《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十一章

作者 巴克禮普世版小組 2016.07.24

Lūn Sìn-sim
1 Sìn-sim sī tuì só͘ ǹg-bāng ê tāi-tsì ū pá-ak, tuì só͘ khuàⁿ bē-tio̍h ê tāi-tsì ū khak-sìn. 2 Kó͘-tsá-lâng in-uī ū tsit-ê sìn-sim tsiah tit-tio̍h Siōng-Tsú ê tsiap-la̍p. 3 Lán ū tsit-ê sìn-sim tsiah liáu-kái ú-tiū sī tuì Siōng-Tsú ê uē tshòng-tsō ê, án-nikong2 khí-lâi, lán só͘ khuàⁿ ē-tio̍h ê sī tuì khuàⁿ bē-tio̍h-.ê lâi tsō-tsiâⁿ. 4 A-pik in-uī ū sìn-sim tsiah hōng-hiàn pí Kai-ún khah hó ê tsè-mi̍h hō͘ Siōng-Tsú, i tsiū-án-ne tit-tio̍h Siōng-Tsú ê tsiap-la̍p, koh jīn-tīng i tsò gī-lâng, i sui-jiân í-king kuè-sin, iáu teh kóng-uē. 5 Í-lo̍k in-uī ū sìn-sim tsiah bô sí-khì, i siū thê-sing khì-kàu Siōng-Tsú hia, só͘-í bô-lâng tshuē ē-tio̍h i.( tsù: CSK 5:24) I siū tshian-suá tsìn-tsîng to̍h hō͘ Siōng-Tsú huaⁿ-hí tsiap-la̍p. 6 Lâng nā bô sìn-sim tsiū bē-tàng hō͘ Siōng-Tsú huaⁿ-hí tsiap-la̍p. Beh tshin-kīn Siōng-Tsú ê lâng it-tīng tio̍h siong-sìn Siōng-Tsú ê tsûn-tsāi, koh siong-sìn I ē pò-siúⁿ hiah-ê tshuē-kiû I ê lâng. 7 Ná-a in-uī ū sìn-sim, tuì iáu-buē khuàⁿ-tio̍h ê tāi-tsì í-king thiaⁿ-tio̍h Siōng-Tsú ê bi̍k-sī, tsûn kìng-uì ê sim tsún-pī tsi̍t-tâi tuā-tsûn thang kiù i ê tsuân-ke. I tsiū án-ne lâi tīng sè-kan-lâng ê tsuē, jî-tshiáⁿ tuì Siōng-Tsú niá-siū in-uī tsit-ê sìn-sim lâi kiò-tsò gī ê lâng. 8 A-pik-la̍h-hán siū tiàu khì sîng-tsiap tsò i sán-gia̍p ê tē ê sî, sui-jiân m̄-tsai beh khì tó-uī, in-uī ū sìn-sim tsiū sūn-tsiông bīng-līng tshut-khì. 9 I uá-khò sìn-sim tuà tī ìng-ín ê tē, ná tshin-tshiūⁿ tuà tī guā-kok, kah sîng-tsiap kāng-khuán ìng-ín ê Í-sat, Ngá-kok tsò-hué tuà tī pò͘-pêⁿ. 10 In-uī A-pik-la̍h-hán teh kî-thāi Siōng-Tsú só͘ siat-kè lâi khí-tsō hit-ê ū tē-ki ê siâⁿ. 11 A-pik-la̍h-hán sui-jiân nî-lāu, Sat-la̍h mā tshiau-kuè sing-sán ê nî-huè, iáu-koh ē-tàng tsò lāu-pē, in-uī i khak-sìn Siōng-Tsú ē siú I ê ìng-ín. 12 Si̍t-tsè-siōng, A-pik-la̍h-hán ná tsi̍t-ê teh-beh sí ê lâng, ū sⁿ-thuàⁿ kiáⁿ-sun tshin-tshiūⁿ thiⁿ-tíng