《巴克禮普世版聖經（試讀本）》

 | | | 轉寄

巴克禮普世版（試讀本） 約翰二書第一章

作者 巴克禮普世版小組 2016.12.19

Tshíng-an
1 Guá tsò tiúⁿ-ló, siá phue kià hō͘ Siōng-Tsú kíng-suán ê hu-jîn kah i ê kiáⁿ-jî, guá tsin-sim thiàⁿ lín. M̄-nā guá, só͘-ū bat tsin-lí ê lâng mā lóng thiàⁿ lín. 2 In-uī ū tsin-lí tiàm tī lán ê sim-lāi, mā ē íng-uán kah lán tông-tsāi. 3 Guān Thiⁿ-Pē Siōng-Tsú kah Thiⁿ-Pē ê Kiáⁿ Iâ-so͘ Ki-tok sù lán un-tián, liân-bín kah pîng-an, hō͘ lán ê sing-ua̍h tshiong-muá tsin-lí kah thiàⁿ-sim.

Tsin-lí Kah Thiàⁿ-sim
4 Guá tsin huaⁿ-hí khuàⁿ-kìⁿ lí ê kiáⁿ-jî tiong-kan ū-lâng teh tsun-hîng Thiⁿ-Pē ê kài-bīng, tī tsin-lí-tiong sing-ua̍h. 5 Tshin-ài ê hu-jîn, taⁿ guá khún-kiû lí, tāi-ke tio̍h sio-thiàⁿ. Guá siá án-ne hō͘ lí, m̄-sī sin ê kài-bīng, sī lán tuì khí-thâu to̍h niá-siū-.ê. 6 Lán tsiàu Siōng-Tsú ê kài-bīng sing-ua̍h, tsiū-sī sio-thiàⁿ. Tsit-ê kài-bīng sī lín tuì khí-thâu to̍h thiaⁿ-tio̍h-.ê. 7 Ū tsin-tsē bê-hi̍k lâng ê pián-sian-á lâi-kàu tsit sè-kan, in m̄ sîng-jīn Iâ-so͘ Ki-tok tsiâⁿ-tsò lâng kàng-lîm sè-kan. Tsit-khuán lâng teh bê-hi̍k lâng, mā kah Ki-tok tsò tuì-ti̍k. 8 Lín tio̍h kín-sīn, tsiah bē sit-khì lán lô-khó͘ ê sîng-kó, huán-tńg ē tit-tio̍h muá-muá ê pò-siúⁿ. 9 Bô kian-siú koh phian-lī Ki-tok kà-sī ê lâng gán-tiong bô Siōng-Tsú. Kian-siú kà-sī ê lâng tsiah ū kah Thiⁿ-Pē í-ki̍p Kiáⁿ kiat-liân. 10 Nā ū-lâng khì lín hia bô thuân tsit-ê kà-sī, m̄-thang tsiap-la̍p i ji̍p-khì lín ê tshù, mā m̄-thang kā i tshíng-an, 11 in-uī nā kā i tshíng-an, i só͘ tsò ê pháiⁿ tāi-tsì mā ū lí ê hūn.

Tsuè-āu ê Tshíng-an
12 Guá ū tsin-tsē tāi-tsì beh kā lín kóng, m̄-koh bô ài īng tsuá kah pit. Guá khah ǹg-bāng khì lín hia, tng-bīn tsò-hué kóng, thang hō͘ lán ê huaⁿ-hí tshiong-muá. 13 Kah lí pêⁿ-pêⁿ siū Siōng-Tsú kíng-suán ê tsí-muē ê kiáⁿ-jî mā kā lí tshíng-an.