《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十六章

作者 巴克禮普世版小組 2013.07.28

Piàn-khiàu Kuán-ke ê Phì-jū
1 Iâ-so͘ koh tuì bûn-tô͘ kóng, " Ū tsi̍t-ê hó-gia̍h-lâng, i ū tsi̍t-ê kuán-ke. Ū-lâng tuì tsú-lâng kiám-kí tsit-ê kuán-ke lōng-huì i ê tsâi-sán. 2 Tsú-lâng kiò hit-ê kuán-ke lâi kā i kóng, ' Guá ū thiaⁿ-tio̍h lí tsit-khuán ê tāi-tsì sī án-tsuáⁿ? Taⁿ lí kuán-lí ê siàu-phō͘ tio̍h tsíng-lí tshing-tshó kau tshut-lâi, in-uī lí bē-tàng koh tsò kuán-ke.' 3 Kuán-ke ê sim-lāi siūⁿ-kóng, ' Tsú-lâng beh kā guá sî kuán-ke ê tsit, taⁿ guá beh án-tsuáⁿ tsiah hó? Guá gia̍h tî-thâu bô khuì-la̍t, tsò khit-tsia̍h koh kiaⁿ kiàn-siàu. 4 Taⁿ guá tsai tio̍h án-tsuáⁿ tsò, kàu hông sî-khì kuán-ke ê tsit liáu-āu, hit sî lâng tsiah ē tsiap-la̍p guá ji̍p-khì in tshù.' 5 " Hit-ê kuán-ke tsiū kiò tsú-lâng ê tsè-bū-jîn tsi̍t-ê tsi̍t-ê lâi. I kā thâu-tsi̍t-ê kóng, ' Lí khiàm guá ê tsú-lâng juā-tsē?' 6 Ìn kóng, ' Kan-ná-iû, tsi̍t-pah tháng.' Kuán-ke kā i kóng, ' Tse sī lí ê siàu-tuaⁿ. Kín tsē lo̍h-lâi, kā i kái-tsò gō͘-tsa̍p tháng.' 7 I koh kā līng-guā tsi̍t-ê kóng, ' Lí khiàm juā-tsē?' Hit lâng kóng, ' Be̍h-á, tsi̍t-pah tsio̍h.' Kuán-ke kā i kóng, ' Tse sī lí ê siàu-tuaⁿ, kā i kái-tsò peh-tsa̍p tsio̍h.' 8 Tsú-lâng tsiū o-ló tsit-ê put-gī ê kuán-ke tsò liáu ū kàu khiáu, in-uī sio̍k sè-kan ê lâng tshù-lí sè-sū ê ki-khiáu, pí sio̍k kng-bîng ê lâng khah ū piàn-khiàu." 9 Iâ-so͘ kè-sio̍k kóng, " Guá kā lín kóng, tio̍h īng kim-sè ê tsîⁿ-tsâi kiat-kau pîng-iú, kàu tsîⁿ-tsâi īng uân ê sî, lí tsiah ē hō͘ lâng tsiap-la̍p ji̍p-khì íng-uán ê khiā-ke. 10 Tuì sè-hāng tāi-tsì tsīn-tiong ê lâng, tuì tuā-hāng tāi-tsì mā ē tsīn-tiong; tuì sè-hāng tāi-tsì bô láu-si̍t ê lâng, tuì tuā-hāng tāi-tsì mā ē bô láu-si̍t. 11 Só͘-í lín nā tuì sè-sio̍k ê tsîⁿ-tsâi bô tsīn-tiong, siáⁿ-lâng ē kā tsin-tsiàⁿ ê tsâi-pó kau-thok lín? 12 Lín tuì sio̍k pa̍t-lâng ê mi̍h nā bô tsīn-tiong, siáⁿ-lâng ē kā ing-kai sio̍k lín ê mi̍h hō͘ lín? 13 Tsi̍t-ê lô͘-po̍k bē-tàng ho̍k-sāi nn̄g-ê tsú-lâng, in-uī i ē uàn-hūn tsit-ê, thiàⁿ hit-ê; á-sī ē tsun-tiōng tsit-ê, khuàⁿ-khin hit-ê. Lín bē-tàng tông-sî ho̍k-sāi Siōng-Tsú koh ho̍k-sāi tsîⁿ-tsâi."

