《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第五章

作者 巴克禮普世版小組 2013.10.27

Iâ-so͘ I-hó Phuà-pēⁿ Saⁿ-tsa̍p-peh Nî-kú ê Lâng
1 Tsiah-ê tāi-tsì liáu-āu, ū Iû-thài-lâng ê tseh-kî, Iâ-so͘ tsiūⁿ-khì Iâ-lō͘-sat-líng. 2 Tī Iâ-lō͘-sat-líng, kīn Iûⁿ-mn̂g ê só͘-tsāi ū tsi̍t-ê tî. Hi-pik-lâi-uē kiò-tsò Pit-sū-tāi, ū gō͘-ê tsáu-lông. 3 Tsin-tsē pēⁿ-lâng tó tī tsáu-lông lāi-bīn, ū tsheⁿ-mê ê, pái-kha ê, piàn-suī ê.(Ū ê tshau-pún ke: "In teh tán tsuí tín-tāng, 4 Ū sî Tsú ê thiⁿ-sài ē lo̍h-lâi tî-ni̍h kā tsuí phah tín-tāng. Tsuí tín-tāng liáu-āu, thâu-tsi̍t ê lo̍h-khì ê lâng, bô-lūn sím-mi̍h pēⁿ lóng ē hó-khì.”) 5 Tī hia ū tsi̍t-ê phuà-pēⁿ saⁿ-tsa̍p-peh nî-kú ê lâng. 6 Iâ-so͘ khuàⁿ-tio̍h i tó tī hia, tsai-iáⁿ i í-king phuà-pēⁿ tsin kú, tsiū uá-khì kā i kóng, " Lí ū ài lí ê pēⁿ hó khí-lâi bô?" 7 Hit-ê pēⁿ-lâng ìn kóng, " Sian-siⁿ ah, tsuí tín-tāng ê sî, bô-lâng thang hû guá lo̍h tî. Guá siūⁿ-beh lo̍h-khì ê sî, pa̍t-lâng tsiū pí guá sing lo̍h-khì à." 8 Iâ-so͘ kā i kóng," Khí-lâi, giâ lí ê tshn̂g-pho͘ khí-lâi kiâⁿ." 9 Hit-ê lâng suî-sî hó-khì, tsiū giâ i ê tshn̂g-pho͘ khí-lâi kiâⁿ. Hit ji̍t sī An-hioh-ji̍t. 10 Iû-thài-lâng tsiū kā tit-tio̍h i-hó ê lâng kóng, " Kin-á-ji̍t sī An-hioh-ji̍t, lí giâ tshn̂g-pho͘ sī bô ha̍p-huat." 11 Hit lâng ìn kóng, " Hit-ê kā guá i-hó ê lâng kā guá kóng, ' Giâ lí ê tshn̂g-pho͘ khí-lâi kiâⁿ.'" 12 Hiah-ê Iû-thài-lâng mn̄g i kóng, " Kā lí kóng, ' Giâ tshn̂g-pho͘ khí-lâi kiâⁿ.' ê sī siáⁿ-lâng?" 13 Tit-tio̍h i-hó ê lâng m̄-tsai I sī siáⁿ-lâng, in-uī ū tsin-tsē lâng tī hia, Iâ-so͘ mā í-king tiām-tiām-á lī-khui hia. 14 Āu-lâi Iâ-so͘ tī sìng-tiān tú-tio̍h hit-ê lâng, tsiū kā i kóng, " Lí ê pēⁿ í-king hó à. M̄-thang koh huān-tsuē, lí tsiah bē tú-tio̍h koh-khah tshám ê tāi-tsì." 15 Hit lâng tsiū khì kā Iû-thài-lâng kóng, kā i i-hó ê lâng tsiū-sī Iâ-so͘. 16 Uī-tio̍h án-ne, Iû-thài-lâng khai-sí pik-hāi Iâ-so͘, in-uī I tī An-hioh-ji̍t kā lâng i-pēⁿ. 17 Iâ-so͘ ìn kóng, " Guá ê Thiⁿ-Pē kè-sio̍k teh tsò-kang. Guá mā sī án-ne teh tsò-kang." 18 Só͘-í Iû-thài-lâng tong-kio̍k koh-khah siūⁿ-beh hāi-sí Iâ-so͘, in-uī I m̄-nā huān-tio̍h An-hioh-ji̍t ê kui-tīng, koh tshing Siōng-Tsú tsò I ê Thiⁿ-Pē, khuàⁿ ka-kī kah Siōng-Tsú pîng-tíng.

