《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第22章

作者 巴克禮普世版小組 2011.08.28

1, Iâ-so͘ ìn i, koh īng phì-jū kā in kóng,
2, Thian-kok pí-phīng jîn-kun, kā i ê kiáⁿ tsún-pī hun-in ê iân-sia̍h.
3, Tshe i ê lô͘-po̍k tiàu só͘ tshiáⁿ ê lâi hù iân-sia̍h; tān-sī in m̄ lâi.
4, Koh tshe pa̍t ê lô͘-po̍k kóng, Khì kā só͘ tshiáⁿ ê kóng, Guá ê toh í-king tsún-pī piān, guá ê gû kap puî ê tsing-siⁿ í-king thâi, pah-hāng mi̍h lóng piān, tio̍h lâi hù iân-sia̍h.
5, In bô iàu-kín, tsò in khì; tsi̍t ê khì i ê tshân-hn̂g, tsi̍t ê khì i ê sing-lí tiûⁿ;
6, kî-û ê lia̍h i ê lô͘-po̍k, lîng-jio̍k in, thâi in.
7, Jîn-kun siū-khì, tshe i ê kun-ping tsâu-bia̍t hiah-ê hiong-huān, suà sio in ê siâⁿ.
8, Tsiū kā i ê lô͘-po̍k kóng, Hun-in ê iân-sia̍h í-king piān, tān-sī só͘ tshiáⁿ ê bē kham-tit.
9, Só͘-í lín khì tuā lō͘-thâu, kìⁿ-nā só͘ tú-tio̍h ê lóng tshiáⁿ i lâi hù iân-sia̍h.
10, Hiah-ê lô͘-po̍k tshut-khì lō͘-ni̍h, tsū-tsi̍p huān só͘ tú-tio̍h ê, bô lūn hó pháiⁿ; hun-in ê kheh-thiaⁿ lâng-kheh tsiū muá.
11, Jîn-kun ji̍p-khì khuàⁿ lâng-kheh, khuàⁿ-tio̍h tī hia tsi̍t lâng bô tshīng lé-ho̍k;
12, kā i kóng, Pîng-iú ah, lí bô tshīng hun-in ê lé-ho̍k, tsáiⁿ-iūⁿ ji̍p-lâi tsia? I tsiū tsīng-tsīng.
13, Hit sî jîn-kun kā tsiah-ê tshe-īng kóng, Pa̍k i ê kha-tshiú, tsiong i hiat tī guā-bīn o͘-àm ê só͘-tsāi; tī hia bueh ū thî-khàu kā-gê tshiat-khí.
14, In-uī siū tiàu ê tsuē, siū kíng ê tsió.
15, Hit sî Huat-lī-sài-phài ê lâng khì tsham-siông, khuàⁿ thang tsáiⁿ-iūⁿ tsiū I ê ē lâi tauh I.
16, Tsiū tshe in ê bûn-tô͘ kap Hi-lu̍t tóng tsiū-kūn I kóng, Sian-siⁿ ah, guán tsai lí sī tsin-si̍t, koh īng tsin-si̍t tsiong Siōng-tsú ê lō͘ kà-sī lâng; lí iā bô lia̍h sím-mi̍h lâng tsò iàu-kín, in-uī lí bô khuàⁿ lâng ê guā-māu.
17, La̍p sè hō͘ Kai-sat ha̍p-gî á bô? Lí phah-sǹg tsáiⁿ-iūⁿ? tshiáⁿ kā guán kóng.
18, Iâ-so͘ tsai in ê pháiⁿ, tsiū kóng, Ké-hó ê lâng ah, siáⁿ-sū tshì guá.
19, Īng la̍p sè ê gûn-á hō͘ guá khuàⁿ. In tsiū the̍h tsi̍t ê gûn-á hō͘ I.
20, Iâ-so͘ kā in kóng, Tsit-ê siōng kap hō sī siáⁿ-lâng?
21, Kā I kóng, Kai-sat. I tsiū kā in kóng, Án-ne, lín tio̍h tsiong Kai-sat ê mi̍h la̍p hō͘ Kai-sat, tsiong Siōng-tsú ê mi̍h la̍p hō͘ Siōng-tsú.
