《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第一章

作者 巴克禮普世版小組 2017.01.09

1 Tse sī Iâ-so͘ Ki-tok ê khé-sī. Siōng-Tsú hō͘ Ki-tok tsit-ê khé-sī, ài tsiong liâm-piⁿ it-tīng ē huat-sing ê tāi-tsì tsí-sī Siōng-Tsú ê lô͘-po̍k. Ki-tok ū tshe-khián I ê thiⁿ-sài khì tsí-sī Siōng-Tsú ê lô͘-po̍k Iok-hān. 2 Iok-hān tsiong só͘ khuàⁿ-tio̍h kuan-hē Siōng-Tsú ê sìn-sit kah Iâ-so͘ Ki-tok ê kiàn-tsìng tuì só͘-ū ê lâng tsò-tsìng. 3 Tha̍k tsit-pún tsheh kah thiaⁿ hiah-ê ī-giân koh tsun-siú kî-tiong só͘ kì-tsài ê lâng tsin ū hok-khì, in-uī ìng-giām tsiah-ê tāi-tsì ê ji̍t-kî teh-beh kàu à.

Tuì Tshit-king Kàu-huē Tshíng-an
4 Guá, Iok-hān siá-phue kià hō͘ A-se-a-síng ê tshit-king kàu-huē. Guān hiān-tsāi tsûn-tsāi, tsá-tsîng tsûn-tsāi, tsiong-lâi mā tsûn-tsāi ê Siōng-Tsú, kah I tsō-uī tsîng tshit-ê sîn-lîng, í-ki̍p Iâ-so͘ Ki-tok sù lín un-tián kah pîng-an. 5 Ki-tok sī tiong-si̍t ê kiàn-tsìng-jîn, thâu tsi̍t-ê tuì sí-lâng-tiong koh-ua̍h, sī tē-tsiūⁿ bān-ông ê Tsú-tsáiⁿ. 6 Ki-tok thiàⁿ lán, uī-tio̍h lán lâu-hueh hi-sing lâi tháu-pàng lán thuat-lī lán ê tsuē, mā hō͘ lán tsiâⁿ-tsò kok-tō͘, tsò tsè-si lâi ho̍k-sāi I ê Thiⁿ-Pē Siōng-Tsú. Guān îng-kng kah kuân-lîng kui tī Iâ-so͘ Ki-tok, kàu tāi-tāi bô-tsīn. Amen! 7 Lí khuàⁿ, Ki-tok tsē hûn teh lâi, tsìng-lâng ē khuàⁿ-tio̍h I. Liân īng tshiuⁿ tsha̍k I ê lâng mā ē khuàⁿ-tio̍h I. Tē-tsiūⁿ bān-bîn lóng ē in-uī I ê tsài-lîm lâi hué-kái thî-khàu. It-tīng ē án-ne huat-sing. Amen! 8 Tsú Siōng-Tsú kóng, "Guá sī khí-thâu-ê(α) koh sī kiat-bué-ê(Ω), hiān-tsāi tsûn-tsāi, tsá-tsîng tsûn-tsāi, tsiong-lâi mā tsûn-tsāi ê, sī tsuân-lîng-.ê."

Ki-tok Tuì Iok-hān Hián-hiān
9 Guá, Iok-hān sī lín ê hiaⁿ-tī, kah lín tsò-hué ū hun-tam Iâ-so͘ ê khó͘-lān kah thun-lún, koh ū-hūn tī I ê kok-tō͘. Uī-tio̍h thuân Siōng-Tsú ê sìn-sit kah kiàn-tsìng Iâ-so͘ ê hok-im, guá bat tuà tī tsi̍t-ê miâ-kiò Pua̍t-mô͘ ê hái-tó. 10 Ū tsi̍t-ê Tsú-ji̍t, guá hō͘ Sìng-Sîn kám-tōng, thiaⁿ-tio̍h tī guá ê āu-bīn ū tshin-tshiūⁿ la-pa ê tuā-siaⁿ, 11 kóng, "Lí tio̍h tsiong só͘ khuàⁿ-tio̍h ê siá-tsò tsheh, kià hō͘ hit tshit-king kàu-huē, tsiū-sī Í-hut-só͘, Sū-muí-ná, Pia̍t-ka-mô͘, Tshui-ngá-tshui-lat, Sat-ti̍k, Hui-lia̍p-thiat-hui, Ló-tí-ka." 12 Guá ua̍t-tńg-sin siūⁿ-beh khuàⁿ kah guá kóng-uē ê sī siáⁿ-lâng, kiat-kó khuàⁿ-tio̍h tshit-ki kim ting-tâi. 13 Ting-tâi ê tiong-ng ū tsi̍t-uī tshin-tshiūⁿ Jîn-tsú, tshīng tsi̍t-niá tn̂g-phàu, hing-khám hâ kim-tuà. 14 I ê thâu-mn̂g pe̍h kah ná tshin-tshiūⁿ iûⁿ-mî á-sī seh, I ê ba̍k-tsiu tshin-tshiūⁿ hué-iām. 15 I ê kha tshin-tshiūⁿ kuè hué-lô͘ thuàn-liān koh buâ-kuè ê tâng hiah-ni̍h kim. I ê siaⁿ tshin-tshiūⁿ tuā-tsuí-tshiâng ê hiáng-siaⁿ. 16 Tī I ê tsiàⁿ-tshiú ū tshit-lia̍p tsheⁿ, I ê tshuì thò͘-tshut siang-bīn-lāi ê kiàm, I ê bīn-māu huat-kng tshin-tshiūⁿ tiong-tàu-sî ê ji̍t-thâu hiah kng. 17 Guá tsi̍t-ē khuàⁿ-tio̍h I tsiū kah-ná sí-lâng phak tī I ê kha-tsîng. I īng tsiàⁿ-tshiú huāⁿ guá, kóng, "M̄-bián kiaⁿ, Guá sī khí-thâu-ê, mā-sī kiat-bué-ê. 18 Guá sī Hit-uī íng-uán ua̍h-teh-.ê. Guá bat sí, taⁿ Guá ua̍h-teh koh ē ua̍h kàu bān-sè-tāi. Guá tsiáng-kuán sí-bông kah im-hú ê só-sî. 19 Só͘-í lí tio̍h tsiong só͘ khuàⁿ-tio̍h-.ê, hiān-kim só͘ teh huat-sing ê, kah tsiong-lâi ē huat-sing ê tāi-tsì lóng siá lo̍h-lâi. 20 Lí só͘ khuàⁿ-tio̍h guá tsiàⁿ-tshiú hit tshit-lia̍p tsheⁿ kah tshit-ki kim ting-tâi ê ò-biāu sī án-ne: tshit-lia̍p tsheⁿ sī tshit-king kàu-huē ê sù-tsiá, tshit-ki ting-tâi sī tshit-king kàu-huē."