Siōng-Tsú ê Kiáⁿ ê Kuân-pìng
19 Iâ-so͘ tsiū ìn kóng, " Guá si̍t-tsāi kā lín kóng, Kiáⁿ bē-tàng tsiàu ka-kī ê ì-sù tsò tāi-tsì, tio̍h tsiàu Thiⁿ-Pē án-tsuáⁿ tsò khì tsò, in-uī Thiⁿ-Pē só͘ tsò ê, Kiáⁿ mā tsiàu án-ne khì tsò. 20 In-uī Thiⁿ-Pē thiàⁿ Kiáⁿ, tsiong ka-kī só͘ tsò ê lóng kā Kiáⁿ tsí-sī. mā ē tsiong pí tsiah-ê koh-khah tuā ê tāi-tsì tsí-sī Kiáⁿ, beh hō͘ lín kám-kak kî-kuài. 21 Pē hō͘ sí-lâng koh-ua̍h, siúⁿ-sù in ua̍h-miā. Tshin-tshiūⁿ án-ne, Kiáⁿ mā beh tsiong ua̍h-miā siúⁿ-sù hō͘ I só͘ ì-ài ê lâng. 22 Thiⁿ-Pē lóng bô kā lâng sím-phuàⁿ. I tsiong sím-phuàⁿ ê kuân-pìng lóng kau-tài Kiáⁿ. 23 Án-ne sī beh hō͘ tsìng-lâng lóng tsun-kìng Kiáⁿ ná tshin-tshiūⁿ tsun-kìng Thiⁿ-Pē. Bô tsun-kìng Kiáⁿ ê lâng, tsiū-sī bô tsun-kìng tshe-phài I lâi ê Thiⁿ-Pē." 24 " Guá si̍t-tsāi kā lín kóng, Thiaⁿ guá ê uē, mā sìn tshe-phài Guá Hit-uī ê lâng tsiū ū íng-uán ê ua̍h-miā, m̄-bián siū sím-phuàⁿ, i í-king tshut-sí ji̍p-ua̍h ā. 25 Guá si̍t-tsāi kā lín kóng, sî teh-beh kàu, hiān-tsāi tsiū-sī à. Sí-lâng ē thiaⁿ-tio̍h Siōng-Tsú ê Kiáⁿ ê siaⁿ, thiaⁿ-tio̍h ê lâng tsiū ē koh ua̍h khí-lâi. 26 In-uī Thiⁿ-Pē pún-sin sī ua̍h-miā ê kin-guân. I mā sī án-ne hō͘ Kiáⁿ tsiâⁿ-tsò ua̍h-miā ê kin-guân. 27 Koh in-uī Kiáⁿ sī Jîn-tsú, Thiⁿ-Pē í-king tsiong sím-phuàⁿ ê kuân-pìng hō͘ Kiáⁿ. 28 Lín m̄-thang kám-kak tsit-ê tāi-tsì kî-kuài, in-uī sî teh-beh kàu, só͘-ū tī bōng-ni̍h ê sí-lâng ē thiaⁿ-tio̍h Kiáⁿ ê siaⁿ, tuì bōng-ni̍h tshut-lâi. 29 Tsò hó ê lâng ē koh khí-lâi tit-tio̍h ua̍h-miā. Tsò pháiⁿ ê lâng ē koh khí-lâi siū sím-phuàⁿ tīng-tsuē."

