《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十三章

作者 巴克禮普世版小組 2013.07.07

Bô Hué-kái Tsiū Ē Bia̍t-bông
1 Tú hit sî ū kuí-nā lâng lâi, tsiong Ka-lī-lī-lâng tī tsè-tuâⁿ hiàn-tsè hō͘ Pí-lia̍p-to sat-hāi ê tāi-tsì kā Iâ-so͘ kóng. 2 Iâ-so͘ ìn kóng, " In-uī tsiah-ê Ka-lī-lī-lâng siū tsit-tsióng ê sat-hāi, lín siūⁿ-kóng in pí tsìng Ka-lī-lī-lâng huān khah tāng ê tsuē , sī-bô? 3 Guá kā lín kóng, m̄-sī. Lín nā bô hué-kái, lóng ē tshin-tshiūⁿ án-ne bia̍t-bông. 4 Á-sī lín siūⁿ-kóng, hō͘ Se-lô-a ê thah tó lo̍h-lâi teh-sí hit tsa̍p-peh ê lâng, pí kî-tha tuà tī Iâ-lō͘-sat-líng ê lâng huān khah tāng ê tsuē , sī-bô? 5 Guá kā lín kóng, m̄-sī. Lín nā bô hué-kái, lóng ē tshin-tshiūⁿ án-ne bia̍t-bông.

Bô Kiat Kué-tsí ê Bû-hua-kó-tshiū
6 Āu-lâi Iâ-so͘ īng tsi̍t-ê phì-jū kā in kóng, " Ū tsi̍t-ê lâng tī i ê phû-tô-hn̂g-ni̍h, tsai tsi̍t tsâng bû-hua-kó-tshiū. I lâi hit tsâng tshiū tshuē kué-tsí, m̄-koh lóng tshuē bô. 7 I tuì kò͘-hn̂g ê kóng, ' Lí khuàⁿ, guá liân-liân saⁿ nî, lâi tsit tsâng bû-hua-kó-tshiū tshuē kué-tsí, tshuē lóng bô. Tio̍h kā i tshò khí-lâi! Ná-tio̍h lâu teh tìn só͘-tsāi?' 8 M̄-koh kò͘-hn̂g ê ìn kóng, ' Tsú-lâng ah, kin-nî tshiáⁿ koh kā i lâu tsi̍t nî khuàⁿ māi. Guá lâi kā sì-tsiu-uî ku̍t-sang koh lo̍h-puî. 9 Mê-nî nā kiat kué-tsí to̍h hó. Nā bô tsiah kā i tshò khí-lâi.'"

Tī An-hioh-ji̍t I-hó Ún-ku ê Hū-jîn-lâng
10 Ū tsi̍t-ê An-hioh-ji̍t, Iâ-so͘ tī tsi̍t-ê huē-tn̂g teh kà-sī lâng. 11 Ū tsi̍t-ê hū-jîn-lâng hō͘ siâ-sîn hū-sin, tài-pēⁿ tsa̍p-peh-nî kú, sing-khu ún-ku lóng tshun bē ti̍t. 12 Iâ-so͘ khuàⁿ-tio̍h tsiū kiò i lâi, kā i kóng, " Hū-jîn-lâng, taⁿ lí ê pēⁿ hó khì à." 13 Iâ-so͘ īng siang-tshiú kā i huāⁿ. I ê sing-khu suî-sî tshun ti̍t. I tsiū tshing-tsàn Siōng-Tsú. 14 M̄-koh huē-tn̂g ê tsú-kuán, in-uī Iâ-so͘ tī An-hioh-ji̍t kā lâng i-pēⁿ tsiū siū-khì, tuì kûn-tsiòng kóng, " Ū la̍k ji̍t ing-kai tio̍h tsò-kang, hit la̍k-ji̍t kan thang lâi i-pēⁿ. An-hioh-ji̍t m̄-thang án-ne tsò." 15 M̄-koh Tsú ìn kóng, " Ké-hó ê lâng ah, tī An-hioh-ji̍t, lín kám bô ta̍k-lâng tuì gû-tiâu tháu i ê gû, á-sī lî, khan-khì tsia̍h tsuí? 16 Tsit-ê hū-jîn-lâng sī A-pik-la̍h-hán ê kiáⁿ-sun, hō͘ Sat-tàn sok-pa̍k í-king tsa̍p-peh nî kú, kám bô ing-kai tī an-hioh ê ji̍t kā i tháu-pàng?" 17 Iâ-so͘ kóng tsiah-ê uē ê sî, hiah-ê tuì-ti̍k lóng kám-kak tsin kiàn-siàu. Kûn-tsiòng in-uī Iâ-so͘ só͘ tsò it-tshè kî-biāu ê tāi-tsì, lóng-tsóng tsin huaⁿ-hí.

