《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第四章

作者 巴克禮普世版小組 2013.10.20

Iâ-so͘ kah Sat-má-lī-á ê Hū-jîn-lâng
1 Huat-lī-sài-phài ê lâng thiaⁿ-tio̍h Iâ-so͘ pí Iok-hān tsio-tio̍h khah tsē bûn-tô͘, mā kā khah tsē lâng sé-lé. 2 Kî-si̍t Iâ-so͘ ka-kī bô kā lâng sé-lé, sī I ê bûn-tô͘ kā lâng sé-lé. 3 Iâ-so͘ thiaⁿ-tio̍h tsit-ê tāi-tsì tsiū lī-khui Iû-thài, koh tńg-khì Ka-lī-lī-síng. 4 I tio̍h king-kuè Sat-má-lī-a. 5 Iâ-so͘ lâi-kàu Sat-má-lī-a tsi̍t-ê kiò-tsò Sū-ka ê siâⁿ. Tsit-ê siâⁿ uá-kīn Ngá-kok hō͘ i ê kiáⁿ Iok-sik hit-tè tē, tī hia ū Ngá-kok ê tsuí-tséⁿ. 6 Iâ-so͘ kiâⁿ-lō͘ kiâⁿ kah tsin-siān tsiū tsē tī tséⁿ-piⁿ. Hit sî tsha-put-to sī tiong-tàu. 7 Ū tsi̍t-ê Sat-má-lī-a ê hū-jîn-lâng lâi tshiūⁿ-tsuí. Iâ-so͘ kā i kóng, " Tsuí pun guá lim tsi̍t-ē." 8 Hit sî I ê bûn-tô͘ í-king ji̍p-khì siâⁿ-lāi bé tsia̍h-mi̍h. 9 Sat-má-lī-a ê hū-jîn-lâng kā I kóng, " Lí sī Iû-thài-lâng, ná-ē tuì guá Sat-má-lī-a ê hū-jîn-lâng thó tsuí lim?" Hit tong-sî Iû-thài-lâng kah Sat-má-lī-a-lâng bô óng-lâi. 10 Iâ-so͘ ìn kóng, " Lí nā tsai Siōng-Tsú hō͘ lâng ê un-sù kah tuì lí kóng, ' Tsuí pun guá lim tsi̍t-ē' ê sī siáⁿ-lâng, lí it-tīng ē kā I kiû. I ē tsiong ua̍h-tsuí hō͘ lí." 11 Hū-jîn-lâng kóng, " Sian-siⁿ, Lí bô tshiūⁿ-tsuí ê khì-kū, tséⁿ koh tshim, Lí beh tuì tó-uī tit-tio̍h ua̍h-tsuí? 12 Guán ê tsó͘-sian-sian Ngá-kok lâu tsit-kháu tséⁿ hō͘ guán, i ka-kī kah kiáⁿ-jî í-ki̍p tsing-seⁿ lóng lim tsit-kháu tséⁿ ê tsuí. Lí kám ē pí Ngá-kok khah uí-tāi?" 13 Iâ-so͘ ìn kóng, " Lim tsit-ê tséⁿ-tsuí ê lâng lóng ē koh tshuì-ta. 14 M̄-koh lim Guá só͘ beh hō͘ i lim tsuí ê lâng íng-uán bē koh tshuì-ta, in-uī Guá só͘ beh hō͘ i lim ê tsuí tī i ê lāi-bīn ē tsiâⁿ-tsò tsuí-tsuâⁿ, it-ti̍t tshìng khí-lâi, hō͘ i tit-tio̍h íng-uán ê ua̍h-miā." 15 Hū-jîn-lâng kóng, " Sian-siⁿ, tshiáⁿ hō͘ guá tsit-ê tsuí, guá tsiah bē koh tshuì-ta, mā bián koh lâi tsiah hn̄g tshiūⁿ-tsuí." 16 Iâ-so͘ kā i kóng, " Khì kiò lín ang lâi tsia." 17 Hū-jîn-lâng ìn kóng, " Guá bô ang." Iâ-so͘ kā i kóng, " Lí kóng, ' Bô ang,' bô m̄-tio̍h. 18 Lí bat ū gō͘-ê ang, taⁿ kah lí tông-ki