《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第五章

作者 巴克禮普世版小組 2013.05.12

Iâ-so͘ Khai-sí Ho͘-tiàu Bûn-tô͘ (Mt 4:18-22;Mk 1:16-20)
1 Ū tsi̍t piàn, Iâ-so͘ khiā tī Kik-nî-sat-li̍k-ô͘ piⁿ, kûn-tsiòng kheh uá-khì beh thiaⁿ Siōng-Tsú ê tō-lí. 2 Iâ-so͘ khuàⁿ-tio̍h nn̄g-tsiah tsûn tī ô͘-piⁿ, lia̍h-hî-lâng lī-khui tsûn teh sé bāng. 3 Kî-tiong tsi̍t tsiah sī Se-bûn ê, Iâ-so͘ tsiūⁿ-tsûn, kiò i kā tsûn kò khì lī-khui huāⁿ-piⁿ ê só͘-tsāi. Iâ-so͘ tsiū tsē tī tsûn-tíng kà-sī kûn-tsiòng. 4 Iâ-so͘ kóng suah tsiū tuì Se-bûn kóng, " Kā tsûn kò khì khah tshim ê só͘-tsāi, pha bāng lo̍h-khì lia̍h hî." 5 Se-bûn ìn kóng, " Lāu-su, guán kui-mê lô-khó͘ lóng lia̍h bô hî, m̄-koh Lí to kà guán án-ne tsò, guá tsiū lâi pha bāng." 6 In tsi̍t-ē pha lo̍h-khì, tsiū bāng-tio̍h tsin-tsē hî, tì-sú hî-bāng kiông-beh li̍h-khui. 7 In tsiū ia̍t pa̍t-tsiah tsûn ê tâng-phuāⁿ lâi tàu kha-tshiú. Hiah-ê tâng-phuāⁿ tsiū lâi, khioh hî té tuà nn̄g-tsiah tsûn, té kàu muá-muá suah kiông-beh tîm lo̍h-khì. 8 Se-bûn Pí-tik khuàⁿ-tio̍h án-ne, tsiū phak tī Iâ-so͘ ê kha-tsîng, kóng, " Tsú ah, tshiáⁿ lī-khui guá, guá sī ū tsuē ê lâng." 9 Se-bûn kah i ê tâng-phuāⁿ uī-tio̍h in tsi̍t-ē pha lo̍h-khì tsiū lia̍h-tio̍h hiah-tsē hî, ta̍k-ke lóng tio̍h-kiaⁿ koh kî-kuài. 10 Se-bûn ê tâng-phuāⁿ, Se-pí-thài ê kiáⁿ Ngá-kok kah Iok-hān mā sī án-ne. Iâ-so͘ tuì Se-bûn kóng, " M̄-bián kiaⁿ, tuì tsit sî khai-sí, lí ē tshin-tshiūⁿ lia̍h-hî án-ne tit-tio̍h lâng." 11 In thua tsûn uá huāⁿ liáu-āu, tsiū pàng-sak it-tshè lâi tuè Iâ-so͘.

Iâ-so͘ I-hó Thái-ko Pēⁿ-lâng (Mt 8:1-4;Mk 1:40-45)
12 Ū tsi̍t ji̍t, Iâ-so͘ tī tsi̍t-ê siâⁿ, tú-hó ū tsi̍t-ê lâng kui sing-khu thái-ko, khuàⁿ-tio̍h Iâ-so͘ tsiū bīn phak lo̍h-khì, kî-kiû kóng, " Tsú ah, Lí nā khíng, tsiū ē hō͘ guá tshing-khì." 13 Iâ-so͘ tshun tshiú kā i bong, kóng, " Guá khíng, hō͘ lí tshing-khì." Thái-ko suî-sî piàn tshing-khì. 14 Iâ-so͘ huan-hù i kóng, " M̄-thang kā lâng kóng, tio̍h khì hō͘ tsè-si giām, mā tio̍h tsiàu Mô͘-se só͘ kui-tīng, uī-tio̍h lí tit-tio̍h tshing-khì lâi hiàn-tsè, thang tuì tsìng-lâng tsìng-bîng." 15 Iâ-so͘ ê miâ-siaⁿ jú thuân jú khuah. Kui tuā-tīn lâng tsū-tsi̍p uá-lâi beh thiaⁿ tō-lí, mā kî-kiû in ê pēⁿ tit-tio̍h i-hó. 16 M̄-koh Iâ-so͘ thè-khì phian-phiah ê só͘-tsāi kî-tó.

