《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十一章

作者 巴克禮普世版小組 2013.06.23

Kî-tó ê Kà-sī (Mt 6:9-15; 7:7-11)
1 Iâ-so͘ tī tsi̍t-ê só͘-tsāi kî-tó. Kî-tó suah ê sî, ū tsi̍t-ê bûn-tô͘ tuì I kóng, " Tsú ah, tshin-tshiūⁿ Iok-hān ū kà-sī i ê bûn-tô͘ kî-tó, kiû Lí mā kà-sī guán kî-tó." 2 Iâ-so͘ kā in kóng, " Lín kî-tó ê sî tio̍h án-ne kóng: Thiⁿ-Pē ah, guān Lí ê miâ sìng, Lí ê kok lîm-kàu. 3 Kiû Lí ta̍k-ji̍t tsiàu-sî sù guán tsia̍h-mi̍h. 4 Sià-bián guán ê tsuē, in-uī guán mā ū sià-bián ko͘-hū guán ê lâng. M̄-thang tshuā guán ji̍p-khì guán tam-tng bē khí ê tshì-thàm." 5 Iâ-so͘ koh kā bûn-tô͘ kóng, " Lín siáⁿ-lâng ū pîng-iú, lí puàⁿ-mê khì tshuē i kóng, ' Pîng-iú ah, the̍h saⁿ-tè piáⁿ tsioh guá, 6 in-uī guá ū pîng-iú lí-hîng lâi tshuē guá, guá bô mi̍h thang tshiáⁿ i tsia̍h.' 7 Lí hit-ê pîng-iú tuì lāi-bīn ìn kóng, ' Mài tshá lah, mn̂g í-king kuaiⁿ, guá kah gín-á tī tshn̂g-ni̍h teh khùn. Guá bē-tàng khí-lâi the̍h hō͘ lí.' 8 Guá kā lí kóng, sui-jiân hit lâng bē tài-liām tio̍h pîng-iú, khí-lâi the̍h piáⁿ hō͘ lí, m̄-koh ē in-uī lí ê pik-tshiat khún-kiû, khí-lâi the̍h lí só͘ su-iàu ê mi̍h hō͘ lí. 9 Só͘-í Guá koh kā lín kóng: Kiû ē tit-tio̍h, tshuē ē tshuē-tio̍h, phah mn̂g ē kā lín khui. 10 In-uī ū kiû tsiū ē tit-tio̍h, ū tshuē tsiū ē tshuē-tio̍h, ū phah mn̂g tsiū ē kā i khui. 11 Lín tsò lāu-pē ê lâng, ka-kī ê kiáⁿ lâi thó piáⁿ, lí kám ē the̍h tsio̍h-thâu hō͘ i ? Á-sī lâi thó hî, lí kám ē tsiong tsuâ tsún-tsò hî hō͘ i? 12 Á-sī thó nn̄g, lí kám ē tsiong giat-á hō͘ i? 13 Lín tsiah-ê lâng sui-jiân pháiⁿ, iáu-koh ē-hiáu īng hó-mi̍h hō͘ lín ê kiáⁿ-jî, hô-hòng lín tī thiⁿ-tíng ê Thiⁿ-Pē, kám bô īng Sìng-Sîn lâi hō͘ tuì I khún-kiû ê lâng?

Iâ-so͘ kah Kuí-ông Pia̍t-se-pok (Mt 12:22-30; Mk 3:20-27)
14 Iâ-so͘ kuáⁿ tsi̍t-ê é-káu siâ-sîn tshut-khì, é-káu-ê lâng tsiū kóng-uē. Kûn-tsiòng lóng kám-kak kî-kuài. 15 M̄-koh kî-tiong ū kuí-nā lâng kóng, " I kuáⁿ-kuí sī khò kuí-ông Pia̍t-se-pok." 16 Koh ū-lâng beh tshì-thàm Iâ-so͘, iau-kiû I kiâⁿ tuì thiⁿ lâi ê sîn-jiah. 17 Iâ-so͘ tsai in ê sim-su tsiū kā in kóng, " Kok-ka nā ka-kī khí hun-tsing, tsiū ē pha-hng; ka-tîng nā bē hô, it-tīng ē phuà-tshuì. 18 Sat-tàn nā ka-kī khí hun-tsing, i ê kok thái-thó khiā ē tiâu? Lín kóng Guá khò Pia̍t-se-pok kuáⁿ-kuí. 19 Guá nā khò Pia̍t-se-pok kuáⁿ-kuí, lín ê tsú-tē kuáⁿ-kuí sī uá-khò siáⁿ-lâng lè? Án-ne lín ê tsú-tē ē huán-po̍k lín ê kóng-huat. 20 Tsóng-sī guá nā khò Siōng-Tsú ê khuì-la̍t kuáⁿ-kuí, Siōng-Tsú Kok-tō͘ tsiū í-king tī lín ê tiong-kan si̍t-hîng." 21 " Ióng-sū nā tshīng khue-kah gia̍h ke-si kò͘-siú i ê tshù, i só͘-ū ê tsâi-sán tsiū an-tsuân. 22 M̄-koh nā ū tsi̍t-ê pí i khah bíng ê lâi phah iâⁿ i, kā i só͘ uá-khò ê tsuân-hù bú-khì tshiúⁿ-khì, koh tsiong i ê tsâi-bu̍t pun liáu-liáu." 23 " Bô uī Guá ê lâng, tsiū-sī kah Guá tuì-ti̍k; bô hia̍p-tsō͘ Guá ê lâng, tsiū-sī teh kā Guá phò-huāi."

