《巴克禮普世版聖經（試讀本）》

 | | | 轉寄

巴克禮普世版（試讀本） 猶大書第一章

作者 巴克禮普世版小組 2017.01.02

1 Guá sī Iâ-so͘ Ki-tok ê lô͘-po̍k, Ngá-kok ê hiaⁿ-tī, Iû-tāi. Guá siá phue kià hō͘ hiah-ê siū suán-tiàu, tit-tio̍h Thiⁿ-Pē Siōng-Tsú ê thiàⁿ, koh siū Iâ-so͘ Ki-tok pó-siú ê lâng. 2 Guān lín tshiong-muá Siōng-Tsú ê liân-bín, pîng-an kah thiàⁿ-thàng.

Ké ê Kàu-su
3 Tshin-ài ê hiaⁿ-tī tsí-muē, guá tsá to̍h it-ti̍t siūⁿ-beh siá phue hō͘ lín, lâi tâm-lūn lán lóng ū hūn ê tsín-kiù. Taⁿ guá kám-kak tsin su-iàu siá phue lâi kó͘-lē lín, tio̍h uī Siōng-Tsú tsi̍t-piàn to̍h uân-tsíng thuân hō͘ sìn-tô͘ ê sìn-gióng lâi hùn-tàu. 4 In-uī ū tsi̍t-kuá bô kìng-uì Siōng-Tsú ê lâng thau-thau-á tsǹg ji̍p-lâi lán tiong-kan, khiok-kái Siōng-Tsú ê un-tián tòng-tsò hòng-tshiòng ê tsià-kháu, koh kī-tsua̍t to̍k-it ê Tsú-tsáiⁿ, lán ê Tsú Iâ-so͘ Ki-tok. Sìng-king tsá to̍h ī-giân tsiah-ê lâng it-tīng tio̍h siū hîng-hua̍t. 5 Lín sui-jiân í-king tsai tsiah-ê tāi-tsì, guá iáu-koh beh kā lín thê-tshéⁿ, Siōng-Tsú tsi̍t-piàn to̍h tsiong Í-sik-lia̍t tsú-bîn tuì Ai-ki̍p ê só͘-tsāi kiù tshut-lâi, āu-lâi koh tsiong hiah-ê m̄-sìn ê lâng huí-bia̍t. 6 Koh ū hiah-ê bô siú pún-hūn ê thiⁿ-sài, lī-khui ka-kī ê tsit-uī, Siōng-Tsú īng íng-uán ê só-liān kā in liān tuà o͘-àm ê tshim-ian, tī hia thìng-hāu tuā Ji̍t-kî ê sím-phuàⁿ. 7 Só͘-to-má kah Gô͘-mô͘-la̍h í-ki̍p sì-tsiu-uî siâⁿ-tshī ê lâng, mā kah hiah-ê thiⁿ-sài kāng-khuán kiâⁿ îm-luān, hòng-tshiòng uî-huán tsū-jiân ê sìng-io̍k, siū-tio̍h íng-uán bē-hua ê hué ê hîng-hua̍t. Tse thang tsò tsìng-lâng ê kíng-kài. 8 Hiah-ê khong-su bōng-sióng ê lâng mā kāng-khuán hō͘ in ê jio̍k-thé huān-tsuē, koh biáu-sī Siōng-Tsú ê kuân-ui, siat-to̍k thiⁿ-tíng tsun-kuì-.ê. 9 Thiⁿ-sài-tiúⁿ Bí-ka-li̍k kah Mô͘-kuí uī-tio̍h Mô͘-se ê sin-si teh tsing-lūn ê sî, mā m̄-káⁿ īng huí-pòng ê uē kā i tsik-pī, kan-taⁿ kóng, "Tsú tio̍h kā lí tsik-pī!" 10 M̄-koh tsiah-ê lâng siat-to̍k ka-kī m̄-tsai ê tāi-tsì, koh kah bô lîng-sìng ê tōng-bu̍t kāng-khuán khì tsò pún-lîng liáu-kái ê tāi-tsì, kiat-kó ka-kī pāi-huāi. 11 In ē ū tsai-hō! in-uī in kiâⁿ Kai-ún ê lō͘, koh uī-tio̍h tsîⁿ-tsâi hām-lo̍h tī Pa-lân ê tshò-gō͘, mā kah Khó-la̍h kāng-khuán in-uī puē-puān lâi bia̍t-bông. 12 Tsiah-ê lâng tī lín ê ài-tshan tsia̍h-toh-tiong kò͘-tsia̍h kò͘-lim bô kò͘ thé-bīn, in ióng-tshī ka-kī lóng bô kiaⁿ puàⁿ-lâng. In ná tshin-tshiūⁿ bē lo̍h puàⁿ-tiám hō͘ ê hûn, hō͘ hong sàu-lâi sàu-khì; koh ná tshiu-thiⁿ bô kiat kué-tsí ê tshiū, hō͘ lâng liân kin to khau khí-lâi, sí kah ta-khok-khok. 13 In mā tshin-tshiūⁿ hái-tiong ê kông-íng, lō͘-tshut ka-kī thang kiàn-siàu ê phue̍h; koh tshin-tshiūⁿ lī-khui kuí-tō ê tsheⁿ lak lo̍h-khì Siōng-Tsú uī-tio̍h in pó-liû ê o͘-àm tshim-ian. 14 A-tong ê tē-tshit tāi sun Í-lo̍k ī-giân tsiah-ê lâng, kóng, "Khuàⁿ ah! Siōng-Tsú ē tuà tshing-tshing bān-bān ê sìng thiⁿ-sài lâi, 15 beh sím-phuàⁿ só͘-ū ê lâng, hîng-hua̍t só͘-ū bô kìng-khiân ê tsuē-jîn, in-uī in īng bô kìng-khiân ê tshiú-tuāⁿ tsò it-tshè bô kìng-khiân ê tāi-tsì, koh kóng siat-to̍k Siōng-Tsú ê uē." 16 Tsiah-ê lâng put-sî nga̍uh-nga̍uh-liām, bâi-uàn, hòng-tshiòng su-io̍k, kóng khua-kháu ê uē, uī-tio̍h ka-kī ê lī-ik kā lâng phô͘-tháⁿ.

