《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十二章

作者 巴克禮普世版小組 2013.12.22

Iâ-so͘ Tī Pik-tāi-nî Siū Buah-iû (Mt 26:6-13;Mk 14:3-9)
1 Puâⁿ-kuè-tseh la̍k ji̍t tsîng, Iâ-so͘ khì kàu Pik-tāi-nî, tsiū-sī Iâ-so͘ hō͘ i tuì sí-lâng tiong koh-ua̍h hit-ê Lia̍p-sat-lō͘ tuà ê só͘-tsāi. 2 In tsiū tī hia uī-tio̍h Iâ-so͘ tsún-pī àm-tǹg. Má-tāi teh sū-hāu, Lia̍p-sat-lō͘ kah Iâ-so͘ tsē kâng toh. 3 Má-lī-a the̍h tsi̍t kuàn sûn koh ko-kuì ê phang-iû lâi buah Iâ-so͘ ê kha, koh īng ka-kī ê thâu-mn̂g kā i tshit, kui tshù-lāi tshiong-muá phang-iû ê phang-bī. 4 Iâ-so͘ ê tsi̍t-ê bûn-tô͘, tsiū āu-lâi tshut-bē Iâ-so͘ ê Ka-lio̍k-lâng Iû-tāi, kóng, 5 " Ná m̄ tsiong tsit-ê phang-iû khì bē saⁿ-pah ê gîn-á lâi tsín-tsè sàn-tshiah lâng?" 6 I án-ne kóng m̄-sī in-uī i kuan-sim sàn-tshiah lâng, sī in-uī i sī tsha̍t, koh siông-siông thau-the̍h i só͘ kuán-lí ê kong-khuán. 7 Iâ-so͘ tsiū kóng, "Tshut-tsāi tsit-ê hū-jîn-lâng khì tsò! Hō͘ i tsiong tsiah-ê phang-iû lâu kàu guá bâi-tsòng ê ji̍t thang īng. 8 Put-sî to ū sàn-tshiah lâng kah lín tsò-hué, m̄-koh Guá bô siông-siông kah lín tsò-hué."

Sat-hāi Lia̍p-sat-lō͘ ê Im-bô͘
9 Tsin-tsē Iû-thài-lâng thiaⁿ-tio̍h Iâ-so͘ tī Pik-tāi-nî tsiū khì hia. In m̄-nā sī beh khuàⁿ Iâ-so͘, mā ài beh khuàⁿ Iâ-so͘ hō͘ i tuì sí-lâng tiong koh-ua̍h ê Lia̍p-sat-lō͘. 10 Só͘-í tsiah-ê tsè-si-tiúⁿ kè-bô͘ liân Lia̍p-sat-lō͘ mā beh kā i sat-hāi. 11 In-uī ū tsin-tsē Iû-thài-lâng uī-tio̍h Lia̍p-sat-lō͘ ê iân-kò͘ khì sìn Iâ-so͘.

Iâ-so͘ Tsìn-ji̍p Iâ-lō͘-sat-líng (Mt 21:1-11;Mk 11:1-11;Lk 19:28-40)
12 Keh-tńg-ji̍t, tsin-tsē lâi kuè tseh ê lâng thiaⁿ-tio̍h Iâ-so͘ beh kàu Iâ-lō͘-sat-líng, 13 tsiū gia̍h tsang-tshiū ki khì gîng-tsiap Iâ-so͘, tuā-siaⁿ huah kóng, "Hô-sàn-ná, hōng Tsú ê miâ lâi ê Hit-uī ing-kai tit-tio̍h o-ló!( tsù: SPh 118:26) Í-sik-lia̍t ê Ông ing-kai tit-tio̍h o-ló!" 14 Iâ-so͘ khuàⁿ-tio̍h tsi̍t tsiah lî-á-kiáⁿ tsiū khan lâi khiâ. Tsiàu Sìng-king só͘ kì-tsài: 15 Sik-an ê tsa-bó͘-kiáⁿ ah, m̄-bián kiaⁿ! Khuàⁿ! lín ê Ông khiâ lî-á-kiáⁿ teh lâi ā."( tsù: SKL 9:9) 16 Hit tong-sî bûn-tô͘ bē liáu-kái tsiah-ê tāi-tsì. Kàu Iâ-so͘ tit-tio̍h îng-kng ê sî tsiah siūⁿ-khí Sìng-king ū kì-tsài tsiah-ê tāi-tsì sī teh tsí Iâ-so͘, mā kó-jiân tī Iâ-so͘ ê sin-tsiūⁿ si̍t-hiān tsiah-ê tāi-tsì. 17 Tng Iâ-so͘ kiò Lia̍p-sat-lō͘ tshut bōng, hō͘ i tuì sí-lâng tiong koh-ua̍h ê sî, kah Iâ-so͘ tsò-hué tī hia ê kûn-tsiòng ū kè-sio̍k teh tsò kiàn-tsìng. 18 Kûn-tsiòng tshut-khì gîng-tsiap Iâ-so͘, in-uī in thiaⁿ-tio̍h I ū kiâⁿ tsit-ê sîn-jiah. 19 Huat-lī-sài-phài ê lâng tsò-hué kóng, "Lán khah án-tsuáⁿ tsò mā bô tshái-kang, lí khuàⁿ, tsuân sè-kài ê lâng lóng tuè I khì à!"

