《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第三章

作者 巴克禮普世版小組 2013.04.28

Kiâⁿ-sé-lé Iok-hān ê Sé-lé kah Thuân-tō (Mt 3:1-12;Mk 1:1-8;Ih 1:19-28)
1 Lô-má hông-tè Thê-pì-liû tsē-uī ê tsa̍p-gō͘ nî, Pún-tiu Pí-lia̍p-to tsò Iû-thài ê tsóng-tok, Hi-lu̍t tsò Ka-lī-lī-síng hun-hong ê ông, i ê hiaⁿ-tī Hui-li̍k tsò Í-thó͘-lī-a kah Tik-lia̍p-khó-nî tē-hng hun-hong ê ông, Lū-sat-liap tsò A-pí-lī-nî hun-hong ê ông. 2 A-ná kah Kai-a-huat tsò tuā-tsè-si ê sî, Sat-ka-lī-a ê kiáⁿ Iok-hān tī khòng-iá niá-siū Siōng-Tsú ê uē. 3 Iok-hān tsiū kàu Iok-tàn-hô it-tài ê ta̍k só͘-tsāi suan-iông, kóng, " Tio̍h hué-kái lâi niá sé-lé, Siōng-Tsú tsiū ē sià-bián lâng ê tsuē." 4 Tú tshin-tshiūⁿ sian-ti Í-sài-a tsheh-ni̍h só͘ kì ê uē, kóng, ' Ū siaⁿ tī khòng-iá teh huah kóng, Tio̍h uī Tsú tsún-pī tō-lō͘, Uī Tsú siu-ti̍t I ê sió-lō͘! 5 Só͘-ū ê suaⁿ-kok lóng tio̍h thūn hō͘ i tīⁿ, Tsiah-ê tuā-sió ê suaⁿ-thâu lóng tio̍h siah hō͘ i kē, Uan-khiau ê lō͘ tio̍h tshú hō͘ i ti̍t, Kham-khia̍t ê lō͘ tio̍h hō͘ i pêⁿ. 6 Bān-bîn lóng ē khuàⁿ-tio̍h Siōng-Tsú ê tsín-kiù.'"( tsù: ISA 40:3-5) 7 Iok-hān tuì tsin-tsē lâi beh niá sé-lé ê lâng kóng, " Lín tsiah-ê to̍k-tsuâ ah, siáⁿ-lâng kíng-kò lín siám-phiah Siōng-Tsú teh-beh huat ê siū-khì? 8 Tio̍h īng ji̍t-siông sing-ua̍h lâi tsìng-bîng lín ê hué-kái. M̄-thang ka-kī siūⁿ-kóng, ' Ū A-pik-la̍h-hán tsò guán ê tsó͘-sian', in-uī guá kā lín kóng, ' Siōng-Tsú ē-tàng tuì tsiah-ê tsio̍h-thâu tshut kiáⁿ-sun hō͘ A-pik-la̍h-hán. 9 Taⁿ pó͘-thâu í-king tuì-tsún tshiū-thâu ā, só͘-ū bô kiat hó kué-tsí ê tshiū, lóng ē tshò khí-lâi hiat lo̍h hué." 10 Tsìng-lâng mn̄g Iok-hān kóng, " Án-ne, guán tio̍h án-tsuáⁿ tsò khah hó?" 11 Iok-hān ìn kóng, " Ū nn̄g niá saⁿ ê lâng tio̍h pun hō͘ bô saⁿ ê lâng, ū tsia̍h-mi̍h ê lâng mā tio̍h án-ne tsò." 12 Ū tsi̍t-kuá thiu-suè-ê mā lâi beh niá-siū sé-lé, in mn̄g Iok-hān