《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第五章

作者 巴克禮普世版小組 2016.09.11

Kíng-kò Hó-gia̍h-lâng
1 Taⁿ lín tsiah-ê hó-gia̍h-lâng tio̍h tsù-ì thiaⁿ, lín ê tsai-lān teh-beh kàu à, lín tio̍h pi-siong thî-khàu! 2 Lín ê tsîⁿ-tsâi í-king pāi-huāi, lín ê saⁿ-khò͘ hō͘ tsiù-thâng tsiù phuà-khì. 3 Lín ê kim-gîn seⁿ sian, hiah-ê sian ē tsò kong-kik lín ê tsìng-kì, beh tshin-tshiūⁿ hué-sio bia̍t lín ê sing-khu. Lín tī tsit-ê bua̍t-sè kan-taⁿ tsai-iáⁿ tsik-tsū tsâi-pó. 4 Lín khik-khui hiah-ê tī lín ê tshân-hn̂g teh siu-kuah ê lâng, bô hō͘ in kang-tsîⁿ. In tshut-siaⁿ teh kā lín khòng-kò! Bān-kun ê Tsú í-king ū thiaⁿ-tio̍h tsiah-ê ai-uàn ê siaⁿ. 5 Lín tī tē-tsiūⁿ hióng-siū tshia-hua iàn-lo̍k, kā ka-kī tshī kah puî-tsut-tsut teh tán tô͘-tsáiⁿ ê ji̍t-tsí. 6 Lín kā hiah-ê gī-lâng tīng-tsuē, koh kā in thâi-sí, in mā bô kā lín tí-khòng.

Jím-nāi Kah Kî-tó
7 Hiaⁿ-tī tsí-muē ah, só͘-í lín tio̍h kè-sio̍k jím-nāi kàu Tsú ê tsài-lîm. Lín khuàⁿ, tsoh-sit-lâng án-tsuáⁿ thìng-hāu tshân-ni̍h pó-puè ê siu-sîng, i nāi-sim thìng-hāu tshiu-lîm tshun-ú. 8 Lín mā tio̍h kè-sio̍k jím-nāi, kian-kò͘ lín ê sìn-sim, in-uī Tsú tsài-lîm ê ji̍t-tsí teh-beh kàu à. 9 Hiaⁿ-tī tsí-muē ah, m̄-thang hō͘-siōng uàn-tò͘, tsiah bián siū Siōng-Tsú sím-phuàⁿ. Lín khuàⁿ, sím-phuàⁿ-tsiá í-king khiā tī mn̂g-kháu à. 10 Hiaⁿ-tī tsí-muē ah, lín tio̍h īng hiah-ê hōng Tsú ê miâ lâi kóng-uē ê sian-ti tsò jím-siū khó͘-lān ê bô͘-iūⁿ. 11 Lán kā hiah-ê jím-nāi kàu-té ê lâng khuàⁿ-tsò ū hok-khì. Lín bat thiaⁿ-kuè Iok-pik ê jím-nāi, mā tsai Tsú kàu-bué án-tsuáⁿ kā i tsiàu-kò͘, in-uī Tsú ū muá-pak ê tsû-pi kah liân-bín. 12 Guá ê hiaⁿ-tī tsí-muē ah, siōng iàu-kín sī: M̄-thang kí thiⁿ, á-sī tē, á-sī sím-mi̍h mi̍h-kiāⁿ lâi tsiù-tsuā. " Sī " to̍h kóng, "Sī ", " M̄-sī " to̍h kóng, "M̄-sī ", án-ne tsiah bián siū Siōng-Tsú sím-phuàⁿ. 13 Lín tiong-kan ū-lâng siū-khó͘ bô? Nā ū, i tio̍h kî-tó. Lín tiong-kan ū-lâng huaⁿ-hí bô? Nā ū, i tio̍h gîm o-ló ê si-kua. 14 Lín tiong-kan ū-lâng phuà-pēⁿ bô? Nā ū, i tio̍h tshiáⁿ kàu-huē ê tiúⁿ-ló lâi thè i kî-tó, hōng Tsú ê miâ kā i buah-iû. 15 Ū sìn-sim ê kî-tó ē kiù phuà-pēⁿ ê lâng. Tsú ē hō͘ i khiā khí-lâi. I nā ū tsuē, mā ē tit-tio̍h sià-bián. 16 Lín tio̍h hō͘-siōng jīn-tsuē, sio-thè kî-tó, thang tit-tio̍h i-hó. Gī-lâng ê kî-tó ū tsin-tuā ê kong-hāu. 17 Í-lī-a kah lán pêⁿ-pêⁿ sī lâng, i pik-tshiat kî-tó khún-kiû Siōng-Tsú m̄-thang lo̍h-hō͘, kó-jiân tē-tsiūⁿ ū saⁿ-nî-puàⁿ kú bô lo̍h-hō͘. 18 I koh kî-tó, kó-jiân lo̍h tuā-hō͘, tē tsiū tshut-sán ngó͘-kok. 19 Tshin-ài ê hiaⁿ-tī tsí-muē, lín tiong-kan nā ū-lâng phian-lī tsin-lí, ū-lâng kā i tshuā tò tńg-lâi. 20 Lín tio̍h tsai, hō͘ tsi̍t-ê sit-bê ê lâng tò tńg-lâi ê lâng, ē kiù i ê lîng-hûn thuat-lī sí-bông, koh hō͘ tsin-tsē tsuē tit-tio̍h sià-bián.