Hi-lia̍p-lâng Lâi Tshuē Iâ-so͘
20 Tseh-kî tiong tsiūⁿ-khì Iâ-lō͘-sat-líng tiâu-pài ê lâng tiong-kan ū kuí-nā-ê Hi-lia̍p-lâng. 21 Tsiah-ê lâng lâi kìⁿ Ka-lī-lī-síng ê Pik-sài-tāi lâng Hui-li̍k, kiû i kóng, "Sian-siⁿ, guán ài beh kìⁿ Iâ-so͘." 22 Hui-li̍k lâi kā An-tik-lia̍t kóng. An-tik-lia̍t kah Hui-li̍k tsiū lâi kā Iâ-so͘ kóng. 23 Iâ-so͘ ìn kóng, "Jîn-tsú tit-tio̍h îng-kng ê sî kàu à. 24 Guá si̍t-tsāi kā lín kóng, Tsi̍t lia̍p be̍h-á nā bô lo̍h tē lâi sí, iû-guân sī tsi̍t lia̍p niā-niā. Nā sí, tsiū ē kiat tsin-tsē lia̍p be̍h-á. 25 Thiàⁿ-sioh ka-kī sèⁿ-miā ê lâng, ē sòng-sit sèⁿ-miā. Tī tsit sè-kan bô tham-luân ka-kī sèⁿ-miā ê lâng it-tīng ē pó-siú sèⁿ-miā lâi tit-tio̍h íng-uán ê ua̍h-miā. 26 Lâng nā beh ho̍k-sāi Guá tio̍h tuè Guá. Guá tī sím-mi̍h só͘-tsāi, ho̍k-sāi Guá ê lâng mā tio̍h tī hia. Lâng nā ho̍k-sāi Guá, Guá ê Thiⁿ-Pē mā ē kā i tsun-tiōng."

Iâ-so͘ Ī-giân I ê Sí-bông
27 Tsit tsūn Guá ê sim-kuaⁿ tsin kan-khó͘.( tsù: SPh 6:2) Guá beh án-tsuáⁿ kóng tsiah hó? Kám tio̍h kóng 'Pē ah, kiù Guá thuat-tshut hit-ê sî-khik.' M̄-koh Guá sī uī-tio̍h tsit-ê sî-khik tsiah lâi-.ê. 28 Pē ah, guān Lí îng-kng Lí ê miâ." Jiân-āu ū siaⁿ tuì thiⁿ-tíng lâi kóng, "Guá í-king ū îng-kng Guá ê miâ. Taⁿ beh koh-tsài kā I îng-kng tsi̍t pái." 29 Khiā tī piⁿ-á ê kûn-tsiòng thiaⁿ-tio̍h tsiū kóng, "Sī luî teh tân." Mā ū-lâng kóng, "Sī thiⁿ-sài teh kā I kóng-uē." 30 Iâ-so͘ ìn kóng, "Tsit-ê siaⁿ m̄-sī uī-tio̍h Guá, sī uī-tio̍h lín lâi-.ê. 31 Tsit-má sī tsit sè-kan siū sím-phuàⁿ ê sî. Tsit sè-kan ê thóng-tī-tsiá ē siū thui-huan. 32 Guá nā siū kú-khí lī-khui sè-kan ê sî, ē khip-ín bān-bîn lâi kui-uá Guá." 33 Iâ-so͘ kóng tsiah-ê uē sī piáu-bîng I beh án-tsuáⁿ lâi sí. 34 Tsìng-lâng ìn I kóng, "Guán thiaⁿ-tio̍h lu̍t-huat ū kóng, ' Ki-tok íng-uán tsûn-tsāi.' Lí án-tsuáⁿ kóng, ' Jîn-tsú tio̍h siū kú-khí?' Tsit-ê Jîn-tsú sī siáⁿ-lâng?" 35 Iâ-so͘ ìn kóng, "Kng iáu ē tī lín tiong-kan tsi̍t-sî-á kú. Lín tio̍h thàn ū kng ê sî kín kiâⁿ tsiah bē hō͘ o͘-àm kā lín jia-khàm. Tī o͘-àm tiong teh kiâⁿ ê lâng, m̄-tsai ē kiâⁿ khì tó-uī. 36 Thàn ū kng ê sî, lín tio̍h sìn kng, thang hō͘ lín tsiâⁿ-tsò kng-bîng ê lâng."

