《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十八章

作者 巴克禮普世版小組 2013.08.11

Kuáⁿ-hū Kah Phuàⁿ-kuaⁿ ê Phì-jū
1 Iâ-so͘ koh kā bûn-tô͘ kóng tsi̍t-ê phì-jū, kà-sī in tio̍h siông-siông kî-tó, m̄-thang ià-siān. 2 I kóng, " Tī bó͘ tsi̍t-ê siâⁿ-tshī ū tsi̍t-ê sím-phuàⁿ-kuaⁿ. I bô kìng-uì Siōng-Tsú, mā bô tsun-tiōng lâng. 3 Tī hit-ê siâⁿ-lāi ū tsi̍t-ê kuáⁿ-hū, siông-siông khì tshuē i kóng, ' Guá ū tsi̍t-ê sò͘-siōng ê tuì-thâu, kiû lí thè guá tsú-tshî kong-tō.' 4 Phuàⁿ-kuaⁿ tsin kú lóng bô kā i tap-ìng. Āu-lâi ka-kī siūⁿ-kóng, ' Guá sui-jiân bô kìng-uì Siōng-Tsú, mā bô tsun-tiōng lâng. 5 M̄-koh in-uī tsit-ê kuáⁿ-hū siông-siông lâi kiáu-jiáu, guá lîng-khó kín lâi thè i tsú-tshî kong-tō, bián-tit i koh lâi kā guá kô-kô-tîⁿ.'" 6 Tsú koh kóng, " Lín tio̍h thiaⁿ tsit-ê put-gī ê phuàⁿ-kuaⁿ só͘ kóng ê uē! 7 Hô-hòng Siōng-Tsú kíng-suán ê tsú-bîn mê-ji̍t tuā-siaⁿ tuì I ai-kiû. Siōng-Tsú kám ē iân-tshiân tsin kú tsiah lâi thè in tsú-tshî kong-tō? 8 Guá kā lín kóng, Siōng-Tsú ē kuáⁿ-kín thè in tsú-tshî kong-tō. Tsóng-sī Jîn-tsú lâi-lîm ê sî, I tī sè-kan kám ē khuàⁿ-tio̍h tsit-khuán ê sìn-sim?"

Huat-lī-sài-phài ê Lâng kah Thiu-suè ê Lâng
9 Iâ-so͘ koh-tsài tuì hiah-ê khuàⁿ ka-kī tsò gī-lâng koh khuàⁿ-khin pa̍t-lâng ê lâng, kóng tsi̍t-ê phì-jū. 10 Iâ-so͘ kóng, " Ū nn̄g-ê lâng ji̍p-khì sìng-tiān kî-tó, tsi̍t-ê sī Huat-lī-sài-phài ê lâng, tsi̍t-ê sī thiu-suè-ê. 11 Huat-lī-sài-phài ê lâng khiā-teh kî-tó kóng, ' Siōng-Tsú ah, guá kám-siā Lí, in-uī guá bô tshin-tshiūⁿ kî-tha ê lâng tham-tsâi, put-gī, kan-îm, mā bô tshin-tshiūⁿ tsit-ê thiu-suè-ê. 12 Guá tsi̍t lé-pài kìm-tsia̍h nn̄g pái, koh hōng-hiàn tsuân-pō͘ siu-ji̍p ê tsa̍p hūn tsi it.' 13 M̄-koh hit-ê thiu-suè-ê khiā tuà hn̄g-hn̄g ê só͘-tsāi, liân gia̍h thâu ǹg thiⁿ to m̄-káⁿ, kan-taⁿ pi-siong kóng, ' Siōng-Tsú ah, liân-bín guá tsit-ê ū tsuē ê lâng.' 14 Guá kā lín kóng, hō͘ Siōng-Tsú sià-tsuē tńg-khì tshù-ni̍h sī tsit-ê thiu-suè-ê. M̄-sī hit-ê Huat-lī-sài-phài ê lâng, in-uī kiau-ngō͘ ê lâng it-tīng ē siū kàng-kē; khiam-pi ê lâng siū thê-ko."

