《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十四章

作者 巴克禮普世版小組 2014.01.05

Iâ-so͘ Sī Tō-lō͘, Tsin-lí, Ua̍h-miā
1 Iâ-so͘ koh kóng, "Lín ê sim m̄-thang tshau-huân put-an. Lín tio̍h sìn Siōng-Tsú, mā tio̍h sìn Guá. 2 Guá ê Thiⁿ-Pē ê tshù ū tsin-tsē pâng-king. Guá khì hia sī beh kā lín tsún-pī só͘-tsāi. Nā bô, Guá bē kā lín kóng tsiah-ê tāi-tsì. 3 Guá khì kā lín tsún-pī só͘-tsāi liáu-āu, ē koh tńg-lâi tshuā lín khì Guá hia. Guá tī tó-uī, lín mā ē tī hia. 4 Guá beh khì tó-uī, lín tsai hit-tiâu lō͘." 5 To-má kā Iâ-so͘ kóng, "Tsú ah, guán to m̄-tsai Lí beh khì ê só͘-tsāi, ná-ē tsai hit-tiâu lō͘?" 6 Iâ-so͘ kā i kóng, "Guá sī tō-lō͘, tsin-lí, ua̍h-miā. Nā m̄-sī thong-kuè Guá, bô-lâng ē-tàng khì kàu Thiⁿ-Pē hia. 7 Lín nā bat Guá, mā ē bat Thiⁿ-Pē. Tuì taⁿ í-āu, lín ē bat I, in-uī lín í-king ū khuàⁿ-tio̍h I." 8 Hui-li̍k kā Iâ-so͘ kóng, "Tsú ah, tsiong Thiⁿ-Pē hián-sī hō͘ guán khuàⁿ, guán tsiū ē muá-tsiok." 9 Iâ-so͘ kóng, "Hui-li̍k, Guá kah lín tsò-hué hiah-ni̍h kú, lí iáu m̄-bat Guá sī-bô? Khuàⁿ-tio̍h Guá tsiū-sī khuàⁿ-tio̍h Thiⁿ-Pē, lí ná-ē kóng, ' Tsiong Thiⁿ-Pē hián-sī hō͘ guán khuàⁿ?' 10 Guá tī Thiⁿ-Pē ê lāi-bīn, Thiⁿ-Pē mā tī Guá ê lāi-bīn, lí m̄ sìn sī-bô? Guá kā lín kóng ê uē m̄-sī tshut-tī Guá ka-kī, sī Thiⁿ-Pē tiàm tī Guá lāi-bīn teh tsò I ka-kī ê kang. 11 Lín tio̍h sìn Guá tī Thiⁿ-Pē lāi-bīn, Thiⁿ-Pē tī Guá lāi-bīn. Nā bô mā tio̍h in-uī Guá só͘ tsò ê tāi-tsì lâi sìn. 12 Guá si̍t-tsāi kā lín kóng, Sìn Guá ê lâng ē tsò Guá só͘ tsò ê tāi-tsì. Sīm-tsí ē tsò koh-khah tuā ê tāi-tsì, in-uī Guá beh tńg-khì Thiⁿ-Pē hia. 13 Lín hōng Guá ê miâ bô-lūn kiû sím-mi̍h, Guá lóng ē siúⁿ-sù hō͘ lín. Thang hō͘ Thiⁿ-Pē tuì Kiáⁿ tit-tio̍h îng-kng. 14 Lín hōng Guá ê miâ bô-lūn kiû sím-mi̍h, Guá lóng ē siúⁿ-sù hō͘ lín."