ê tsheⁿ hiah-ni̍h tsuē, tshin-tshiūⁿ hái-piⁿ ê sua sǹg bē-liáu. 13 Tsiah-ê lâng kàu sí uî-tsí lóng ū sìn-sim, sui-jiân bô tit-tio̍h só͘ ìng-ín ê, m̄-koh tuì hn̄g-hn̄g teh khuàⁿ, huaⁿ-hí lâi tán-thāi gîng-tsiap tsiah-ê tāi-tsì, koh sîng-jīn ka-kī tī tē-tsiūⁿ tsí-put-kò sī lâi tsò lâng-kheh ê tshut-guā-lâng. 14 Án-ne kóng ê lâng piáu-bîng in teh tshuē tsi̍t-ê ka-hiong. 15 In pīng bô teh siàu-liām lī-khui hn̄g-hn̄g ê ka-hiong, nā ū tsá to̍h ū thang tńg-khì ê ki-huē. 16 M̄-koh in him-bō͘ hit-ê thiⁿ-tíng koh-khah hó ê só͘-tsāi, só͘-í Siōng-Tsú bô in-uī in tshing I tsò Siōng-Tsú lâi kám-kak kiàn-siàu, in-uī I í-king uī in tsún-pī tsi̍t-ê siâⁿ thang khāi-khí. 17 A-pik-la̍h-hán siū Siōng-Tsú khó-giām ê sî in-uī ū sìn-sim tsiah tsiong i ê kiáⁿ Í-sat tsò tsè-mi̍h. Tsiū-sī kóng sîng-siū ìng-ín ê A-pik-la̍h-hán iáu-koh guān-ì tsiong i ê to̍k-kiáⁿ tsò tsè-mi̍h hiàn hō͘ Siōng-Tsú. 18 Siōng-Tsú bat tuì i kóng, "Tuì Í-sat seⁿ ê tsiah thang sǹg-tsò lí ê kiáⁿ-sun."( tsù: CSK 21:12) 19 A-pik-la̍h-hán siūⁿ-kóng Siōng-Tsú ē-tàng hō͘ Í-sat tuì sí-lâng tiong koh-ua̍h, só͘-í thang phì-jū kóng Í-sat sī sí-liáu koh tò tńg-lâi. 20 Í-sat in-uī ū sìn-sim tsiah uī-tio̍h tsiong-lâi ê tāi-tsì tuì Ngá-kok kah Í-sò tsiok-hok. 21 Ngá-kok in-uī ū sìn-sim, beh-sí ê sî tsiah kā Iok-sik nn̄g-ê kiáⁿ tsiok-hok. I huāⁿ-tuà kuái-á-thâu kìng-pài Siōng-Tsú.( tsù: CSK 47:31 LXX) 22 Iok-sik in-uī ū sìn-sim, beh sí ê sî tsiah kóng-khí Í-sik-lia̍t-lâng tshut Ai-ki̍p ê tāi-tsì, koh ū huan-hù tshù-lí i ê kut-hâi ê tāi-tsì. 23 Mô͘-se tshut-sì ê sî, i ê pē-bú in-uī ū sìn-sim, khuàⁿ-tio̍h kiáⁿ tshing-siù, kiaⁿ ông ê bīng-līng to̍h kā eⁿ-á ún-tsông saⁿ gue̍h-ji̍t kú. 24 Mô͘-se tióng-tuā liáu-āu, in-uī ū sìn-sim tsiah kī-tsua̍t lâng kā i kiò-tsò Ai-ki̍p kong-tsú ê kiáⁿ, 25 khah ài kah Siōng-Tsú ê tsú-bîn tsò-hué siū khó͘-lān, bô ài tī tsuē-ok-tiong hióng-siū tsiām-sî ê khuài-lo̍k. 26 I khuàⁿ uī-tio̍h Ki-tok siū lîng-jio̍k pí Ai-ki̍p ê tsâi-pó khah kuì-khì, in-uī i gióng-bōng