《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二章

作者 巴克禮普世版小組 2013.04.21

Iâ-so͘ ê tshut-sì (Mt 1:18-25)
1 Hit sî, Lô-má hông-tè A-kó͘-sū-tok ū pan-pò͘ tsiàu-līng, kiò tsuân-kok ê jîn-bîn lóng tio̍h ting-kì hō͘-kháu. 2 Tsit-ê thâu tsi̍t pái ê hō͘-kháu phó͘-tsa, sī Ku-lí-liú tsò Sū-lī-a tsóng-tok ê sî si̍t-si ê. 3 Só͘-í ta̍k-lâng lóng tio̍h khì ka-kī ê kò͘-hiong ting-kì hō͘-kháu. 4 Iok-sik tuì Ka-lī-lī-síng ê Ná-sat-li̍k siâⁿ, tsiūⁿ-khì Iû-thài-síng ê Pik-lī-hîng-siâⁿ, tsiū-sī Tāi-pi̍t tshut-sì ê siâⁿ, in-uī Iok-sik sio̍k Tāi-pi̍t ê ke, sī Tāi-pi̍t ê sè-hē. 5 Iok-sik beh kah i só͘ phìng-tiāⁿ ê Má-lī-a, tsò-hué ting-kì hō͘-kháu. Hit sî, Má-lī-a í-king ū sin-īn ā. 6 In tī hia ê sî, Má-lī-a sing-sán ê kî kàu. 7 Tsiū seⁿ thâu-the ê tsa-po͘-kiáⁿ. I īng pò͘ kā I pau, hō͘ I khùn tuà bé-tsô-ni̍h; in-uī kheh-kuán bô só͘-tsāi thang hō͘ in tuà.

Bo̍k-tsiá Kah Thiⁿ-sài
8 Hit tē-hng ū kò͘-iûⁿ ê lâng tuà tī suaⁿ-ni̍h, àm-sî lûn-liû kò͘ in ê iûⁿ-kûn. 9 Ū tsi̍t-uī Tsú ê thiⁿ-sài tshut-hiān tī in ê sin-piⁿ, Tsú ê îng-kng sì-bīn teh kā in tsiò, in tuā tio̍h-kiaⁿ. 10 Thiⁿ-sài kā in kóng, " M̄-bián kiaⁿ! guá pò lín tsi̍t-ê bān-bîn lóng tuā huaⁿ-hí ê hó siau-sit. 11 Kin-á-ji̍t tī Tāi-pi̍t ê siâⁿ, ū tsi̍t-uī Kiù-Tsú uī-tio̍h lín tshut-sì, tsiū-sī Tsú Ki-tok. 12 Lín ē khuàⁿ-tio̍h tsi̍t-ê eⁿ-á īng pò͘ pau, khùn tī tsô-ni̍h, tsit-ê tsiū-sī hō͘ lín tsò kì-hō." 13 Hut-jiân ū tsin-tsē thian-ping kah hit-ê thiⁿ-sài, tsò-hué teh o-ló Siōng-Tsú, kóng, 14 " Guān îng-kng kui tī tsì-kuân ê Siōng-Tsú, Guān I sù hô-pîng hō͘ I só͘ huaⁿ-hí ê lâng." 15 Tsiah-ê thiⁿ-sài lī-khui in beh tsiūⁿ-thiⁿ ê sî, kò͘-iûⁿ ê lâng tsò-hué kóng, " Taⁿ lán lâi khì Pik-lī-hîng-siâⁿ, khuàⁿ Tsú pò lán tsai só͘ huat-sing ê tāi-tsì." 16 In tsiū kuáⁿ-kín khì, tshuē-tio̍h Má-lī-a kah Iok-sik, koh khuàⁿ-tio̍h eⁿ-á khùn tī bé-tsô-ni̍h. 17 In khuàⁿ liáu, tsiū kā thiⁿ-sài tuì in só͘ kóng tsit-ê eⁿ-á ê tāi-tsì, pò hō͘ lâng tsai. 18 Thiaⁿ-tio̍h ê lâng lóng kám-kak tsin kî-kuài. 19 M̄-koh Má-lī-a kā tsiah-ê uē kì tiâu-tiâu, sim-lāi siông-siông teh siūⁿ. 20 Kò͘-iûⁿ ê lâng tńg-khì, uī-tio̍h só͘ thiaⁿ-tio̍h kah só͘ khuàⁿ-tio̍h ê tāi-tsì, lóng kah thiⁿ-sài só͘ kóng ê uân-tsuân kāng-khuán, tsiū tsiong îng-kng kah o-ló kui hō͘ Siōng-Tsú.