ê m̄-sī lí ê ang. Lí án-ne kóng bô m̄-tio̍h." 19 Hū-jîn-lâng kā i kóng, " Sian-siⁿ, guá khuàⁿ Lí sī sian-ti. 20 Guán tsó͘-sian tī tsit-ê suaⁿ kìng-pài, m̄-koh lín kóng Iâ-lō͘-sat-líng tsiah sī kìng-pài ê só͘-tsāi." 21 Iâ-so͘ kā i kóng, " Hū-jîn-lâng ah, tio̍h sìn guá, sî beh kàu à. Hit sî lín bē tī tsit-ê suaⁿ mā bē tī Iâ-lō͘-sat-líng kìng-pài Thiⁿ-Pē. 22 Lín m̄-tsai lín teh kìng-pài sím-mi̍h, guán tsai guán teh kìng-pài sím-mi̍h, in-uī tsín-kiù sī tuì Iû-thài-lâng tshut-lâi ê. 23 M̄-koh sî teh-beh kàu, hiān-kim tsiū-sī. Tsin-tsiàⁿ kìng-pài ê lâng ē īng sim-lîng kah tsin-sîng lâi kìng-pài Thiⁿ-Pē, in-uī Thiⁿ-Pē ài tsit khuán lâng kìng-pài I. 24 Siōng-Tsú sī Sîn, kìng-pài I ê lâng tio̍h īng sim-lîng kah tsin-sîng lâi kìng-pài." 25 Hū-jîn-lâng kā I kóng, " Guá tsai Ki-tok teh-beh lâi-lîm. I nā kàu ē tsiong it-tshè ê tāi-tsì kā guán kóng." 26 Iâ-so͘ kā i kóng, " Guá tsit-ê teh kah lí kóng-uē ê tsiū-sī." 27 Hit-sî Iâ-so͘ ê bûn-tô͘ tńg-lâi. In khuàⁿ-tio̍h Iâ-so͘ kah hū-jîn-lâng teh kóng-uē kám-kak kî-kuài, m̄-koh bô-lâng mn̄g hū-jîn-lâng kóng, " Lí beh tshòng sím-mi̍h?" á-sī mn̄g Iâ-so͘ kóng, " Lí ná-ē kah hū-jîn-lâng kóng-uē?" 28 Hū-jîn-lâng tsiū tsiong tsuí-pân pàng hē-teh, ji̍p-khì siâⁿ-lāi kā lâng kóng, 29 " Lín lâi khuàⁿ, tsit-ê lâng tsiong guá kuè-khì ê tāi-tsì lóng kā guá kóng. Tsit-ê lâng kám to̍h sī Ki-tok?" 30 In tsiū tshut-siâⁿ khì beh khuàⁿ Iâ-so͘. 31 Hit sî bûn-tô͘ kā Iâ-so͘ kóng, " Lāu-su, lâi tsia̍h." 32 M̄-koh Iâ-so͘ ìn kóng, " Guá ū lín só͘ m̄-tsai ê tsia̍h-mi̍h thang tsia̍h." 33 Bûn-tô͘ tsiū mn̄g-lâi mn̄g-khì kóng, " Kám ū-lâng hō͘ I tsia̍h-mi̍h?" 34 Iâ-so͘ kā in kóng, " Tsun-hîng tshe-phài Guá lâi Hit-uī ê tsí-ì, koh uân-sîng I ê kang-tsok, tsiū-sī Guá ê tsia̍h-mi̍h. 35 Lín kám bô án-ne kóng, ' Koh sì gue̍h-ji̍t tsiū ū thang siu-sîng ā?' Guá kā lín kóng, lín khuàⁿ sì-bīn ê tshân-hn̂g. Ngó͘-kok í-king si̍k, thang siu-sîng ā. 36 Siu-sîng ê lâng í-king teh niá kang-tsîⁿ, koh uī-tio̍h íng-uán ê ua̍h-miā teh tsik-tsū ngó͘-kok. Hō͘ iā-tsíng ê lâng kah siu-kuah ê lâng tsò-hué huaⁿ-hí. 37 In-uī