《巴克禮普世版聖經（試讀本）》

 | | | 轉寄

巴克禮普世版（試讀本） 彼得後書第二章

作者 巴克禮普世版小組 2016.10.29

Ké ê Kàu-su
1 Í-tsîng ū ké-sian-ti tī bîn-kan tshut-hiān. Kāng-khuán, tsit-má mā ū ké kàu-su tī lín ê tiong-kan tshut-hiān. In àm-tiong ín-tsìn huí-bia̍t-sìng ê īⁿ-tuan ji̍p-lâi, sīm-tsí m̄ sîng-jīn kā in sio̍k-huê ê Tsú-tsáiⁿ, ka-kī tsin-kín tsiū bia̍t-bông. 2 M̄-koh iáu-ū tsin-tsē lâng o̍h in ê îm-luān sing-ua̍h, tsin-lí ê tō-lō͘ suah uī-tio̍h in lâi siū huí-pòng. 3 Tsiah-ê ké kàu-su in-uī tham-sim, ē liap-tsō kò͘-sū lâi pián lín ê tsîⁿ-tsâi. Siōng-Tsú tuì in ê sím-phuàⁿ tsá to̍h kuat-tīng ā, in liâm-piⁿ tsiū bia̍t-bông. 4 Siōng-Tsú pīng bô iông-ún huān-tsuē ê thiⁿ-sài, kā in hiat lo̍h-khì im-hú, kā in kuaiⁿ tī o͘-àm ê tshim-kheⁿ, thìng-hāu sím-phuàⁿ. 5 Siōng-Tsú mā bô iông-ún kó͘-tsá ê sè-kài, īng tuā-tsuí im-bia̍t hiah-ê bô kìng-uì Siōng-Tsú ê sè-kan-lâng, kan-taⁿ tsín-kiù suan-iông kong-gī ê Ná-a hit peh lâng. 6 Siōng-Tsú tshù-hua̍t Só͘-to-má kah Ngô͘-mô͘-la̍h ê siâⁿ-tshī, īng hué kā in huí-bia̍t, hō͘ āu-lâi bô kìng-uì Siōng-Tsú ê lâng tsò kíng-kài. 7 Siōng-Tsú ū tsín-kiù gī-lâng Lô-tik, in-uī i siông-siông uī-tio̍h siâ-ok îm-luān ê lâng lâi tshim-tshim iu-būn. 8 Tsit-ê gī-lâng Lô-tik tuà tī in tiong-kan, ta̍k-ji̍t khuàⁿ-tio̍h mā thiaⁿ-tio̍h hiah-ê siâ-ok ê tāi-tsì, sim-lāi hui-siông thòng-khó͘. 9 Siōng-Tsú tsai tio̍h tsuáⁿ-iūⁿ tsín-kiù kìng-khiân ê lâng thuat-lī tshì-liān, mā tsai kā put-gī ê lâng lâu-kàu sím-phuàⁿ ê ji̍t khì siū hîng-hua̍t. 10 Ti̍k-pia̍t sī hiah-ê hòng-tshiòng jio̍k-thé tsîng-io̍k koh biáu-sī Siōng-Tsú kuân-ui ê lâng. Tsiah-ê ké kàu-su tuā-táⁿ koh kiau-ngō͘, sīm-tsí siat-to̍k tsun-kuì ê thiⁿ-sài. 11 Sui-jiân thiⁿ-sài ê khuì-la̍t kah kuân-lîng pí hiah-ê ké kàu-su khah tuā, mā bô tī Siōng-Tsú ê bīn-tsîng īng huí-pòng ê uē kā in khòng-kò. 12 M̄-koh tsiah-ê lâng tshin-tshiūⁿ bô lîng-sìng ê tōng-bu̍t, seⁿ-sîng tio̍h hō͘ lâng lia̍h khì thâi. In huí-pòng ka-kī m̄-tsai ê tāi-tsì. In ē kah tōng-bu̍t kāng-khuán siū huí-bia̍t, siū-tio̍h ka-kī put-gī hîng-uî ê pò-ìng. 13 Tuì in lâi kóng, hióng-lo̍k tsiū-sī tī ji̍t-sî tsiū tîm-lûn tī tsîng-io̍k ê buán-tsiok lâi huaⁿ-hí. Kah lín tsò-hué tsia̍h-toh ê sî, in m̄-tsai thang kiàn-siàu koh bô kò͘ thé-biān, hòng-tshiòng iàn-lo̍k. 14 In ê ba̍k-tsiu kan-taⁿ ài khuàⁿ siâ-îm, huān-tsuē bô suah, bê-hi̍k sim bô kian-kò͘ ê lâng, in ê sim kuàiⁿ-sì tham-tsâi, ing-kai tio̍h siū Siōng-Tsú ê tsiù-tsó͘. 15 In lī-khui tsiàⁿ-lō͘ lâi kiâⁿ bê-lō͘, kiâⁿ Pì-ní ê kiáⁿ Pa-lân só͘ kiâⁿ ê lō͘. Pa-lân tham-ài put-gī ê tsîⁿ-tsâi, 16 m̄-koh uī-tio̍h ka-kī ê huān-huat lâi siū tsik-pī. Tsi̍t-tsiah bē kóng-uē ê lî-á, kìng-jiân īng lâng ê siaⁿ lâi tsó͘-tsí sian-ti Pa-lân ê hong-kông. 17 Tsiah-ê lâng tshiun-tshiūⁿ bô tsuí ê tsuâⁿ, tshin-tshiūⁿ hō͘ kông-hong sàu-kuè ê hûn-bū. Siōng-Tsú í-king tī o͘-àm ê tshim-ian kā in lâu tsi̍t-ê só͘-tsāi teh thìng-hāu in. 18 In kóng khua-kháu ê gōng-uē, tī jio̍k-thé ê tsîng-io̍k kah siâ-îm lâi iú-hi̍k hiah-ê tú-tú thuat-lī sit-bê sing-ua̍h ê lâng. 19 In ìng-ín hō͘ lâng tsū-iû, m̄-koh ka-kī tsò hú-pāi sing-ua̍h ê lô͘-lē, in-uī lâng siū sím-mi̍h khòng-tsè tsiū tsò hit-hāng ê lô͘-lē. 20 Lâng jīn-bat Kiù-Tsú Iâ-so͘ Ki-tok lâi thuat-lī sè-kan hiah-ê ù-uè í-āu, nā koh-tsài hō͘ hiah-ê hú-pāi ê sè-li̍k tîⁿ-sin koh siū ap-tsè, tsit-tsióng lâng ê kiat-kio̍k ē pí í-tsîng koh-khah tshám. 21 In kì-jiân jīn-bat kong-gī ê tō-lō͘, kìng-jiân koh-lâi uî-puē só͘ thuân hō͘ in ê sîn-sìng kài-bīng, án-ne lîng-khó tuì khí-thâu to̍h lóng m̄-bat khah hó. 22 Hit-tsióng lâng ê tsîng-hîng tú tshin-tshiūⁿ sio̍k-gí só͘ kóng, "Káu-á tò-tńg-khì tsia̍h ka-kī só͘ thò͘ ê mi̍h, ti-á sé tshing-khì suî-sî koh khì nuà tī thô͘-muê ê tiong-ng."