Iû-thài-lâng M̄-sìn Iâ-so͘
Iâ-so͘ tsiah-ê uē kóng suah tsiū lī-khui in, ka-kī bih khí-lâi. 37 Iâ-so͘ sui-jiân tī in ê bīn-tsîng kiâⁿ hiah-tsē sîn-jiah, in iáu-koh m̄ sìn I. 38 Tse sī beh ìng-giām sian-ti Í-sài-a ê uē, kóng, "Tsú ah, siáⁿ-lâng ū teh sìn guán só͘ thuân ê sìn-sit? Tsú ē tuì siáⁿ-lâng hián-bîng I ê kuân-lîng?( tsù: ISA 53:1) 39 In bē-tàng siong-sìn ê guân-in, Í-sài-a mā ū án-ne kóng, 40 " Siōng-Tsú hō͘ in ê ba̍k-tsiu tsheⁿ-mê, koh sim ngē. Nā bô in īng ba̍k-tsiu khuàⁿ-kìⁿ koh īng sim hiáu-ngō͘ lâi kui-hiòng Guá, Guá tsiū ē kā in i-hó.( tsù: ISA 6:10) 41 Í-sài-a án-ne kóng sī in-uī i ū khuàⁿ-tio̍h Iâ-so͘ ê îng-kng, tsiah kóng kuan-hē I ê tāi-tsì. 42 Sui-jiân án-ne, Iû-thài-lâng ê líng-siù ū tsin-tsē sìn Iâ-so͘, m̄-koh in kiaⁿ Huat-lī-sài-phài ê lâng tsiah bô kong-khai sîng-jīn I, tsiah bián siū kuáⁿ-tshut huē-tn̂g. 43 Tsiah-ê Huat-lī-sài-phài ê lâng ài lâng ê o-ló, tshiau-kuè tuì Siōng-Tsú lâi ê o-ló.

Iâ-so͘ ê Uē Beh Sím-phuàⁿ Lâng
44 Iâ-so͘ tuā-siaⁿ huah kóng, "Sìn Guá ê lâng m̄-sī teh sìn Guá, sī sìn tshe-phài Guá lâi ê Hit-uī. 45 Khuàⁿ-kìⁿ Guá ê lâng tsiū-sī khuàⁿ-tio̍h tshe-phài Guá lâi ê Hit-uī. 46 Guá tsò kng lâi-kàu tsit sè-kan, sī beh hō͘ sìn Guá ê lâng thuat-lī o͘-àm. 47 Thiaⁿ Guá ê uē bô khì tsun-siú ê lâng, Guá beh kā i sím-phuàⁿ, in-uī Guá m̄-sī lâi beh sím-phuàⁿ sè-kan-lâng, sī beh tsín-kiù sè-kan-lâng. 48 Kī-tsua̍t Guá koh m̄ tsiap-la̍p Guá ê uē ê lâng, ū tsi̍t-ê sím-phuàⁿ-tsiá kā i sím-phuàⁿ. Tī bua̍t-ji̍t ê sî, Guá só͘ kóng ê tō-lí ē kā i sím-phuàⁿ. 49 In-uī Guá m̄-sī tsiàu ka-kī ê ì-sù kóng. Sī tsiàu tshe-phài Guá lâi ê Thiⁿ-Pē bīng-līng Guá sím-mi̍h, Guá tsiū thuân sím-mi̍h, kóng sím-mi̍h. 50 Guá tsai Siōng-Tsú ê kài-bīng sī íng-uán ê ua̍h-miā, só͘-í Guá só͘ kóng ê lóng sī tsiàu Thiⁿ-Pē kā Guá kóng-.ê."