《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第五章

作者 巴克禮普世版小組 2016.10.15

Siōng-Tsú ê Iûⁿ-kûn Guá tsit-má īng tiúⁿ-ló ê sin-hūn khó͘-khǹg lín 1 tiong-kan ê tiúⁿ-ló. Guá koh sī Ki-tok siū-khó͘ ê kiàn-tsìng-jîn, mā tsò-hué ū hūn teh-beh hián-hiān ê îng-kng. 2 Lín tio̍h bo̍k-ióng Siōng-Tsú kau-tài lín ê iûⁿ-kûn, kā in tsiàu-kò͘. M̄-sī bián-kióng, sī tsiàu Siōng-Tsú ê tsí-ì kam-sim-lo̍k-ì. M̄-sī uī-tio̍h tham-tsâi, sī huaⁿ-hí lâi sū-hōng. 3 Mā m̄-sī tsò Siōng-Tsú kau-tài lín ê iûⁿ-kûn ê tsú-lâng lâi kā in kuán-hat, tio̍h tsò in ê bô͘-iūⁿ. 4 Án-ne tī Tuā-Bo̍k-tsiá hián-hiān ê sî, lín tsiah ē tit-tio̍h bē sit-khì kong-tshái ê îng-kuan. 5 Kah án-ne kāng-khuán, lín siàu-liân-lâng tio̍h sūn-ho̍k tióng-puè. Lín tāi-ke tio̍h khiam-sùn hō͘-siōng tuì-thāi, in-uī Sìng-king ū kì-tsài kóng, "Siōng-Tsú kah kiau-ngō͘ ê lâng tuì-ti̍k, siúⁿ-sù un-tián hō͘ khiam-pi ê lâng." 6 Só͘-í lín tio̍h tī Siōng-Tsú tuā khuì-la̍t ê tshiú-ē ka-kī khiam-pi, I kàu-sî ē kā lín ko-sing. 7 Lín tio̍h tsiong it-tshè ê tshau-huân kau-thok hō͘ Siōng-Tsú, in-uī I kuan-sim lín. 8 Tio̍h kín-sīn, tio̍h kíng-síng, in-uī lín ê tuì-ti̍k Mô͘-kuí tshin-tshiūⁿ teh háu ê sai, sì-kè kiâⁿ teh tshuē thang thun-tsia̍h ê lâng. 9 Tio̍h khò kian-tīng ê sìn-sim lâi tí-khòng i, lín tsai tsuân sè-kài ê hiaⁿ-tī tsí-muē lóng teh siū kāng-khuán ê khó͘-lān. 10 M̄-koh tán lín tsiām-sî siū-khó͘ liáu-āu, siúⁿ-sù it-tshè un-tián ê Siōng-Tsú, tsiū-sī thong-kuè Ki-tok ho͘-tiàu lín tit-tio̍h I íng-uán ê îng-kng ê Hit-uī, ē tshin-sin sù lín khuì-la̍t lâi tîng-sin kiàn-li̍p kian-kò͘ ê ki-tshó͘. 11 Guān kuân-lîng kui hō͘ Siōng-Tsú ti̍t-kàu íng-uán. Amen!

Tsuè-āu ê Tshíng-an
12 Thong-kuè tiong-si̍t ê hiaⁿ-tī Se-lah, guá siá tsit-tiuⁿ té-té ê phue hō͘ lín, lâi bián-lē lín, mā kiàn-tsìng tse sī Siōng-Tsú tsin-si̍t ê un-tián. Lín tio̍h tī tsit-ê un-tián tíng-bīn khiā-tsāi. 13 Tiàm-tī Pa-pí-lûn kah lín pêⁿ-pêⁿ siū kíng-suán ê kàu-huē í-ki̍p guá ê kiáⁿ Má-khó kā lín tshíng-an. 14 Lín tio̍h īng thiàⁿ-sim ê sio-tsim lâi hō͘-siōng tshíng-an. Guān só͘-ū sio̍k Ki-tok ê lâng lóng tit-tio̍h pîng-an!