《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十章

作者 巴克禮普世版小組 2016.07.17

1 Kì-jiân lu̍t-huat ū teh-beh lâi ê hó tāi-tsì ê iáⁿ, m̄-sī hó tāi-tsì ê tsin siōng, só͘-í bē-tàng ta̍k nî īng kāng-khuán ê tsè-mi̍h lâi hō͘ tshin-kīn Siōng-Tsú ê lâng tit-tio̍h uân-tsuân. 2 Kìng-pài Siōng-Tsú ê lâng nā ē-tàng tsi̍t-pái tsiū sé-tshing i ê tsuē, liông-sim bô koh ū tsuē ê ì-sik, it-tshè m̄-bián koh-tsài hiàn-tsè. 3 Kî-si̍t ta̍k-nî só͘ hiàn ê tsè-mi̍h ē hō͘ lâng koh siūⁿ-khí in ê tsuē. 4 In-uī gû kah iûⁿ ê hueh bē-tàng tû-khì lâng ê tsuē. 5 Só͘-í Iâ-so͘ lâi-kàu sè-kan ê sî ū tuì Siōng-Tsú kóng: Tsè-sū kah lé-mi̍h Lí bô ài, m̄-koh Lí ū kā guá tsún-pī sing-khu. 6 Sio-tsè kah sio̍k-tsuē-tsè, Lí bô kah-ì. 7 Hit sî, Guá kóng: Siōng-Tsú ah, Lí khuàⁿ, Guá lâi sī beh tsiàu Lí ê tsí-ì lâi si̍t-hiān. Kuan-hē Guá ê tāi-tsì ū kì-tsài tī tsheh-ni̍h.( tsù: SPh 40:6-8) 8 Guá tíng-bīn ū kóng, Tsè-sū kah lé-mi̍h, sio-tsè kah sio̍k-tsuē-tsè, Lí lóng bô ài, mā bô kah-ì. Sui-jiân tsiah-ê lóng sī tsiàu lu̍t-huat lâi hiàn ê, I iáu-koh án-ne kóng." 9 Iâ-so͘ āu-lâi koh kóng, "Lí khuàⁿ, Guá lâi sī beh tsiàu Lí ê tsí-ì lâi si̍t-hiān." Án-ne Siōng-Tsú sī beh huì-tû í-tsîng ê hiàn-tsè, beh īng Ki-tok ê hi-sing lâi tāi-thè. 10 Iâ-so͘ Ki-tok tsun-hîng Siōng-Tsú ê tsí-ì, tsí-iàu tsi̍t pái hiàn ka-kī ê sing-khu tsiū kàu-gia̍h hō͘ lán tit-tio̍h sìng-huà lâi kui-hiòng Siōng-Tsú. 11 Iû-thài-lâng ê tsè-si ta̍k-ji̍t khiā-teh lâi ho̍k-sāi Siōng-Tsú, tsi̍t-pái koh tsi̍t-pái hiàn siâng-khuán ê tsè, mā íng-uán bē-tàng tû-khì jîn-luī ê tsuē. 12 M̄-koh Ki-tok hiàn tsi̍t-pái tsiū íng-uán ū-hāu ê tsè, jiân-āu tsē tī Siōng-Tsú ê tsiàⁿ-pîng, 13 Tī hia thìng-hāu Siōng-Tsú hō͘ I ê tuì-ti̍k tsò I ê kha-ta̍h. 14 Thong-kuè Iâ-so͘ tsi̍t-pái ê hiàn-tsè, hō͘ sìng-huà kui-sio̍k Tsú ê lâng íng-uán uân-tsuân. 15 Sìng-Sîn mā í-king kā lán tsò-tsìng. I tāi-sing án-ne kóng, 16 " Tsú kóng, Tsiah-ê ji̍t liáu-āu, Guá kah in só͘ beh li̍p ê bîng-iok sī án-ne: Guá beh tsiong Guá ê lu̍t-huat khǹg tī in ê sim, Khik tī in ê thâu-náu. 17 I kè-sio̍k kóng, "Guá tsua̍t-tuì bô koh kì-tit in ê tsuē-ok kah put-gī."( tsù: ILB 31:33-34) 18 Kì-jiân tsuē tit-tio̍h sià-bián, tsiū bián koh hiàn sio̍k-tsuē-tsè.

