《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第一章

作者 巴克禮普世版小組 2016.09.18

1 Guá, Pí-tik, sī Iâ-so͘ Ki-tok ê sù-tô͘, siá tsit-tiuⁿ phue kià hō͘ sì-suàⁿ pī-lān tī Pún-to͘, Ka-lia̍p-thài, Ka-phàⁿ-to-ka, A-se-a, Pí-tshui-nî khiā-khí ê Siōng-Tsú suán-bîn. 2 Lín siū kíng-suán sī tsiàu Thiⁿ-Pē Siōng-Tsú ī-tīng ê tsí-ì, uá-khò Sìng-Sîn lâi tsiâⁿ-tsò sìng-kiat, thang sūn-ho̍k Iâ-so͘ Ki-tok koh tuì I ê hueh tit-tio̍h kiat-tsīng. Guān Siōng-Tsú ê un-tián kah pîng-an tshiong-muá lín tāi-ke!

Sin Ua̍h-miā ê Ǹg-bāng
3 Guān lán ê Tsú Iâ-so͘ Ki-tok ê Thiⁿ-Pē Siōng-Tsú, tit-tio̍h o-ló! Tsiàu I bû-hān ê tsû-pi thong-kuè Iâ-so͘ Ki-tok tuì sí-lâng tiong koh-ua̍h, hō͘ lán tîng-thâu-seⁿ thang tit-tio̍h sin ua̍h-miā ê ǹg-bāng, 4 lâi sîng-siū hit-ê uī-tio̍h lín pó-tsûn tī thiⁿ-tíng, bē pāi-huāi, bē lah-sap, bē sue-thè ê hok-khì. 5 Tse sī beh hō͘ lín tsiah-ê thong-kuè sìn siū Siōng-Tsú ê tuā-kuân-lîng pó-siú, thang tit-tio̍h tsún-pī tī bua̍t-ji̍t teh-beh si̍t-hiān ê tsín-kiù. 6 Lín tsit-má sui-jiân iáu-teh siū tsióng-tsióng ê tshì-liān, tsiām-sî sim kan-khó͘, lín mā tio̍h uī-tio̍h án-ne lâi huaⁿ-hí. 7 Tse sī beh tsìng-bîng lín ê sìn-sim kham-tit khó-giām, pí hiah-ê king-kuè hué thuàn-liān iû-guân ē pāi-huāi ê kim koh-khah pó-kuì, thang tī Iâ-so͘ Ki-tok tsài-lîm ê sî tit-tio̍h o-ló, îng-kng kah tsun-kuì. 8 Lín sui-jiân m̄-bat khuàⁿ-tio̍h Iâ-so͘ mā teh thiàⁿ I. Tsit-má bô khuàⁿ-kìⁿ I iáu-koh teh sìn I. Lín ū īng giân-gí bô-huat-tō͘ piáu-ta̍t ê hí-lo̍k. 9 In-uī lín tit-tio̍h sìn-gióng ê kiat-kó, tsiū-sī lîng-hûn ê tit-kiù. 10 Kuan-hē tsit-ê tsín-kiù, ī-giân lín ē tit-tio̍h un-tián hiah-ê sian-ti í-king ū gián-kiù koh siông-sè tsa-khó. 11 Tsìng sian-ti ê sim-lāi ū Ki-tok ê Sìng-Sîn tuì in tsí-sī, lâi tsa-khó Ki-tok ê siū-khó͘ kah āu-lâi tit-tio̍h îng-kng ê ī-giân, ē tī sím-mi̍h sî-kî án-tsuáⁿ si̍t-hiān. 12 Siōng-Tsú ū khé-sī hiah-ê sian-ti hō͘ in tsai, in ê sū-hōng m̄-sī uī-tio̍h ka-kī, khiok-sī uī-tio̍h lín. Tsiah-ê sìn-sit tsit-má í-king uá-khò tuì thiⁿ tshe-lâi ê Sìng-Sîn, thong-kuè hok-im ê sù-tsiá thuân hō͘ lín. Tsiah-ê tāi-tsì liân Thiⁿ-sài mā pik-tshiat teh thìng-hāu ài-beh tsai. 13 Sìng-kiat ê Sing-ua̍h Só͘-í lín ê sim tio̍h tsún-pī piān, tio̍h kín-sīn, tsuan-sim ǹg-bāng tī Iâ-so͘ Ki-tok tsài-lîm ê sî só͘ beh siúⁿ-sù lín ê un-tián. 14 Tio̍h tsò sūn-ho̍k ê kiáⁿ-jî, m̄-thang tshin-tshiūⁿ tsá-tsîng lín m̄-bat Siōng-Tsú ê sî hòng-tshiòng su-io̍k. 15 Ho͘-tiàu lín ê sī sìng-kiat ê Siōng-Tsú, lín pún-sin mā tio̍h tī it-tshè ê hîng-uî sìng-kiat. 16 Sìng-king ū kì-tsài: Lín tio̍h sìng-kiat, in-uī Guá sī sìng-kiat.( tsù: LBK 19:2) 17 Lín kî-tó ê sî kiû-kiò bô phian-sim tsiàu ta̍k-lâng ê hîng-uî lâi sím-phuàⁿ ê Hit-uī tsò Thiⁿ-pē, tsiū tio̍h īng kìng-uì ê sim tī lín kià-kha ê sè-kan sing-ua̍h. 18 In-uī lín tsai, lín siū sio̍k-huê thuat-lī tuì tsó͘-sian liû-thuân hō͘ lín bô-lō͘-īng ê thuân-thóng, m̄-sī īng ē-pāi-huāi ê kim-gîn, 19 sī īng Ki-tok ê pó-hueh, tshin-tshiūⁿ bô khuat-tiám koh bô ù-tiám ê iûⁿ-ko ê hueh. 20 Ki-tok tī tshòng-tsō ú-tiū í-tsîng to̍h hō͘ Siōng-Tsú kíng-suán, tī tsit-ê bua̍t-sè tsiah uī-tio̍h lín hián-hiān tshut-lâi. 21 Lín thong-kuè Ki-tok lâi sìn Siōng-Tsú, tsiū-sī hō͘ Ki-tok tuì sí-lâng tiong koh-ua̍h koh hō͘ I îng-kng ê Hit-uī, só͘-í lín ê sìn-sim kah ǹg-bāng lóng tsāi-tī Siōng-Tsú. 22 Lín í-king tuì sūn-ho̍k tsin-lí lâi kiat-tsīng ka-kī,koh kah kî-tha ê sìn-tô͘ ū sûn-tsin ê tshiú-tsiok-tsi-tsîng, tio̍h tuì sim-té jia̍t-tshiat sio-thiàⁿ. 23 Lín í-king tîng-thâu-seⁿ, m̄-sī tuì ē pāi-huāi ê tsíng-tsí, sī tuì bē pāi-huāi ê tsíng-tsí. Tsiū-sī thong-kuè Siōng-Tsú ê tō-lí, sī ua̍h-ua̍h ê, sī íng-uán tsûn-tsāi ê tsin-lí. 24 In-uī Sìng-king kì-tsài: Jio̍k-thé lóng tshin-tshiūⁿ tsháu, I ê îng-kng lóng tshin-tshiūⁿ tsháu ê hue, Tsháu ē ta, hue ē siā. 25 Tsóng-sī Tsú ê tō-lí íng-uán tsûn-tsāi.( tsù: ISA 40:6-8) Tsit-ê sìn-sit tsiū-sī thuân hō͘ lín ê hok-im.