《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十三章

作者 巴克禮普世版小組 2013.12.29

Iâ-so͘ Kā Bûn-tô͘ Sé-kha
1 Puâⁿ-kuè-tseh tsîng, Iâ-so͘ tsai I lī-khui tsit sè-kan tńg khì Thiⁿ-pē hia ê sî í-king kàu. I ū it-ti̍t thiàⁿ sè-kan sio̍k I ê lâng, taⁿ I beh piáu-sī thiàⁿ in tàu-tí. 2 Iâ-so͘ kah sù-tô͘ tsia̍h àm-tǹg ê sî, mô͘-kuí tsiong tshut-bē Iâ-so͘ ê ì-sù hē tī Ka-lio̍k-lâng Se-bûn ê kiáⁿ Iû-tāi ê sim. 3 Iâ-so͘ tsai Thiⁿ-pē í-king tsiong it-tshè kau tī I ê tshiú, koh tsai I tuì Siōng-Tsú hia lâi, mā beh tńg-khì Siōng-Tsú hia. 4 I tsiū lī-khui toh, thǹg guā-saⁿ, the̍h tsi̍t-tiâu kin-á hâ tī io-ni̍h. 5 Jiân-āu tò tsuí tī bīn-tháng, kā sù-tô͘ sé kha, koh īng hâ tī io-ni̍h ê kin-á kā in tshit. 6 Sé kàu Se-bûn Pí-tik ê sî, Pí-tik kā I kóng, "Tsú ah, Lí beh kā guá sé kha sī-bô?" 7 Iâ-so͘ ìn kóng, "Guá só͘-tsò ê, lí tsit-má m̄ tsai, āu-lâi tsiū ē bîng-pi̍k." 8 Pí-tik kóng, "Lí tshian-bān m̄-thang kā guá sé kha." Iâ-so͘ ìn kóng, "Guá nā bô kā lí sé kha, lí kah Guá tsiū bô kuan-hē." 9 Se-bûn Pí-tik kóng, "Tsú ah, m̄-nā kha, liân tshiú kah thâu-khak mā kā guá sé." 10 Iâ-so͘ kóng, "Lâng sé sing-khu liáu-āu, kui sing-khu lóng tshing-khì, kan-taⁿ sé kha to̍h hó. Lín í-king tshing-khì, m̄-koh bô ta̍k-ê lóng án-ne." 11 In-uī Iâ-so͘ tsai-iáⁿ siáⁿ-lâng beh kā I tshut-bē, só͘-í tsiah kóng, "Lín bô ta̍k-ê tshing-khì." 12 Iâ-so͘ kā in sé kha liáu-āu, tshīng guā-saⁿ koh tńg-lâi tsē-toh, mn̄g in kóng, "Guá tuì lín só͘-tsò tsiah-ê tāi-tsì, lín kám ū bîng-pi̍k? 13 Lín tshing-ho͘ Guá ' lāu-su' mā tshing-ho͘ Guá ' Tsú, lín án-ne tshing-ho͘ bô m̄-tio̍h, in-uī Guá tsiū-sī. 14 Guá tsò ' Tsú', tsò 『 lāu-su』 to kā lín sé kha, lín mā tio̍h hō͘-siōng sé kha. 15 Guá ū lâu bô͘-iūⁿ hō͘ lín, sī beh hō͘ lín thang tsiàu Guá tuì lín só͘-tsò ê khì tsò. 16 Guá si̍t-tsāi kā lín kóng, lô͘-po̍k bē pí tsú-lâng khah tuā, hōng-tshe-phài ê mā bē pí tshe-phài I ê Hit-uī khah tuā. 17 Lín kì-jiân bîng-pi̍k tsiah-ê tāi-tsì, nā tsiàu án-ne khì tsò, tsiū tsin ū hok-khì." 18 " Guá m̄-sī kóng lín tāi-ke lóng án-ne, Guá tsai Guá só͘ kíng-suán ê, m̄-koh tse sī beh ìng-giām Sìng-king só͘ kóng: Kah Guá tsò-hué tsia̍h-pn̄g ê lâng ē puē-gi̍k Guá.( tsù: SPh 41:9) 19 Taⁿ tāi-tsì iáu-buē huat-sing, Guá sing kā lín kóng. Kàu tāi-tsì huat-sing, hō͘ lín thang sìn Guá tsiū-sī Hit-uī. 20 Guá si̍t-tsāi kā lín kóng, tsiap-la̍p Guá só͘ tshe-phài ê lâng tsiū-sī tsiap-la̍p Guá, tsiap-la̍p Guá tsiū-sī tsiap-la̍p tshe-phài Guá lâi ê Hit-uī."