Kuà-tshài-tsí ê phì-jū (Mt 13:31-32; Mk 4:30-32)
18 Iâ-so͘ tsiū kóng, " Siōng-Tsú Kok-tō͘ tshin-tshiūⁿ siáⁿ-mi̍h? Guá tio̍h īng siáⁿ-mi̍h lâi pí-phīng? 19 Sī tshin-tshiūⁿ tsi̍t-lia̍p kuà-tshài-tsí, lâng the̍h khì iā tī hn̂g-ni̍h, tsiū tuā tsâng khí-lâi tsiâⁿ-tsò tshiū, khong-tiong ê pue-tsiáu mā lâi tī tshiū-ki tsò siū."

Kàⁿ-bó ê Phì-jū (Mt 13:33)
20 Iâ-so͘ koh kóng, " Guá beh īng siáⁿ-mi̍h lâi pí-phīng Siōng-Tsú Kok-tō͘? 21 Sī tshin-tshiūⁿ kàⁿ-bó, hū-jîn-lâng the̍h khì hē tī saⁿ táu ê mī-hún lāi tshiau-tshiau lè, tsuè-āu lóng huat khí-lâi."

E̍h ê Mn̂g (Mt 7:13-14; 21-23)
22 Iâ-so͘ ǹg Iâ-lō͘-sat-líng teh kiâⁿ, king-kuè hiah-ê siâⁿ-tshī kah tsng-siā, iân-lō͘ kà-sī lâng. 23 Ū tsi̍t-ê lâng lâi mn̄g Iâ-so͘ kóng, " Tsú ah, ē tit-tio̍h kiù ê lâng tsin tsió , sī-bô?" 24 Iâ-so͘ ìn kóng, " Tio̍h tsīn-la̍t tuì e̍h mn̂g ji̍p-khì. Guá kā lín kóng, ū tsin-tsē lâng kiû beh ji̍p-khì, mā bē-tàng ji̍p-khì. 25 Tsú-lâng khí-lâi kuaiⁿ mn̂g liáu-āu, lín tsiah khiā tī guā-bīn phah mn̂g, kóng, ' Tsú-lâng ah, tshiáⁿ kā guán khui mn̂g.' I ē ìn lín kóng, ' Guá m̄-bat lín sī tuì tó-uī lâi ê lâng.' 26 Hit sî lín ē kóng, ' Guán bat kah lí tsò-hué lim-tsia̍h, Lí mā bat tī guán ê ke-lō͘ kà-sī guán.' 27 M̄-koh I ē kóng, ' Guá kā lín kóng, Guá m̄-tsai lín tuì tó-uī lâi. Lín tsiah-ê tsò put-gī tāi-tsì ê lâng lóng tio̍h lī-khui Guá.' 28 Lín khuàⁿ-tio̍h A-pik-la̍h-hán, Í-sat, Ngá-kok kah tsìng sian-ti tī Siōng-Tsú Kok-tō͘ lāi-bīn, ka-kī khiok siū kuáⁿ tshut-khì guā-bīn. Hit sî, lín ē tī hia thî-khàu, kā-gê tshiat-khí. 29 Lâng ē tuì tang-sai lâm-pak lâi Siōng-Tsú Kok-tō͘, tsò-hué tsē-toh lim-tsia̍h. 30 Lō͘-bué ê lâng ē tsò tāi-sing, tāi-sing ê lâng mā ē tsò lō͘-bué."

Uī Iâ-lō͘-sat-líng Pi-siong (Mt 23:37-39)
31 Hit sî ū kuí-nā-ê Huat-lī-sài-phài ê lâng lâi kā Iâ-so͘ kóng, " Lí tio̍h lī-khui tsia khì pa̍t uī, in-uī Hi-lu̍t ài beh kā Lí thâi." 32 Iâ-so͘ ìn kóng, " Lín khì kā hit tsiah hô͘-lî kóng, ' Lí khuàⁿ, kin-á-ji̍t, bîn-á-tsài Guá kuáⁿ-kuí, i-pēⁿ, kàu tē-saⁿ ji̍t uân-sîng Guá ê kang-tsok.' 33 Sui-jiân án-ne, kin-á-ji̍t, bîn-á-tsài kah āu-ji̍t, Guá tio̍h kè-sio̍k kiâⁿ, in-uī sian-ti bô ing-kai tī Iâ-lō͘-sat-líng í-guā ê só͘-tsāi, hō͘ lâng hāi-sí." 34 Iâ-lō͘-sat-líng ah, Iâ-lō͘-sat-líng ah, lí thâi-sí sian-ti, īng tsio̍h-thâu tìm-sí Siōng-Tsú tshe-phài kàu tī lín tsia ê sù-tsiá. Guá juā-tsē pái ài-beh tsū-tsi̍p lí ê kiáⁿ-jî, tshin-tshiūⁿ ke-bó tsū-tsi̍p i ê kue-á-kiáⁿ tī si̍t-ē, m̄-koh lín bô ài. 35 Lí khuàⁿ, lín ê tshù ē hong-huè. Guá koh kā lín kóng, lín tsua̍t-tuì bē-tàng khuàⁿ-tio̍h guá, ti̍t-kàu lín kóng, ' Hōng Tsú ê miâ lâi ê Hit-uī ing-kai tit-tio̍h o-ló.'"