《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第四章

作者 巴克禮普世版小組 2013.05.05

Iâ-so͘ Siū Tshì-thàm (Mt 4:1-11;Mk 1:12-13)
1 Iâ-so͘ siū Sìng-Sîn tshiong-muá, tuì Iok-tàn-hô tńg-lâi, hō͘ Sìng-Sîn tshuā khì khòng-iá sì-tsa̍p ji̍t kú, siū Mô͘-kuí kā I tshì-thàm. 2 Hit tiong-kan, I lóng bô tsia̍h siáⁿ-mi̍h, āu-lâi pak-tó͘ tsiū iau. 3 Mô͘-kuí kā I kóng, " Lí nā sī Siōng-Tsú ê Kiáⁿ, tio̍h bīng-līng tsit-tè tsio̍h-thâu piàn-tsò piáⁿ." 4 Iâ-so͘ ìn kóng, " Sìng-king ū kì-tsài: ' Lâng teh ua̍h m̄-nā uá-khò piáⁿ.'"( tsù: SBK 8:3) 5 Mô͘-kuí koh tshuā Iâ-so͘ peh-tsiūⁿ kuân ê só͘-tsāi, tsi̍t-ba̍k-nih-á ê tiong-kan, tsiong thiⁿ-ē bān-kok hō͘ I khuàⁿ, 6 tsiū tuì Iâ-so͘ kóng, " Tsiah-ê it-tshè ê kuân-sè kah îng-kng guá lóng beh hō͘ lí, in-uī tsiah-ê it-tshè í-king lóng kau hō͘ guá, tshut-tsāi guá beh hō͘ siáⁿ-lâng. 7 Só͘-í Lí nā kuī lo̍h-lâi pài guá, tsiah-ê it-tshè lóng-tsóng hō͘ Lí." 8 Iâ-so͘ ìn kóng, " Sìng-king ū kì-tsài: ' Tio̍h pài Tsú, lí ê Siōng-Tsú, tsí-ū tio̍h ho̍k-sāi I.'"( tsù: SBK 6:13) 9 Mô͘-kuí koh tshuā Iâ-so͘ kàu Iâ-lō͘-sat-líng, hō͘ I khiā tī sìng-tiān siōng kuân ê só͘-tsāi, kā I kóng, " Lí nā sī Siōng-Tsú ê Kiáⁿ, to̍h tuì tsia thiàu lo̍h-khì, 10 in-uī Sìng-king ū kì-tsài: ' Siōng-Tsú ē uī-tio̍h Lí, bīng-līng I ê thiⁿ-sài lâi pó-hō͘ Lí. 11 Koh kóng, ' Thiⁿ-sài ē īng tshiú kā Lí hû-teh, bián-tit Lí ê kha tak-tio̍h tsio̍h-thâu.'"( tsù: SPh 91:11-12) 12 Iâ-so͘ ìn kóng, " Sìng-king ū kóng, ' M̄-thang tshì-thàm Tsú, lí ê Siōng-Tsú.'"( tsù: SBK 6:16) 13 Mô͘-kuí só͘-ū ê tshì-thàm lóng īng liáu, tsiū tsiām-sî lī-khui Iâ-so͘.

Iâ-so͘ Khai-sí Tī Ka-lī-lī Thuân-tō (Mt 4:12-17;Mk 1:14-15)
14 Jiân-āu Iâ-so͘ siū Sìng-Sîn ê kuân-lîng tshiong-muá, tò-tńg-khì Ka-lī-lī-síng. I ê miâ-siaⁿ thuân kàu sì-tsiu-uî ê tē-hng. 15 I tī ta̍k-ê huē-tn̂g kà-sī lâng, siū kûn-tsiòng ê tshing-tsàn.

