《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十四章

作者 巴克禮普世版小組 2013.07.14

Iâ-so͘ Tī An-hioh-ji̍t I-hó Pēⁿ-lâng
1 Ū tsi̍t-ê An-hioh-ji̍t, Iâ-so͘ ji̍p-khì tsi̍t-ê Huat-lī-sài-phài thâu-lâng ê tshù tsia̍h-pn̄g. Ta̍k-ke teh kuan-tshat Iâ-so͘ ê só͘-tsò. 2 Tú-hó tī Iâ-so͘ ê bīn-tsîng, ū tsi̍t-ê kó͘-tiòng-pēⁿ ê lâng. 3 Iâ-so͘ tuì lu̍t-huat-kàu-su kah Huat-lī-sài-phài ê lâng kóng, " An-hioh-ji̍t i-pēⁿ thang á m̄-thang?" 4 Hiah-ê lâng tsīng-tsīng. Iâ-so͘ tsiū kā hit-ê lâng khan lâi, kā i i-hó, hō͘ i tńg-khì. 5 Jiân-āu Iâ-so͘ tuì in kóng, " Lín tiong-kan siáⁿ-lâng ū lî á-sī gû, tī An-hioh-ji̍t pua̍h-lo̍h kau-khut, kám bô suî-sî kā i giú khí-lâi?" 6 Hiah-ê lâng lóng bô uē thang ìn.

Tsú-Kheh Kuan-hē ê Kà-sī
7 Iâ-so͘ khuàⁿ hiah-ê lâng-kheh teh kíng tuā-uī, tsiū īng phì-jū tuì in kóng, 8 " Lín hō͘ lâng tshiáⁿ khì hù hun-iàn ê sî, m̄-thang tsē tuā-uī, khióng-kiaⁿ ū pí lí khah tsun-kuì ê lâng mā lâi hō͘ i tshiáⁿ. 9 Hit sî tshiáⁿ lí kah tshiáⁿ i ê tsú-lâng lâi kā lí kóng, ' Tshiáⁿ niū uī hō͘ tsit-ê lâng.' Lí ē kám-kak kiàn-siàu, suah tio̍h khì tsē tī siōng bué ê uī. 10 Hō͘ lâng tshiáⁿ ê sî tio̍h khì tsē bué-uī, Tshiáⁿ lí ê lâng lâi kā lí kóng, ' Pîng-iú ah, tshiáⁿ lí khí-lâi tsē tuā-uī. Hit sî lí tī kâng-toh ê lâng bīn-tsîng tsiū ū thé-biān. 11 In-uī kiau-ngō͘ ê lâng ē siū kàng-kē, Khiam-pi ê lâng ē hō͘ lâng kā i thê-ko." 12 Jiân-āu Iâ-so͘ mā kā tshiáⁿ I ê lâng kóng, " Lí pān tiong-tàu-tǹg á-sī àm-tǹg, m̄-thang tshiáⁿ lí ê pîng-iú, á-sī hiaⁿ-tī, á-sī tshin-tsiâⁿ, á-sī hó-gia̍h ê tshù-piⁿ, tsiah bián-tit in kā lí tshiáⁿ tò tńg-lâi, án-ne lí suah siū lâng pò-tap. 13 Lí pān toh tshiáⁿ lâng-kheh ê sî, tio̍h tshiáⁿ sàn-tshiah-ê, phuà-siùⁿ-ê, pái-kha-ê, tsheⁿ-mê-ê. 14 Án-ne lí it-tīng ē siū tsiok-hok, in-uī in bô lîng-li̍k kā lí pò-tap. Tī gī-lâng koh-ua̍h ê sî, Siōng-Tsú ē kā lí pò-tap."

