《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第三章

作者 巴克禮普世版小組 2016.10.01

Hū-jîn-lâng Kah Tiōng-hu
1 Lín tsò hū-jîn-lâng ê mā tio̍h sūn-ho̍k ka-kī ê tiōng-hu. Nā-sī tiōng-hu bô sìn tō-lí, ē hō͘ hū-jîn-lâng ê hó phín-hīng kám-huà lâi sìn, lín lóng bián kóng puàⁿ-kù uē, 2 in-uī in ē khuàⁿ-tio̍h lín sûn-kiat ê phín-hīng kah kìng-khiân. 3 Lín m̄-thang khò guā-piáu ê tshīng-tshah, tshiūⁿ piⁿ-thâu-mn̂g, kuà kim-khì, á-sī tshīng suí-saⁿ. 4 Tio̍h khò lāi-tsāi ê suí, īng un-jiû koh thiâm-tsīng ê sim-lîng tsò bē pāi-huāi ê tsong-sik. Tse tī Siōng-Tsú ê gán-tiong tsiah sī tsin-tsiàⁿ pó-puè. 5 In-uī kó͘-tsá hiah-ê gióng-bōng Siōng-Tsú sìng-kiat ê hū-jîn-lâng mā sī án-ne tsong-sik, sūn-ho̍k ka-kī ê tiōng-hu. 6 Tshin-tshiūⁿ Sat-la̍h sūn-ho̍k A-pik-la̍h-hán, tshing-ho͘ i tsò " tsú-lâng". Lín nā tsò hó-sū, bô tah-hiaⁿh lâi kiaⁿ-hiâⁿ, tsiū-sī Sat-la̍h ê tsa-bó͘-kiáⁿ. 7 Lín tsò tiōng-hu ê mā tio̍h kah ka-kī ê hū-jîn-lâng tuà tsò-hué, thé-thiap in jio̍k-thé-siōng khah nńg-tsiáⁿ. Tio̍h kā in tsun-tiōng, in-uī in mā pêⁿ-pêⁿ kah lín tsò-hué sîng-tsiap Siōng-Tsú siúⁿ-sù ua̍h-miā ê un-tián, án-ne lín ê kî-tó tsiah bē tú-tio̍h tsó͘-tòng.

Uī-tio̍h Gī Siū-khó͘
8 Tsóng-kóng tsi̍t-kù, lín tio̍h tâng-sim, hō͘-siōng thé-thiap, tshin-tshiūⁿ hiaⁿ-tī sio-thiàⁿ, īng jîn-tsû kah khiam-pi hō͘-siōng tuì-thāi. 9 M̄-thang īng pháiⁿ pò pháiⁿ, á-sī mē-lâi mē-khì, tian-tò tio̍h īng tsiok-hok lâi huê-pò, in-uī Siōng-Tsú ho͘-tiàu lín ê sî ū ìng-ín beh hō͘ lín sîng-tsiap tsiok-hok. 10 In-uī Sìng-king ū kì-tsài kóng, "Lâng nā ài-beh pó-sioh ua̍h-miā, koh ài-beh kuè hīng-hok ê ji̍t-tsí, tio̍h kìm-tsí tshuì-tsi̍h kóng pháiⁿ-uē, m̄-thang kóng pe̍h-tsha̍t. 11 Tio̍h lī-khui pháiⁿ lâi tsò hó-sū, tsuan-sim tui-kiû hô-pîng. 12 In-uī Tsú khuàⁿ-kò͘ gī-lâng, I ū teh thiaⁿ in ê kî-tó, m̄-koh Tsú ê bīn ū teh kàm-tshat tsò pháiⁿ ê lâng.( tsù: SPh 34:12-16) 13 Lín nā jia̍t-sim tsò hó-sū, siáⁿ-lâng ē hāi lín? 14 M̄-koh lín nā uī-tio̍h gī lâi siū-khó͘, tsiū ū hok-khì. M̄-bián kiaⁿ puàⁿ-lâng, mā m̄-bián gîng-sim. 15 Tio̍h kìng-uì Ki-tok tsò Tsú. Nā ū-lâng mn̄g lín sim-lāi ê ǹg-bāng, tio̍h put-sî piān-piān īng un-jiû kah kìng-uì ê sim lâi piān-kái. 16 Tio̍h ū tshing-pi̍k ê liông-sim, thang tī lín siū huí-pòng ê sî, hō͘ hiah-ê bú-jio̍k lín ê lâng khuàⁿ-tio̍h lín uá-khò Ki-tok só͘ piáu-hiān ê hó phín-hīng lâi ka-kī kám-kak kiàn-siàu. 17 Siū-khó͘ ná-sī Siōng-Tsú ê tsí-ì, tsò hó lâi siū-khó͘ pí tsò pháiⁿ lâi siū-khó͘ khah hó. 18 In-uī Ki-tok mā bat uī-tio̍h lán ê tsuē lâi siū-khó͘, tsi̍t-pái to̍h uân-sîng. Gī-lâng thè put-gī ê lâng siū-khó͘ sī beh tshuā lín lâi-kàu Siōng-Tsú ê bīn-tsîng. I ê jio̍k-thé sí-bông, m̄-koh tsiàu lîng-sìng lâi kóng, Siōng-Tsú hō͘ I koh ua̍h khí-lâi. 19 Thong-kuè I ê lîng, I mā bat khì thuân tō-lí hō͘ siū-kuaiⁿ tī im-hú ê lîng-hûn. 20 Hiah-ê lîng-hûn tsiū-sī Ná-a teh tsún-pī tuā-tsûn ê kî-kan, Siōng-Tsú ū nāi-sim thìng-hāu hiah-ê m̄ sūn-ho̍k ê lâng. Tong-sî tsìn-ji̍p tuā-tsûn ê lâng tsin-tsió, kan-taⁿ peh-ê, in ū tuì tsuí lâi tit-kiù. 21 Tsit-ê tsuí teh ī-giân piáu-sī sé-lé. Taⁿ tsit-ê sé-lé ū kā lín tsín-kiù, m̄-sī sé-tû lín jio̍k-thé ê lah-sap, sī hō͘ lín ū tshing-pi̍k ê liông-sim thang tuì Siōng-Tsú kî-kiû. Tsit-ê sé-lé thong-kuè Iâ-so͘ Ki-tok ê koh-ua̍h í-king hō͘ lín tit-tio̍h tsín-kiù. 22 Iâ-so͘ í-king tsiūⁿ-thiⁿ, taⁿ tī Siōng-Tsú ê tsiàⁿ-pîng teh tsiáng-kuán tsìng thiⁿ-sài í-ki̍p lîng-kài ê tsip-tsìng-tsiá kah tsiáng-kuân-tsiá.