《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十二章

作者 巴克禮普世版小組 2013.06.30

Kíng-kài Ké-hó ê Lâng (Mt 10:26-27)
1 Hit sî kuí-nā bān lâng tsū-tsi̍p uá-lâi, tì-kàu hō͘-siōng thún-ta̍h, Iâ-so͘ tsiū tuì bûn-tô͘ kóng, " Lín tio̍h tî-hông Huat-lī-sài-phài ê lâng ê kàⁿ, tsiū-sī ké-hó." 2 Bô tsi̍t-hāng khàm-ba̍t ê tāi-tsì bē lō͘-hiān, muí tsi̍t-hāng pì-bi̍t ê tāi-tsì kàu-sî mā lóng ē hō͘ lâng tsai-iáⁿ. 3 Só͘-í lín tī o͘-àm tiong só͘ kóng ê, ē tī kng-bîng tiong hō͘ lâng thiaⁿ-tio̍h; lín tī pâng-king lāi hīⁿ-khang-piⁿ só͘ kóng ê, ē hō͘ lâng tī tshù-bué-tíng kong-khai suan-pò͘."

Tio̍h Kìng-uì Siōng-Tsú (Mt 10:28-31)
4 " Guá ê pîng-iú ah, Guá kā lín kóng, hāi-sí lín ê sing-khu liáu-āu bē-tàng koh tuì lín tsò siáⁿ-mi̍h ê lâng, lín m̄-bián kiaⁿ. 5 Guá beh tsí-sī lín tio̍h kìng-uì siáⁿ-khuán lâng. Lín tio̍h kìng-uì Siōng-Tsú, I hō͘ lâng sí liáu-āu koh ū kuân-pìng kā lâng hiat lo̍h-khì tē-ga̍k. Sī lah, Guá kā lín kóng, tio̍h kiaⁿ Hit-uī! 6 " Gō͘ tsiah tshik-tsiáu-á kám m̄-sī bē nn̄g-kak gîn? tī Siōng-Tsú ê bīn-tsîng, liân tsi̍t tsiah to bô bē kì-tit. 7 Liân lín ê thâu-mn̂g to lóng ū sǹg kuè. M̄-bián kiaⁿ, lín pí hiah-ê tshik-tsiáu-á koh-khah kuì-tiōng."

Kong-khai Sîng-jīn Ki-tok (Mt 10:32-33; 12:32; 10:19-20)
8 " Guá kā lín kóng, tī lâng ê bīn-tsîng sîng-jīn Guá ê, Jîn-tsú tī Siōng-Tsú ê thiⁿ-sài bīn-tsîng, mā ē kā i sîng-jīn. 9 M̄-koh tī lâng ê bīn-tsîng bô sîng-jīn Guá ê, tī Siōng-Tsú ê thiⁿ-sài bīn-tsîng, mā bô beh kā i sîng-jīn." 10 " Lâng nā kóng-uē kong-kik Jîn-tsú ê, iáu ē tit-tio̍h sià-bián, m̄-koh nā sī siat-to̍k Sìng-Sîn ê, tsiū bē tit-tio̍h sià-bián." 11 Lâng nā ah lín khì kàu huē-tn̂g, á-sī thóng-tī-tsiá kah kuaⁿ-uân ê bīn-tsîng, lín m̄-bián huân-ló beh án-tsuáⁿ piān-kái, á-sī tio̍h kóng siáⁿ-mi̍h. 12 In-uī kàu sî Sìng-Sîn ē kà lín, tio̍h kóng siáⁿ-mi̍h uē."

