《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十七章

作者 巴克禮普世版小組 2013.08.04

Lūn Tsuē, Sìn-sim, Ho̍k-sāi (Mt 17:20; 18:6-7, 21-22; Mk 9:42)
1 Iâ-so͘ koh tuì bûn-tô͘ kóng, " Ín-khí lâng huān-tsuē ê tāi-tsì lân-bián, m̄-koh hō͘ hit-ê tāi-tsì huat-sing ê lâng ū tsai-hō! 2 Lîng-khó īng tuā tsio̍h-bō tiàu tuà i ê ām-kún, kā i hiat-lo̍h hái. Mā m̄-thang hō͘ tsì-bî-sè ê tsi̍t-ê huān-tsuē. 3 Lín ka-kī mā tio̍h kín-sīn. Nā lín ê hiaⁿ-tī huān-tsuē, tio̍h kā i tsik-pī. I nā hué-kái, tio̍h kā i sià-bián. 4 M̄-koh nā lí ê hiaⁿ-tī tsi̍t ji̍t tik-tsuē lí tshit pái, i tshit pái lóng ū tò-tńg-lâi kā lí kóng, ' Guá hué-kái à.' Lí mā lóng tio̍h kā i sià-bián."

Lūn Sìn-sim
5 Sù-tô͘ kā Tsú kóng, " Kiû Lí ke-thiⁿ guán ê sìn-sim." 6 Tsú ìn kóng, " Lín nā ū tshin-tshiūⁿ tsi̍t-lia̍p kuà-tshài-tsí hiah tuā ê sìn-sim, tsiū-sī bīng-līng tsit tsâng sng-tsâi-tshiū kóng, ' Pui̍h lí ê kin khì tsai tī hái-ni̍h.' Hit tsâng tshiū mā ē sūn-ho̍k lín."

Lô͘-po̍k ê Gī-bū
7 Lín tiong-kan nā ū lô͘-po̍k tuì tsò-sit á-sī kò͘-iûⁿ tńg-lâi ê sî, lín kám ē kā i kóng, ' Kín tsē lo̍h-lâi tsia̍h-pn̄g?' 8 Lí kám ē tian-tò kā i kóng, ' Tsún-pī hō͘ guá tsia̍h-pn̄g, hâ uî-su-kûn lâi ho̍k-sāi guá. Thìng-hāu guá lim-tsia̍h suah, lí tsiah thang lim-tsia̍h?' 9 Lô͘-po̍k tsò tsú-lâng só͘ huan-hù ê tāi-tsì, tsú-lâng kám tio̍h kā i sueh-siā? 10 Lín mā tshin-tshiūⁿ án-ne, lín tsò uân siū kau-tài ê tāi-tsì, tio̍h kóng, ' Guán sī bô lō͘-īng ê lô͘-po̍k, kan-tāⁿ tsīn pún-hūn khì tsò niā-niā.'"

I-hó Tsa̍p-ê Thái-ko Pēⁿ-lâng
11 Iâ-so͘ khì Iâ-lō͘-sat-líng ê sî, tuì Sat-má-lī-a kah Ka-lī-lī-síng ê kau-kài king-kuè. 12 I ji̍p-khì tsi̍t-ê tsng-siā ê sî, tú-tio̍h tsa̍p-ê thái-ko pēⁿ-lâng. In khiā tuà hn̄g-hn̄g ê só͘-tsāi, 13 tuā-siaⁿ huah kóng, " Iâ-so͘ lāu-su, liân-bín guán." 14 Iâ-so͘ tsi̍t-ē khuàⁿ-tio̍h tsiū kā in kóng, " Lín pún-sin khì hō͘ tsè-si giām." In khì tī lō͘-tiong, tsiū tit-tio̍h tshing-khì. 15 Kî-tiong tsi̍t-ê lâng khuàⁿ-tio̍h ka-kī ê pēⁿ í-king hó, tsiū tò-tńg-lâi tuā-siaⁿ o-ló Siōng-Tsú, 16 phak tuà Iâ-so͘ ê kha-tsîng kā I kám-siā. Tsit-ê lâng sī Sat-má-lī-a-lâng. 17 Iâ-so͘ mn̄g kóng, " Kám m̄-sī tsa̍p-ê lâng lóng tit-tio̍h tshing-khì? Kî-tha káu-ê lâng tī tó-uī? 18 Tsit-ê guā-tso̍k ê lâng í-guā, kám bô pa̍t-lâng tò-tńg-lâi kám-siā Siōng-Tsú?" 19 Iâ-so͘ tsiū kā hit-ê lâng kóng, " Khí-lâi, tsò lí tńg-khì, lí ê sìn-sim hō͘ lí tit-tio̍h i-hó à."