22, In thiaⁿ-tio̍h tsiū kî-kuài, lī-khui I khì.
23, Hit ji̍t ū Sat-thó͘-kai-phài ê lâng, tsiū-sī kóng lâng bô koh-ua̍h ê, tsiū-kūn I, mn̄g kóng,
24, Sian-siⁿ ah, Mô͘-se kóng, Lâng sí iā bô kiáⁿ, i ê sió-tī tio̍h tshuā i ê bó͘; seⁿ kiáⁿ lâi suà-tsiap i ê hiaⁿ.
25, Taⁿ guán tiong-kan ū hiaⁿ-tī tshit lâng; tuā-ê tshuā, tsiū sí-khì, bô kiáⁿ; lâu i ê bó͘ hō͘ sió-tī.
26, Tē jī ê, tē saⁿ ê, kàu tē tshit ê iā lóng sī án-ne.
27, Kàu bé, hit ê hū-jîn-lâng iā sí.
28, Án-ne tī koh-ua̍h ê sî, tshit lâng tiong hū-jîn-lâng bueh tsò siáⁿ-lâng ê bó͘? in-uī lóng ū tshuā i.
29, Iâ-so͘ ìn i kóng, Lín tshò à, in-uī lín m̄ bat sìng-king kap Siōng-tsú ê kuân-lîng.
30, In-uī koh-ua̍h ê sî, bô kuè bô tshuā; sī tshin-tshiūⁿ thiⁿ-sài tī thiⁿ-tíng.
31, Lūn-kàu sí-lâng koh-ua̍h, kiám bē tha̍k-tio̍h Siōng-tsú só͘ kā lín kóng ê kóng,
32, Guá tsiū-sī A-pik-la̍h-hán ê Siōng-tsú, Í-sat ê Siōng-tsú, Ngá-kok ê Siōng-tsú? I m̄-sī sí-lâng ê Siōng-tsú, sī ua̍h-lâng ê Siōng-tsú.
33, Tsìng lâng thiaⁿ-tio̍h, kî-kuài I ê kà-sī.
34, Huat-lī-sài-phài ê lâng thiaⁿ-tio̍h I í-king that-ba̍t Sat-thó͘-kai-phài ê lâng ê tshuì, tsiū saⁿ-kap tsū-tsi̍p.
35, Kî-tiong tsi̍t lâng tsò kàu-huat-su ê tshì I, mn̄g kóng,
36, Sian-siⁿ ah, lu̍t-huat tiong, sím-mi̍h kài tsò tuā?
37, I kā i kóng, Lí tio̍h tsīn sim, tsīn sìng, tsīn ì thiàⁿ Tsú lí ê Siōng-tsú.
38, Tsit-ê kài sī tuā ê, iā sī thâu tsi̍t ê.
39, Tē jī ê iā saⁿ tshin-tshiūⁿ, sī kóng, Lí tio̍h thiàⁿ tshù-piⁿ tshin-tshiūⁿ ka-kī.
40, Tsit nn̄g tiâu kài sī tsuân lu̍t-huat kap sian-ti ê tsóng-kun-thâu.
41, Huat-lī-sài-phài ê lâng tsū-tsi̍p ê sî Iâ-so͘ mn̄g in kóng,
42, Lūn Ki-tok lín phah-sǹg tsáiⁿ-iūⁿ? I sī siáⁿ-lâng ê kiáⁿ-sun? In kā I kóng, Sī Tāi-pi̍t ê.
43, I kā in kóng, Án-ne, tsiū Tāi-pi̍t hō͘ Sìng Lîng kám-tōng, tsáiⁿ-iūⁿ tshing I tsò Tsú ah, kóng,
44, Tsú kā guá ê Tsú kóng, Tsē guá ê tuā pîng, Thìng-hāu guá tsiong lí tsiah-ê tuì-ti̍k hē tī lí ê kha-ē?
45, Tāi-pi̍t kì-jiân tshing I tsò Tsú, tsiū Ki-tok tsáiⁿ-iūⁿ tsò I ê kiáⁿ-sun ah?
46, Bô lâng ē ìn I tsi̍t kù; tuì hit ji̍t iā bô lâng káⁿ koh mn̄g I.