Gōng Tsâi-tsú ê Phì-jū
13 Tsìng-lâng tiong-kan ū tsi̍t-ê tsâi-tsú kā Iâ-so͘ kóng, " Lāu-su, tshiáⁿ Lí kiò guá ê hiaⁿ-tī kah guá pun ke-hué." 14 M̄-koh Iâ-so͘ kā i kóng, " Lí tsit-ê lâng, siáⁿ-lâng siat-li̍p Guá tsò lín ê sím-phuàⁿ-kuaⁿ, á-sī tsò pun ke-hué ê kong-tshin?" 15 Iâ-so͘ tsiū tuì kûn-tsiòng kóng, " Tio̍h kín-sīn, tio̍h iok-sok ka-kī, tio̍h tî-hông kok-tsióng ê tham-sim, in-uī lâng ê ua̍h-miā kè-ta̍t m̄ sī kài-tsāi tī i só͘ tsik-tsū ê tsâi-sán." 16 Jiân-āu Iâ-so͘ īng phì-jū tuì in kóng, " Ū tsi̍t-ê hó-gia̍h-lâng, i ê tshân-hn̂g tsin hong-siu. 17 I siūⁿ-lâi siūⁿ-khì kóng, ' Guá bô kàu só͘-tsāi thang tún guá ê ngó͘-kok, taⁿ beh án-tsuáⁿ?' 18 Koh kóng, ' Guá tio̍h án-ne tsò, guá beh kā tshik-tshng thiah-tiāu koh khí khah tuā-king, thang lâi kā guá ê ngó͘-kok kah tsâi-bu̍t lóng tún tuà hia. 19 Jiân-āu mā beh tuì guá ê lîng-hûn kóng, ' Lîng-hûn ah, lí ū tsik-tsū tsin-tsē tsâi-bu̍t, thang tsò tsin-tsē nî ê lō͘-īng. Taⁿ tshing-îng ā, lâi lim-tsia̍h, lâi hióng-siū!' 20 M̄-koh Siōng-Tsú kā i kóng, ' Gōng lâng ah, Kim-mê beh tuì lí thó lí ê sèⁿ-miā. Lí só͘ tsik-tsū ê tsâi-sán beh lâu hō͘ siáⁿ-lâng?' 21 Án-ne uī-tio̍h ka-kī tsik-tsū tsâi-pó, bô hō͘ Siōng-Tsú khuàⁿ-tsò hó-gia̍h ê lâng, mā sī kāng-khuán."

Sìn-khò Siōng-Tsú (Mt 6:25-34)
22 Koh tuì bûn-tô͘ kóng, " Só͘-í Guá kā lín kóng, m̄-thang uī-tio̍h sèⁿ-miā tshau-huân beh tsia̍h siáⁿ-mi̍h, á-sī uī-tio̍h lín ê sing-khu tshau-huân beh tshīng siáⁿ-mi̍h. 23 In-uī sèⁿ-miā pí tsia̍h-mi̍h khah tiōng-iàu, sing-khu pí saⁿ-khò͘ khah kè-ta̍t. 24 Lín khuàⁿ o͘-a, in sui-jiân bô tsìng-tsoh bô siu-sîng, mā bô tshng-khò͘ bô tshik-tshng, Siōng-Tsú iáu-koh teh kā in ióng-tshī. Lín kám bô pí hiah-ê tsiáu-á khah kuì-tiōng? 25 Lín kám ū-lâng siūⁿ-kóng, tshau-huân ē-tàng hō͘ ka-kī ê sèⁿ-miā ke ua̍h tsi̍t-sî-á kú? 26 Taⁿ lín kì-jiân liân tsiah-ni̍h sè-hāng tāi-tsì to bô huat-tō͘ tsò, ná-tio̍h tshau-huân kî-tha ê tāi-tsì? 27 Lín sió siūⁿ khuàⁿ māi lè, pik-ha̍p-hue án-tsuáⁿ teh tuā tsâng? In bô lô-khó͘ mā bô pháng-tsit, m̄-koh Guá kā lín kóng, tng Só͘-lô-bûn siōng îng-huâ hù-kuì ê sî, i só͘ tshīng ê saⁿ to bô pí tsiah-ê hue ê tsi̍t luí khah suí. 28 Taⁿ suaⁿ-ni̍h ê tsháu, kin-á-ji̍t teh ua̍h, bîn-á-tsài to̍h hō͘ lâng hiat lo̍h-khì hué-lô͘. Siōng-Tsú iáu-koh án-ne teh kā in táⁿ-pān. Lín ná-ē tsiah-ni̍h bô sìn-sim? 29 Só͘-í lín m̄-thang kan-tāⁿ teh siūⁿ-beh tsia̍h siáⁿ-mi̍h beh lim siáⁿ-mi̍h, mā m̄-thang tshau-huân. 30 In-uī tsiah-ê lóng sī tsit sè-kan ê bī-sìn-tsiá só͘ teh kiû ê. Lín ê Thiⁿ-Pē mā tsai lín su-iàu tsiah-ê mi̍h-kiāⁿ. 31 Tian-tó tio̍h tāi-sing tui-kiû Siōng-Tsú Kok-tō͘, tsiah-ê mi̍h-kiāⁿ ē sūn-suà siúⁿ-sù hō͘ lín."

