《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第三章

作者 巴克禮普世版小組 2013.10.13

Iâ-so͘ kah Nî-ko-tí-bó͘
1 Ū tsi̍t-ê Huat-lī-sài-phài ê lâng, miâ-kiò Nî-ko-tí-bó͘, sī Iû-thài-lâng ê kuaⁿ. 2 Ū tsi̍t àm, tsit-ê lâng lâi tuì Iâ-so͘ kóng, " Lāu-su, guán tsai Lí sī Siōng-Tsú tshe lâi ê kàu-su, in-uī nā m̄-sī ū Siōng-Tsú tông-tsāi, bô-lâng ē-tàng kiâⁿ Lí só͘ kiâⁿ ê sîn-jiah." 3 Iâ-so͘ ìn kóng, " Guá si̍t-tsāi kā lí kóng, Lâng nā bô tîng-thâu seⁿ, tsiū bē-tàng khuàⁿ-tio̍h Siōng-Tsú ê Kok-tō͘." 4 Nî-ko-tí-bó͘ mn̄g kóng, " Lâng í-king lāu ā, ná-ē tîng-thâu seⁿ? Kám ē-tàng koh ji̍p-khì lāu-bú ê pak-tó͘ lâi tîng-thâu seⁿ?" 5 Iâ-so͘ ìn kóng, " Guá si̍t-tsāi kā lí kóng, Lâng nā bô tuì tsuí kah Sìng-Sîn lâi tîng-thâu seⁿ, tsiū bē-tàng ji̍p-khì Siōng-Tsú ê Kok-tō͘. 6 Tuì jio̍k-thé seⁿ ê sī jio̍k-thé; tuì Sìng-Sîn seⁿ ê sī Sìng-Sîn. 7 M̄-thang in-uī Guá kóng, ' Lín tio̍h tîng-thâu seⁿ', lâi kám-kak kî-kuài. 8 Hong beh tshue khì tó-uī tsiū tshue khì tó-uī. Lí ū thiaⁿ-tio̍h siaⁿ, m̄-tsai i tuì tó-uī lâi, tó-uī khì. Ta̍k-ê tuì Sìng-Sîn lâi tshut-sì ê lâng mā sī án-ne." 9 Nî-ko-tí-bó͘ mn̄g kóng, " Ná-ē huat-sing tsit khuán tāi-tsì?" 10 Iâ-so͘ ìn kóng, " Lí tsò Í-sik-lia̍t ê kàu-su, liân tse to m̄-tsai sī-bô? 11 Guá si̍t-tsāi kā lí kóng, Guán kóng guán só͘ tsai ê, kiàn-tsìng guán só͘ khuàⁿ-tio̍h ê, m̄-koh lín m̄ tsiap-la̍p guán ê kiàn-tsìng. 12 Guá kā lín kóng tsit sè-kan ê tāi-tsì, lín to m̄ sìn. Guá nā kā lín kóng thiⁿ-tíng ê tāi-tsì, lín ná-ē beh sìn? 13 Tuì thiⁿ kàng-lîm ê Jîn-tsú í-guā bô-lâng bat tsiūⁿ-thiⁿ. 14 " Tshin-tshiūⁿ Mô͘-se tī khòng-iá kú-khí tâng-tsuâ, Jîn-tsú mā it-tīng tio̍h án-ne siū kú-khí. 15 Hō͘ muí tsi̍t-ê sìn I ê lâng tit-tio̍h íng-uán ê ua̍h-miā. 16 Siōng-Tsú tsiah-ni̍h thiàⁿ sè-kan-lâng, sīm-tsí tsiong to̍k-seⁿ-Kiáⁿ siúⁿ-sù sè-kan, hō͘ só͘-ū sìn I ê lâng bē tîm-lûn, huán-tńg tit-tio̍h íng-uán ê ua̍h-miā. 17 In-uī Siōng-Tsú tshe I ê Kiáⁿ lâi sè-kan, m̄-sī beh sím-phuàⁿ sè-kan, sī beh thong-kuè I lâi tsín-kiù sè-kan. 18 Sìn I ê lâng bē siū sím-phuàⁿ; m̄ sìn ê lâng í-king siū tīng-tsuē, in-uī i m̄ sìn Siōng-Tsú ê to̍k-seⁿ-Kiáⁿ. 19 Siōng-Tsú ê sím-phuàⁿ tsiū-sī: Kng tsìn-ji̍p sè-kan, m̄-koh sè-kan-lâng khah ài o͘-àm, khah bô ài kng-bîng, in-uī in ê hîng-uî siâ-ok. 20 Tsò pháiⁿ ê lâng uàn-hūn kng, mā m̄ tsiap-kīn kng, án-ne i ê pháiⁿ hîng-uî tsiah bē lō͘-hiān tshut-lâi. 21 M̄-koh tsun-hîng tsin-lí ê lâng lâi kìⁿ kng, sī beh hián-bîng i ê hîng-uî sī tsun-hîng Siōng-Tsú ê tsí-ì."