Iàn-si̍k ê Phì-jū (Mt 22:1-10)
15 Kâng toh ê tsi̍t-ê lâng thiaⁿ-tio̍h tsiah-ê uē, tsiū tuì Iâ-so͘ kóng, " Ē-tàng tī Siōng-Tsú Kok-tō͘ lim-tsia̍h ê lâng, tsin ū hok-khì!." 16 M̄-koh Iâ-so͘ kā i kóng, " Ū tsi̍t-ê lâng pān tuā iàn-si̍k, tshiáⁿ tsin-tsē lâng. 17 Kàu beh khui-toh ê sî, tshe i ê lô͘-po̍k kā só͘ tshiáⁿ ê lâng kóng, ' Tshiáⁿ lín tio̍h lâi, ta̍k-hāng lóng tsún-pī hó-sè à.' 18 M̄-koh in tsi̍t-ê tsi̍t-ê the-sî. Thâu-tsi̍t-ê kā i kóng, ' Guá ū bué tsi̍t-tè hn̂g, it-tīng tio̍h khì khuàⁿ tsi̍t-ē. Tshiáⁿ lí liōng-kái.' 19 Koh tsi̍t-ê lâng kóng, ' Guá ū bé gō͘-tuì gû, tio̍h khì giām-siu. Tshiáⁿ lí liōng-kái.' 20 Koh tsi̍t-ê lâng kóng, ' Guá tú tshuā bó͘, só͘-í bē-tàng khì.' 21 Lô͘-po̍k tńg-khì tsiong tsiah-ê tāi-tsì kā tsú-lâng kóng. HIt-ê tsú-lâng siū-khì, kā i ê lô͘-po̍k kóng, 'Kín tshut-khì siâⁿ-lāi ê ke-thâu hāng-bué, tshuā hiah-ê sàn-tshiah-ê, phuà-siùⁿ-ê, tsheⁿ-mê-ê, pái-kha ê lâng lâi tsia.' 22 Lô͘-po̍k kóng, ' Tsú-lâng, lí só͘ huan-hù ê guá lóng í-king tsò à, m̄-koh iáu-koh ū khang-uī.' 23 Tsú-lâng tuì lô͘-po̍k kóng, ' Tshut-khì lō͘-ni̍h á-sī lî-pa piⁿ, kā hiah-ê lâng giú ji̍p-lâi, thang hō͘ guá ê tshù tsē muá. 24 Guá kā lín kóng, tsîng só͘ iau-tshiáⁿ hiah-ê lâng, bô tsi̍t-ê ē-tàng tsia̍h-tio̍h Guá ê iàn-si̍k.'"

Tsò Bûn-tô͘ ê Tāi-kè (Mt 10:37-38)
25 Ū tsin-tsē lâng kah Iâ-so͘ tsò-tīn kiâⁿ. Iâ-so͘ ua̍t kuè-lâi tuì in kóng, 26 " Siūⁿ beh lâi tuè Guá ê lâng, nā m̄-khíng pàng-sak i ê pē-bú, bó͘-kiáⁿ, hiaⁿ-tī, tsí-muē, sīm-tsì ka-kī ê sèⁿ-miā, tsiū bē-tàng tsò Guá ê bûn-tô͘. 27 Bô giâ ka-kī ê si̍p-jī-kè lâi tuè Guá ê lâng, mā bē-tàng tsò Guá ê bûn-tô͘. 28 Lín tiong-kan siáⁿ-lâng siūⁿ-beh khí thah, kám bô tāi-sing tsē lo̍h-lâi, sǹg khuàⁿ ū kàu tsîⁿ thang uân-sîng hit-ê kang-thîng á-bô? 29 Nā bô án-ne tsò, kiám-tshái hē tē-ki liáu-āu suah bē-tàng uân-sîng kang-thîng. Khuàⁿ-tio̍h ê lâng lóng ē kā i thí-tshiò, kóng, 30 ' Tsit-ê lâng ū khai-sí tāng kang, suah bē-tàng uân-sîng.' 31 Á-sī ū tsi̍t-ê ông beh kah pa̍t-ê ông kau-tsiàn, kám bô tāi-sing tsē lo̍h-lâi, siūⁿ khuàⁿ ē-tàng īng tsi̍t-bān ê ping, té-khòng hit-ê tshuā nn̄g-bān ê ping lâi kong-kik ê ông á-bē? 32 Nā tsai-iáⁿ bē, i ē thàn hit-ê ông iáu tī hn̄g-hn̄g ê sî, tshe sù-tsiá khì kah i kóng hô. 33 Án-ne kâng khuán, lín tiong-kan nā bô pàng-sak ka-kī ê it-tshè, tsiū bē-tàng tsò Guá ê bûn-tô͘." 34 Sit-bī ê Iâm (Mt 5:13; Mk 9:50) " Iâm tsin ū lō͘-īng, m̄-koh iâm nā sit-bī, beh án-tsuáⁿ huê-ho̍k i ê kiâm-bī? 35 Sit-bī ê iâm bē-tàng lo̍h-hn̂g, mā bē-tàng kauh-puî. Tsí ū hiat tiāu. Ū hīⁿ-khang thang thiaⁿ ê lâng, tio̍h thiaⁿ!"