kóng, " Lāu-su, guán tio̍h án-tsuáⁿ tsò tsiah hó?" 13 Iok-hān tuì in kóng, " Kui-tīng ê suè í-guā, m̄-thang kā lâng ke thiu." 14 Ū tsi̍t-kuá kun-jîn mā mn̄g Iok-hān kóng, " Á guán tio̍h án-tsuáⁿ tsò?" I ìn kóng, " M̄-thang kā lâng khióng-hat the̍h tsîⁿ, m̄-thang kā lâng khà-iû, tuì lín só͘ niá ê sin-suí tio̍h buán-tsiok." 15 Jîn-bîn teh kî-thāi Ki-tok, sim-lāi lóng teh siūⁿ-kóng, Iok-hān bô tiāⁿ-tio̍h tsiū-sī Ki-tok, 16 Iok-hān ìn kûn-tsiòng kóng, " Guá īng tsuí kā lín sé-lé, m̄-koh ū tsi̍t-ê pí guá khah ū kuân-lîng ê teh-beh lâi, guá liân kā I tháu ê-tuà to bē kham-tit. I beh īng Sìng-Sîn kah hué kā lín sé-lé. 17 I ê tshiú the̍h puà-ki, beh kā be̍h-tiâⁿ ê be̍h-á tsuân-pō͘ puà tshing-khì, kā be̍h-á siu-ji̍p tshng-khò͘, m̄-koh be̍h-hiūⁿ to̍h īng bē-hua ê hué sio-tiāu." 18 Iok-hān thuân Hok-im hō͘ bîn-tsiòng ê sî, lóng īng tsin-tsē hong-huat lâi khó͘-khǹg. 19 M̄-koh Iok-hān tsik-pī hun-hong ê ông Hi-lu̍t, in-uī i tshiúⁿ-tua̍t sió-tī ê bó͘ Hi-lô-tí ê iân-kò͘, koh in-uī i tsò tsin-tsē pháiⁿ tāi-tsì. 20 Taⁿ Hi-lu̍t koh ke tsi̍t-hāng pháiⁿ tāi-tsì, tsiū-sī kā Iok-hān kuaiⁿ lo̍h-kaⁿ.

Iâ-so͘ Niá-siū Sé-lé (Mt 3:13-17;Mk 1:9-11) 21 Tsìng-lâng niá-siū sé-lé liáu-āu, Iâ-so͘ mā ū lâi niá-siū sé-lé, kî-tó ê sî, thiⁿ khui, 22 Sìng-Sîn kàng-lîm tī I ê tíng-bīn, hîng-tsōng tshin-tshiūⁿ hún-tsiáu; koh tuì thiⁿ ū siaⁿ kóng, " Lí sī Guá só͘ thiàⁿ ê Kiáⁿ, Guá tsin kah-ì Lí."

Iâ-so͘ ê Ka-phó͘ (Mt 1:1-17)
23 Iâ-so͘ khai-sí thuân-tō ê sî tsha-put-to saⁿ-tsa̍p huè. Tsìng-lâng khuàⁿ I sī Iok-sik ê kiáⁿ, Iok-sik sī Hi-lí ê kiáⁿ, 24 Hi-lí sī Má-thap ê kiáⁿ, Má-thap sī Lī-bī ê kiáⁿ, Lī-bī sī Bi̍k-ki ê kiáⁿ, Bi̍k-ki sī Ngá-ná ê kiáⁿ, Ngá-ná sī Iok-sik ê kiáⁿ, 25 Iok-sik sī Má-tāi-thê-a ê kiáⁿ, Má-tāi-thê-a sī A-mô͘-su ê kiáⁿ, A-mô͘-su sī Ná-ong ê kiáⁿ, Ná-ong sī Í-sū-lí ê kiáⁿ, Í-sū-lí sī Ná-kai ê kiáⁿ, 26 Ná-kai sī Má-ap ê