Kā Iâ-so͘ Hō-miâ
21 Kàu eⁿ-á tshut-sì āu tē-peh ji̍t, kā eⁿ-á kiâⁿ kat-lé ê ji̍t kàu, tsiū kā I hō-miâ kiò-tsò Iâ-so͘. Tsit-ê miâ sī Má-lī-a iáu-buē huâi-īn ê sî, thiⁿ-sài kā I hō ê.

Phō Iâ-so͘ Khì sìng-tiān Hōng-hiàn
22 In tshing-khì ê ji̍t-kî tsi̍t-ē muá, Iok-sik kah Má-lī-a tsiàu Mô͘-se ê lu̍t-huat, tsiū phō eⁿ-á khì Iâ-lō͘-sat-líng, beh kā I hiàn hō͘ Tsú. 23 Tsiàu Tsú ê lu̍t-huat kì-tsài:, " thâu-tsi̍t-the ê tsa-po͘-kiáⁿ, lóng tio̍h sìng-pia̍t lâi kui hō͘ Tsú. 24 Tsiàu Tsú ê lu̍t-huat kui-tīng, tio̍h hiàn tsi̍t-tuì pan-kah, á-sī nn̄g-tsiah hún-tsiáu-kiáⁿ tsò sing-lé.( tsù: LBK 12:8; 5:11 LXX) 25 Tī Iâ-lō͘-sat-líng ū tsi̍t-ê lâng, miâ-kiò Se-biān; tsit-ê lâng sī gī-lâng koh kìng-khiân, put-sî to teh kî-thāi Í-sik-lia̍t ê ho̍k-hing. Sìng-Sîn mā kah i tông-tsāi. 26 I bat tit-tio̍h Sìng-Sîn tsí-sī, tsai-iáⁿ i sí í-tsîng, ē khuàⁿ-tio̍h Tsú só͘ ìng-ún ê Ki-tok. 27 I hō͘ Sìng-Sîn kám-tōng, ji̍p-khì sìng-tiān. Tú hit sî, Iâ-so͘ ê pē-bú phō eⁿ-á ji̍p-lâi, beh tsiàu lu̍t-huat kā Iâ-so͘ kí-hîng gî-sik. 28 Se-biān īng siang tshiú kā eⁿ-á tsiap kuè-lâi, o-ló Siōng-Tsú kóng, 29 " Tsú ah, taⁿ tsiàu Lí ê uē, hō͘ Lí ê lô͘-po̍k pîng-pîng an-an lī-khui sè-kan. 30 In-uī guá í-king tshin-ba̍k khuàⁿ-tio̍h Lí ê tsín-kiù. 31 Tsiū-sī lí uī-tio̍h bān-bîn só͘ tsún-pī ê. 32 Lí tsò khé-sī Guā-pang-lâng ê kng, Koh tsò Lí ê tsú-bîn Í-sik-lia̍t-lâng ê îng-kng." 33 Iâ-so͘ ê pē-bú thiaⁿ-tio̍h Se-biān kóng-khí kuan-hē eⁿ-á ê uē, kám-kak kî-kuài koh tio̍h-kiaⁿ. 34 Se-biān kā in tsiok-hok, koh tuì Iâ-so͘ ê lāu-bú Má-lī-a kóng, " Tsit-ê eⁿ-á siū siat-li̍p, sī beh hō͘ Í-sik-lia̍t tiong tsin-tsē lâng pua̍h-tó, tsin-tsē lâng peh khí-lâi, mā tsò siū kong-kik ê kì-hō. 35 Koh hō͘ tsin-tsē lâng sim-lāi ê ì-liām lō͘-tshut. Lí ka-kī ê sim mā ē hō͘ kiàm tsha̍k thàng-kuè." 36 Koh ū tsi̍t-ê nî-huè tsin lāu ê lú-sian-ti A-ná, sī A-siat tsi-tso̍k Huat-luē-li̍k ê tsa-bó͘-kiáⁿ. I kiat-hun liáu-āu kah tiōng-hu tsò-hué sing-ua̍h tshit-nî kú. 37 Āu-lâi i tsiū tsiú-kuáⁿ. Kàu taⁿ í-king peh-tsa̍p-sì huè lóng bô lī-khui sìng-tiān, mê-ji̍t kìm-tsia̍h kî-tó, ho̍k-sāi Siōng-Tsú. 38 Tú hit sî, i mā kiâⁿ tsìn-tsîng lâi kám-siā Siōng-Tsú, tuì só͘-ū kî-thāi Siōng-Tsú kiù-sio̍k Iâ-lō͘-sat-líng ê lâng, kóng-khí tsit-ê eⁿ-á ê tāi-tsì.

