《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第二章

作者 巴克禮普世版小組 2017.01.16

Siá Hō͘ Í-hut-só͘ Kàu-huē ê Phue
1 " Lí tio̍h siá phue hō͘ Í-hut-só͘ kàu-huē ê sù-tsiá kā in kóng, tsiàⁿ-tshiú tháⁿ tshit-lia̍p tsheⁿ, tī tshit-ki kim-ting-tâi tiong-ng teh kiâⁿ hit-uī án-ne kóng: 2 Guá tsai lí ê só͘-tsò kah lí ê lô-khó͘ í-ki̍p thun-lún, lí mā bē iông-ín hiah-ê tsò-pháiⁿ ê lâng, lí mā ū khó-giām hiah-ê ka-kī kóng sī sù-tô͘ kî-si̍t m̄-sī ê lâng, khuàⁿ-tshut in sī teh kóng pe̍h-tsha̍t. 3 Lí ū thun-lún, bat uī-tio̍h Guá ê miâ jím-siū khó͘-lān lóng bô ià-siān. 4 M̄-koh ū tsi̍t-hāng tāi-tsì Guá tio̍h kā lí tsik-pī, tsiū-sī lí í-king khì-sak tong-tsho͘ tuì Guá ê thiàⁿ. 5 Só͘-í lí tio̍h ē-kì-tit lí tuì tó-uī pua̍h-tó, tio̍h hué-kái, huê-ho̍k lí khí-thâu thiàⁿ ê kiâⁿ-ta̍h. Nā bô, Guá ē khì lí hia, tsiong lí ê ting-tâi suá-tsáu. 6 M̄-koh lí iáu-ū tsi̍t-hāng khó-tshú ê tāi-tsì, tsiū-sī lí mā kah Guá kāng-khuán uàn-hūn kin-tuè Nî-ko-lia̍p hit-tīn lâng tsò ê tāi-tsì. 7 Ū hīⁿ-khang ê lâng tio̍h thiaⁿ Sìng-Sîn kā tsiah-ê kàu-huē só͘ kóng ê uē: "Guá beh hō͘ tik-sìng ê lâng tsia̍h Siōng-Tsú ê lo̍k-hn̂g-tiong hit-tsâng ua̍h-miā-tshiū ê kué-tsí."

Siá Hō͘ Sū-muí-ná Kàu-huē ê Phue
8 " Lí tio̍h siá-phue hō͘ Sū-muí-ná kàu-huē ê sù-tsiá kā in kóng, khí-thâu-ê kah kiat-bué-ê, tuì sí-lâng-tiong koh-ua̍h ê Hit-uī án-ne kóng: 9 Guá tsai lí ê khó͘-lān kah sàn-tshiah, kî-si̍t lí sī hó-gia̍h. Guá mā tsai lí ū siū tsū-tshing Iû-thài-lâng hiah-ê lâng huí-pòng. Kî-si̍t in m̄-sī Iû-thài-lâng, in sio̍k Sat-tàn ê tsi̍p-thuân. 10 M̄-bián kiaⁿ lí teh-beh siū ê khó͘-lān. Lí khuàⁿ, Mô͘-kuí beh tsiong lín tiong-kan kuí-nā lâng kuaiⁿ lo̍h-kaⁿ, kā lín khó-giām, lín ē siū khó͘-lān tsa̍p-ji̍t kú. Lí tio̍h tsīn-tiong kàu sí, Guá ē siúⁿ-sù lí ua̍h-miā ê îng-kuan. 11 Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē só͘ kóng ê uē: "Tik-sìng ê lâng it-tīng bē siū-tio̍h tē-jī pái sí-bông ê tsai-hāi."

