《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十五章

作者 巴克禮普世版小組 2013.07.21

Bê-iûⁿ ê Phì-jū (Mt 18:12-14)
1 Ū tsi̍t pái, tsin-tsē thiu-suè-ê kah pháiⁿ-lâng, lâi Iâ-so͘ hia beh thiaⁿ I kóng tō-lí. 2 Huat-lī-sài-phài ê lâng kah king-ha̍k kàu-su ka̍uh-ka̍uh-liām kóng, " Tsit-ê lâng tsiap-la̍p pháiⁿ-lâng koh kah in tsò-hué tsia̍h-pn̄g!" 3 Iâ-so͘ īng tsit-ê phì-jū tuì in kóng, 4 " Lín tiong-kan siáⁿ-lâng ū tsi̍t-pah tsiah iûⁿ, phah-m̄-kiàn tsi̍t tsiah, kám bē tsiām-tshiáⁿ pàng káu-tsa̍p-káu tsiah tī suaⁿ-ni̍h, khì tshuē hit tsiah phah-m̄-kiàn ê, it-ti̍t kàu tshuē-tio̍h uî-tsí? 5 Tshuē-tio̍h liáu-āu tsiū huaⁿ-hí, kā hit tsiah iûⁿ phāiⁿ tuà king-kah-thâu. 6 Tńg-kàu tshù tsiū kiò tshù-piⁿ ê pîng-iú lâi, kā in kóng, " Lâi kah guá tàu huaⁿ-hí, in-uī guá tshuē-tio̍h phah-m̄-kiàn hit tsiah iûⁿ.' 7 Guá kā lín kóng, tī thiⁿ-tíng mā tshin-tshiūⁿ án-ne, uī-tio̍h pháiⁿ-lâng tiong-kan ū tsi̍t-ê lâng hué-kái lâi huaⁿ-hí, pí uī-tio̍h m̄-bián hué-kái ê káu-tsa̍p-káu ê gī-lâng koh-khah huaⁿ-hí."

Phah-m̄-kiàn Tsîⁿ ê Phì-jū
8 " Á-sī ū tsi̍t-ê hū-jîn-lâng ū tsa̍p-ê gîn-á, nā phah-m̄-kiàn tsi̍t-ê, kám bē tiám ting, piàⁿ-sàu tshù-lāi, phah-piàⁿ tshuē, kàu tshuē-tio̍h uî-tsí? 9 I tsi̍t-ē tshuē-tio̍h tsiū kiò pîng-iú kah tshù-piⁿ lâi, kā in kóng, ' Lâi kah guá tàu huaⁿ-hí, in-uī guá phah-m̄-kiàn ê gîn-á í-king tshuē-tio̍h.' 10 Guá kā lín kóng, tshin-tshiūⁿ án-ne, Siōng-Tsú ê thiⁿ-sài ē uī-tio̍h pháiⁿ-lâng tiong-kan ū tsi̍t-ê lâng hué-kái, lâi huaⁿ-hí."