Iok-hān Uī Iâ-so͘ Tsò-tsìng
22 Tsiah-ê tāi-tsì í-āu, Iâ-so͘ kah bûn-tô͘ kàu Iû-thài tē-khu, kah in tsò-hué tuà hia, kā lâng sé-lé. 23 Iok-hān mā tī Sat-líng hū-kīn ê Ai-luán teh kā lâng sé-lé, in-uī tī hia ū tsin-tsē tsuí, tsìng-lâng lâi hia hō͘ i sé-lé. 24 Hit sî Iok-hān iáu-buē hō͘ lâng kuaiⁿ lo̍h-kaⁿ. 25 Ū tsi̍t-kuá Iok-hān ê bûn-tô͘ kah tsi̍t-ê Iû-thài-lâng uī-tio̍h kiat-tsīng ê lé-gî piān-lūn. 26 In lâi kā Iok-hān kóng, " Lāu-su ah, tsá-tsîng tī Iok-tàn-hô tang-huāⁿ kah lí tsò-hué, lí uī I tsò-tsìng Hit-uī. Lí khuàⁿ, I teh kā lâng sé-lé. Kûn-tsiòng lóng khì I hia." 27 Iok-hān ìn kóng, " Nā m̄-sī thiⁿ siúⁿ-sù, lâng bē-tàng tsò sím-mi̍h. 28 Guá bat kóng, ' Guá m̄-sī Ki-tok, tsí-put-kò sī siū-phài lâi tsò I ê sian-hong.' Tsit-ê tāi-tsì, lín pún-sin sī guá ê kiàn-tsìng. 29 Tshuā sin-niû ê sī sin-lông, sin-lông ê pîng-iú khiā tī piⁿ-á thiaⁿ-tio̍h sin-lông ê siaⁿ tsiū hui-siông huaⁿ-hí. só͘-í guá muá-sim tuā huaⁿ-hí. 30 I it-tīng ná hing-ōng, guá it-tīng ná sue-bî."

Siōng-Tsú ê Kiáⁿ Tuì Thiⁿ Kàng-lîm
31 Tuì tíng-bīn lâi ê sī tī bān-bu̍t ê tíng-bīn. Tuì tē-tsiūⁿ lâi ê sī sio̍k tē-tsiūⁿ, mā lóng kóng tē-tsiūⁿ ê tāi-tsì. Tuì thiⁿ-tíng lâi ê sī tī bān-bu̍t ê tíng-bīn. 32 I uī-tio̍h só͘ thiaⁿ-tio̍h kah só͘ khuàⁿ-tio̍h ê lâi tsò kiàn-tsìng, m̄-koh bô-lâng tsiap-la̍p I ê kiàn-tsìng. 33 Tsiap-la̍p I ê kiàn-tsìng ê lâng kiàn-tsìng Siōng-Tsú sī tsin-si̍t ê. 34 Siōng-Tsú só͘ tshe-khián ê Hit-uī kóng Siōng-Tsú ê uē, in-uī Siōng-Tsú bô hān-liōng siúⁿ-sù Sìng-Sîn hō͘ I. 35 Pē thiàⁿ Kiáⁿ, í-king tsiong it-tshè kau tī I ê tshiú-thâu. 36 Sìn Kiáⁿ ê lâng ū íng-uán ê ua̍h-miā. M̄ sūn-ho̍k Kiáⁿ ê lâng m̄-nā bē tit-tio̍h ua̍h-miā, huán-tńg hō͘ Siōng-Tsú siông-siông siū-khì."