Kíng-kò Kah Kà-sī
17 Tshin-ài ê hiaⁿ-tī tsí-muē, tio̍h ē-kì-tit lán ê Tsú Iâ-so͘ Ki-tok ê sù-tô͘ tsá-tsîng só͘ kóng ê uē. 18 In ū kā lín kóng, "Bua̍t-ji̍t ê sî, ū tsi̍t-kuá tsiàu in ka-kī bô kìng-khiân ê su-io̍k tsò tāi-tsì ê lâng ē tshut-hiān, in ài thí-tshiò pa̍t-lâng ê sìn-gióng." 19 Tsiah-ê lâng tsè-tsok hun-tsing, in siū ka-kī ê pún-sìng khòng-tsè, bô kah Sìng-Sîn kiat-liân. 20 M̄-koh lín tsiah-ê hiaⁿ-tī tsí-muē, tio̍h tsiong ka-kī kiàn-li̍p tī tsì-sìng ê sìn-gióng tíng-bīn, tio̍h khò Sìng-Sîn lâi kî-tó. 21 Mā tio̍h kè-sio̍k sing-ua̍h tī Siōng-Tsú ê thiàⁿ lāi-bīn, gióng-bōng lán ê Tsú Iâ-so͘ Ki-tok ê liân-bín, ti̍t-kàu tit-tio̍h íng-uán ê ua̍h-miā. 22 Lín tio̍h liân-bín hiah-ê ū giâu-gî-sim ê lâng. 23 Ū tsi̍t-kuá lâng, lín tio̍h tuì hué-tiong kā in kiù tshut-lâi; koh ū tsi̍t-kuá lâng, lín tio̍h kín-sīn lâi kā in liân-bín, liân in hō͘ tsîng-io̍k bak lah-sap ê saⁿ-khò͘ mā tio̍h thó-ià.

Siōng-tsàn
24 Siōng-Tsú ē pó-siú lín bē tuī-lo̍h, mā hō͘ lín bô khuat-tiám, huaⁿ-huaⁿ hí-hí khiā tī I îng-kng ê bīn-tsîng. 25 Guān to̍k-it ê Siōng-Tsú lán ê Kiù-Tsú, thong-kuè lán ê Tsú Iâ-so͘ Ki-tok, tit-tio̍h îng-kng, ui-giâm, kuân-lîng, khuì-la̍t, tuì bān-sè í-tsîng kàu hiān-kim, ti̍t-kàu íng-uán. Amen!