Iâ-so͘ Tī Ná-sat-li̍k Hông Kī-tsua̍t (Mt 13:53-58;Mk 6:1-6)
16 Iâ-so͘ tńg-khì kàu I sîng-tióng ê kò͘-hiong Ná-sat-li̍k. Tī An-hioh-ji̍t, I tsiàu pîng-siông ê si̍p-kuàn ji̍p-khì huē-tn̂g, khiā khí-lâi teh-beh tha̍k Sìng-king. 17 Ū-lâng the̍h sian-ti Í-sài-a ê tsheh hō͘ I. I tsiū hian-khui, tshuē-tio̍h tsi̍t só͘-tsāi ū kì-tsài: 18 Tsú ê Sìng-Sîn lîm-kàu Guá, In-uī I īng iû buah Guá, hō͘ Guá thang thuân Hok-im hō͘ sàn-tshiah lâng. I tshe-phài Guá lâi suan-pò͘ kóng, ' Siū lia̍h ê lâng ē tit-tio̍h tháu-pàng, tsheⁿ-mê-ê ē koh khuàⁿ-kìⁿ, siū ap-pik ê lâng ē tit-tio̍h tsū-iû. 19 koh suan-pò͘ Siōng-Tsú ê Hi-nî."( tsù: ISA 61:1-2; 58:6) 20 Iâ-so͘ kā tsheh kǹg khí-lâi, hîng huē-tn̂g ê tsip-sū, tsiū tsē lo̍h-lâi. Huē-tn̂g lāi ê tsìng-lâng lóng tsù-ba̍k kā I khuàⁿ. 21 Iâ-so͘ tsiū khui-tshuì tuì in kóng, " Tsit-tuāⁿ Sìng-king, kin-á-ji̍t lín thiaⁿ-tio̍h ê sî í-king si̍t-hiān ā." 22 Tsìng-lâng lóng tshing-tsàn Iâ-so͘, tuì I só͘ kóng un-tián ê uē kám-kak kî-kuài, kóng, " Tsit-ê lâng kám m̄-sī Iok-sik ê kiáⁿ?" 23 Iâ-so͘ tuì in kóng, " Lín it-tīng ē ín-iōng ' I-sing ah, lí tio̍h ka-kī i.' tsit-kù sio̍k-gí tuì Guá kóng, ' Guán ū thiaⁿ-tio̍h Lí tī Ka-pik-lông tsò tsin-tsē tāi-tsì, taⁿ mā tio̍h tī Lí ê kò͘-hiong lâi tsò.'" 24 Iâ-so͘ koh kè-sio̍k kóng, " Guá si̍t-tsāi kā lín kóng, sian-ti bô tsi̍t-ê tī ka-kī ê kò͘-hiong hō͘ lâng tsiap-la̍p." 25 Guá kā lín kóng si̍t-uē, tī Í-lī-a ê sî-tāi ū khòng-hān saⁿ-nî-puàⁿ kú, ta̍k só͘-tsāi lóng tuā ki-hng, hit sî Í-sik-lia̍t tiong ū tsin-tsē kuáⁿ-hū. 26 Í-lī-a m̄-bat hōng-tshe khì tshuē hiah-ê kuáⁿ-hū tiong-kan ê tsi̍t-ê lâng. I kan-tāⁿ khì Se-tùn ê Sat-li̍k-tāi tshuē tsi̍t-ê kuáⁿ-hū. 27 Koh tī sian-ti Í-lī-sa ê sî-tāi, Í-sik-lia̍t tiong ū tsin-tsē thái-ko ê pēⁿ-lâng, tû-liáu Sū-lī-a-lâng Nái-bān í-guā, bô kah tsi̍t-ê lâng tit-tio̍h tshing-khì." 28 Huē-tn̂g lāi só͘-ū ê lâng thiaⁿ-tio̍h tsiah-ê uē, lóng hui-siông siū-khì. 29 Huē-tsiòng tsiū khí-lâi kuáⁿ Iâ-so͘ tshut-khì siâⁿ-guā, in ê siâⁿ khí tī suaⁿ-tíng, huē-tsiòng kā I thua kàu suaⁿ-khàm, beh kā I tshia lo̍h-khì. 30 M̄-koh Iâ-so͘ tuì in tiong-kan kiâⁿ kuè-khì, tsò I khì.

