《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第三章

作者 巴克禮普世版小組 2017.01.23

Siá Hō͘ Sat-ti̍k Kàu-huē ê Phue
1 " Lí tio̍h siá phue hō͘ Sat-ti̍k kàu-huē ê sù-tsiá kā in kóng: Ū Siōng-Tsú tshit-ê sîn-lîng kah tshit-lia̍p tsheⁿ ê Hit-uī án-ne kóng: Guá tsai lí ê só͘-tsò, bîng-gī-siōng lí sī teh-ua̍h, kî-si̍t sī sí-khì. 2 Lí tio̍h kíng-síng, kian-kò͘ hiah-ê teh-beh sí-khì ê khuì-si-á, in-uī Guá khuàⁿ-tio̍h lí ê hîng-uî, tī Guá Siōng-Tsú ê bīn-tsîng iáu-buē uân-tsuân. 3 Só͘-í lí tio̍h ē-kì-tit lí só͘ niá-siū kah só͘ thiaⁿ-tio̍h-.ê, koh tio̍h tsip-siú, mā tio̍h hué-kái. Nā m̄ kíng-síng, Guá ē tshin-tshiūⁿ tsha̍t-á lâi lí hia, lí it-tīng m̄-tsai Guá sím-mi̍h-sî ē lâi-kàu lí hia. 4 M̄-koh tī Sat-ti̍k iáu-ū tsi̍t-kuá lâng kā in ê saⁿ-khò͘ pó-tshî kah tsin tshing-khì. In ē tshīng pe̍h-saⁿ kah Guá tsò-hué sì-kè kiâⁿ, in-uī in ē-kham-tit. 5 Tik-sìng ê lâng mā ē án-ne tshīng pe̍h-saⁿ. Guá tsua̍t-tuì bē kā i ê miâ tuì ua̍h-miā-tsheh tshat-siau. Guá ē tī Guá ê Thiⁿ-Pē kah I hiah-ê thiⁿ-sài ê bīn-tsîng kong-khai sîng-jīn i ê miâ. 6 Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē kóng ê uē.

Siá Hō͘ Hui-la̍h-thiat-hui Kàu-huē ê Phue
7 " Lí tio̍h siá phue hō͘ Hui-lia̍p-thiat-hui kàu-huē ê sù-tsiá kā in kóng: Sìng-kiat koh tsin-si̍t, tsiáng-kuán Tāi-pi̍t ê só-sî, khui tsiū bô-lâng ē-tàng kuaiⁿ, kuaiⁿ tsiū bô-lâng ē-tàng khui ê Hit-uī án-ne kóng: 8 Guá tsai lí ê só͘-tsò, lí khuàⁿ, Guá í-king tī lí ê bīn-tsîng kā lí khui tsi̍t-ê mn̂g, sī bô-lâng ē-tàng kuaiⁿ-.ê. Guá mā tsai lí kan-taⁿ ū tām-po̍h-á khuì-la̍t khiok ū tsun-siú Guá ê tō-lí, m̄-bat hó͘ⁿ-jīn Guá ê miâ. 9 Lí khuàⁿ, Sat-tàn ê tsi̍p-thuân tsū-tshing sī Iû-thài-lâng kî-si̍t m̄-sī, in sī teh kóng pe̍h-tsha̍t. Guá beh hō͘ in lâi phak tuà lí ê kha-tsîng, koh hō͘ in tsai Guá thiàⁿ lí. 10 In-uī lí ū tsun-siú Guá ê tō-lí koh thun-lún kàu kiat-bué, Guá mā beh pó-siú lí thuat-lī hit-ê tshì-thàm ê sî-kî. Tsit-ê sî-kî beh lîm-kàu tsuân sè-kài, lâi khó-giām só͘-ū tuà tī tē-tsiūⁿ ê lâng. 11 Guá liâm-piⁿ kàu. Lí tio̍h tshî-siú só͘-ū ê tō-lí tsiah bián-tit ū-lâng kā lí ê îng-kuan tshiúⁿ-khì. 12 "Tik-sìng ê lâng, Guá beh hō͘ i tsiâⁿ-tsò Guá ê Siōng-Tsú sìng-tiān ê thiāu, íng-uán bē koh tshut-khì. Guá mā beh tsiong Guá ê Siōng-Tsú ê miâ kah tuì thiⁿ-tíng kàng-lo̍h ê Iâ-lō͘-sat-líng-siâⁿ, í-ki̍p Guá ê sin-miâ lóng khik tī i ê sin-tsiūⁿ. 13 "Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē só͘ kóng ê uē."

Siá Hō͘ Ló-tí-ka Kàu-huē ê Phue
14 " Lí tio̍h siá phue hō͘ Ló-tí-ka kàu-huē ê sù-tsiá kā in kóng: Tsò Amen, tsò tiong-sìn tsin-si̍t ê kiàn-tsìng, tsò Siōng-Tsú tsō-huà ê guân-thâu ê Hit-uī án-ne kóng: 15 Guá tsai lí ê só͘-tsò, lí ê sìn-gióng bô sio bô líng. Guá khah ì-ài lí hi̍k-sī sio hi̍k-sī líng. 16 Lí kì-jiân sī lâ-lûn-sio, m̄-tsiâⁿ sio m̄-tsiâⁿ líng, Guá beh kā lí tuì Guá ê tshuì phuì tshut-lâi. 17 In-uī lí kóng, ' Guá sī hó-gia̍h, í-king huat-tsâi, lóng bô khiàm-khueh.' Lí khiok m̄-tsai ka-kī pi-tshám, khó-liân, sàn-tshiah, tsheⁿ-mê koh thǹg-pak-theh. 18 Guá khó͘-khǹg lí, nā beh hó-gia̍h tio̍h tuì guá bé kuè-hué thuàn-liān ê kim, koh bé pe̍h-saⁿ lâi tshīng thang hō͘ lí bē ū thǹg-pak-theh ê kiàn-siàu, koh bé io̍h-ko lâi buah lí ê ba̍k-tsiu thang hō͘ lí ē khuàⁿ-kìⁿ. 19 Tuì guá só͘ thiàⁿ ê lâng, guá lóng kā in tsik-pī kah kuán-kà, só͘-í lín tio̍h jia̍t-sim, tio̍h hué-kái. 20 Guá khiā tī mn̂g-kháu teh phah-mn̂g, thiaⁿ-tio̍h Guá ê siaⁿ lâi khui-mn̂g ê lâng, Guá beh ji̍p-khì in tau kah i tsò-hué tsia̍h-pn̄g, i mā ē kah Guá tsò-hué tsia̍h. 21 "Tik-sìng ê lâng, Guá beh hō͘ i kah Guá tsò-hué tsē tī Guá ê pó-tsō, tshin-tshiūⁿ Guá í-king tik-sìng kah Guá ê Thiⁿ-Pē tsò-hué tsē tī I ê pó-tsō. 22 "Ū hīⁿ-khang ê lâng lóng tio̍h thiaⁿ Sìng-Sîn kā tsiah-ê kàu-huē só͘ kóng ê uē."