《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第五章

作者 巴克禮普世版小組 2017.02.06

Tsheh Kah Iûⁿ-ko
1 Guá khuàⁿ-tio̍h tsē tī pó-tsō Hit-uī ê tsiàⁿ-tshiú the̍h tsi̍t-kńg tsheh, lāi-guā-bīn lóng ū bûn-jī, īng tshit-ê ìn hong-teh. 2 Guá koh khuàⁿ-tio̍h tsi̍t-ê ū kuân-lîng ê thiⁿ-sài tuā-siaⁿ suan-pò͘ kóng, "Siáⁿ-lâng ū tsu-keh thang thiah-khui hit-ê hong-ìn, hian-khui hit-kńg tsheh?" 3 Tī thiⁿ-tíng, tē-tsiūⁿ kah tē-hā lóng bô-lâng ē-tàng hian-khui á-sī tha̍k hit-kńg tsheh. 4 Tshuē bô-lâng ē-tàng hian-khui á-sī tha̍k hit-kńg tsheh, guá tsiū tuā-siaⁿ khàu. 5 Hiah-ê tiúⁿ-ló tiong-kan ê tsi̍t-ê tuì guá kóng, "M̄-thang khàu, lí khuàⁿ! Tuì Iû-tāi tsi-tso̍k tshut-lâi ê sai, Tāi-pi̍t ê kin-thâu. I í-king tik-sìng thang thiah-khui hit-ê hong-ìn, hian-khui hit-kńg tsheh. 6 Jiân-āu guá khuàⁿ-tio̍h hō͘ sì-ê ua̍h-mi̍h kah hiah-ê tiúⁿ-ló uî-teh ê pó-tsō tsîng ū tsi̍t-tsiah Iûⁿ-ko khiā-teh. Iûⁿ-ko ná tshin-tshiūⁿ bat siū sat-hāi, ū tshit-ki kak, tshit-luí ba̍k-tsiu, tsiū-sī siū Siōng-Tsú tshe-phài khì tsuân sè-kài hit tshit-ê sîn-lîng. 7 Iûⁿ-ko tsiū kiâⁿ tsìn-tsîng, tuì tsē tī pó-tsō Hit-uī ê tsiàⁿ-tshiú the̍h hit-kńg tsheh. 8 Iûⁿ-ko the̍h-tio̍h hit-kńg tsheh ê sî, hit sì-ê ua̍h-mi̍h kah jī-tsa̍p-sì-ê tiúⁿ-ló lóng phak tī Iûⁿ-ko ê bīn-tsîng, ta̍k-ê ū the̍h khîm kah té hiuⁿ muá-muá ê kim-lô͘. Hiah-ê hiuⁿ tsiū-sī Siōng-Tsú tsú-bîn ê kî-tó. 9 In gîm tsi̍t-siú sin ê si, kóng, "Lí ū tsu-keh the̍h hit-kńg tsheh, thiah-khui i ê hong-ìn, in-uī Lí ū siū sat-hāi, īng Lí ê hueh tuì kok tso̍k-kûn, kok-tsióng gí-giân, kok bîn-tso̍k, kok-kok ê lâng sio̍k-huê lâi kui Siōng-Tsú. 10 Lí hō͘ in tsiâⁿ-tsò kok-tō͘ kah tsè-si lâi ho̍k-sāi Siōng-Tsú. In mā ē tī tē-tsiūⁿ tsiáng-kuân. 11 Guá koh siông-sè khuàⁿ, thiaⁿ-tio̍h tshing-tshing bān-bān thiⁿ-sài ê siaⁿ. In lóng uî tī pó-tsō kah ua̍h-mi̍h í-ki̍p tiúⁿ-ló ê sì-tsiu-uî, 12 tuā-siaⁿ kóng, "Siū sat-hāi ê Iûⁿ-ko ing-kai tit-tio̍h kuân-lîng, hù-jū, tì-huī, khuì-la̍t, tsun-kuì, îng-kng kah o-ló!" 13 Guá koh thiaⁿ-tio̍h thiⁿ-tíng, tē-tsiūⁿ, tē-hā kah hái-ni̍h it-tshè siū-tsō ê mi̍h, í-ki̍p kî-tiong ê bān-bu̍t lóng gîm-si kóng, "Guān O-ló, tsun-kuì, îng-kng kah kuân-sè lóng kui hō͘ tsē tī pó-tsō Hit-uī kah Iûⁿ-ko, it-ti̍t kàu tāi-tāi bô tsīn!" 14 Hit sì-ê ua̍h-mi̍h ìn kóng, "Amen!" Hiah-ê tiúⁿ-ló tsiū phak lo̍h-khì kìng-pài.