Siōng-Tsú Kok-tō͘ ê Lâi-lîm (Mt 24:23-28, 37-41)

20 Ū tsi̍t-kuá Huat-lī-sài-phài ê lâng mn̄g Iâ-so͘, Siōng-Tsú Kok-tō͘ tī-sî ē lîm-kàu. Iâ-so͘ ìn kóng, " Siōng-Tsú Kok-tō͘ lîm-kàu, m̄-sī lâng khuàⁿ ē tshut-lâi. 21 Mā bô-lâng ē-tàng kóng, ' Tī tsia', á-sī ' Tī hia', in-uī Siōng-Tsú Kok-tō͘ sī tī lín ê tiong-kan." 22 Iâ-so͘ tsiū tuì bûn-tô͘ kóng, " Sî-ji̍t teh-beh kàu. Lín tsin ài khuàⁿ-tio̍h Jîn-tsú lâi-lîm ê hit ji̍t, lín mā khuàⁿ bē-tio̍h. 23 Ū-lâng kā lín kóng, ' Lí khuàⁿ, tī hia! Lí khuàⁿ, tī tsia!' Lín m̄-thang tshut-khì, mā m̄-thang tuè in khì. 24 In-uī Jîn-tsú lâi-lîm ê ji̍t-tsí ná tshin-tshiūⁿ sih-nà, tuì thiⁿ tsit-pîng teh sih, kng tsiò kàu thiⁿ ê hit-pîng. 25 M̄-koh I it-tīng tio̍h tāi-sing siū tsin-tsē ê kan-khó͘, mā hō͘ tsit sè-tāi ê lâng khì-sak. 26 Jîn-tsú lâi-lîm ê ji̍t-tsí kah Ná-a ê sî-ji̍t kāng-khuán. 27 Hit sî ê lâng, tsiàu-siông teh lim-tsia̍h, teh kè-tshuā. Kàu Ná-a ji̍p-khì tuā-tsûn ê ji̍t, tuā-tsuí tsi̍t-ē kàu, tsìng-lâng lóng im-sí liáu-liáu. 28 Mā kah Lô-tik ê sî-ji̍t kāng-khuán, lâng tsiàu-siông teh lim-tsia̍h, bé-bē, tsìng-tsoh, khí-tshù. 29 M̄-koh Lô-tik tshut Só͘-to-má hit ji̍t, tuì thiⁿ ū kàng-lo̍h hué kah liû-hông, kā in siau-bia̍t kah bô puàⁿ-lâng. 30 Jîn-tsú tshut-hiān ê ji̍t, mā ē tshin-tshiūⁿ án-ne." 31 Hit ji̍t, tú tī tshù-tíng ê lâng m̄-thang lo̍h-lâi the̍h tshù-lāi ê mi̍h-kiāⁿ. Tú tī hn̂g-ni̍h ê lâng mā m̄-thang tńg-khì tshù-ni̍h. 32 Lín tio̍h ē-kì-tit Lô-tik ê bó͘ só͘ tú-tio̍h ê tāi-tsì. 33 Siūⁿ-beh pó-tsuân ka-kī sèⁿ-miā ê lâng ē sòng-sit sèⁿ-miā; só͘-ū sòng-sit sèⁿ-miā ê lâng ē pó-tsuân i ê sèⁿ-miā. 34 Guá kā lín kóng, hit mê nn̄g-ê lâng khùn kâng-tíng tshn̂g, tsi̍t-ê ē hō͘ lâng tshuā-khì, tsi̍t-ê ē lâu teh. 35 Nn̄g-ê hū-jîn-lâng tâng-tsê teh e tsio̍h-bō, tsi̍t-ê ē hō͘ lâng tshuā-khì, tsi̍t-ê ē lâu teh. 36 Ū nn̄g-ê lâng tī tshân-ni̍h teh tsò-sit, tsi̍t-ê hō͘ lâng tsiap-khì, tsi̍t-ê lâu-teh.”(tsù: Ū-ê tshau-pún bô tsit tsat.) 37 Bûn-tô͘ mn̄g Iâ-so͘ kóng, " Tsú ah, tse ē tī siáⁿ-mi̍h só͘-tsāi huat-sing?" Iâ-so͘ ìn kóng, " Ū si-thé ê só͘-tsāi, ing-tsiáu tsiū ē tsū-tsi̍p khì tī hia."