Tńg-khì Ná-sat-li̍k
39 Iok-sik kah Má-lī-a, tsiàu Tsú ê lu̍t-huat pān uân ta̍k-hāng tāi-tsì liáu-āu, tsiū tńg-khì Ka-lī-lī-síng, kàu in ê kò͘-hiong Ná-sat-li̍k. 40 Eⁿ-á tsiām-tsiām tuā-hàn, ji̍t-ji̍t ióng-tsòng, tì-huī tshiong-muá, Siōng-Tsú ê un-tián kah I tông-tsāi.

Gín-á Iâ-so͘ Tī sìng-tiān
41 Ta̍k nî Puâⁿ-kuè-tseh ê sî, Iâ-so͘ ê pē-bú lóng ē khì Iâ-lō͘-sat-líng kuè-tseh. 42 Kàu Iâ-so͘ tsa̍p-jī huè ê sî, tsiàu kuàn-lē lóng khì Iâ-lō͘-sat-líng kuè-tseh. 43 Tseh-kî suah liáu-āu, in beh tńg-khì ê sî, gín-á Iâ-so͘ iáu lâu tī Iâ-lō͘-sat-líng. I ê pē-bú m̄-tsai. 44 In siūⁿ-kóng Iâ-so͘ tī tsò-hué kiâⁿ ê lâng tiong-kan. In kiâⁿ tsi̍t ji̍t ê lō͘-tsām liáu-āu, tsiah tī tshin-tsiâⁿ kah si̍k-sāi-lâng ê tiong-kan tshuē Iâ-so͘. 45 In tshuē bô Iâ-so͘, tsiū tò-tńg khì Iâ-lō͘-sat-líng tshuē. 46 Saⁿ ji̍t āu tsiah tī sìng-tiān lāi, khuàⁿ-tio̍h Iâ-so͘ tsē tī hiah-ê kàu-su tiong-kan, mā teh thiaⁿ, mā teh mn̄g. 47 Thiaⁿ-tio̍h Iâ-so͘ teh kóng-uē ê lâng, lóng tuì I ê tshong-bîng kah ìn-tap, kám-kak kî-kuài. 48 Pē-bú khuàⁿ-tio̍h I tsiū tio̍h-kiaⁿ koh kî-kuài; I ê lāu-bú tuì I kóng, " Kiáⁿ ah, Lí ná thang án-ne khuán-thāi guán? Lí khuàⁿ, Lí ê lāu-pē kah guá tsin huân-ló, it-ti̍t teh tshuē Lí." 49 Iâ-so͘ ìn kóng, " Lín ná-tio̍h tshuē Guá? Lín kám m̄-tsai Guá ing-kai tio̍h tuà Guá ê Thiⁿ-Pē ê tshù?" 50 M̄-koh in bē liáu-kái Iâ-so͘ tuì in kóng ê uē. 51 Iâ-so͘ tsiū kah pē-bú tńg-khì kàu Ná-sat-li̍k, lâi hàu-sūn in. I ê lāu-bú kā tsiah-ê uē lóng kì tī sim-lāi. 52 Iâ-so͘ ê tì-huī kah nî-huè ná ke-thiⁿ, Siōng-Tsú kah lâng mā ná thiàⁿ I.