《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十九章

作者 巴克禮普世版小組 2013.08.18

Iâ-so͘ Kah Sat-kai
1 Iâ-so͘ ji̍p-khì Iâ-lī-ko-siâⁿ, tī ke-lō͘ teh kiâⁿ ê sî, 2 Ū tsi̍t-ê lâng miâ-kiò Sat-kai, sī thiu-suè-ê thâu-lâng, mā sī hó-gia̍h-lâng. 3 I ài beh khuàⁿ Iâ-so͘ sī siáⁿ-lâng, m̄-koh lâng tsin-tsē, i ê sin-tsâi koh é, suah khuàⁿ bē-tio̍h. 4 Só͘-í i tsiū tsáu tsò-tsîng, peh khí-lih tsi̍t tsâng sng-tsâi-tshiū, beh khuàⁿ Iâ-so͘ tuì hia king-kuè. 5 Iâ-so͘ kiâⁿ kàu hit só͘-tsāi, gia̍h thâu khí-lâi khuàⁿ, kā i kóng, " Sat-kai, kuáⁿ-kín lo̍h-lâi, kin-á-ji̍t Guá it-tīng tio̍h tuà lí ê tshù." 6 Sat-kai tsiū kuáⁿ-kín lo̍h-lâi, huaⁿ-huaⁿ hí-hí khì gîng-tsiap Iâ-so͘. 7 Tsìng-lâng khuàⁿ-tio̍h tsiū nga̍uh-nga̍uh-liām kóng, " Tsit-ê lâng suah ji̍p-khì pháiⁿ-lâng ê tshù tuà!" 8 Sat-kai khiā-teh, tuì Tsú kóng, " Tsú ah, guá tsiong só͘ ū tsâi-sán ê tsi̍t puàⁿ lâi tsín-tsè sàn-tshiah lâng. Guá nā bat pián siáⁿ-lâng ê tsîⁿ, beh sì-puē puê i." 9 Iâ-so͘ tuì i kóng, " Kin-á-ji̍t kiù-un lâi-kàu tsit-ê ke, in-uī i mā sī A-pik-la̍h-hán ê kiáⁿ-sun. 10 In-uī Jîn-tsú sī beh lâi tshuē sit-bê ê lâng, lâi kā i tsín-kiù."