Lán Lâi Tshin-kīn Siōng-Tsú
19 Só͘-í hiaⁿ-tī tsí-muē ah, lán uá-khò Iâ-so͘ ê lâu-hueh sí-bông tsiū ē-tàng hó-táⁿ tsìn-ji̍p Tsì-sìng-só͘. 20 Iâ-so͘ thong-kuè tiùⁿ-lî, tsiū-sī I ka-kī ê sing-khu, uī lán khui tsi̍t-tiâu sin ê ua̍h-lō͘. 21 Lán í-king ū tsi̍t-uī Tsè-si-tiúⁿ teh tī-lí Siōng-Tsú ê ke. 22 Án-ne lán ê sim í-king siū kiat-tsīng, lóng bô liông-sim ê tsik-pī, sing-khu mā īng tsuí sé tshing-khì, tio̍h īng sîng-si̍t kah kian-tīng ê sìn-gióng lâi tshin-kīn Siōng-Tsú. 23 Lán tio̍h kian-tshî kong-khai sîng-jīn ê ǹg-bāng, in-uī Siōng-Tsú ê ìng-ín sī sìn-si̍t khó-khò-.ê. 24 Lán tio̍h hō͘-siōng kuan-huâi lâi kik-lē thiàⁿ-sim kah tsò hó-sū. 25 M̄-thang o̍h tsi̍t-kuá lâng thîng-tsí tsū-huē, tio̍h hō͘-siōng khuàn-bián. Kì-jiân í-king tsai Tsú tsài-lîm ê ji̍t teh-beh kàu, koh-khah tio̍h án-ne tsò. 26 Lán kì-jiân í-king tsin-tsiàⁿ bat tsin-lí, nā kò͘-ì huān-tsuē, tsiū bô koh ū thang sio̍k-tsuē ê tsè-mi̍h. 27 Tsí-ū īng kiaⁿ-hiâⁿ ê sim lâi thìng-hāu sím-phuàⁿ í-ki̍p teh-beh thun-bia̍t kah Siōng-Tsú tsò tuì-ti̍k ê lâng ê jia̍t hué. 28 Uî-puē Mô͘-se lu̍t-huat ê lâng, nā ū nn̄g-saⁿ-ê lâng tsò-tsìng, tsiū thang kā i tshù sí-hîng, bián kā i liân-bín. 29 Nā án-ne kóng khí-lâi, hiah-ê thún-ta̍h Siōng-Tsú ê Kiáⁿ, biáu-sī hō͘ in pún-sin sìng-huà kui Tsú bîng-iok ê hueh, koh bú-jio̍k si-un ê Sìng-Sîn ê lâng, lín siūⁿ ing-kai siū ê hîng-hua̍t tio̍h ke juā tāng? 30 Lán tsai lâng teh kóng, "Sin-uan tsāi guá, guá beh pò-ìng."( tsù: SBK 32:35) Koh kóng, "Tsú beh sím-phuàⁿ I e tsú-bîn."( tsù: SBK 32:36; SPh 135:14) hit-uī sī siáⁿ-lâng? 31 Hām-lo̍h íng-uán ua̍h-miā Siōng-Tsú ê tshiú si̍t-tsāi tsin thang kiaⁿ! 32 Lín tio̍h ē-kì-tit kuè-khì ê ji̍t-tsí, lín tit-tio̍h kng-tsiò liáu-āu ū jím-siū kau-tsiàn ê thòng-khó͘, 33 ū-sî hō͘ lâng kong-khai bú-jio̍k kah hì-lāng, á-sī kah pa̍t-lâng tâng-siū khó͘-lān. 34 Lín ū thé-thiap siū kuaiⁿ-kaⁿ ê lâng, lín mā jím-siū lâng tshiúⁿ-kiap lín ê sán-gia̍p, in-uī lín tsai ka-kī ū koh-khah hó koh kú-tn̂g ê sán-gia̍p. 35 Só͘-í m̄-thang sit-khì lín ê ióng-khì, in-uī tsit-ê ióng-khì ē hō͘ lín tuā pò-siúⁿ. 36 Lín iàu-kín tio̍h ū nāi-sim tsiah ē-tàng si̍t-hiān Siōng-Tsú ê tsí-ì, thang niá-siū I só͘ ìng-ín ê hok-khì. 37 In-uī Sìng-king kóng, "Koh tsi̍t-sî-á kú, Hit-ê teh-beh lâi-ê ē kàu, bē iân-tshiân. 38 Guá ê tsú-bîn ē thong-kuè sìn-sim lâi tit-tio̍h ua̍h-miā, m̄-koh i nā kiâⁿ huan-thâu, Guá ē bô kah-ì i."( tsù: HPK 2:3-4) 39 Lán m̄-sī kiaⁿ-tio̍h tsiah kiâⁿ huan-thâu suah tîm-lûn. Lán sī ū sìn-sim lâi tit-kiù ê lâng.