《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十五章

作者 巴克禮普世版小組 2014.01.12

Iâ-so͘ Sī Tsin ê Phû-tô-tshiū
1 " Guá sī tsin ê phû-tô-tshiū, guá ê Thiⁿ-pē sī tsai phû-tô ê lâng. 2 Liân tī Guá ê ki bô kiat kué-tsí ê, I tsiū kā i tsián-tû; ū kiat kué-tsí ê ki, I tsiū kā i siu-tsián, hō͘ i kiat koh khah-tsē kué-tsí. 3 Taⁿ in-uī lín tsiap-siū Guá só͘ kā lín kóng ê tō-lí, lín í-king hō͘ I siu-tsíng hó-sè à. 4 Lín tio̍h kah Guá kiat-liân, Guá mā kah lín kiat-liân. Tú tshin-tshiūⁿ ki bô liân tī phû-tô-tshiū, ka-kī bē kiat kué-tsí. Lín nā bô kah Guá kiat-liân, mā sī ē án-ne." 5 Guá tsiū-sī phû-tô tshiū, lín tsiū-sī ki; tiàm tī guá lāi-bīn ê, guá mā tiàm tī i ê lāi-bīn, tsiū kiat kué-tsí tsin-tsē, in-uī kah guá saⁿ-lī, lín tsiū bē tsò sím-mi̍h. 6 Lâng nā bô kah Guá kiat-liân, ē tshiūⁿ tshiū-ki hō͘ lâng hiat khì guā-bīn suah ta khì. Lâng kā in khioh tsò-tui hiat lo̍h hué khì sio. 7 Lín nā kah Guá kiat-liân, Guá ê uē tī lín lāi-bīn, lín ài sím-mi̍h, kiû tsiū ē kā lín sîng-tsuân. 8 Lín nā kiat tsin-tsē kué-tsí, tsin-tsiàⁿ tsò Guá ê bûn-tô͘, Guá ê Thiⁿ-pē ē in-uī án-ne tit-tio̍h îng-kng. 9 Tshin-tshiūⁿ Thiⁿ-pē ū thiàⁿ Guá, Guá mā ū thiàⁿ lín, lín tio̍h tiàm tī Guá ê thiàⁿ lāi-bīn. 10 Lín nā tsun-siú Guá ê kài-bīng, lín tsiū ē tiàm tī Guá ê thiàⁿ lāi-bīn; tshin-tshiūⁿ Guá ū tsun-siú Guá ê Thiⁿ-pē ê kài-bīng, tiàm tī I ê thiàⁿ lāi-bīn." 11 " Guá kā lín kóng tsiah-ê tāi-tsì sī beh hō͘ Guá ê huaⁿ-hí tiàm tī lín lāi-bīn, koh hō͘ lín ê huaⁿ-hí buán-buán. 12 Tshin-tshiūⁿ Guá ū thiàⁿ lín, lín tio̍h sio-thiàⁿ. Tse sī Guá ê bīng-līng. 13 Lâng uī-tio̍h pîng-iú hi-sing sèⁿ-miā, bô koh ū pí tse khah tuā ê thiàⁿ. 14 Lín nā tsun-siú Guá ê bīng-līng, lín tsiū-sī Guá ê pîng-iú. 15 Guá bô koh kiò lín tsò lô͘-po̍k, in-uī lô͘-po̍k m̄ tsai tsú-lâng teh tsò sím-mi̍h. Taⁿ Guá í-king kiò lín tsò pîng-iú, in-uī Guá tuì Thiⁿ-pē só͘ thiaⁿ-tio̍h ê, lóng ū kā lín kóng à. 16 M̄ sī lín kíng-suán Guá, sī Guá kíng-suán lín, mā jīm-bīng lín, hō͘ lín khì kiat kué-tsí, koh hō͘ lín ê kué-tsí kú-tn̂g pó-tsûn, án-ne hō͘ lín ē-tàng hōng Guá ê miâ lâi tuì Thiⁿ-pē kiû, I lóng ē kā lín sîng-tsuân. 17 Tse sī Guá hō͘ lín ê bīng-līng, Lín tio̍h sio-thiàⁿ."

Sè-kan-lâng ê Uàn-hūn
18 "Sè-kan-lâng nā uàn-hūn lín, lín tio̍h tsai i uàn-hūn lín í-tsîng to̍h tāi-sing uàn-hūn Guá. 19 Lín nā sio̍k tsit sè-kan, sè-kan-lâng tsiū ē khuàⁿ lín tsò ka-kī ê lâng lâi thiàⁿ lín, m̄-koh Guá í-king kā lín tuì sè-kan kíng-suán tshut-lâi, só͘-í sè-kan-lâng ē uàn-hūn lín. 20 Lín tio̍h kì tiâu Guá kā lín kóng ê uē: Lô͘-po̍k bē pí tsú-lâng khah tuā. Lâng nā pik-hāi Guá, mā ē pik-hāi lín; in nā tsun-siú Guá ê uē, mā ē tsun-siú lín ê uē. 21 M̄-koh in-uī lín sī Guá ê bûn-tô͘, in tsiū ē án-ne tuì-thāi lín, in-uī in m̄-bat tshe-phài Guá lâi ê Hit-uī. 22 Guá nā bô lâi kā in kóng, in tsiū bô tsuē. Taⁿ in bô huat-tō͘ uī ka-kī ê tsuē lâi piān-kái. 23 Uàn-hūn Guá ê lâng mā ē uàn-hūn Guá ê Thiⁿ-pē. 24 Guá tī in tiong-kan nā bô tsò pa̍t-lâng m̄-bat tsò ê tāi-tsì, in tsiū bô tsuē, m̄-koh taⁿ in ū khuàⁿ-tio̍h Guá só͘-tsò ê kang-tsok, iáu-koh teh uàn-hūn Guá kah Thiⁿ-pē. 25 Tse sī beh ìng-giām in ê lu̍t-huat só͘ kì-tsāi ê uē: In bô-iân bô-kò͘ uàn-hūn Guá.( tsù: SPh 35:19; 69:4) 26 Hit-uī Pó-huī-su, tsiū-sī tsin-lí ê Sìng-Sîn, ē tuì Thiⁿ-pē hia lâi lín tsia. Guá tuì Thiⁿ-pē hia tshe Sìng-Sîn lâi lín tsia sī beh uī Guá tsò kiàn-tsìng. 27 Lín mā tio̍h uī Guá tsò kiàn-tsìng, in-uī lín tuì khí-thâu to̍h kah Guá tsò-hué."