Uī Iâ-so͘ Tsò-tsìng
30 " Guá ka-kī bē-tàng tsò sím-mi̍h, Guá tsiàu só͘ thiaⁿ-tio̍h ê lâi sím-phuàⁿ. Guá ê sím-phuàⁿ kong-tsìng, in-uī Guá bô tsiàu ka-kī ê ì-sù, sī tsun-tsiàu tshe-phài Guá lâi Hit-uī ê tsí-ì. 31 " Guá nā uī ka-kī tsò kiàn-tsìng, Guá ê kiàn-tsìng tsiū bô tsin-si̍t. 32 Ū līng-guā tsi̍t-ê lâng teh uī guá tsò kiàn-tsìng. Guá tsai i uī Guá só͘ tsò ê kiàn-tsìng sī tsin-si̍t. 33 Lín bat phài lâng khì kìⁿ Iok-hān, i ū uī tsin-lí tsò kiàn-tsìng. 34 M̄-sī Guá bô su-iàu lâng uī Guá tsò kiàn-tsìng. Guá kóng-khí tsiah-ê tāi-tsì sī beh hō͘ lín tit-tio̍h kiù. 35 Iok-hān sī tsi̍t-pha teh to̍h teh tsiò-kng ê ting. Lín tsîng-guān tsiām-sî hióng-siū i ê kng. 36 M̄-koh Guá ū pí Iok-hān khah ū-la̍t ê kiàn-tsìng, in-uī Thiⁿ-Pē só͘ kau-tài Guá lâi uân-sîng ê tāi-tsì, tsiū-sī Guá só͘ teh tsò tsiah-ê kang-tsok, thang lâi kiàn-tsìng guá sī Thiⁿ-Pē só͘ tshe-phài lâi ê. 37 Tshe-phài Guá lâi ê Thiⁿ-Pē mā bat uī Guá tsò kiàn-tsìng. Lín tsiông-lâi m̄-bat thiaⁿ-tio̍h I ê siaⁿ, mā m̄-bat khuàⁿ-tio̍h I ê hîng-siōng. 38 Lín bô tsiong I ê uē khǹg tī sim-lāi, in-uī lín m̄ sìn I só͘ tshe-phài lâi ê Hit-uī. 39 Lín gián-kiù tsiah-ê Sìng-king, in-uī lín siūⁿ-kóng hit tiong-kan tshuē ē-tio̍h íng-uán ê ua̍h-miā. Kî-si̍t tsiū-sī tsiah-ê Sìng-king teh uī Guá tsò kiàn-tsìng. 40 Án-ne lín iáu-koh bô beh lâi Guá tsia tit-tio̍h ua̍h-miā. 41 Guá m̄-sī teh ài lâng o-ló. 42 M̄-koh Guá bat lín kah ū tshun, lín kin-pún bô thiàⁿ Siōng-Tsú ê sim. 43 Guá hōng Guá ê Thiⁿ-Pē ê miâ lâi, lín bô beh tsiap-la̍p Guá. Nā ū pa̍t-lâng hōng ka-kī ê miâ lâi, lín tian-tó kā i tsiap-la̍p. 44 Lín tāi-ke hō͘-siōng ài o-ló lâi o-ló khì, m̄ kiû tuì to̍k-it Siōng-Tsú lâi ê tshing-tsàn. Án-ne lín ná-ē sìn Guá? 45 M̄-thang siūⁿ-kóng Guá ē tī Thiⁿ-Pē ê bīn-tsîng khòng-kò lín. Teh khòng-kò lín ê sī lín só͘ gióng-bōng ê Mô͘-se. 46 Lín nā tsin-tsiàⁿ ū sìn Mô͘-se, mā ē sìn Guá, in-uī i ū kì-tsài Guá ê tāi-tsì. 47 I siá ê tsheh lín to m̄ sìn, ná-ē sìn Guá ê uē?"