Iâ-so͘ Tsiok-hok Sè-hàn Gín-á (Mt 19:13-15; Mk 10:13-16)
15 Ū-lâng liân sè-hàn-gín-á mā tshuā lâi, beh hō͘ Iâ-so͘ huāⁿ-tshiú. Bûn-tô͘ khuàⁿ-tio̍h tsiū kā in tsik-pī. 16 M̄-koh Iâ-so͘ kiò hiah-ê sè-hàn-gín-á lâi kóng, " Iông-ín sè-hàn-gín-á lâi Guá tsia, m̄-thang kā i tsó͘-tòng, in-uī tshin-tshiūⁿ gín-á ê lâng, tsiah ē-tàng tsiâⁿ-tsò Siōng-Tsú Kok-tō͘ ê tsú-bîn. 17 Guá si̍t-tsāi kā lín kóng, nā bô tshin-tshiūⁿ sè-hàn-gín-á án-ne sîng-tsiap Siōng-Tsú Kok-tō͘, tsua̍t-tuì bē-tàng ji̍p-khì hit-ê kok-tō͘."

Hó-gia̍h ê Kuaⁿ-uân Lâi Kìⁿ Iâ-so͘ (Mt 19:16-30; Mk 10:17-31)
18 Ū tsi̍t-ê Iû-thài-lâng ê kuaⁿ-uân lâi mn̄g Iâ-so͘, kóng, " Hó ê lāu-su ah, guá tio̍h án-tsuáⁿ tsò tsiah ē-tàng tit-tio̍h íng-uán ê ua̍h-miā?" 19 Iâ-so͘ kā i kóng, " Lí án-tsuáⁿ tshing-ho͘ Guá sī hó à? Siōng-Tsú í-guā bô tsi̍t-ê sī hó. 20 Lí tong-jiân lóng bat tsiah-ê kài-bīng, tsiū-sī: M̄-thang kan-îm, M̄-thang thâi-sí lâng, M̄-thang thau-the̍h, M̄-thang lām-sám tsò kiàn-tsìng, Tio̍h hàu-kìng lí ê pē-bú."( tsù: SBK 5:16-20; CAK 20:12-16) 21 Hit-ê lâng kóng, " Tsiah-ê kài-bīng, guá tsū sè-hàn to̍h lóng án-ne teh tsun-siú." 22 Iâ-so͘ thiaⁿ-tio̍h tsiah-ê uē tsiū kā i kóng, " Lí iáu khiàm tsi̍t-hāng, tio̍h khì bē lí só͘-ū ê tsâi-sán, lâi pun hō͘ sàn-tshiah lâng. Án-ne lí tsiū ū tsik-tsū tsâi-pó tī thiⁿ-tíng, jiân-āu tsiah lâi tuè Guá." 23 Hit-ê lâng thiaⁿ-tio̍h tsiah-ê uē tsin iu-būn, in-uī i tsin hó-gia̍h. 24 Iâ-so͘ khuàⁿ-tio̍h hit-ê lâng teh iu-būn tsiū kóng, " Hó-gia̍h-lâng beh ji̍p-khì Siōng-Tsú Kok-tō͘ tsin khùn-lân! 25 In-uī lo̍k-tô tshng-kuè tsiam-phīⁿ, pí hó-gia̍h-lâng ji̍p Siōng-Tsú Kok-tō͘, iáu khah kán-tan!" 26 Thiaⁿ-kìⁿ tsiah-ê uē ê lâng mn̄g kóng, " Án-ne, siáⁿ-lâng tsiah ē-tàng tit-tio̍h kiù?" 27 Iâ-so͘ ìn kóng, " Lâng só͘ tsò bē kàu ê, Siōng-Tsú lóng ē." 28 Pí-tik kóng, " Guán í-king pàng-sak ka-kī só͘-ū ê lâi teh tuè Lí." 29 Iâ-so͘ kā in kóng, " Guá si̍t-tsāi kā lín kóng, lâng nā uī-tio̍h Siōng-Tsú Kok-tō͘ lâi pàng-sak tshù-the̍h, bó͘, hiaⁿ-tī, pē-bú, á-sī kiáⁿ-jî, 30 tī kim-sè ē tit-tio̍h kuí-nā puē ê pò-siúⁿ, tī lâi-sè tit-tio̍h íng-uán ê ua̍h-miā."