Thiⁿ-tíng ê Tsâi-hù (Mt 6:19-21)
32 Lín tsiah-ê sè-sè ê iûⁿ-kûn, m̄-bián kiaⁿ, in-uī lín ê Thiⁿ-Pē huaⁿ-hí kā I ê Kok-tō͘ hō͘ lín. 33 Tio̍h bē lín ê tsâi-sán lâi tsín-tsè sàn-tshiah-lâng. Tio̍h uī lín ka-kī tsún-pī bē phuà ê tsîⁿ-tē-á, lâi tsik-tsū īng bē liáu ê tsâi-pó tī thiⁿ-tíng. Tī hia bô tsha̍t-á ē lâi thau-the̍h, mā bē ū thâng tsiù. 34 In-uī lín ê tsâi-pó tī tó-uī, lín ê sim mā ē khì tī hia."

Kín-sīn Thìng-hāu ê Lô͘-po̍k
35 Lín ê saⁿ tio̍h tshīng hó-sè, lín ê ting tio̍h tiám hō͘ to̍h. 36 Lín tio̍h tshin-tshiūⁿ lâng teh thìng-hāu in ê tsú-lâng tuì hun-iàn tńg-lâi. Tsú-lâng tńg kàu-uī, tsi̍t-ē phah mn̂g thang suî-sî kā i khui. 37 Tsú-lâng tńg-lâi khuàⁿ-tio̍h in tshéⁿ-tshéⁿ, hiah-ê lô͘-po̍k tsin ū hok-khì. Guá si̍t-tsāi kā lín kóng, tsú-lâng ē ka-kī saⁿ tshīng hó-sè, hō͘ in tsē toh, lâi kā in sū-hāu. 38 Kiám-tshái tsú-lâng ē tī puàⁿ-mê á-sī thiⁿ-phú-kng ê sî tńg-lâi, khuàⁿ-tio̍h in tshéⁿ-tshéⁿ, hiah-ê lô͘-po̍k tsin ū hok-khì. 39 Tsú-lâng nā tsai tsha̍t-á tang-sî-tsūn ē lâi, i tsiū tiuⁿ-tî, it-tīng bē hō͘ tsha̍t-á ji̍p-lâi i ê tshù. Tse sī lín tsai-iáⁿ ê tāi-tsì. 40 Só͘-í lín mā tio̍h tsún-pī piān-piān, in-uī Jîn-tsú ē tī lín siūⁿ bē kàu ê sî-tsūn lâi-lîm."

Tiong-si̍t kah Bô Tiong-si̍t ê Kuán-ke (Mt 24:45-51)
41 Pí-tik kóng, " Tsú ah, Lí tsit-ê phì-jū sī teh tuì guán kóng, á-sī mā tuì kûn-tsiòng?" 42 Tsú kóng, " Siáⁿ-lâng sī tsīn-tiong koh ki-khiáu ê kuán-ke? Tsiū sī tsú-lâng kau-tài i lâi kuán-lí kî-tha ê lô͘-po̍k, tsiàu sî hun-phuè tsia̍h-mi̍h hō͘ in hit-ê lâng. 43 Tsú-lâng tńg-lâi khuàⁿ-tio̍h i ū tsiàu kau-tài khì tsò, hit-ê lô͘-po̍k tsin ū hok-khì! 44 Guá si̍t-tsāi kā lín kóng, tsú-lâng ē phài i lâi kuán-lí i só͘-ū ê tsâi-sán. 45 Hit-ê lô͘-po̍k nā sim-lāi siūⁿ-kóng, guá ê tsú-lâng ē khah bān tsiah tńg-lâi, tsiū phah kî-tha ê lô͘-po̍k kah lú-pī, lim-tsia̍h koh tsiú-tsuì. 46 Tsú-lâng tī i siūⁿ bē kàu ê sî-tsūn tńg-lâi. Tsú-lâng ē tāng-tāng kā i hîng-hua̍t. Hō͘ i kah hiah-ê bô tiong-si̍t ê lâng siū kāng-khuán ê hîng-hua̍t. 47 Lô͘-po̍k tsai-iáⁿ tsú-lâng ê ì-sù khiok bô khì tsún-pī, á-sī bô tsiàu tsú-lâng ê ì-sù khì tsò. I it-tīng ē hō͘ tsú-lâng phah kah tsin thiám. 48 M̄-koh nā m̄-tsai tsú-lâng ê ì-sù khì tsò ing-kai siū phah ê tāi-tsì, i ē siū phah khah tsió ē; hō͘ i khah-tsē ê lâng, ē tuì i the̍h khah-tsē; kau-thok i khah-tsē ê lâng, ē kā i iau-kiû khah-tsē."

