《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第二章

作者 巴克禮普世版小組 2013.10.06

Ka-ná ê Hun-lé
1 Tē saⁿ ji̍t tī Ka-lī-lī-síng ê Ka-ná ū hun-lé. Iâ-so͘ ê lāu-bú ū tsham-ka. 2 Iâ-so͘ kah bûn-tô͘ mā hō͘ in tshiáⁿ khì hù tsit-ê hun-lé. 3 Tsiú lóng lim liáu ê sî, Iâ-so͘ ê lāu-bú tsiū tuì I kóng, " In bô tsiú à." 4 Iâ-so͘ ìn kóng, " Lāu-bú ah, tse kah lí guá ū sím-mi̍h kuan-hē? Guá ê sî iáu-buē kàu." 5 Iâ-so͘ ê lāu-bú huan-hù tshe-īng ê lâng kóng, " Lín tio̍h tsiàu I kā lín kóng ê khì tsò." 6 Tsiàu Iû-thài-lâng kiat-tsīng ê lé-gî, tī hia ū pâi la̍k ê tsio̍h àng, ta̍k-ê ē-tàng té tsha-put-to tsi̍t-pah kong-sing. 7 Iâ-so͘ kā tshe-īng ê lâng kóng, " Īng tsuí kā tsiah-ê tsio̍h-àng té hō͘ i tīⁿ." In tsiū tsiong tsuí tò ji̍p-khì tsio̍h-àng, tò kàu muá-muá. 8 Jiân-āu Iâ-so͘ koh kā in kóng, " Taⁿ lín tio̍h kā tsuí iúⁿ tshut-lâi, phâng khì hō͘ pān-toh ê hū-tsik-jîn." In tsiū phâng khì hō͘ i. 9 Pān-toh ê hū-tsik-jîn tsi̍t-ē tam-tio̍h piàn-tsò tsiú ê tsuí, m̄-tsai tsit-ê tsiú tuì tó-uī lâi, m̄-koh iúⁿ tsuí ê tshe-īng tsai. Pān-toh ê hū-tsik-jîn tsiū kiò sin-lông lâi, 10 kā i kóng, " Lâng lóng sī sing tshut hó tsiú, kàu lâng-kheh lim kàu tsuì tsiah tshut khah bái ê tsiú. Lí tian-tò kā siōng hó ê tsiú lâu kàu tsit-má. 11 Iâ-so͘ tī Ka-lī-lī-síng ê Ka-ná kiâⁿ tsit-ê thâu-tsi̍t pái ê sîn-jiah, lâi hián-tshut I ê îng-kng. I ê bûn-tô͘ tsiū lóng sìn I. 12 Tsit-ê tāi-tsì í-āu, Iâ-so͘ kah I ê lāu-bú, hiaⁿ-tī í-ki̍p I ê bûn-tô͘ lo̍h-khì Ka-pik-lông. In tī hia tuà bô kuí ji̍t.

Iâ-so͘ Kiat-tsīng sìng-tiān (Mt 21:12-13;Mk 11:15-17;Lk 19:45-46)
13 Iû-thài-lâng ê Puâⁿ-kuè-tseh teh-beh kàu, Iâ-so͘ tsiūⁿ Iâ-lō͘-sat-líng. 14 I khuàⁿ-tio̍h tī sìng-tiān ū-lâng teh bē gû, iûⁿ, hún-tsiáu. Mā ū-lâng tsē tī hia teh uāⁿ tsîⁿ. 15 Iâ-so͘ īng soh-á tsò piⁿ, kā hiah-ê lâng kah in ê iûⁿ, gû lóng tuì sìng-tiān kuáⁿ tshut-khì. Koh tshia-tó uāⁿ tsîⁿ ê toh-á, kā in ê tsîⁿ iā-suàⁿ. 16 Iâ-so͘ koh kā bē hún-tsiáu ê lâng kóng, " Kā tsiah-ê mi̍h lóng puaⁿ tshut-khì! M̄-thang īng guá ê Thiⁿ-Pē ê tshù piàn-tsò tshī-tiûⁿ." 17 I ê bûn-tô͘ tsiū siūⁿ-khí Sìng-king ū kì-tsài: Guá uī-tio̍h Lí ê sìng-tiān, sim-lāi ná tshin-tshiūⁿ hué teh to̍h."( tsù: SPh 69:9) 18 Iû-thài-lâng mn̄g Iâ-so͘ kóng, " Lí īng sím-mi̍h sîn-jiah lâi tsìng-bîng Lí ū kuân tsò tsiah-ê tāi-tsì?" 19 Iâ-so͘ ìn kóng, " Lín huí-huāi tsit-king sìng-tiān, Guá saⁿ ji̍t āu beh koh kā i khí khí-lâi." 20 Iû-thài-lâng tsiū kóng, " Tsit-king sìng-tiān sì-tsa̍p-la̍k nî tsiah khí hó. Lí saⁿ ji̍t lāi tsiū beh koh kā i khí hó sī-bô?" 21 M̄-koh Iâ-so͘ án-ne kóng sī teh tsí I ka-kī sing-khu ê tiān. 22 Iâ-so͘ tuì sí-lâng tiong koh-ua̍h ê sî, I ê bûn-tô͘ tsiah siūⁿ-khí I bat án-ne kóng. In tsiū án-ne lâi sìn Sìng-king kah Iâ-so͘ só͘ kóng ê uē.

Iâ-so͘ Liáu-kái Tsìng-lâng ê Sim
23 Iâ-so͘ tī Iâ-lō͘-sat-líng kuè Puâⁿ-kuè-tseh ê sî, tsin-tsē lâng khuàⁿ-tio̍h I só͘ kiâⁿ ê sîn-jiah, tsiū sìn I. 24 M̄-koh Iâ-so͘ bô uân-tsuân sìn-jīm in, in-uī I liáu-kái kûn-tsiòng ê sim. 25 Kuan-hē lâng ê tāi-tsì, bô su-iàu lâng koh lâi tuì I tsìng-bîng, in-uī I tsin liáu-kái lâng ê lāi-sim.