《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第二章

作者 巴克禮普世版小組 2016.09.25

Ua̍h-tsio̍h, Sìng-kiat ê Kok-bîn
1 Só͘-í lín tio̍h tû-khì só͘-ū ê ok-to̍k, khuí-khiat, guī-siān, uàn-tò͘ kah huí-pòng. 2 Tio̍h tshin-tshiūⁿ tú-á seⁿ ê eⁿ-á tsin ài suh sûn-kiat sio̍k-lîng ê lin, hō͘ lín thang tióng-tuā kàu tit-kiù. 3 Tú tshin-tshiūⁿ Sìng-king kì-tsài kóng, "Lín í-king tam-tio̍h Tsú sī tsû-siān ê tsu-bī." 4 Tio̍h tshin-kīn Tsú. I sī ua̍h-tsio̍h, sui-jiân hō͘ lâng khì-sak, m̄-koh hō͘ Siōng-Tsú kíng-suán lâi khuàⁿ-tsò sī pó-puè. 5 Lín mā tio̍h tsò ua̍h-tsio̍h lâi hō͘ Siōng-Tsú khí-tsō sio̍k-lîng ê tiān, koh tsò sìng-kiat ê tsè-si, thong-kuè Iâ-so͘ Ki-tok lâi hiàn hō͘ Siōng-Tsú huaⁿ-hí sio̍k-lîng ê tsè-mi̍h. 6 In-uī Sìng-king ū kì-tsài: Khuàⁿ ah, Guá beh tī Sik-an-suaⁿ hē tsi̍t-tè tsio̍h, sī siū kíng-suán pó-kuì ê tshù-kak-tsio̍h. Sìn-khò I ê lâng lóng bē sit-bōng.( tsù: ISA 28:16) 7 Tsit-tè tsio̍h tuì lín tsiah-ê sìn ê lâng lâi kóng sī tsin pó-kuì, m̄-koh tuì hiah-ê m̄-sìn ê lâng sī: Khí-tshù sai-hū só͘ khì-sak ê tsio̍h í-king tsiâⁿ-tsò tshù-kak-thâu siōng tiōng-iàu ê tsio̍h. 8 Tī pa̍t-uī ê Sìng-king ū kì-tsài kóng, "Tsit-tè sī puàn-kha-tsio̍h, hō͘ lâng pua̍h-tó ê tsio̍h." In m̄ sūn-ho̍k tō-lí lâi pua̍h-tó, tse sī Siōng-Tsú ê tsí-ì só͘ tiāⁿ-tio̍h-.ê. 9 M̄-koh lín sī siū kíng-suán ê tsíng-tso̍k, sī ông-ka ê tsè-si, sī sìng-kiat ê kok-tō͘, sī Siōng-Tsú ê tsú-bîn. Siōng-Tsú tiàu lín lī-khui o͘-àm lâi tsìn-ji̍p I bî-biāu ê kng-bîng, sī ài lín suan-iông I ê uí-tāi tsok-uî. 10 Lín í-tsîng m̄-sī Siōng-Tsú ê tsú-bîn, taⁿ sī I ê tsú-bîn. Í-tsîng lín bô tit-tio̍h Siōng-Tsú ê liân-bín, taⁿ ū tit-tio̍h I ê liân-bín.

Siōng-Tsú ê Lô͘-po̍k
11 Tshin-ài ê hiaⁿ-tī tsí-muē, lín lâi sè-kan tsò kià-kha ê tshut-guā-lâng, guá khó͘-khǹg lín m̄-thang hòng-tshiòng jio̍k-thé ê tsîng-io̍k. Tsit-ê tsîng-io̍k put-sî teh kong-kik lîng-hûn. 12 Lín tī bī-sìn-tsiá ê tiong-kan tio̍h ū hó hîng-uî, hō͘ hiah-ê huí-pòng lín sī pháiⁿ-lâng ê lâng thang khuàⁿ-tio̍h lín ê hó phín-hīng, tī Tsú tsài-lîm ê ji̍t-tsí kui îng-kng hō͘ Siōng-Tsú. 13 Uī-tio̍h Tsú ê iân-kò͘, lín tio̍h sūn-ho̍k lâng só͘ siat ê tsè-tō͘. Bô-lūn sī tuì tsuè-ko thóng-tī-tsiá ê kun-ông, 14 á-sī kun-ông tshe-phài lâi hîng-hua̍t pháiⁿ-lâng kah tsióng-lē hó-lâng ê kuaⁿ-uân lóng tio̍h sūn-ho̍k. 15 In-uī tse sī Siōng-Tsú ê tsí-ì, ài lín tsò hó-sū lâi hō͘ hiah-ê bû-ti ê gōng-lâng bô uē thang kóng. 16 Lín sī tsū-iû ê lâng, m̄-thang īng tsū-iû lâi jia-khàm siâ-ok, tio̍h tsò Siōng-Tsú ê lô͘-po̍k. 17 Tio̍h tsun-tiōng só͘-ū ê lâng, tio̍h thiàⁿ Tsú-lāi ê hiaⁿ-tī tsí-muē, kìng-uì Siōng-Tsú, tsun-kìng kun-ông. 18 Īng Ki-tok ê Siū-khó͘ Lâi Tsò Bô͘-huān Tsò lô͘-po̍k ê lâng tio̍h ta̍k-hāng tāi-tsì sūn-ho̍k tsú-lâng. M̄-nā tuì siān-liông un-sûn ê tsú-lâng tio̍h án-ne, liân tuì khik-po̍k ê tsú-lâng mā tio̍h án-ne. 19 Lâng siū uan-óng ê sî, nā ū thé-huē sī Siōng-Tsú ê tsí-ì lâi jím-siū khó͘-tshó. Siōng-Tsú ē kā i tsiok-hok. 20 Lín nā tsò m̄-tio̍h lâi jím-siū hō͘ lâng hîng-hua̍t ê khó͘-tshó, ū sím-mi̍h khó-tshú? Lín nā tsò hó-sū lâi jím-siū tsia̍h-khó͘, Siōng-Tsú ē kā lín tsiok-hok. 21 Siōng-Tsú ho͘-tiàu lín ê bo̍k-tik sī án-ne. Ki-tok mā ū uī-tio̍h lín siū-khó͘, lâu bô͘-iūⁿ hō͘ lín, thang hō͘ lín tuè I ê kha-pō͘. 22 Ki-tok lóng bô huān-tsuē, mā bô-lâng thiaⁿ-kuè I kóng pe̍h-tsha̍t. 23 I hō͘ lâng mē bô hîng-tshuì mē lâng, siū gi̍k-thāi mā bô pàng-uē kā lâng khióng-hat. Tsí-ū tsiong ka-kī kau-thok Hit-uī tsiàu kong-gī sím-phuàⁿ ê Siōng-Tsú. 24 Ki-tok tī si̍p-jī-kè-tíng tshin-sin tam-tng lán ê tsuē, hō͘ lán thuat-lī tsuē ê sí-bông, kui-hiòng kong-gī lâi ua̍h. Lín tuì I ê siong-hûn tit-tio̍h i-hó. 25 Lín í-tsîng tshin-tshiūⁿ iûⁿ bê-lō͘, tsit-má í-king tńg-lâi kui tī lín lîng-hûn ê Bo̍k-tsiá, mā sī Kàm-hō͘-jîn.