Tsa̍p-niú Gîn-á ê Phì-jū (Mt 25:14-30)
11 In thiaⁿ-tio̍h tsiah-ê uē ê sî, Iâ-so͘ koh kā in kóng tsi̍t-ê phì-jū, sī in-uī I teh-beh kàu Iâ-lō͘-sat-líng à, hiah-ê lâng mā siūⁿ-kóng Siōng-Tsú Kok-tō͘ liâm-piⁿ to̍h ē tshut-hiān. 12 Só͘-í Iâ-so͘ kā in kóng, " Ū tsi̍t-ê kuì-tso̍k beh khì tsin-hn̄g ê só͘-tsāi siū-hong tsò-ông liáu tsiah tò tńg-lâi. 13 I kiò tsa̍p-ê lô͘-po̍k lâi, hō͘ in muí lâng tsi̍t-niú gîn-á, tuì in kóng, ' Kàu guá tńg-lâi í-tsîng, īng tsiah-ê gîn-á khì tsò sing-lí.' 14 M̄-koh hit-ê kuì-tso̍k pún-kok ê jîn-bîn uàn-hūn i, tshe tsi̍t-ê sù-tsiá tuè-āu khì tsàu kóng, ' Guán bô ài tsit-ê lâng tsò guán ê ông.' 15 " Tsit-ê kuì-tso̍k siū-hong tsò ông tńg-lâi, kiò hiah-ê tuì i niá gîn-á ê lô͘-po̍k lâi, ài beh tsai in tsò sing-lí thàn juā-tsē tsîⁿ. 16 Thâu tsi̍t-ê lâi i ê bīn-tsîng kóng, ' Tsú-lâng ah, guá īng lí hō͘ guá hiah-ê gîn-á thàn tsa̍p niú à.' 17 Tsú-lâng kā i kóng, ' Tsin hó, hó ê lô͘-po̍k, lí kì-jiân tī sió-khuá ê tāi-tsì tsīn-tiong, taⁿ hō͘ lí kuán tsa̍p-ê siâⁿ.' 18 Tē-jī ê lâi kóng, ' Tsú-lâng, guá īng lí hit-ê gîn-á thàn gō͘ niú à.' 19 Tsú-lâng mā án-ne kā i kóng, ' Hō͘ lí mā kuán-lí gō͘-ê siâⁿ.' 20 Koh tsi̍t-ê lô͘-po̍k lâi kóng, ' Tsú-lâng, lí khuàⁿ, lí tsi̍t niú gîn-á tī tsia, guá īng tshiú-kin-á kā i pau khí-lâi khǹg-teh. 21 Guá kiaⁿ lí, in-uī lí sī khik-po̍k ê lâng, bô kià mā beh niá, bô iā-tsíng mā beh siu-kuah.' 22 Tsú-lâng kā i kóng, ' Lí tsit-ê pháiⁿ ê lô͘-po̍k, tsiàu lí só͘ kóng ê, guá beh kā lí tīng-tsuē. Lí kì-jiân tsai guá sī khik-po̍k ê lâng, bô kià mā beh niá, bô iā-tsíng mā beh siu-kuah. 23 Lí ná-ē bô kā guá ê gîn-á khì lok tī tsîⁿ-tiàm, kàu guá tńg-lâi ê sî, thang niá bó-kim kah lī-sik?' 24 Tsú-lâng kā khiā tī piⁿ-á ê lâng kóng, ' Kā i ê tsi̍t-niú gîn-á the̍h-lâi, kau hō͘ hit-ê ū tsa̍p-niú ê.' 25 In tuì tsú-lâng kóng, ' Tsú-lâng ah, i í-king ū tsa̍p niú à.' 26 Tsú-lâng ìn kóng, ' Guá kā lín kóng, í-king ū ê lâng, guá beh hō͘ i koh-khah-tsē; bô-ê lâng, liân i só͘-ū ê mā beh kā i the̍h-lâi. 27 M̄-koh hiah-ê bô ài guá tsò in ê ông ê tuì-ti̍k, tio̍h kā in thua lâi, tī guá ê bīn-tsîng kā in thâi-sí.'"

