《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第21章

作者 巴克禮普世版小組 2011.08.21

1, In kiâⁿ kūn Iâ-lō͘-sat-líng, kàu Pik-huat-kî kap Kaⁿ-ná suaⁿ ê sî, Iâ-so͘ tshe nn̄g ê bûn-tô͘, kā in kóng,
2, Lín khì tuì-bīn ê hiuⁿ-siā, liâm-piⁿ ē tú-tio̍h tsi̍t tsiah lû pa̍k-teh, ū lû-á kap i tī-teh; tháu-khui, khan i lâi guá tsia.
3, Nā ū lâng kā lín kóng sím-mi̍h, tsiū tio̍h kóng, Tsú khiàm-īng i, i liâm-piⁿ bueh sàng i lâi.
4, Tsit-ê sū tsiâⁿ, sī bueh ìng-giām tsá thok sian-ti só͘ kóng ê, kóng,
5, Tio̍h kā Sûn ê tsa-bó͘-kiáⁿ kóng, Lí ê ông lâi tsiū-kūn lí, Un-jiû koh khiâ lû, Kap lû só͘ seⁿ ê lû-á.
6, Bûn-tô͘ khì, tsiàu Iâ-so͘ só͘ huan-hù in ê khì kiâⁿ.
7, Khan lû kap lû-á lâi, tsiong ka-kī ê saⁿ tshu tī in tíng-bīn, Iâ-so͘ tsiū tsiūⁿ-khì khiâ.
8, Tsìng lâng tiong khah tsuē tsiong ka-kī ê saⁿ pho͘ tī lō͘-ni̍h; ū-ê tshò tshiū-ki pho͘ tī lō͘-ni̍h.
9, Tsîng kiâⁿ āu tè ê tsìng lâng huah kóng, Tāi-pi̍t ê kiáⁿ-sun, Hô-sàn-ná, tī Tsú ê miâ lâi ê tit-tio̍h o-ló, tī tsì-kuân ê, Hô-sàn-ná.
10, I ji̍p Iâ-lō͘-sat-líng, tsuân siâⁿ iô-tsuah, kóng, Tsit-ê siáⁿ-lâng?
11, Tsìng lâng kóng, Tsit-ê sī sian-ti Iâ-so͘, tuì Ka-lī-lī-síng ê Ná-sat-li̍k lâi ê.
12, Iâ-so͘ ji̍p Siōng-tsú ê tiān, kuáⁿ-tshut tiān-lāi it-tshè bué-buē ê lâng, tshia-tó uāⁿ tsîⁿ ê lâng ê toh, kap bē hún-tsiáu ê lâng ê í.
13, Kā in kóng, Ū kì-tsài kóng, Guá ê tshù bueh tshing tsò kî-tó ê tshù, tān-sī lín tsiah-ê hō͘ i tsò tsha̍t-siū.
14, Tshiⁿ-mî ê, pái-kha ê, tī tiān-ni̍h tsiū-kūn Iâ-so͘, I tsiū i-hó in.
15, Tsí-ū tsiah-ê tsè-si-thâu kap king-ha̍k-kàu-su khuàⁿ-tio̍h I só͘ kiâⁿ ê kî-sū, koh khuàⁿ-tio̍h gín-ná tī tiān-ni̍h huah kóng, Tāi-pi̍t ê kiáⁿ-sun, Hô-sàn-ná, tsiū siū-khì; kā I kóng, In teh kóng ê, lí thiaⁿ-tio̍h bô?
16, Iâ-so͘ kā in kóng, Ū; lín kiám m̄ bat tha̍k-tio̍h hit kù, kóng, Tuì gín-ná kap tsia̍h lin ê ê tshuì, lí hō͘ o-ló ê ē tsiâu-pī mah?
17, Tsiū lī-khui in, tshut siâⁿ kàu Pik-tāi-nî; tī hia hioh mî.
18, Keh tsá-khí, tò-lâi siâⁿ-ni̍h ê sî, Iâ-so͘ iau;
19, khuàⁿ-tio̍h lō͘-piⁿ tsi̍t tsâng bû-hua-kó tshiū, tsiū uá-kūn khì, bán lóng bô, tsí-ū hio̍h nā-tiāⁿ; tsiū kā tshiū kóng, Taⁿ liáu-āu, lí íng-íng bô koh kiat kué-tsí; hit tsâng bû-hua-kó tshiū liâm-piⁿ ko͘-tâ.
20, Bûn-tô͘ khuàⁿ-liáu tsiū kî-kuài, kóng, Bû-hua-kó tshiū tsáiⁿ-iūⁿ liâm-piⁿ ko͘-tâ?
21, Iâ-so͘ ìn kóng, Guá si̍t-tsāi kā lín kóng, Lín nā ū sìn bô giâu-gî, m̄-nā tsit tsióng kiâⁿ tī bû-hua-kó tshiū ê sū lín ē kiâⁿ; tsiū nā tuì tsit-ê suaⁿ kóng, Tio̍h suá-khì hiat-lo̍h hái, iā bueh tsiâⁿ.
22, Koh kî-tó ê sî, kìⁿ-nā lín só͘ kiû ê, sìn tsiū tit-tio̍h.
23, Iâ-so͘ ji̍p tiān, kà-sī lâng ê sî, tsiah-ê tsè-si-thâu, kap jîn-bîn ê tiúⁿ-ló, tsiū-kūn I kóng, Lí īng sím-mi̍h kuân kiâⁿ tsiah-ê sū? koh siáⁿ-lâng hō͘ lí tsit-ê kuân?