Siâ-sîn Tò Tńg-khì (Mt 12:43-45)
24 " Siâ-sîn lī-khui hū-sin ê lâng liáu-āu, king-kuè bô tsuí ê tē, beh tshuē hioh-khùn ê só͘-tsāi tshuē lóng bô, tsiū kóng, ' Guá beh tńg-khì tshut-lâi ê hit-king tshù.' 25 Tńg kàu-uī tsi̍t khuàⁿ, tshù-lāi piàⁿ-sàu kah tsin tshing-khì koh tsíng-tsê. 26 Hit-ê siâ-sîn tsiū koh khì tuà tshit-ê pí ka-kī khah pháiⁿ ê siâ-sîn lâi, ji̍p-khì hia tuà. Hit lâng ê kiat-kio̍k pí khí-thâu koh-khah tshám."

Tsin-tsiàⁿ ê Hok-khì
27 Iâ-so͘ teh kóng tsiah-ê uē ê sî, kûn-tsiòng tiong-kan ū tsi̍t-ê hū-jîn-lâng tuā-siaⁿ tuì I kóng, " Seⁿ Lí koh hō͘ Lí suh-ling ê hū-jîn-lâng, tsin ū hok-khì!" 28 M̄-koh Iâ-so͘ ìn kóng, " Thiaⁿ Siōng-Tsú ê tō-lí lâi tsun-siú ê lâng, koh-khah ū hok-khì!"

Tsìng-lâng Iau-kiû Sîn-jiah (Mt 12:38-42; Mk 8:12)
29 Kûn-tsiòng jú lâi jú tsē, Iâ-so͘ tsiū kóng, " Tsit sè-tāi sī pháiⁿ ê sè-tāi, in kiû sîn-jiah, m̄-koh tû-liáu Iok-ná ê sîn-jiah í-guā, bô koh ū sîn-jiah hō͘ in. 30 Tú tshin-tshiūⁿ Iok-ná tsiâⁿ-tsò Nî-nî-bî lâng ê sîn-jiah, Jîn-tsú mā beh tsiâⁿ-tsò tsit sè-tāi ê sîn-jiah. 31 Tī sím-phuàⁿ ê sî, Lâm-hong ê lú-ông beh kah tsit sè-tāi ê lâng tsò-hué koh-ua̍h khí-lâi, suà kā tsit sè-tāi ê lâng tīng-tsuē, in-uī hit-ê lú-ông ū tuì tē ê ki̍k-thâu, lâi thiaⁿ Só͘-lô-bûn tì-huī ê uē, hô-hòng tī tsia ū pí Só͘-lô-bûn khah uí-tāi ê. 32 Tī sím-phuàⁿ ê sî, Nî-nî-bî-lâng ē kah tsit sè-tāi ê lâng tsò-hué koh-ua̍h khí-lâi, suà kā tsit sè-tāi ê lâng tīng-tsuē, in-uī Nî-nî-bî-lâng ū tuì Iok-ná só͘ thuân ê tō-lí lâi hué-kái, hô-hòng tī tsia ū pí Iok-ná koh-khah uí-tāi ê."

Ba̍k-tsiu Sī Sing-khu ê Kng (Mt 5:15;6:22~23)
33 Bô-lâng tiám ting hē tī bô-lâng khuàⁿ-kìⁿ ê só͘-tsāi, á-sī khàm tuà bí-táu-ē. It-tīng tio̍h hē tī ting-tâi tíng, hō͘ ji̍p-lâi ê lâng khuàⁿ-tio̍h hit-ê kng. 34 Lí ê ba̍k-tsiu sī sing-khu ê ting. Lí ê ba̍k-tsiu nā kim, tsuân sing-khu tsiū kng-bîng; lí ê ba̍k-tsiu nā hue, kui sing-khu tsiū o͘-àm. 35 Só͘-í tio̍h tsù-ì, m̄-thang hō͘ lí lāi-bīn ê kng àm-khì. 36 Lí tsuân sing-khu nā lóng kng-bîng, bô tsi̍t-tiám-á o͘-àm, tsiū ē tshin-tshiūⁿ ting kng-iàⁿ-iàⁿ teh tsiò lí, ē hō͘ lí uân-tsuân kng-bîng."

