《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第23章

作者 巴克禮普世版小組 2011.09.04

1, Hit sî Iâ-so͘ kā tsìng lâng kap I ê bûn-tô͘ kóng,
2, King-ha̍k-sū kap Huat-lī-sài-phài ê lâng tsē Mô͘-se ê uī.
3, Só͘-í kìⁿ-nā in só͘ kā lín kóng ê, lóng tio̍h kiâⁿ lâi siú i; tān-sī bo̍h-tit tsiàu in ê só͘ tsò lâi kiâⁿ; in-uī in ū kóng, iā bô kiâⁿ.
4, In īng tāng koh oh taⁿ ê tàⁿ pa̍k lâi hē tī lâng ê king-thâu tíng, tān-sī in ka-kī m̄ khíng īng tsi̍t ki tsńg-thâu-á tín-tāng i.
5, In it-tshè ê só͘ tsò, lóng sī bueh hō͘ lâng khuàⁿ tsiah tsò; in-uī in ê puē-king tsò khah khuah, saⁿ-á-ku ê tshiu tsò khah tn̂g.
6, Ài iân-toh-ni̍h tsē tuā uī, huē-tn̂g lāi tsē kuân uī,
7, kue-tshī-ni̍h hō͘ lâng tshíng-an, iā hō͘ lâng tshing-ho͘ in Lia̍p-pí.
8, Tān-sī lín bo̍h-tit hō͘ lâng tshing tsò Lia̍p-pí; in-uī lín ê sian-siⁿ sī tsi̍t ê, lín lóng sī hiaⁿ-tī.
9, Tī tē-ni̍h iā bo̍h-tit tshing lâng tsò pē; in-uī lín ê Pē sī tsi̍t ê, tsiū-sī tī thiⁿ-tíng ê.
10, Iā bo̍h-tit hō͘ lâng tshing tsò sian-siⁿ; in-uī lín ê sian-siⁿ sī tsi̍t ê, tsiū-sī Ki-tok.
11, Tān-sī lín tiong-kan tsò tuā ê, bueh tsò lín ê tshe-īng.
12, Huān-nā tsū-ko ê, bueh hō͘ i pi-bî; ka-kī pi-bî ê, bueh kā i ko-sing.
13, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín tī lâng ê bīn-tsîng kuaiⁿ-ba̍t Thian-kok; lín ka-kī bô ji̍p, teh-bueh ji̍p ê lâng, lín iā m̄ tsún in ji̍p.
14,15, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín piàn kiâⁿ tsuí-lō͘ lio̍k-lō͘, hō͘ tsi̍t lâng ji̍p kàu; kì-jiân ji̍p, tsiū hō͘ i tsò tē-gi̍k ê lâng, pí lín ka-pē.
16, Lín tshiⁿ-mî tsò tshuā-thâu ê, ū tsai-ē ah! lín kóng, Kìⁿ-nā kí tiān lâi tsiù-tsuā ê, bô sū; tsí-ū kìⁿ-nā kí tiān-ni̍h ê kim lâi tsiù-tsuā ê, tsiū tio̍h siú i.
17, Lín gōng koh tshiⁿ-mî; in-uī tó-uī tsi̍t hāng khah tuā, sī kim, á-sī hō͘ kim tsiâⁿ sìng ê tiān ah?
18, Lín iā kóng Kìⁿ-nā kí tuâⁿ lâi tsiù-tsuā ê, bô sū; tsí-ū kìⁿ-nā kí tuâⁿ-tíng ê lé-mi̍h lâi tsiù-tsuā ê, tsiū tio̍h siú i.
19, Lín tshiⁿ-mî ah; in-uī tó-uī tsi̍t hāng khah tuā, sī lé-mi̍h á-sī hō͘ lé-mi̍h tsiâⁿ sìng ê tuâⁿ?
20, Só͘-í lâng kí tuâⁿ lâi tsiù-tsuā, sī kí tuâⁿ kap kìⁿ-nā tī i tíng-bīn ê, lâi tsiù-tsuā.
21, Lâng kí tiān lâi tsiù-tsuā, sī kí tiān kap tiàm tī hit lāi-bīn ê lâi tsiù-tsuā.