Iâ-so͘ Kong-îng Tsìn-ji̍p Iâ-lō͘-sat-líng (Mt 21:1-11; Mk 11:1-11; Ih 12:12-19)
28 Iâ-so͘ kóng tsiah-ê uē liáu-āu, kè-sio̍k hiòng-tsîng kiâⁿ, tsiūⁿ Iâ-lō͘-sat-líng. 29 Teh-beh kàu kiò-tsò Kan-ná-suaⁿ suaⁿ-kha ê Pik-huat-kî kah Pik-tāi-nî ê sî, Iâ-so͘ tshe nn̄g-ê bûn-tô͘, 30 Huan-hù in kóng, " Lín khì tuì-bīn ê tsng-siā, ji̍p-khì ê sî ē tú-tio̍h tsi̍t tsiah iáu-buē ū-lâng khiâ kuè ê lî-á pa̍k tī hia. Lín kā i tháu-khui khan lâi tsia. 31 Nā ū-lâng mn̄g kóng, ' Lín tháu lî-á beh tshòng-siáⁿ?' lín tio̍h kóng, ' Tsú teh su-iàu īng.'" 32 Hit nn̄g-ê bûn-tô͘ tsiū khì, só͘ tú-tio̍h ê tāi-tsì, kó-jiân kah Iâ-so͘ só͘ kóng ê uân-tsuân kāng-khuán. 33 In teh tháu lî-á ê sî, tsú-lâng mn̄g in kóng, " Tháu lî-á beh tshòng-siáⁿ?" 34 In ìn kóng, " Tsú teh su-iàu īng." 35 In tsiū khan hit tsiah lî-á lâi hō͘ Iâ-so͘. Kā in ka-kī ê guā-saⁿ phua̍h tuà lî-á tíng, hû Iâ-so͘ khí-lih khiâ. 36 Iâ-so͘ khiâ lî-á hiòng tsîng kiâⁿ ê sî, tsìng-lâng kā ka-kī ê guā-saⁿ pho͘ tī lō͘-ni̍h. 37 Iâ-so͘ tú beh lo̍h Kan-ná-suaⁿ ê sî, kui tuā-tīn ê bûn-tô͘ khuàⁿ-tio̍h it-tshè kî-biāu ê tāi-tsì, tsiū tuā huaⁿ-hí, tuā-siaⁿ o-ló Siōng-Tsú, 38 kóng, " Hōng Tsú ê miâ lâi ê ông, ing-kai tit-tio̍h o-ló, guān thiⁿ-tíng hô-pîng, kui îng-kng hō͘ tsì-kuân ê Siōng-Tsú." 39 Tsìng-lâng tiong-kan ū kuí-nā-ê Huat-lī-sài-phài ê lâng tuì Iâ-so͘ kóng, " Lāu-su ah, tio̍h tsik-pī Lí ê bûn-tô͘." 40 Iâ-so͘ ìn kóng, " Guá kā lín kóng, in nā tiām-tiām, hiah-ê tsio̍h-thâu mā ē tuā-siaⁿ huah."

Iâ-so͘ Uī Iâ-lō͘-sat-líng Ai-khàu
41 Iâ-so͘ teh-beh kàu Iâ-lō͘-sat-líng, khuàⁿ-tio̍h siâⁿ tsiū uī-tio̍h tsit-ê siâⁿ thî-khàu, 42 kóng, " Guá si̍t-tsāi tsin ài lí tī tsit ji̍t to̍h tsai kuan-hē pîng-an ê tāi-tsì! M̄-koh hiān-tshú-sî lí ê ba̍k-tsiu khuàⁿ bē tshut. 43 In-uī sî-ji̍t teh-beh kàu, lí ê tuì-ti̍k ē tī lí ê sì-tsiu-uî khí thô͘-tshiûⁿ, lâi kā lí hong-só khí-lâi. 44 In koh ē hō͘ lí kah lí siâⁿ-lāi ê jîn-bîn lóng huí-bia̍t, bô lâu kah nn̄g-tè tsio̍h sio-tha̍h, in-uī lí m̄-tsai Siōng-Tsú lâi beh tsín-kiù lí ê hó ki-huē."

Iâ-so͘ Tshing-kiat sìng-tiān (Mt 21:12-17; Mk 11:15-19; Ih 2:13-22)
45 Iâ-so͘ ji̍p-khì sìng-tiān, tsiū kuáⁿ-tshut hiah-ê bē mi̍h-kiāⁿ ê lâng. 46 I kā in kóng, " Sìng-king ū kì-tsài: Guá ê tshù beh tsò kî-tó ê tshù,' m̄-koh lín hō͘ i piàn-tsò tsha̍t-siū."( tsù: ISA 56:7; ILB 7:11) 47 Iâ-so͘ ta̍k-ji̍t tī sìng-tiān kà-sī lâng. Tsiah-ê tsè-si-tiúⁿ, king-ha̍k kàu-su í-ki̍p jîn-bîn ê thâu-lâng, kè-bô͘ beh sat-hāi Iâ-so͘. 48 M̄-koh lóng tshuē bô pō͘, in-uī jîn-bîn lóng tsin tì-ì teh thiaⁿ Iâ-so͘ ê uē.