In-uī Iâ-so͘ Ín-khí ê Hun-lia̍t (Mt 10:34-36) 49 " Guá lâi sī beh īng hué tàn tī tē-tsiūⁿ. Hué nā to̍h khí-lâi, m̄-tsai guā-ni̍h-á hó? 50 Guá ū ing-kai siū ê sé-lé. Hit-ê sé-lé iáu-buē uân-sîng í-tsîng, Guá tio̍h kan-khó͘ kah siáⁿ-mi̍h thîng-tō͘? 51 Lín siūⁿ-kóng Guá lâi sī beh hō͘ tē-tsiūⁿ hô-pîng? Guá kā lín kóng, m̄-sī, tian-tò sī uan-ke. 52 Tuì taⁿ í-āu, tsi̍t ke gō͘ lâng ē uan-ke, saⁿ-ê kah nn̄g-ê uan-ke, nn̄g-ê kah saⁿ-ê uan-ke. 53 Pē kah kiáⁿ, kiáⁿ kah pē, lāu-bú kah tsa-bó͘-kiáⁿ, tsa-bó͘-kiáⁿ kah lāu-bú, ta-ke kah i ê sim-pū, sim-pū kah ta-ke, in lóng ē uan-ke.

Liáu-kái Hit-ê Sî ê Tiāu-thâu (Mt 16:2-3)
54 Iâ-so͘ koh tuì kûn-tsiòng kóng, " Lín khuàⁿ-tio̍h hûn tuì sai-pîng khí-lâi, lín tsiū kóng, ' Beh lo̍h-hō͘'. Kó-jiân tsiū lo̍h-hō͘. 55 Lín khuàⁿ-tio̍h thàu lâm-hong ê sî, lín tsiū kóng, ' Beh sio-jua̍h ā.' Tsiū tsin-tsiàⁿ sio-jua̍h khí-lâi. 56 Lín tsiah-ê ké-hó ê lâng, lín to ē-hiáu phuàⁿ-tuàn thiⁿ kah tē ê kíng-siōng, ná bē-hiáu phuàⁿ-tuàn tsit-ê sî-kî?"

Tio̍h Kah Khòng-kò Lí ê Lâng Hô-kái (Mt 5:25-26)
57 " Lín ná-ē bô beh ka-kī phuàⁿ-tuàn sī-hui? 58 Nā ū-lâng kā lí kò khì kìⁿ kuaⁿ-hú, iáu tī lō͘-ni̍h ê sî, tio̍h siat-huat kah i hô-kái. Nā bô i ē thua lí khì kìⁿ sím-phuàⁿ-kuaⁿ, sím-phuàⁿ-kuaⁿ ē kā lí kau hō͘ huat-kíng, suà lo̍h-khì huat-kíng ē kā lí kuaiⁿ lo̍h-kaⁿ. 59 Guá kā lí kóng, tsuè-āu ê tsi̍t-sián-gō͘-lî nā bô hîng tshing-tshó, lí tsua̍t-tuì bē-tàng tuì kaⁿ-ni̍h tshut-lâi."