Iâ-so͘ I-hó Piàn-suī ê Lâng (Mt 9:1-8;Mk 2:1-12)
17 Ū tsi̍t ji̍t, Iâ-so͘ teh kà-sī lâng ê sî, ū Huat-lī-sài-phài ê lâng kah kà lu̍t-huat ê kàu-su tī hia teh tsē. in sī tuì Ka-lī-lī-síng kah Iû-thài-síng ta̍k tsng-siā í-ki̍p Iâ-lō͘-sat-líng lâi ê. Tsú ê kuân-lîng kah Iâ-so͘ tông-tsāi, hō͘ I ē-tàng i-hó pēⁿ-lâng. 18 Hit sî ū-lâng īng tshn̂g-pho͘ kng piàn-suī ê lâng lâi, ài beh kng ji̍p-khì hē tī Iâ-so͘ ê bīn-tsîng. 19 In-uī lâng tsin-tsē, tshuē bô phāng thang kng ji̍p-khì; tsiū peh khí-lih tshù-tíng, thiah tshù-hiā, kā hit-ê piàn-suī ê lâng liân tshn̂g-pho͘, tuī-lo̍h-khì tsìng-lâng ê tiong-kan, hē tī Iâ-so͘ ê bīn-tsîng. 20 Iâ-so͘ khuàⁿ-tio̍h in ê sìn-sim tsiū kóng, " Pîng-iú ah, lí ê tsuē tit-tio̍h sià-bián à." 21 King-ha̍k-kàu-su kah Huat-lī-sài-phài ê lâng tsiū gī-lūn kóng, " Tsit-ê teh siat-to̍k Siōng-Tsú ê sī siáⁿ-lâng? Siōng-Tsú í-guā, siáⁿ-lâng ē-tàng sià-tsuē?" 22 Iâ-so͘ tsai-iáⁿ in teh gī-lūn siáⁿ-mi̍h, tsiū tuì in kóng, " Lín sim-lāi ná-ē teh siūⁿ tsit-khuán tāi-tsì? 23 Kóng, ' Lí ê tsuē tit-tio̍h sià-bián' á-sī kóng, ' Lí khí-lâi kiâⁿ', tó tsi̍t-hāng khah kán-tan? 24 M̄-koh guá beh hō͘ lín tsai, Jîn-tsú tī tē-tsiūⁿ ū sià-tsuē ê kuân-pìng." Iâ-so͘ tuì hit-ê piàn-suī ê lâng kóng, " Guá kā lí kóng, khí-lâi! giâ lí ê tshn̂g-pho͘ tńg-khì lí ê tshù." 25 Hit-ê lâng tī tsìng-lâng ê bīn-tsîng, suî-sî khiā khí-lâi, giâ i só͘ tó ê tshn̂g-pho͘ tńg-khì i ê tshù, ná kiâⁿ ná o-ló Siōng-Tsú. 26 Tsìng-lâng lóng tio̍h-kiaⁿ koh kî-kuài, mā o-ló Siōng-Tsú, koh sim tsûn kìng-uì kóng, " Guán kin-á-ji̍t ū khuàⁿ-tio̍h hui-siông kî-biāu ê tāi-tsì."

Iâ-so͘ Ho͘-tiàu Lī-bī (Mt 9:9-13;Mk 2:13-17)
27 Tsiah-ê tāi-tsì liáu-āu, Iâ-so͘ tshut-khì, khuàⁿ-tio̍h tsi̍t-ê thiu-suè-ê, miâ-kiò Lī-bī, tsē tī suè-kuan. Iâ-so͘ kā i kóng, " Lâi tuè Guá!" 28 Lī-bī tsiū pàng-sak it-tshè, khí-lâi tuè Iâ-so͘. 29 Lī-bī tī in tshù uī-tio̍h Iâ-so͘ pān tuā iàn-si̍k. Ū thiu-suè-ê kah kî-tha tsin-tsē lâng, lâi kah in tsò-hué tsē-toh tsia̍h-pn̄g. 30 Huat-lī-sài-phài ê lâng kah sio̍k in ê king-ha̍k kàu-su, tuì Iâ-so͘ ê bûn-tô͘ nga̍uh-nga̍uh-liām, kóng, " Lín ná-ē kah thiu-suè-ê í-ki̍p pháiⁿ-lâng tsò-hué lim-tsia̍h?" 31 Iâ-so͘ ìn kóng, " Ióng-tsòng ê lâng bô su-iàu i-sing, m̄-koh phuà-pēⁿ ê lâng tsiū su-iàu. 32 Guá lâi m̄-sī beh tsio gī-lâng, sī beh tsio pháiⁿ-lâng lâi hué-kái."

Kìm-tsia̍h ê Būn-tê (Mt 9:14-17;Mk 2:18-22)
33 Ū-lâng tuì Iâ-so͘ kóng, " Iok-hān ê bûn-tô͘ siông-siông kìm-tsia̍h kî-tó, Huat-lī-sài-phài ê bûn-tô͘ mā sī án-ne, m̄-koh Lí ê bûn-tô͘ mā lim mā tsia̍h." 34 Iâ-so͘ ìn kóng, " Sin-lông kah hun-iàn ê lâng-kheh tsò-hué ê sî, lín kám ē hō͘ lâng-kheh kìm-tsia̍h? 35 M̄-koh ji̍t-tsí teh-beh kàu, sin-lông ē hō͘ lâng tuì in tiong-kan lia̍h-khì, tī hiah-ê ji̍t, in tsiū ē kìm-tsia̍h." 36 Iâ-so͘ hoh īng phì-jū tuì in kóng, " Bô-lâng thiah sin-saⁿ lâi pó͘ kū-saⁿ. Nā án-ne tsò, m̄-nā ē thiah-phuà sin-saⁿ, jî-tshiáⁿ tuì sin-saⁿ thiah lâi pó͘ hit-tè pò͘, kah kū-saⁿ mā bē ha̍h. 37 Mā bô-lâng īng sin tsiú té tī kū phuê-tē-á. Nā án-ne tsò, sin tsiú ē kā phuê-tē-á piak-li̍h, tsiú lāu tshut-lâi, phuê-tē-á mā phah pháiⁿ. 38 Sin tsiú tio̍h té ji̍p-khì sin ê phuê-tē-á. 39 Lâng nā lim kū-tsiú liáu-āu, tsiū bē ài lim hit-ê sin-tsiú, in-uī lâng lóng kóng, ' Kū-tsiú khah hó.'"