22, Lâng kí thiⁿ lâi tsiù-tsuā, sī kí Siōng-tsú ê tsō-uī kap tsē tī hit tíng-bīn ê, lâi tsiù-tsuā.
23, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín tsiong po̍k-hô, pueh-kak, má-khûn, tsa̍p hūn thiu tsi̍t hūn; tān-sī lu̍t-huat ê khah tsun-tiōng ê, tsiū-sī kong-gī, lîn-bín kap sìn-si̍t, lín tsiū pàng-sak; tān-sī tsiah-ê sī ing-kai tio̍h kiâⁿ ê, hiah-ê iā sī m̄-thang pàng-sak.
24, Lín tshiⁿ-mî tsò tshuā-thâu ê, báng-á tsiū lū-khí-lâi, lo̍k-tô tsiū thun-lo̍h-khì.
25, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín tshing-khì pue-puâⁿ ê guā-bīn, tān-sī hit lāi-bīn té li̍k-sik kap hòng-tōng muá-muá.
26, Lí tshiⁿ-mî ê Huat-lī-sài-phài ê lâng ah, tāi-sing tshing-khì pue-puâⁿ ê lāi-bīn, hō͘ i ê guā-bīn iā ē tshing-khì.
27, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín tshin-tshiūⁿ hún pe̍h ê bōng, guā-bīn khuàⁿ sī suí, tān-sī lāi-bīn té sí-lâng ê kut-thâu kap ta̍k hāng ê ù-uè muá-muá.
28, Án-ne, lín guā-bīn hō͘ lâng khuàⁿ sī gī, tān-sī lāi-bīn tsiū ké-hó kap put-huat muá-muá.
29, Lín ké-hó ê king-ha̍k-kàu-su kap Huat-lī-sài-phài ê lâng, ū tsai-ē ah! in-uī lín tshòng sian-ti lâng ê bōng, siu-tsíng gī lâng ê hûn-bōng;
30, ia̍h kóng, Siat-sú guán tī guán tsó͘ ê sî, tsiū bô kap in ū hūn tī lâu sian-ti lâng ê huih.
31, Án-ne, lín ka-kī kiàn-tsìng sī tsò thâi sian-ti lâng ê ê kiáⁿ-sun.
32, Tsuè lín khì muá lín tsó͘ ê hūn-liōng.
33, Tsuâ ah! to̍k-thâng ê luī ah! lín thài ē tô-siám tē-gi̍k ê hîng-hua̍t?
34, Só͘-í guá tshe sian-ti tì-sik ê lâng, king-ha̍k-kàu-su tsiū-kūn lín; ū-ê lín bueh thâi i, bueh tìng i tī si̍p-jī-kè; iā ū-ê bueh tī lín ê huē-tn̂g īng piⁿ phah i, tuì tsit-ê siâⁿ kuáⁿ-tio̍k in kàu hit ê siâⁿ.
35, Tì-kàu tē-tsiūⁿ só͘ lâu gī lâng ê huih, lóng kui tī lín, tsiū-sī tuì gī lâng A-pik ê huih kàu Pa-lia̍p-ka ê kiáⁿ Sat-ka-lī-a ê huih, i sī lín só͘ thâi tī tiān kap tuâⁿ ê tiong-kan ê.
36, Guá si̍t-tsāi kā lín kóng, Tsiah-ê sū lóng bueh kui tī tsit tāi.
37, Iâ-lō͘-sat-líng ah! Iâ-lō͘-sat-líng ah! tsiū-sī thâi-sí sian-ti lâng, īng tsio̍h-thâu tìm hōng-tshe kàu tī i ê; guá juā tsuē pái ài tsū-tsi̍p lí ê kiáⁿ-jî, tshin-tshiūⁿ kue-bú tsū-tsi̍p i ê kue-á tī si̍t-ē; tān-sī lín m̄ ài.
38 Lí khuàⁿ! lín ê tshù bueh pha-hng, lâu-teh hō͘ lín.
39, In-uī guá kā lín kóng, Taⁿ liáu-āu, lín bô khuàⁿ-tio̍h guá; thìng-hāu lín kóng, Tī Tsú ê miâ lâi ê, tit-tio̍h hok-khì.