Iâ-so͘ Tsik-pī Huat-lī-sài-phài ê Lâng kah King-ha̍k-kàu-su(Mt 23:1~36;Mk 12:38~40)
37 Iâ-so͘ tsiah-ê kóng suah ê sî, ū tsi̍t-ê Huat-lī-sài-phài ê lâng tshiáⁿ i tsia̍h-pn̄g. Iâ-so͘ tsiū ji̍p-khì tsē toh. 38 Hit-ê Huat-lī-sài-phài ê lâng khuàⁿ-tio̍h Iâ-so͘ bô sé-tshiú tsiū lâi tsia̍h, kám-kak tsin kî-kuài. 39 Iâ-so͘ tsiū kā i kóng, " Taⁿ lín Huat-lī-sài-phài ê lâng kan-tāⁿ tshing-khì pue kah puâⁿ ê guā-bīn, m̄-koh lín lāi-bīn tshiong-muá tham-io̍k kah siâ-ok. 40 Lín tsiah-ê gōng-lâng, tshòng-tsō guā-bīn ê Siōng-Tsú kám m̄-sī mā ū tshòng-tsō lāi-bīn? 41 Tio̍h tsiong tsiah-ê lāi-bīn ê mi̍h the̍h lâi tsín-tsè lâng, án-ne lín ta̍k-hāng mi̍h tsiū lóng tshing-khì." 42 Lín tsiah-ê Huat-lī-sài-phài ê lâng ū tsai-hō! In-uī lín tsiong po̍k-hô, huê-hiang-á, kah ta̍k-tsióng ê tshài-se tsa̍p-hūn thiu tsi̍t-hūn hiàn hō͘ Siōng-Tsú, m̄-koh bô tiōng-sī kong-gī kah thiàⁿ Siōng-Tsú ê tāi-tsì. Kî-si̍t tsiah-ê tio̍h ing-kai án-ne tsò, mā m̄-thang hut-lio̍k tíng-bīn hiah-ê hōng-hiàn. 43 Lín Huat-lī-sài-phài ê lâng ū tsai-hō! in-uī lín ài tī huē-tn̂g lāi tsē tuā-uī, koh ài tī ke-lō͘-ni̍h hō͘ lâng kā lín tshíng-an. 44 Lín ū tsai-hō! in-uī lín tshin-tshiūⁿ khuàⁿ bē-tio̍h sí-lâng ê bōng, lâng tuì hit tíng-bīn kiâⁿ-kuè mā m̄-tsai." 45 Ū tsi̍t-ê lu̍t-huat ê kàu-su ìn Iâ-so͘ kóng, " Lāu-su, Lí kóng tsiah-ê uē mā bú-jio̍k tio̍h guán." 46 M̄-koh Iâ-so͘ ìn kóng, " Lín tsiah-ê lu̍t-huat-kàu-su mā ū tsai-hō! in-uī lín tsiong taⁿ bô-huat ê tāng-tàⁿ hō͘ lâng taⁿ, m̄-koh lín ka-kī liân tsi̍t-ki tsíng-thâu-á, to bô tín-tāng lâi kiám-khin hiah-ê tāng-tàⁿ. 47 Lín it-tīng ū tsai-hō! in-uī lín uī lín tsó͘-sian sat-hāi ê sian-ti tsō bōng. 48 Án-ne, lín ka-kī tsìng-si̍t lín mā tsàn-sîng tsó͘-sian só͘ tsò ê tāi-tsì, koh huaⁿ-hí lâi tsō in ê bōng. 49 Só͘-í Siōng-Tsú ê Tì-huī ū kóng, ' Guá beh tshe sian-ti kah sù-tô͘ khì in hia, kî-tiong ū-ê in ē kā i hāi-sí, ū-ê in ē kā i pik-hāi.' 50 Án-ne tuì tshòng-tsō sè-kài í-lâi só͘ lâu tsìng sian-ti ê hueh lóng beh kā lín tsit sè-tāi thó. 51 Tsiū-sī tuì A-pik ê hueh kàu Sat-ka-lī-a sí tī tiān kah tuâⁿ ê tiong-kan só͘ lâu ê hueh. Guá si̍t-tsāi kā lín kóng, hiah-ê hueh-tsè lóng beh tuì lín tsit sè-tāi ê lâng thó. 52 Lín tsiah-ê lu̍t-huat-kàu-su ū tsai-hō! in-uī lín kā khui tì-sik ê mn̂g ê só-sî gia̍h-khì. Lín ka-kī bô beh ji̍p-khì, suah tsó͘-tòng siūⁿ-beh ji̍p-khì ê lâng." 53 Iâ-so͘ tuì hia tshut-lâi ê sî, king-ha̍k kàu-su kah Huat-lī-sài-phài ê lâng tshut-la̍t, koh-khah ki̍k-lia̍t kong-kik Iâ-so͘, pik I kóng khah-tsē uē. 54 In teh tán Iâ-so͘ kóng m̄-tio̍h uē ê sî, thang lia̍h I ê uē-phāng.