kiáⁿ, Má-ap sī Má-tāi-thê-a ê kiáⁿ, Má-tāi-thê-a sī Se-bí ê kiáⁿ, Se-bí sī Iok-sik ê kiáⁿ, Iok-sik sī Iû-tāi ê kiáⁿ, Iû-tāi sī Iok-a-ná ê kiáⁿ, 27 Iok-a-ná sī Lī-sat ê kiáⁿ, Lī-sat sī Só͘-lô-pa-pik ê kiáⁿ, Só͘-lô-pa-pik sī Sat-lia̍p-thiat ê kiáⁿ, Sat-lia̍p-thiat sī Nî-lī ê kiáⁿ, 28 Nî-lī sī Bi̍k-ki ê kiáⁿ, Bi̍k-ki sī A-tí ê kiáⁿ, A-tí sī Ko-song ê kiáⁿ, Ko-song sī Í-mô͘-tông ê kiáⁿ, Í-mô͘-tông sī Jíⁿ ê kiáⁿ, Jíⁿ sī Iok-sè ê kiáⁿ, 29 Iok-sè sī Í-lia̍t-sat ê kiáⁿ, Í-lia̍t-sat sī Iok-līng ê kiáⁿ, Iok-līng sī Má-thap ê kiáⁿ, Má-thap sī Lī-bī ê kiáⁿ, 30 Lī-bī sī Se-biān ê kiáⁿ, Se-biān sī Iû-tāi ê kiáⁿ. Iû-tāi sī Iok-sik ê kiáⁿ, Iok-sik sī Iok-lâm ê kiáⁿ, Iok-lâm sī Í-lī-a-kim ê kiáⁿ, 31 Í-lī-a-kim sī Bí-lī-a ê kiáⁿ, Bí-lī-a sī Mái-lâm ê kiáⁿ, Mái-lâm sī Má-ta̍t-thaⁿ ê kiáⁿ, Má-ta̍t-thaⁿ sī Ná-tan ê kiáⁿ, Ná-tan sī Tāi-pi̍t ê kiáⁿ, 32 Tāi-pi̍t sī Iâ-se ê kiáⁿ, Iâ-se sī O-pik ê kiáⁿ, O-pik sī Pho-sū ê kiáⁿ, Pho-sū sī Sat-bûn ê kiáⁿ, Sat-bûn sī Ná-sūn ê kiáⁿ, 33 Ná-sūn sī A-bí-ná-ta̍t ê kiáⁿ, A-bí-ná-ta̍t sī A-lân ê kiáⁿ, A-lân sī Í-sū-lûn ê kiáⁿ, Í-sū-lûn sī Huat-li̍k-sū ê kiáⁿ, Huat-li̍k-sū sī Iû-tāi ê kiáⁿ, 34 Iû-tāi sī Ngá-kok ê kiáⁿ, Ngá-kok sī Í-sat ê kiáⁿ, Í-sat sī A-pik-la̍h-hán ê kiáⁿ, A-pik-la̍h-hán sī Thaⁿ-la̍h ê kiáⁿ, Thaⁿ-la̍h sī Ná-ho̍k ê kiáⁿ, 35 Ná-ho̍k sī Sat-lo̍k ê kiáⁿ, Sat-lo̍k sī Lia̍p-kó͘ ê kiáⁿ, Lia̍p-kó͘ sī Huat-li̍k ê kiáⁿ, Huat-li̍k sī Hi-pik ê kiáⁿ, Hi-pik sī Sat-lia̍p ê kiáⁿ, 36 Sat-lia̍p sī Kai-lâm ê kiáⁿ, Kai-lâm sī A-huat-sat ê kiáⁿ, A-huat-sat sī Siám ê kiáⁿ, Siám sī Ná-a ê kiáⁿ, Ná-a sī La̍h-bi̍k ê kiáⁿ, 37 La̍h-bi̍k sī Má-thó͘-sat-la̍h ê kiáⁿ, Má-thó͘-sat-la̍h sī Í-lo̍k ê kiáⁿ, Í-lo̍k sī Ngá-lia̍t ê kiáⁿ, Ngá-lia̍t sī Má-li̍k-lia̍t ê kiáⁿ, Má-li̍k-lia̍t sī Kai-lâm ê kiáⁿ, Kai-lâm sī Í-ná-sū ê kiáⁿ, 38 Í-ná-sū sī Siat ê kiáⁿ, Siat sī A-tong ê kiáⁿ, A-tong sī Siōng-Tsú ê kiáⁿ.