Ìng-ún Sù Sìng-Sîn
15 Lín nā thiàⁿ Guá, tio̍h siú Guá ê kài-bīng. 16 Guá mā ē tuì Thiⁿ-pē kiû, I ē sù tsi̍t-ê Pó-huī-su hō͘ lín, thang kah lín íng-uán tông-tsāi. 17 Tsit-ê Pó-huī-su tsiū-sī tsin-lí ê Sìng-Sîn, sè-kan-lâng bē-tàng tsiap-la̍p I, in-uī in bô khuàⁿ-tio̍h I, mā m̄-bat I, m̄-koh lín bat I, in-uī I kah lín tông-tsāi, koh ē kè-sio̍k tiàm-tī lín lāi-bīn." 18 "Guá bē pàng lín tsuè ko͘-tuaⁿ, Guá ē koh tńg lâi lín tsia. 19 Koh bô juā kú, sè-kan-lâng bē koh khuàⁿ-tio̍h Guá, m̄-koh lín ē khuàⁿ-tio̍h Guá, in-uī Guá ua̍h teh, lín mā ē ua̍h. 20 Kàu hit ji̍t, lín ē tsai Guá tī Guá ê Thiⁿ-pē lāi-bīn, lín tī Guá ê lāi-bīn, Guá mā tī lín lāi-bīn." 21 Tsiap-siū Guá ê kài-bīng koh tsun-siú ê lâng, tsiū-sī thiàⁿ Guá. Thiàⁿ Guá ê lâng ē tit-tio̍h Guá ê Thiⁿ-pē ê thiàⁿ, Guá mā ē thiàⁿ i, koh tsiong Guá pún-sin hián-hiān hō͘ i khuàⁿ." 22 Iû-tāi, m̄ sī hit-ê Ka-lio̍k-lâng, mn̄g Iâ-so͘ kóng, "Tsú ah, uī-sím-mi̍h Lí beh tsiong pún-sin tuì guán hián-hiān, bô beh tuì sè-kan-lâng hián-hiān?" 23 Iâ-so͘ ìn kóng, "Thiàⁿ Guá ê lâng ē tsun-siú Guá ê tō-lí, Guá ê Thiⁿ-pē ē thiàⁿ i, Thiⁿ-pē kah Guá ē lâi i hia kah i tsò-hué tuà. 24 Bô thiàⁿ Guá ê lâng bē tsun-siú Guá ê tō-lí, lín só͘ thiaⁿ ê tō-lí m̄-sī Guá ka-kī ê uē, sī tshe-phài Guá lâi ê Thiⁿ-pē ê uē. 25 " Guá iáu kah lín tsò-hué ê sî, ū tsiong tsiah-ê uē kā lín kóng. 26 M̄-koh Pó-huī-su, tsiū-sī Thiⁿ-pē īng Guá ê miâ beh tshe-phài lâi ê Sìng-Sîn, ē tsiong it-tshè ê tāi-tsì kà-sī lín, koh ē hō͘ lín kì-tit Guá kā lín kóng it-tshè ê uē." 27 " Guá tsiong pîng-an lâu hō͘ lín, Guá tsiong Guá ê pîng-an sù hō͘ lín. Guá hō͘ lín ê kah sè-kan-lâng teh hō͘ lâng ê bô kāng-khuán. Lín ê sim m̄-thang tshau-huân put-an, mā m̄-bián kiaⁿ-hiâⁿ. 28 Lín í-king thiaⁿ-tio̍h Guá ū kā lín kóng, 『 Guá khì, ē koh tńg lâi lín tsia.』 Lín nā thiàⁿ Guá, tsiū ē in-uī Guá beh khì Thiⁿ-pē hia lâi huaⁿ-hí, in-uī Thiⁿ-pē pí Guá khah tuā. 29 Taⁿ tāi-tsì iáu-buē huat-sing, Guá sing kā lín kóng, hō͘ lín tī tāi-tsì huat-sing ê sî thang sìn. 30 Guá bē koh kah lín kóng tsin-tsē uē, in-uī sè-kan ê thóng-tī-tsiá teh-beh lâi à, i bē-tàng tuì Guá tsò sím-mi̍h. 31 M̄-koh beh hō͘ sè-kan-lâng tsai-iáⁿ Guá thiàⁿ Thiⁿ-pē, mā ū tsiàu Thiⁿ-pē ê bīng-līng khì tsò.""Khí lâi, lán lâi khì."