Iâ-so͘ I-hó Siâ-sîn Hū-sin ê Lâng (Mk 1:21-28)
31 Iâ-so͘ lo̍h-khì Ka-lī-lī-síng tsi̍t-ê Ka-pik-lông-siâⁿ, tī An-hioh-ji̍t tuà hia kà-sī lâng. 32 Lâng tuì I ê kà-sī kám-kak kî-kuài, in-uī I ê uē ū kuân-ui. 33 Huē-tn̂g lāi ū tsi̍t-ê hō͘ siâ-sîn hū-sin ê lâng, tuā-siaⁿ huah kóng, 34 " Haiⁿh, Ná-sat-li̍k lâng Iâ-so͘, Lí hô-pit lâi kan-sia̍p guán? Lí beh lâi huí-bia̍t guán, sī-bô? Guá tsai Lí sī siáⁿ-mi̍h-khuán lâng. Lí sī Siōng-Tsú ê Sìng-Kiáⁿ." 35 Iâ-so͘ kā i tsik-pī kóng, " Tiām-khì! tuì tsit-ê lâng tshut-khì!" Kuí tī tsìng-lâng bīn-tsîng kā hit-ê lâng tshia-tó tsiū tshut-khì, lóng bô kā i siong-hāi-tio̍h. 36 Tsìng-lâng tio̍h-kiaⁿ koh kî-kuài, tsò-hué gī-lūn kóng, " Tse sī siáⁿ-mi̍h uē? I īng kuân-pìng kah lîng-li̍k bīng-līng tsiah-ê siâ-sîn, in tsiū tshut-khì." 37 Iâ-so͘ ê miâ-siaⁿ tsiū thuân kàu sì-tsiu-uî ê ta̍k só͘-tsāi.

Iâ-so͘ I-hó Tsin Tsē Pēⁿ-Lâng (Mt 8:14-17;Mk 1:29-34)
38 Iâ-so͘ tuì huē-tn̂g tshut-lâi, ji̍p-khì Se-bûn ê tshù. Se-bûn ê tiūⁿ-ḿ huat-jia̍t tsin sio; ū-lâng thè i kiû Iâ-so͘ i-tī. 39 Iâ-so͘ khiā uá-khì, àⁿ lo̍h-khì tsik-pī i ê jia̍t-pēⁿ, jia̍t tsiū thè, hū-jîn-lâng suî-sî khí-lâi kā in tsiap-thāi. 40 Ji̍t lo̍h ê sî, tsìng-lâng tshuā ū pēⁿ ê lâng, bô-lūn huān-tio̍h siáⁿ-mi̍h pēⁿ, lóng tshuā-lâi tshuē Iâ-so͘. Iâ-so͘ kā ta̍k-lâng huāⁿ-tshiú, lâi kā in ê pēⁿ i-hó. 41 Koh ū kuí tuì tsin-tsē lâng ê sing-khu tshut-khì, tuā-siaⁿ huah kóng, " Lí tsiū-sī Siōng-Tsú ê Kiáⁿ." Iâ-so͘ in-uī kuí bat I sī Ki-tok, tsiū tsik-pī hiah-ê kuí, m̄ tsún in kóng.

Iâ-so͘ tī Huē-tn̂g Thuân-tō (Mk 1:35-39)
42 Thiⁿ-kng ê sî, Iâ-so͘ khì kàu phian-phiah ê só͘-tsāi; kui-tīn lâng lâi tshuē I, tshuē-tio̍h tsiū kā i lâu, tshiáⁿ I m̄-thang lī-khui in. 43 M̄-koh Iâ-so͘ tuì in kóng, " Guá mā tio̍h khì pa̍t-ê siâⁿ-tshī thuân Siōng-Tsú Kok-tō͘ ê Hok-im, in-uī tse sī Siōng-Tsú tshe-phài Guá lâi ê bo̍k-tik." 44 Iâ-so͘ tsiū kè-sio̍k tī Ka-lī-lī-síng ê kok huē-tn̂g thuân Hok-im.