Hòng-tōng Kiáⁿ ê Phì-jū
11 Iâ-so͘ koh kóng, " Ū tsi̍t-ê lâng ū nn̄g-ê kiáⁿ. 12 Hit-ê sè-hàn-kiáⁿ kā lāu-pē kóng, " A-pa, tshiáⁿ kā guá ing-kai tit ê tsâi-sán pun hō͘ guá." Lāu-pē tsiū pun ke-hué hō͘ nn̄g-ê kiáⁿ. 13 Keh bô kuí ji̍t, hit-ê sè-hàn-kiáⁿ kā só͘ tit-tio̍h ê tsâi-sán tsuân-pō͘ uāⁿ-tsò hiān-kim, tsiū tshut-guā khì tsin-hn̄g ê só͘-tsāi. I tī hia hòng-tōng luān khai tsîⁿ. 14 I kā só͘-ū ê tsîⁿ khai liáu-liáu ê sî, hit só͘-tsāi tú-tio̍h tuā ki-hng. I tsiah kak-gō͘ khiàm-khueh ê kan-khó͘. 15 I tsiū khì hō͘ hit só͘-tsāi ê tsi̍t-ê lâng tshiàⁿ. Hit-ê lâng tshe i khì suaⁿ-ni̍h ê hn̂g tshī ti. 16 I iau kah siūⁿ-beh the̍h ti teh tsia̍h ê tāu-phoh lâi tsí-iau, m̄-koh lóng bô-lâng beh hō͘ i tsia̍h. 17 Āu-lâi i kak-tshéⁿ kóng, ' Guá ê lāu-pē ū hiah-tsē tn̂g-kang, bí-niû tsia̍h kah ū tshun, m̄-koh guá tī tsia teh-beh iau sí-khì. 18 Guá beh tńg lâi-khì tshuē guá ê lāu-pē, kā i kóng, ' A-pa, guá ū tik-tsuē thiⁿ , mā ū tik-tsuē lí. 19 Taⁿ guá bô tsu-keh koh tsò lí ê kiáⁿ. Tshiáⁿ hō͘ guá tsò lí ê tn̂g-kang to̍h hó.' 20 I tsiū tshut-huat tńg-khì tshuē i ê lāu-pē. Lī in lāu-pē iáu-koh tsin hn̄g, lāu-pē to̍h khuàⁿ-tio̍h i, kám-kak tsin m̄-kam, tsáu uá-khì kā i lám-teh, ti̍t-ti̍t kā i tsim. 21 Kiáⁿ kā lāu-pē kóng, ' A-pa, guá ū tik-tsuē thiⁿ , mā ū tik-tsuē lí.Taⁿ guá bô tsu-keh koh tsò lí ê kiáⁿ.' 22 M̄-koh lāu-pē tuì hiah-ê lô͘-po̍k kóng, ' Kín hiaⁿh siōng-hó ê saⁿ lâi kā i tshīng, kā i kuà tshiú-tsí, koh kā i tshīng ê. 23 Suà khan hit tsiah puî ê gû-á-kiáⁿ lâi thâi, lâi pān-toh huaⁿ-hí khìng-tsiok. 24 In-uī guá tsit-ê kiáⁿ sí-khì ū koh-ua̍h, phah-m̄-kiàn ū koh tshuē-tio̍h.' In tsiū tsò-hué huaⁿ-hí khìng-tsiok." 25 Hit sî, tuā-kiáⁿ tuì hn̂g-ni̍h tńg-lâi, beh kàu tshù ê sî, thiaⁿ-tio̍h tsàu-ga̍k kah thiàu-bú ê siaⁿ. 26 I kiò tsi̍t-ê lô͘-po̍k lâi, mn̄g i khuàⁿ teh tsò siáⁿ-mi̍h tāi-tsì. 27 Hit-ê lô͘-po̍k kā i kóng, ' Lín sió-tī tńg-lâi à. Lín lāu-pē in-uī i pîng-an bô-sū tńg-lâi, só͘-í thâi hit tsiah puî ê gû-á-kiáⁿ. 28 Tuā-kiáⁿ tsin siū-khì, m̄ ji̍p-khì. Lāu-pē tshut-lâi kā i khó͘-khǹg. 29 M̄-koh i ìn lāu-pē kóng, ' Lí khuàⁿ, guá ho̍k-sāi lí hiah-tsē nî, lóng m̄ bat uî-puē lí ê bīng-līng. Lí mā m̄ bat hō͘ guá tsi̍t tsiah iûⁿ-á-kiáⁿ, thang kah guá ê pîng-iú tsò-hué huaⁿ-hí lim-tsia̍h. 30 M̄-koh lí tsit-ê kiáⁿ, kau-puê tshiong-ki, kā lí pun hō͘ i ê tsâi-sán tsuân-pō͘ khai liáu-liáu. I tsi̍t-ē tńg-lâi, lí tsiū uī-tio̍h i thâi puî ê gû-á-kiáⁿ.' 31 Lāu-pē kā i kóng, ' Guá ê kiáⁿ ah, lí siông-siông kah guá tsò-hué. Guá só͘-ū ê tsâi-sán lóng sī lí ê. 32 M̄-koh lí ê sió-tī sí ū koh-ua̍h, phah-m̄-kiàn koh tshuē-tio̍h. Lán ing-kai tio̍h lâi huaⁿ-hí khìng-tsiok!'"