《巴克禮普世版聖經（試讀本）》

 | | | 轉寄

巴克禮普世版（試讀本） 彼得後書第一章

作者 巴克禮普世版小組 2016.10.22

1 Guá, Se-bûn Pí-tik sī Iâ-so͘ Ki-tok ê sù-tô͘ kah lô͘-po̍k, siá tsit-tiuⁿ phue kià hō͘ hiah-ê khò lán ê Siōng-Tsú kah Kiù-Tsú Iâ-so͘ Ki-tok ê gī, kah guán tsò-hué hun-hióng kāng-khuán pó-puè sìn-gióng ê lâng. 2 In-uī lín ū jīn-bat Siōng-Tsú kah lán ê Tsú Iâ-so͘, guān lín tit-tio̍h hong-hong hù-hù ê un-tián kah pîng-an!

Siōng-Tsú ê Ho͘-tiàu Kah Kíng-suán
3 Siōng-Tsú ê kuân-lîng í-king siúⁿ-sù lán kìng-khiân sing-ua̍h só͘ su-iàu ê it-tshè. Tsit-ê un-sù sī thong-kuè tsin-tsiàⁿ jīn-bat Hit-uī ho͘-tiàu lán lâi hun-hióng I ka-kī ê îng-kng kah liông-siān ê Siōng-Tsú siúⁿ-sù-.ê. 4 Siōng-Tsú í-king tsiong I ìng-ín ê pó-puè kah ki̍k-tuā ê un-tián siúⁿ-sù lán. Hō͘ lín thong-kuè tsiah-ê ìng-ín thang thuat-lī sè-kan ê tsîng-io̍k só͘ tsō-tsiâⁿ ê pāi-huāi, lâi hun-hióng Siōng-Tsú ê sîn-sìng. 5 Uī-tio̍h án-ne, lín tio̍h tsīn-la̍t phah-piàⁿ, īng tik-hīng lâi ke-thiⁿ lín ê sìn-sim, īng tì-sik lâi ke-thiⁿ lín ê tik-hīng. 6 Īng tsún-tsat lâi ke-thiⁿ tì-sik, īng jím-nāi lâi ke-thiⁿ tsún-tsat, īng kìng-khiân lâi ke-thiⁿ jím-nāi. 7 Īng tshiú-tsiok tsi-tsîng lâi ke-thiⁿ kìng-khiân, īng thiàⁿ-sim lâi ke-thiⁿ tshiú-tsiok tsi-tsîng. 8 Lín nā lóng ū tsiah-ê tik-hīng koh ná tshiong-si̍t, tsiū ē hō͘ lín koh-khah tsik-ki̍k koh ū hāu-lîng lâi jīn-bat lán ê Tsú Iâ-so͘ Ki-tok. 9 Nā bô tsiah-ê tik-hīng ê lâng tsiū-sī kīn-sī á-sī tsheⁿ-mê, bē kì-tit in í-tsîng ê tsuē í-king sé tshing-khì. 10 Hiaⁿ-tī tsí-muē ah, só͘-í lín tio̍h koh-khah phah-piàⁿ lâi tsìng-bîng Siōng-Tsú tuì lín ê ho͘-tiàu kah kíng-suán sī khak-si̍t. Lín nā án-ne tsò tsiū íng-uán bē tuī-lo̍h. 11 Án-ne Siōng-Tsú tsiū ē tuā-tuā sù-hok hō͘ lín thang tsìn-ji̍p lán ê Kiù-Tsú Iâ-so͘ Ki-tok íng-uán ê kok-tō͘. 12 Lín sui-jiân í-king tsai tsiah-ê tāi-tsì, koh kian-tīng tsip-siú lín só͘ niá-siū ê tsin-lí, guá iáu-koh tio̍h siông-siông kā lín thê-tshéⁿ. 13 Guá siūⁿ tī guá iáu ua̍h-teh ê sî, ing-kai tio̍h siông-siông kā lín thê-tshéⁿ. 14 Tsiàu lán ê Tsú Iâ-so͘ Ki-tok kā guá tsí-sī ê, guá ka-kī tsai guá lī-khui sè-kan ê ji̍t-tsí teh-beh kàu. 15 Guá mā beh tsīn-la̍t siūⁿ pān-huat hō͘ lín tī guá kuè-sin liáu-āu iáu put-sî ē kì-tit tsiah-ê tāi-tsì.

Ki-tok Îng-kng ê Kiàn-tsìng-jîn
16 Guán tuì lín kóng kuan-hē lán ê Tsú Iâ-so͘ Ki-tok ê tuā-kuân-lîng kah tsài-lîm, m̄-sī kin-kì kî-khiáu bô iáⁿ-tsiah ê thuân-suat, sī guán ū tshin-ba̍k khuàⁿ-tio̍h I ê tuā ui-giâm. 17 I tuì Thiⁿ-Pē Siōng-Tsú tit-tio̍h tsun-kuì kah îng-kng ê sî, Hit-uī tsì-tsun koh îng-kng ê Siōng-Tsú ū tshut-siaⁿ tuì I kóng, "Tsit-ê sī Guá só͘ thiàⁿ ê Kiáⁿ, I sī Guá tsin-tsiàⁿ kah-ì-.ê." 18 Guán kah I tī sìng-suaⁿ ê sî, ū tshin-sin thiaⁿ-tio̍h tuì thiⁿ-tíng tshut-lâi tsit-ê siaⁿ. 19 Só͘-í guán tuì sian-ti só͘ suan-pò͘ ê sìn-sit koh-khah khak-sìn. Lín tio̍h tsù-ì thiaⁿ, in-uī tsit-ê sìn-sit tshin-tshiūⁿ ting-hué tsiò tī o͘-àm, tsiò-kàu thiⁿ-kng, it-ti̍t kàu khé-bîng-tshiⁿ tshut-hiān tī lín ê sim ê sî. 20 Siōng iàu-kín tio̍h tsai, m̄-thang suî-piān tsiàu ka-kī ê ì-sù lâi kái-sueh Sìng-king tiong sian-ti só͘ kóng ê uē. 21 In-uī sian-ti ê uē m̄-sī tuì lâng ê ì-sù kóng tshut, sī lâng hō͘ Sìng-Sîn kám-tōng lâi kóng-tshut Siōng-Tsú ê uē.