24, Iâ-so͘ ìn kóng, Guá iā ū tsi̍t kù ē bueh mn̄g lín, lín nā kā guá kóng, guá tsiah bueh kā lín kóng guá īng sím-mi̍h kuân kiâⁿ tsiah-ê sū.
25, Iok-hān ê sé-lé sī tuì tó-uī lâi? sī tuì thiⁿ, á-sī tuì lâng? In su-khia gī-lūn kóng, Nā kóng, Tuì thiⁿ, I bueh kā lán kóng, Án-ne lín siáⁿ-sū m̄ sìn i?
26, Nā kóng, Tuì lâng, lán iū kiaⁿ jîn-bîn; in lóng lia̍h Iok-hān tsò sian-ti.
27, Tsiū ìn Iâ-so͘ kóng, Guán m̄ tsai. I tsiū kā in kóng, Guá iā bô bueh kā lín kóng guá sī īng sím-mi̍h kuân kiâⁿ tsiah-ê sū. Tān-sī lín phah-sǹg tsáiⁿ-iūⁿ?
28, Lâng ū nn̄g ê kiáⁿ, tsiū-kūn hit ê thâu-tsi̍t-ê kóng, Kiáⁿ ah, kin-á-ji̍t khì phû-tô-hn̂g tsò kang.
29, Ìn kóng, Guá m̄; āu-lâi hué-kái tsiū khì.
30, Koh tsiū-kūn tē-jī-ê, iā án-ne kóng. Ìn kóng, Tsú ah, guá beh; tsiū kìng-jiân bô khì.
31, Tsí nn̄g ê tó-uī tsi̍t ê kiâⁿ lāu-pē ê ì-sù ah? In kóng, Thâu-tsi̍t-ê. Iâ-so͘ kā in kóng, Guá si̍t-tsāi kā lín kóng tsiah-ê thiu-suè ê kap tshiong-ki tāi-sing lín ji̍p Siōng-tsú ê kok.
32, In-uī Iok-hān tī gī ê lō͘ tsiū-kūn lín, lín bô sìn i; thiu-suè ê kap tshiong-ki tsiū sìn i; koh lín khuàⁿ-liáu, iā bô hué-kái khì sìn i.
33, Koh thiaⁿ tsi̍t ê phì-jū: Ū tsi̍t ê ke-tsú, tsai tsi̍t hn̂g phû-tô, īng lî-pa uî i, lāi-bīn khui tsiú-khut, khí tsi̍t ê tsiú-kiⁿ lâu, tso͘ hō͘ tiān-hō͘, tsiū khì pa̍t só͘-tsāi.
34, Siu kué-tsí ê sî bueh kàu, tsiū tshe i ê lô͘-po̍k tsiū-kūn tiān-hō͘, siu i ê kué-tsí.
35, Tiān-hō͘ lia̍h i ê lô͘-po̍k, tsi̍t-ê phah, tsi̍t-ê thâi, tsi̍t-ê īng tsio̍h-thâu tìm.
36, Koh tshe pa̍t ê lô͘-po̍k, pí tsîng khah tsuē; in iû-guân án-ne khuán-thāi in.
37, Āu-lâi tshe i ê kiáⁿ tsiū-kūn in, siūⁿ kóng, In bueh tsun-kìng guá ê kiáⁿ.
38, Tān-sī tiān-hō͘ khuàⁿ-tio̍h hit ê kiáⁿ, tsiū saⁿ-kap kóng, Tsit-ê sī i ê hō͘-sû; lâi, kā i thâi-sí, thang tit i ê gia̍p.
39, Tsiū lia̍h i, tshia i tshut hn̂g-guā, hāi-sí i.
40, Taⁿ hn̂g-tsú nā kàu, bueh tsáiⁿ-iūⁿ lâi pān tsiah-ê tiān-hō͘?
41, In kā I kóng, I bueh īng ok-pò lâi bia̍t tsiah-ê ok-lâng; tsiong phû-tô-hn̂g tso͘ pa̍t ê tiān-hō͘, tsiū-sī tsiàu-sî la̍p kué-tsí ê.
42, Iâ-so͘ tuì in kóng, King-ni̍h só͘ kì-tsài, Sai-hū só͘ khì-sak ê tsio̍h, Tsiâⁿ-tsò tshù-kak-thâu ê tsio̍h; Tse sī Tsú só͘ tsiâⁿ ê, Lán ê ba̍k-tsiu khuàⁿ tsò kî-kuài,lín kiám bē tha̍k mah?
43, Só͘-í guá kā lín kóng, Siōng-tsú ê kok bueh tuì lín tshiúⁿ-khì, lâi siúⁿ-sù kiat i ê kué-tsí ê jîn-bîn.
44, Koh pua̍h-tó tī tsit tè tsio̍h tíng ê teh-bueh phuà kô͘-kô͘; hō͘ tsit tè tsio̍h teh tī i tíng-bīn ê bueh iù bua̍h-bua̍h.
45, Tsiah-ê tsè-si-thâu kap Huat-lī-sài-phài ê lâng thiaⁿ-tio̍h I ê phì-jū, tsai I só͘ kóng ê sī tsí in.
46, Tsiū ài bueh lia̍h I, tān-sī kiaⁿ tsìng lâng; in-uī tsìng lâng lia̍h I tsò sian-ti.