Siá Hō͘ Pia̍t-ka-mô͘ Kàu-huē ê Phue
12 " Lí tio̍h siá-phue hō͘ Pia̍t-ka-mô͘ kàu-huē ê sù-tsiá kā in kóng, ū siang-bīn-lāi ê kiàm Hit-uī án-ne kóng: 13 Guá tsai lí só͘ tuà ê só͘-tsāi tsiū-sī Sat-tàn ê tsō-uī hia, lí tshî-siú Guá ê miâ, sīm-tsì Guá tiong-si̍t ê kiàn-tsìng-jîn An-thê-phàⁿ tī Mô͘-kuí ê tē-puâⁿ hō͘ lâng sat-hāi, lí mā bē hòng-khì tuì Guá ê sìn-sim. 14 M̄-koh Guá ū kuí-nā hāng tāi-tsì beh kā lí tsik-pī, in-uī tī lí hia ū-lâng tshî-siú Pa-lân ê kà-sī. Tsit-ê Pa-lân bat kà-sī Pa-li̍k khì bê-hi̍k Í-sik-lia̍t ê kiáⁿ-sun, hō͘ in tsia̍h tsè ngó͘-siōng ê mi̍h, koh kiâⁿ kan-îm. 15 Tshin-tshiūⁿ án-ne, lí hia mā ū-lâng tshî-siú Nî-ko-liap8e5 kà-sī. 16 Só͘-í tio̍h hué-kái, nā bô Guá liâm-piⁿ ē kàu lí hia, īng Guá tshuì-lāi ê kiàm kah in kau-tsiàn. 17 "Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē só͘ kóng ê uē: Tik-sìng ê lâng, Guá beh tsiong pó-tsûn khí-lâi ê má-ná hō͘ i. Guá mā beh hō͘ i tsi̍t-tè pe̍h-tsio̍h, tsio̍h ê tíng-bīn khik sin ê miâ. Niá-siū ê lâng í-guā bô-lâng bat tsit-ê miâ."

Siá Hō͘ Tshui-ngá-tshui-lat Kàu-huē ê Phue
18 " Lí tio̍h siá-phue hō͘ Tshui-ngá-tshui-lat kàu-huē ê sù-tsiá kā in kóng, Siōng-Tsú ê Kiáⁿ, tsiū-sī ba̍k-tsiu tshin-tshiūⁿ hué-iām, kha tshin-tshiūⁿ kim-siak-siak ê tâng Hit-uī án-ne kóng: 19 Guá tsai lí ê kiâⁿ-ta̍h, lí ê thiàⁿ, sìn-sim, ho̍k-sāi kah thun-lún. Guá mā tsai lí tsuè-kīn teh tsò ê tāi-tsì pí khí-thâu ê khah tsē. 20 M̄-koh ū tsi̍t-hāng tāi-tsì guá tio̍h kā lí tsik-pī, tsiū-sī lí iông-ín hit-ê tsū-tshing tsò sian-ti ê tsa-bó͘-lâng Iâ-sé-piat. I kà-sī koh bê-hi̍k Guá hiah-ê lô͘-po̍k khì kiâⁿ kan-îm koh tsia̍h tsè ngó͘-siōng ê mi̍h. 21 Guá hō͘ i ū ki-huē thang hué-kái, m̄-koh i bô beh hué-kái, kè-sio̍k i ê îm-luān. 22 Guá beh hō͘ i phuà-pēⁿ tó tī bîn-tshn̂g. Hiah-ê kah i kiâⁿ kan-îm ê lâng nā bô hué-kái thîng-tsí kah i ê îm-luān, Guá mā beh hō͘ in siū tuā tsai-lān. 23 Guá beh īng sí-bông lâi siau-bia̍t hiah-ê kin-tuè Iâ-sé-piat ê lâng, án-ne tsiah-ê kàu-huē lóng ē tsai Guá ū-teh kàm-tshat lâng ê sim-tn̂g, mā beh tsiàu lín ta̍k-lâng ê só͘ kiâⁿ kā lín pò-ìng. 24 "M̄-koh lín tī Tshui-ngá-tshui-lat kî-tha bô sîng-siū tsit-tsióng kà-sī, mā m̄-bat in só͘ kóng kuan-hē Sat-tàn ê ò-pì ê lâng, Guá kā lín kóng, Guá bē ke-thiⁿ pa̍t-khuán tāng-tàⁿ hō͘ lín. 25 M̄-koh lín tio̍h tshî-siú lín só͘ ū ê, ti̍t-kàu Guá tsài-lîm. 26 Tik-sìng koh kè-sio̍k tsun-siú Guá ê bīng-līng ti̍t-kàu lō͘-bué ê lâng, Guá beh hō͘ i ū kuân-pìng thang tī-lí bān-kok. 27 I beh īng thih-kuái kā in kuán-hat, tshin-tshiūⁿ kā huî-khì kòng-tshuì. Guá mā ū án-ne tuì Guá ê Thiⁿ-Pē niá-siū kuân-pìng. 28 Guá mā beh īng khé-bîng-tsheⁿ hō͘ tik-sìng ê lâng. 29 "Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē só͘ kóng ê uē."