《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第四章

作者 巴克禮普世版小組 2017.01.30

Thiⁿ-tíng ê Kìng-pài
1 Jiân-āu guá koh khuàⁿ-tio̍h thiⁿ-tíng ū tsi̍t-ê mn̂g phah-khui, hit-ê tsîng bat tshin-tshiūⁿ la-pa hiáng-siaⁿ tuì guá kóng-uē ê siaⁿ koh tuì guá kóng, "Khí-lâi tsia, Guá beh pò lí khuàⁿ tsiong-lâi it-tīng ē huat-sing ê tāi-tsì." 2 Guá suî-sî siū Sìng-Sîn kám-tōng, hut-jiân khuàⁿ-tio̍h thiⁿ-tíng ū tsi̍t-ê pó-tsō, Tsi̍t-uī tsē tī pó-tsō tíng-bīn. 3 Hit-uī ê bīn tshin-tshiūⁿ phik-gio̍k kah âng-pó-tsio̍h teh huat-kng. Pó-tsō tsiu-uî ū tsi̍t-ê khīng, khuàⁿ khí-lâi ná tshin-tshiūⁿ li̍k-pó-tsio̍h. 4 Tsō-uī ê tsiu-uî ū jī-tsa̍p-sì-ê tsō-uī, tíng-bīn tsē jī-tsa̍p-sì-ê tiúⁿ-ló, tshīng pe̍h-saⁿ, thâu-khak tì kim-sik ê bián-liû. 5 Tuì pó-tsō huat-tshut sih-nà kah tân-luî ê siaⁿ. Pó-tsō tsîng ū tshit-ki ting-hué teh to̍h, tsiū-sī Siōng-Tsú ê tshit-uī sîn-lîng. 6 Pó-tsō tsîng ū tshin-tshiūⁿ tsuí-tsiⁿ hiah tshing ê po-lê-hái. Pó-tsō sì-tsiu-uî ū sì-ê ua̍h-mi̍h, tsîng-āu lóng ū ba̍k-tsiu. 7 Thâu tsi̍t-ê ua̍h-mi̍h tshin-tshiūⁿ sai, tē-jī-ê ua̍h-mi̍h tshin-tshiūⁿ gû-á-kiáⁿ, tē-saⁿ-ê ua̍h-mi̍h ê bīn tshin-tshiūⁿ lâng, tē-sì-ê ua̍h-mi̍h tshin-tshiūⁿ teh pue ê ing. 8 Hit sì-ê ua̍h-mi̍h ta̍k-ê lóng ū la̍k-ki si̍t, tsiu-uî kah lāi-bīn ba̍k-tsiu muá-muá-sī. In mê-ji̍t lóng bô hioh-khùn teh tshiùⁿ, " Sìng-tsài! Sìng-tsài! Sìng-tsài! Tsú Tsuân-lîng ê Siōng-Tsú, Kuè-khì tsûn-tsāi, hiān-tsāi tsûn-tsāi, tsiong-lâi mā íng-uán tsûn-tsāi." 9 Ta̍k-pái ua̍h-mi̍h tsiong îng-kng, tsun-kuì kah kám-siā kui hō͘ tsē tī pó-tsō íng-uán ua̍h-teh Hit-uī ê sî, 10 jī-tsa̍p-sì ê tiúⁿ-ló tsiū phak lo̍h-khì tsē tī pó-tsō Hit-uī ê bīn-tsîng, kìng-pài ua̍h kàu tāi-tāi bô-tsīn ê Hit-uī, koh tsiong in ê bián-liû hiat tī pó-tsō tsîng, kóng, 11 Guán ê Tsú, guán ê Siōng-Tsú, Lí ing-kai tit-tio̍h îng-kng, tsun-kuì kah kuân-lîng, in-uī Lí bat tshòng-tsō bān-bu̍t. Bān-bu̍t ê siū tshòng-tsō kah tsûn-tsāi lóng sī Lí ê tsí-ì.