《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第四章

作者 巴克禮普世版小組 2016.10.08

Kái-piàn ê Sin Sing-ua̍h
1 Ki-tok kì-jiân tī jio̍k-thé siū-khó͘, lín mā tio̍h īng tsit-tsióng ê sim-tsì lâi tsong-pī ka-kī, in-uī jio̍k-thé siū-khó͘ tsiū-sī kah tsuē-ok tuān-tsua̍t kuan-hē. 2 Án-ne lín iáu tī sè-kan ê ji̍t-tsí, bô koh tsiàu lâng ê tsîng-io̍k, sī tsiàu Siōng-Tsú ê tsí-ì lâi sing-ua̍h. 3 Lín í-tsîng tsiàu bī-sìn-tsiá só͘ ài-tsò ê teh lōng-huì tī îm-luān, sik-io̍k, tsiú-tsuì, hòng-tshiòng, iàn-lo̍k kah hiah-ê khó-ò͘ ê ngó͘-siōng tsông-pài, í-king kàu-gia̍h à. 4 Taⁿ in khuàⁿ-tio̍h lín bô koh kah in kuè hòng-tōng bô tsiat-tsè ê sing-ua̍h tsiū kám-kak kî-kuài, suah kā lín huí-pòng. 5 In tio̍h kah teh-beh sím-phuàⁿ ua̍h-lâng í-ki̍p sí-lâng ê Siōng-Tsú sǹg-siàu. 6 In-uī hok-im mā bat thuân hō͘ sí-lâng, sī beh hō͘ in tī jio̍k-thé tsiàu lâng ê khuán-sit siū sím-phuàⁿ, m̄-koh in ê lîng-hûn ē-tàng tsiàu Siōng-Tsú ê khuán lâi ua̍h.

Tsò Siōng-Tsú Un-sù ê Hó Kuán-ke
7 Bān-sū ê kiat-kio̍k teh-beh kàu, só͘-í lín tio̍h kín-sīn siú-kí, kíng-síng lâi kî-tó. 8 Siōng iàu-kín tio̍h sîng-khún sio-thiàⁿ, in-uī thiàⁿ ē-tàng siau-tû tsin-tsē tsuē-kò. 9 Lín tio̍h hō͘-siōng hó khuán-thāi, m̄-thang bâi-uàn. 10 Ta̍k-lâng tio̍h tsiàu só͘ niá-siū ê un-sù hō͘-siōng ho̍k-sāi, lâi tsò Siōng-Tsú kok-tsióng un-sù ê hó kuán-ke. 11 Kóng tō-lí ê lâng tio̍h suan-káng Siōng-Tsú ê sìn-sit. Sū-hōng ê lâng tio̍h īng Siōng-Tsú só͘ siúⁿ-sù ê khuì-la̍t lâi sū-hōng, hō͘ Siōng-Tsú thong-kuè Iâ-so͘ Ki-tok tī bān-sū tit-tio̍h îng-kng. Guān îng-kng kah kuân-lîng lóng kui tī Siōng-Tsú, tāi-tāi bô suah. Amen.

Tsò Ki-tok-tô͘ Tio̍h Jím-siū Khó͘-lān
12 Tshin-ài ê hiaⁿ-tī tsí-muē, lín tú-tio̍h kah-ná hué ê tshì-liān, m̄-thang ná-tsún tú-tio̍h kî-kuài ê tāi-tsì. 13 Huán-tńg tio̍h in-uī ū hūn tī Ki-tok ê kan-khó͘ lâi huaⁿ-hí, hō͘ lín tī I îng-kng hián-hiān ê sî mā thang huaⁿ-hí khuài-lo̍k. 14 Lín nā uī-tio̍h Ki-tok ê miâ hō͘ lâng bú-jio̍k, lín tsin ū hok-khì, in-uī ū Siōng-Tsú ê Sìng-Sîn tiàm tī lín sin-tsiūⁿ. 15 Lín tiong-kan m̄-thang ū-lâng uī-tio̍h thâi-lâng, tsò-tsha̍t, tsò pháiⁿ á-sī in-uī tshap pa̍t-lâng ê tāi-tsì lâi siū-khó͘. 16 Nā uī-tio̍h tsò Ki-tok-tô͘ lâi siū-khó͘, m̄-bián kám-kak kiàn-siàu, huán-tńg tio̍h in-uī ū tsit-ê miâ kui îng-kng hō͘ Siōng-Tsú. 17 Sím-phuàⁿ ê sî kàu à, Siōng-Tsú ka-kī ê tsú-bîn tāi-sing siū sím-phuàⁿ. Nā sī sím-phuàⁿ tuì lán khai-sí, hiah-ê m̄ sìn Siōng-Tsú hok-im ê lâng kiat-kio̍k ē án-tsuáⁿ? 18 Sìng-king kì-tsài kóng, "Gī-lâng bô iông-ī tit-kiù, án-ne bô kìng-khiân kah tsuē-jîn ē án-tsuáⁿ?" 19 Só͘-í hiah-ê tsiàu Siōng-Tsú ê tsí-ì siū-khó͘ ê lâng, tio̍h īng hó phín-hīng tsiong in ê lîng-hûn kau-tài hō͘ sìn-si̍t ê Tsō-bu̍t-Tsú.