tsiong-lâi ê pò-siúⁿ. 27 Mô͘-se in-uī ū sìn-sim tsiah bô kiaⁿ ông ê siū-khì lī-khui Ai-ki̍p, i ná tshin-tshiūⁿ ū khuàⁿ-tio̍h lâng só͘ khuàⁿ bē-tio̍h ê Siōng-Tsú, kian-tshî kàu-té, m̄-khíng tò tńg-khì. 28 I ū sìn-sim tsiah lâi siat-li̍p Puâⁿ-kuè-tseh, huan-hù ke-ke hō͘-hō͘ tio̍h hiù hueh tuà mn̂g-ni̍h, bián-tit hō͘ tsâu-bia̍t-tsiá thâi-sí Í-sik-lia̍t-lâng ê tuā-kiáⁿ. 29 Í-sik-lia̍t-lâng ū sìn-sim tsiah ē-tàng kuè Âng-hái ná tshin-tshiūⁿ teh kiâⁿ ta-tē. Ai-ki̍p-lâng mā siūⁿ-beh kiâⁿ-kuè suah hō͘ tsuí im-sí. 30 Í-sik-lia̍t-lâng se̍h Iâ-lī-ko-siâⁿ tshit ji̍t kú, in-uī ū sìn-sim, siâⁿ-tshiûⁿ tsiū tó lo̍h-khì. 31 Ki-lí Lat-ha̍p in-uī ū sìn-sim tsiah hó khuán-thāi bi̍t-thàm, só͘-í bô kah hiah-ê bô sūn-ho̍k Siōng-Tsú ê lâng tsò-hué bia̍t-bông. 32 Guá kám tio̍h koh kóng? Guá bô sî-kan thang thê-khí Ki-tiân, Pa-la̍k, Tsham-sun, Iâ-hut-tha, Tāi-pi̍t, Sat-bó-ní kah tsìng sian-ti ê tāi-tsì. 33 Tsiah-ê lâng khò sìn-sim thâi-iâⁿ lia̍t-kok. In tsò kong-gī ê tāi-tsì lâi niá-siū Siōng-Tsú ê ìng-ín. In kā sai ê tshuì hong-ba̍t, 34 phah-hua lia̍t-hué, siám-phiah lāi-to ê sat-hāi, jio̍k-sè tsiâⁿ-tsò kiông-sè, tī tsiàn-tiûⁿ ióng-bíng, kong-phuà guā-kok ê kun-tuī. 35 Ū-kuá hū-jîn-lâng uá-khò sìn-sim tsiap in hiah-ê tuì sí koh-ua̍h ê tshin-lâng, mā ū-kuá lâng uī-tio̍h khah hó ê koh-ua̍h suah m̄ guān siū sio̍k-huê, kam-guān siū khok-hîng lâi sí. 36 Koh ū-kuá lâng siū hì-lāng, piⁿ-phah, mā ū-lâng siū khún-pa̍k kuaiⁿ-kaⁿ. 37 Koh ū-lâng hō͘ lâng īng tsio̍h-thâu tìm, īng kì-á kì, īng to thâi-sí. In tshīng mî-iûⁿ á-sī suaⁿ-iûⁿ ê phuê, sì-kè phun-pho, jím-siū sàn-tshiah, huān-lān kah gi̍k-thāi. 38 Tsiah-ê lâng khuàⁿ-phuà sè-kan, tī khòng-iá, suaⁿ-niá, tsio̍h-tōng á-sī tē-hia̍t sì-kè liû-lōng. 39 Tsiah-ê lâng uá-khò in ê sìn-sim ū tit-tio̍h Siōng-Tsú ê jīn-tīng, m̄-koh bô niá-siū Siōng-Tsú só͘ ìng-ín-.ê. 40 In-uī Siōng-Tsú kā lán an-pâi koh-khah hó ê kè-uē. Siōng-Tsú ê tsí-ì tsiū-sī tsiah-ê lâng tio̍h kah lán tsò-hué tsiah ē-tàng uân-tsuân si̍t-hiān.