Lu̍t-huat Kah Siōng-Tsú Kok-tō͘ (Mt 5:31-32; 11:12-13; Mk 10:11-12)
14 Hiah-ê tham tsâi ê Huat-lī-sài-phài ê lâng, thiaⁿ-tio̍h Iâ-so͘ kóng tsiah-ê uē, tsiū kā I thí-tshiò. 15 Iâ-so͘ kā in kóng, " Lín tsiah-ê tī lâng ê bīn-tsîng ka-kī kiò-tsò gī ê lâng, m̄-koh Siōng-Tsú tsai lín ê sim-su, in-uī lâng khuàⁿ-tsò tsun-kuì ê, tuì Siōng-Tsú khuàⁿ khí-lâi sī thó-ià ê." 16 " Mô͘-se ê lu̍t-huat kah sian-ti ê kà-sī kàu Iok-hān uî-tsí. Tuì hit sî khí, Siōng-Tsú Kok-tō͘ ê Hok-im thuân tshut-khì, lâng-lâng lóng piàⁿ-miā tseⁿ beh ji̍p-khì hit-ê kok-tō͘. 17 M̄-koh thiⁿ-tē ê siau-bia̍t, pí beh huì-tû lu̍t-huat ê tsi̍t ue̍h, koh-khah kán-tan. 18 Lâng nā lî ka-kī ê bó͘ khì tshuā pa̍t-ê tsa-bó͘-lâng, sī huān kan-îm; tshuā hō͘ lâng lī-hun ê tsa-bó͘-lâng, mā sī huān kan-îm."

Hó-gia̍h-lâng Kah Lia̍p-sat-lō͘
19 Ū tsi̍t-ê hó-gia̍h-lâng tshīng tsí-sik kah iù-tē-pò͘ ê saⁿ-khò͘, ta̍k-ji̍t tshia-huâ iàn-lo̍k. 20 Koh ū tsi̍t-ê khit-tsia̍h miâ-kiò Lia̍p-sat-lō͘, kui sing-khu seⁿ kah tsuân lia̍p-á, tó tī hit-ê hó-gia̍h-lâng ê mn̂g-kháu, 21 beh khioh hó-gia̍h-lâng toh-kha só͘ ka-la̍uh ê tsia̍h-mi̍h lâi tsí-iau. Káu mā lâi tsīⁿ i ê kha seⁿ lia̍p-á ê só͘-tsāi. 22 Āu-lâi tsit-ê khit-tsia̍h sí-khì, thiⁿ-sài hû i khì kàu A-pik-la̍h-hán ê hing-tsîng. Hit-ê hó-gia̍h-lâng mā sí-khì, suà hō͘ lâng kā i bâi-tsòng. 23 I tī im-kan siū tuā thòng-khó͘ ê sî, gia̍h thâu tsiū khuàⁿ-tio̍h A-pik-la̍h-hán tī hn̄g-hn̄g ê só͘-tsāi, mā ū khuàⁿ-tio̍h Lia̍p-sat-lō͘ tī i ê hing-tsîng. 24 I tsiū tuā-siaⁿ huah kóng, ' Guá ê tsó͘-sian A-pik-la̍h-hán, liân-bín guá! Kiû lí tshe Lia̍p-sat-lō͘ īng tsíng-thâu-á-bué ùn tsuí lâi hō͘ guá ê tshuì-tsi̍h liâng tsi̍t-ē, in-uī guá tī tsit-ê hué-iām tiong teh siū khó͘-tshó͘.' 25 M̄-koh A-pik-la̍h-hán kóng, ' Sió-kiáⁿ ah, tio̍h kì-tit lí tsāi-seⁿ hióng-siū lí ê hok-khì, m̄-koh Lia̍p-sat-lō͘ tsāi-seⁿ siū tsin-tsē kan-khó͘. Taⁿ i tī tsia tit-tio̍h an-uì, á lí tī tsia teh siū khó͘-tshó͘. 26 M̄-nā án-ne, tī guán kah lín ê tiong-kan ū tuā tshim-ian keh-khui, só͘-í tuì tsia bē-tàng kuè-khì lín hia, mā bē-tàng tuì lí hia kuè-lâi guán tsia.' 27 Hit-ê hó-gia̍h-lâng tsiū kóng, ' Kì-jiân sī án-ne, guá ê tsó͘-sian ah, kiû lí tshe Lia̍p-sat-lō͘ khì guán lāu-pē ê tshù. 28 In-uī guá ū gō͘-ê hiaⁿ-tī, hō͘ Lia̍p-sat-lō͘ thang tuì in kíng-kò, bián-tit in mā lâi-kàu tsit-ê hui-siông thòng-khó͘ ê só͘-tsāi.' 29 M̄-koh A-pik-la̍h-hán ìn kóng, ' Lí hiah-ê hiaⁿ-tī ū Mô͘-se kah hiah-ê sian-ti thang kā in kíng-kò, hō͘ lí ê hiaⁿ-tī khì thiaⁿ in ê uē.' 30 Hit-ê hó-gia̍h-lâng ìn kóng, ' Guá ê tsó͘-sian A-pik-la̍h-hán ah, án-ne bô kàu gia̍h, tio̍h ū-lâng tuì sí-lâng tiong koh ua̍h khì tshuē in, in tsiah ē hué-kái.' 31 A-pik-la̍h-hán kā i kóng, ' In nā m̄ thiaⁿ Mô͘-se kah sian-ti ê uē, tsiū-sī ū-lâng tuì sí-lâng tiong koh-ua̍h, in mā m̄ siū khó͘-khǹg.'"