《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第四章

作者 巴克禮普世版小組 2016.09.04

M̄-thang Tsò Sè-kan ê Pîng-iú
1 Lín tiong-kan ê tò͘-tsing kah uan-ke sī tuì tó-uī lâi? Kám m̄-sī tuì lín put-sî teh tò͘-tsing kah uan-ke ê io̍k-bōng lâi? 2 Lín siàu-siūⁿ ê mi̍h-kiāⁿ tit bē-tio̍h tsiū beh thâi-sí lâng. Lín tham-tsâi tit bē-tio̍h tsiū tò͘-tsing uan-ke. Kî-si̍t lín tit bē-tio̍h só͘ ài ê mi̍h-kiāⁿ sī in-uī lín bô tuì Siōng-Tsú kiû. 3 lín sui-jiân ū kiû m̄-koh tit bē-tio̍h, in-uī lín kiû ê tōng-ki bô hó, kan-taⁿ kiû buán-tsiok ka-kī ê hióng-lo̍k. 4 Lín tsiah-ê îm-luān ê lâng ah, lín kám m̄-tsai kah sè-kan tsò pîng-iú tsiū-sī kah Siōng-Tsú tsò tuì-ti̍k? Só͘-í ài-beh tsò sè-kan ê pîng-iú ê lâng tsiū-sī Siōng-Tsú ê ti̍k-jîn. 5 Sìng-king kóng, "Siōng-Tsú ài I siúⁿ-sù lán ê Sìng-Sîn ài kah khí tsi̍t-tò͘." Lín kám siūⁿ-kóng Sìng-king tsit-kù uē bô ì-sù? 6 M̄-koh Siōng-Tsú siúⁿ-sù lán ê un-tián koh-khah tuā, in-uī Sìng-king ū kì-tsài: Siōng-Tsú kah kiau-ngō͘ ê lâng tuì-ti̍k, siúⁿ-sù un-tián hō͘ khiam-pi ê lâng.( tsù: TsG 3:34) 7 Só͘-í lín tio̍h sūn-ho̍k Siōng-Tsú, huán-khòng Mô͘-kuí, Mô͘-kuí tsiū siám-phiah lín. 8 Lâi tshin-kīn Siōng-Tsú, Siōng-Tsú tsiū ē tshin-kīn lín. Tsuē-jîn ah, lín tio̍h sé lín ê tshiú. Sam-sim lióng-ì ê lâng ah, tio̍h kiat-tsīng lín ê sim. 9 Tio̍h pi-siong, thî-khàu lâu ba̍k-sái, tsiong lín ê tshiò-bīn piàn-tsò ai-siong, huaⁿ-hí piàn-tsò iu-tshiû. 10 Tio̍h tī Tsú ê bīn-tsîng khiam-pi, I tsiū ē kā lín ko-sing.

M̄-thang Phue-phîng Hiaⁿ-tī Tsí-muē
11 Hiaⁿ-tī tsí-muē, lín m̄-thang hō͘-siōng kóng pháiⁿ-uē. Kóng hiaⁿ-tī tsí-muē ê pháiⁿ-uē, á-sī phue-phîng hiaⁿ-tī tsí-muē ê lâng tsiū-sī kóng lu̍t-huat ê pháiⁿ-uē, phue-phîng lu̍t-huat. Lí nā phue-phîng lu̍t-huat tsiū m̄-sī siú lu̍t-huat ê lâng, sī teh phue-phîng lu̍t-huat. 12 Lu̍t-huat ê tsè-tīng-tsiá kah sím-phuàⁿ-tsiá tsí ū tsi̍t-uī, I ē tsín-kiù mā ē huí-bia̍t. Lí sī siáⁿ-lâng ná káⁿ phue-phîng lí ê tshù-piⁿ?

M̄-thang Khua-kháu
13 Ū-lâng án-ne kóng, "Kin-á-ji̍t á-sī bîn-á-tsài, guán beh khì bó͘ tsi̍t-ê siâⁿ, tī hia tuà tsi̍t-nî kú, tsò sing-lí thàn tsîⁿ." Taⁿ lín thiaⁿ guá kóng, 14 lín liân bîn-á-tsài sèⁿ-miā ē piàn án-tsuáⁿ to m̄-tsai. Lín kah-ná hûn-bū tshut-hiān tsi̍t-sî-á kú, liâm-piⁿ tsiū siau-sit khì. 15 Lín ing-kai tio̍h án-ne kóng, "Tsú nā guān-ì, guán tsiū ē ua̍h, mā ē-tàng tsò tsit hāng tsò hit hāng." 16 Lín tsit-má teh phòng-hong khua-kháu. Tsit-tsióng ê khua-kháu lóng sī siâ-ok. 17 Só͘-í lâng tsai-iáⁿ tio̍h tsò hó-sū. M̄ khì tsò tsiū-sī huān-tsuē.