Iâ-so͘ Tē-saⁿ Pái Ī-giân I ê Sí-bông kah Koh-ua̍h (Mt 20:17-19; Mk 10:32-34)
31 Iâ-so͘ tshuā tsa̍p-jī sù-tô͘ khì piⁿ-á kā in kóng, " Lí khuàⁿ, taⁿ lán beh tsiūⁿ Iâ-lō͘-sat-líng, sian-ti só͘ kì-tsài kuan-hē Jîn-tsú ê it-tshè, lóng ē ìng-giām. 32 I ē hō͘ lâng tshut-bē kau hō͘ Guā-pang-lâng. In ē kā i thí-tshiò, bú-jio̍k, phuì-nuā. 33 In ē īng piⁿ kā i phah lâi hāi-sí I. Tē-saⁿ ji̍t Siōng-Tsú ē hō͘ I koh-ua̍h." 34 M̄-koh bûn-tô͘ tuì tsiah-ê tāi-tsì lóng bē liáu-kái. Tsiah-ê uē hō͘ in kám-kak bo̍k-bîng kî-biāu. In m̄-tsai Iâ-so͘ teh kóng siáⁿ-mi̍h.

Iâ-so͘ I-hó Sit-bîng ê Khit-tsia̍h (Mt 20:29-34; Mk 10:46-52)
35 Iâ-so͘ teh-beh kàu Iâ-lī-ko-siâⁿ ê sî, ū tsi̍t-ê tsheⁿ-mê-ê tsē tī lō͘-piⁿ teh kiû-khit. 36 Hit-ê tsheⁿ-mê-ê thiaⁿ-tio̍h tsin-tsē lâng tuì hia king-kuè, tsiū mn̄g sī siáⁿ-mi̍h tāi-tsì. 37 Lâng kā i kóng, " Ná-sat-li̍k-lâng Iâ-so͘ teh-beh tuì tsia king-kuè." 38 I tsiū tuā-siaⁿ huah kóng, " Tāi-pi̍t ê kiáⁿ-sun, Iâ-so͘, liân-bín guá!" 39 Kiâⁿ tī thâu-tsîng ê lâng kā i tsik-pī, kiò i tio̍h tiām-tiām, m̄-koh i koh-khah tuā-siaⁿ huah kóng, " Tāi-pi̍t ê kiáⁿ-sun ah, liân-bín guá!" 40 Iâ-so͘ thîng-kha, kiò lâng kā i khan lâi. I uá-lâi ê sî, Iâ-so͘ mn̄g i kóng, 41 " Lí ài Guá kā lí tsò siáⁿ-mi̍h?" I tsiū kóng, " Tsú ah, kiû Lí hō͘ guá koh-tsài ū khuàⁿ-kìⁿ." 42 Iâ-so͘ kā i kóng, " Hó, hō͘ lí koh-tsài ū khuàⁿ-kìⁿ, lí ê sìn-sim kiù-tio̍h lí à." 43 I suî-sî khuàⁿ-kìⁿ, tsiū tuè Iâ-so͘ khì, kui îng-kng hō͘ Siōng-Tsú. Kûn-tsiòng khuàⁿ-tio̍h tsit-ê tāi-tsì, lóng o-ló Siōng-Tsú.