《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第24章

作者 巴克禮普世版小組 2011.09.11

1, Iâ-so͘ tshut tiān, tú teh kiâⁿ, I ê bûn-tô͘ tsiū-kūn I, īng tiān-tn̂g hiah-ê tshù pò I khuàⁿ.
2, Tān-sī I ìn kóng, Lín bô khuàⁿ-tio̍h tsiah-ê mah? guá si̍t-tsāi kā lín kóng, Tī tsia bueh bô tsi̍t tè tsio̍h lâu tī tsio̍h tíng, iā bô tshia-lo̍h-khì.
3, Iâ-so͘ tsē tī Kaⁿ-ná suaⁿ ê sî, bûn-tô͘ su-khia tsiū-kūn I kóng, Tshiáⁿ kā guán kóng, tī-sî ū tsiah-ê tāi-tsì? iā lí koh lâi, kap sè-kài ê kiat-kio̍k ū sím-mi̍h tiāu-thâu?
4, Iâ-so͘ ìn kóng, Tio̍h kín-sīn, bo̍h-tit hō͘ lâng bê-hi̍k.
5, In-uī bueh ū tsē-tsē lâng tī guá ê miâ lâi, kóng, Guá sī Ki-tok, lâi bê-hi̍k tsē-tsē lâng.
6, Lín bueh thiaⁿ-tio̍h kau-tsiàn kap kau-tsiàn ê hong-siaⁿ, kín-sīn m̄-bián kiaⁿ; in-uī tsiah-ê tik-khak ū, tān-sī bua̍t-kî iáu-bē kàu.
7, In-uī jîn-bîn bueh khí-lâi kong-kik jîn-bîn, kok bueh khí-lâi kong-kik kok; tsē-tsē só͘-tsāi bueh ū ki-hng, tē-tāng.
8, Tsiah-ê lóng sī khó͘-thàng ê khí-thâu.
9, Hit sî lâng bueh kau-hù lín tī huān-lān, thâi-sí lín. Lín in-uī guá ê miâ bueh hō͘ bān pang uàn-hūn.
10, Iā hit sî tsē-tsē lâng bueh siū that-gāi, saⁿ ké-sàng, saⁿ uàn-hūn.
11, Koh ū tsē-tsē ké sian-ti bueh khí-lâi bê-hi̍k tsē-tsē lâng.
12, In-uī put-huat tuā-tuā ke-thiⁿ, tsē-tsē lâng ê thiàⁿ tsiām-tsiām líng-tām.
13, Tsí-ū thun-lún kàu lō͘-bé ê, i ē tit-tio̍h kiù.
14, Tsit-ê Thian-kok ê hok-im bueh thuân kàu tsuân thiⁿ-ē, tsò kiàn-tsìng tī bān pang; hit sî bua̍t-kî tsiū kàu.
15, Só͘-í lín khuàⁿ-tio̍h tsá thok sian-ti Tàn-í-lí só͘ kóng, hit ê tsân-hāi khó-ò͘ⁿ ê khiā tī sìng ê só͘-tsāi, (tha̍k ê lâng tio̍h hiáu-ngō͘),
16, hit sî tī Iû-thài ê tio̍h tsáu-khì suaⁿ-ni̍h;
17, tī tshù-tíng ê bo̍h-tit lo̍h-lâi the̍h i ke-lāi ê mi̍h;
18, tī hn̂g-ni̍h ê bo̍h-tit tńg-khì hiaⁿh i ê saⁿ.
19, Tng hiah-ê ji̍t, ū sin-īn kap hō͘ eⁿ-á tsia̍h lin ê hū-jîn-lâng ū tsai-ē ah!
20, Lín tio̍h kî-tó, bián-tit lín ê tô-tsáu tī tang-thiⁿ sî, á-sī an-hioh-ji̍t.
21, In-uī hit sî bueh ū tuā huān-lān, tuì sè-kan ê khí-thâu kàu taⁿ bē bat ū án-ne; āu-lâi iā tsua̍t-tuì bô.
22, Nā bô kiám-tsió hiah-ê ji̍t, tsiū huān ū jio̍k-thé ê bô tsi̍t-ê tit kiù, tsí-ū uī-tio̍h kíng ê jîn-bîn, hiah-ê ji̍t bueh kiám-tsió.
23, Hit sî nā ū lâng kā lín kóng, Lí khuàⁿ, Ki-tok tī tsia, á-sī kóng, Tī hia, lín bo̍h-tit sìn.
24, In-uī bueh ū ké Ki-tok, ké sian-ti khí-lâi kiâⁿ tuā ê sîn-jiah kap tiāu-thâu; bueh sī uē, liân kíng ê jîn-bîn iā bê-hi̍k i.
25, Guá í-king tāi-sing kā lín kóng.
26, Só͘-í lâng nā kā lín kóng, Lí khuàⁿ, I sī tī khòng-iá, lín bo̍h-tit tshut-khì; á-sī kóng, Lí khuàⁿ, I sī tī ba̍t tshù, lín bo̍h-tit sìn.