Iâ-so͘ Ī-giân Siū Tshut-bē (Mt 26:20-25;Mk 14:17-21;Lk 21:22-23) 21 Iâ-so͘ kóng tsiah-ê uē liáu-āu, sim-lāi tsin kan-khó͘, tsiū bîng kóng, "Guá si̍t-tsāi kā lín kóng, lín tiong-kan ū tsi̍t-ê lâng ē tshut-bē Guá." 22 Sù-tô͘ hō͘-siōng khuàⁿ-lâi khuàⁿ-khì, m̄-tsai Iâ-so͘ sī teh kóng siáⁿ-lâng. 23 Sù-tô͘ tiong-kan ū tsi̍t-ê sī Iâ-so͘ só͘ thiàⁿ ê, i tsē tī Iâ-so͘ ê sin-piⁿ. 24 Se-bûn Pí-tik ǹg hit-ê sù-tô͘ tìm thâu kóng, "Tshiáⁿ lí mn̄g khuàⁿ Iâ-so͘ sī teh kóng siáⁿ-lâng." 25 Hit-ê sù-tô͘ tsiū khò uá Iâ-so͘ ê hing-khám, mn̄g kóng, "Tsú ah, sī siáⁿ-lâng?" 26 Iâ-so͘ ìn kóng, "Guá beh ùn piáⁿ the̍h hō͘ i, hit-ê lâng tsiū-sī." I tsiū ùn tsi̍t-tè piáⁿ, the̍h hō͘ Ka-lio̍k-lâng Se-bûn ê kiáⁿ Iû-tāi. 27 Iû-tāi tsi̍t-ē tsiap-tio̍h hit-tè piáⁿ, Sat-tàn tsiū ji̍p-khì i ê sim. Iâ-so͘ tsiū kā Iû-tāi kóng, "Lí siūⁿ-beh tsò ê, kuáⁿ-kín khì tsò." 28 tâng tsē-toh ê lâng bô tsi̍t-ê tsai-iáⁿ Iâ-so͘ ná-ē tuì i kóng tsit-kù uē. 29 In-uī Iû-tāi sī teh kuán tsîⁿ-hāng, ū-lâng siūⁿ kóng, kám sī Iâ-so͘ teh kiò i khì bé siú-tseh só͘ su-iàu ê mi̍h-kiāⁿ, á-sī kiò i khì tsín-tsè sàn-tshiah lâng. 30 Iû-tāi tsiap-tio̍h hit-tè piáⁿ suî-sî tshut-khì. Hit sî sī àm-sî.

Sin ê Kài-bīng
31 Iû-tāi tshut-khì liáu-āu, Iâ-so͘ kóng, "Taⁿ Jîn-tsú tit-tio̍h îng-kng, Siōng-Tsú mā thong-kuè Jîn-tsú tit-tio̍h îng-kng. 32 kì-jiân Siōng-Tsú thong-kuè Jîn-tsú tit-tio̍h îng-kng, Siōng-Tsú ka-kī mā beh îng-kng Jîn-tsú, koh sī beh suî-sî hō͘ I tit-tio̍h îng-kng. 33 Sè-kiáⁿ ah, Guá kah lín tsò-hué tshun bô juā kú à, lín ē beh tshuē Guá. Tsiàu Guá bat kā Iû-thài-lâng kóng ê, taⁿ Guá kā lín kóng, ' Guá beh khì ê só͘-tsāi, lín bē-tàng khì.' 34 Guá hō͘ lín tsi̍t-tiâu sin ê kài-bīng, Lín tio̍h sio-thiàⁿ, tshin-tshiūⁿ Guá bat thiàⁿ lín. Lín mā tio̍h tsiàu án-ne sio-thiàⁿ. 35 Lín nā sio-thiàⁿ, tsìng-lâng ē tuì án-ne lâi tsai, lín sī Guá ê bûn-tô͘."

Iâ-so͘ Ī-giân Pí-tik M̄-jīn Tsú (Mt 26:31-35;Mk 14:27-31;Lk 22:31-34)
36 Se-bûn Pí-tik mn̄g Iâ-so͘ kóng, "Tsú ah, Lí beh khì tó-uī?" Iâ-so͘ ìn kóng, "Guá beh khì ê só͘-tsāi, lí tsit-má bē-tàng tuè Guá khì, m̄-koh āu-lâi lí ē tuè Guá khì." 37 Pí-tik kóng, "Tsú ah, guá tsit-má ná-ē bē-tàng tuè Lí khì? Guá kam-guān uī-tio̍h Lí lâi pàng-sak sèⁿ-miā." 38 Iâ-so͘ ìn kóng, "Lí beh uī-tio̍h Guá lâi pàng-sak sèⁿ-miā sī-bô? Guá si̍t-tsāi kā lí kóng, ke iáu-buē thî í-tsîng, lí ē saⁿ pái m̄ jīn Guá."