sio̍k-gí kóng, ' Tsi̍t-ê iā-tsíng, līng-guā tsi̍t-ê siu-sîng.' Si̍t-tsāi kóng liáu tsin tio̍h. 38 Lín bô lô-khó͘ king-tsoh ê tshân-hn̂g, Guá tshe lín khì siu-sîng. Lín hióng-siū pa̍t-lâng lô-khó͘ king-tsoh ê sîng-kó." 39 Hit-ê siâⁿ ū tsin-tsē Sat-má-lī-a-lâng sìn Iâ-so͘, in-uī hit-ê hū-jîn-lâng kiàn-tsìng kóng, " Tsit-ê lâng tsiong guá kuè-khì ê tāi-tsì lóng kā guá kóng." 40 Só͘-í Sat-má-lī-a-lâng lâi kìⁿ Iâ-so͘, kiû I kah in tuà. I tsiū tī hia tuà nn̄g ji̍t. 41 In-uī thiaⁿ-tio̍h Iâ-so͘ ê tō-lí lâi sìn ê lâng koh-khah tsē. 42 Hiah-ê lâng kā hū-jîn-lâng kóng, " Guán taⁿ m̄-sī tuì lí ê uē lâi sìn, sī in-uī guán tshin-sin thiaⁿ-tio̍h Iâ-so͘ ê tō-lí. Guán tsai I tsin-tsiàⁿ sī sè-kan ê Kiù-Tsú."

Iâ-so͘ I-hó Kuaⁿ-uân ê Kiáⁿ
43 Nn̄g ji̍t āu, Iâ-so͘ lī-khui hia khì Ka-lī-lī-síng. 44 In-uī Iâ-so͘ ka-kī bat kóng, " Sian-ti tī ka-kī ê kò͘-hiong bē siū tsun-tiōng." 45 Só͘-í Iâ-so͘ lâi-kàu Ka-lī-lī-síng ê sî, Ka-lī-lī-lâng kā I huan-gîng, in-uī tsiah-ê lâng khì Iâ-lō͘-sat-líng kuè Puâⁿ-kuè-tseh ê sî mā ū khuàⁿ-tio̍h I tī tseh-kî tiong só͘ tsò ê it-tshè tāi-tsì. 46 Iâ-so͘ koh lâi-kàu Ka-lī-lī-síng ê Ka-ná, tsiū-sī I īng tsuí piàn-tsò tsiú ê só͘-tsāi. Tī hia ū tsi̍t-ê Ka-pik-lông kuaⁿ-uân ê kiáⁿ phuà-pēⁿ. 47 Thiaⁿ-kìⁿ Iâ-so͘ tuì Iû-thài-síng lâi-kàu Ka-lī-lī-síng, tsiū khì kiû I lo̍h-khì Ka-pik-lông i-tī i ê kiáⁿ, in-uī i ê kiáⁿ teh-beh sí à. 48 Iâ-so͘ kā i kóng, " Lín nā bô khuàⁿ-tio̍h sîn-jiah kî-sū it-tīng m̄ sìn." 49 Hit-ê kuaⁿ-uân ìn kóng, " Sian-siⁿ, thàn guá ê sè-kiáⁿ iáu-buē sí, kín lâi-khì." 50 Iâ-so͘ kā i kóng, " Lí tńg-khì, lí ê kiáⁿ bē sí." Hit-ê lâng siong-sìn Iâ-so͘ kā i kóng ê uē, tsiū tńg-khì. 51 I tī lō͘-tiong tú-tio̍h i ê lô͘-po̍k. Lô͘-po̍k kā i kóng i ê kiáⁿ ua̍h khí-lâi à. 52 I tsiū mn̄g in khuàⁿ i ê kiáⁿ sím-mi̍h sî tsiah hó khí-lâi. In ìn kóng, " Tsang-ē-po͘ tsi̍t tiám, jia̍t tsiū thè." 53 Lāu-pē tsai-iáⁿ hit sî tú-tú sī Iâ-so͘ kóng, " Lí ê kiáⁿ bē sí." ê sî. I ka-kī kah tsuân-ke ê lâng tsiū lóng sìn Iâ-so͘. 54 Tse sī Iâ-so͘ tuì Iû-thài-síng lâi-kàu Ka-lī-lī-síng í-āu só͘ kiâⁿ ê tē-jī pái sîn-jiah.