27, In-uī tshin-tshiūⁿ sih-nà tuì tang-sì teh sih, nā kàu sai-sì, Jîn-tsú ê koh lâi iā bueh án-ne.
28, Sin-si nā tī hia, ing-tsiáu iā bueh tsū-tsi̍p tī hia.
29, Tú-tú tsiah-ê ji̍t ê huān-lān liáu-āu, ji̍t bueh o͘-àm, ge̍h bô tshut kng, tsheⁿ tuì thiⁿ ka-la̍uh, thiⁿ-siōng tín-tāng.
30, Hit sî Jîn-tsú ê tiāu-thâu bueh tshut-hiān tī thiⁿ-tíng; tī tē-ni̍h tsiah-ê tso̍k-luī lóng bueh thî-khàu, iā bueh khuàⁿ-tio̍h Jîn-tsú īng kuân-lîng kap tuā îng-kng tsē thiⁿ ê hûn lîm-kàu.
31, I bueh tshe I ê thiⁿ-sài, īng hō-thâu hiáng-liāng ê siaⁿ, in bueh tuì sì-hng tsit pîng ê thiⁿ-piⁿ kàu hit pîng ê thiⁿ-piⁿ, tsū-tsi̍p I só͘ kíng ê jîn-bîn.
32, Lín tio̍h tuì bû-hua-kó tshiū tshú phì-jū; tng i ki nńg hio̍h huat ê sî, tsiū tsai hē-thiⁿ kūn à.
33, Án-ne, lín khuàⁿ lóng-tsóng tsiah-ê sū, tsiū tsai í-king kūn, kàu mn̂g-kháu à.
34, Guá si̍t-tsāi kā lín kóng, Tsit sè-tāi tsua̍t-tuì bē kè-khì, kàu tsiah-ê tāi-tsì lóng tsiâⁿ.
35, Thiⁿ kap tē bueh huè-tû, guá ê ē bē huè-tû.
36, Tān-sī lūn hit ji̍t, hit sî, lâng m̄ tsai, thiⁿ-sài iā m̄ tsai, Kiáⁿ iā m̄ tsai, tsí-ū Pē tsai nā-tiāⁿ.
37, Koh tshin-tshiūⁿ Ná-a ê ji̍t, Jîn-tsú ê koh lâi iā bueh án-ne.
38, In-uī tuā tsuí ê tāi-sing hiah-ê ji̍t, lâng teh lim-tsia̍h, kè-tshuā, kàu Ná-a ji̍p tuā tsûn ê ji̍t,
39, in kìng-jiân m̄ tsai, kàu tuā tsuí kàu, tsuân-pō͘ bia̍t in, Jîn-tsú ê koh lâi iā bueh án-ne.
40, Hit sî bueh ū nn̄g lâng tī hn̂g-ni̍h, tsi̍t-ê tshú-khì, tsi̍t-ê pàng-teh.
41, Nn̄g ê hū-jîn-lâng ue bō, tsi̍t-ê tshú-khì, tsi̍t-ê pàng-teh.
42, Só͘-í tio̍h tiuⁿ-tî, in-uī lín m̄ tsai lín ê Tsú sím-mi̍h ji̍t bueh lâi.
43, Ke-tsú nā tsai tsha̍t sím-mi̍h kiⁿ bueh kàu, i tsiū tiuⁿ-tî, bô iông-ún lâng iah khang i ê tshù, tse sī lín só͘ tsai.
44, Só͘-í lín iā tio̍h tsún-pī piān; in-uī lín bô phah-sǹg ê sî, Jîn-tsú lâi à.
45, Tsī-tsuī sī tsīn-tiong tì-huī ê lô͘-po̍k, tsú-lâng só͘ siat-li̍p lâi kuán i ke-lāi ê lâng, thang tsiàu sî pun bí-niû hō͘ in.
46, Tsú-lâng lâi, tú-tio̍h i án-ne kiâⁿ, hit ê lô͘-po̍k ū hok-khì.
47, Guá si̍t-tsāi kā lín kóng, tsú-lâng bueh siat-li̍p i lâi kuán i it-tshè só͘ ū ê.
48, Tsí-ū hit ê pháiⁿ ê lô͘-po̍k, nā sim-lāi kóng, Guá ê tsú-lâng teh iân-tshiân;
49, tsiū phah hiah-ê kap i tâng tsò lô͘-po̍k ê, koh kap tsuì-hàn saⁿ-kap lim-tsia̍h,
50, tsiū tī bô phài-phe ê ji̍t, m̄ tsai ê sî, hit ê lô͘-po̍k ê tsú-lâng bueh kàu.
51, tāng-tāng kā i hîng-hua̍t, hō͘ i kap ké-hó ê lâng tú-tio̍h kāng-khuán ê miā-ūn, tī hia bueh ū thî-khàu kā-gê tshiat-khí.