《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十六章

作者 巴克禮普世版小組 2014.01.19

" Guá kā lín kóng tsiah-ê tāi-tsì, sī beh hō͘ lín ê sìn-sim bē khí iô-tāng. 2 Sè-kan-lâng ē kā lín kuáⁿ-tshut huē-tn̂g. Sî teh-beh kàu, hiah-ê siūⁿ-beh thâi lín ê lâng lóng ē siūⁿ-kóng in teh ho̍k-sāi Siōng-Tsú. 3 In ē tsò tsiah-ê tāi-tsì sī in-uī in m̄-bat Thiⁿ-Pē, mā m̄-bat Guá. 4 M̄-koh Guá ū kā lín kóng tsiah-ê tāi-tsì, sī beh hō͘ lín kàu sî thang kì-tit Guá bat kā lín kóng."

Sìng-Sîn ê Kang-tsok
" Guá bô tuì khí-thâu kā lín kóng tsiah-ê tāi-tsì, sī in-uī Guá iáu kah lín tsò-hué. 5 Taⁿ Guá teh-beh tńg-khì tshe-phài Guá lâi ê Hit-uī hia. Lín tiong-kan bô-lâng mn̄g guá, kóng, ' Lí beh khì tó-uī?' 6 Guá kā lín kóng tsiah-ê tāi-tsì liáu-āu, lín suah muá-sim iu-būn. 7 M̄-koh Guá tio̍h tsiong si̍t-tsîng kā lín kóng. Guá khì sī tuì lín ū lī-ik. Guá nā bô khì, Hit-uī Pó-huī-su tsiū bē lâi lín tsia; Guá nā khì, tsiū ē tshe I lâi lín tsia. 8 Sìng-Sîn lâi ê sî, ē kā sè-kan-lâng tsí-tsìng in tuì tsuē, tuì gī, tuì sím-phuàⁿ ê tshò-gō͘ kuan-liām. 9 Tuì tsuē, in-uī in m̄ sìn Guá; 10 Tuì gī, in-uī Guá teh-beh tńg-khì Thiⁿ-Pē hia, lín bē koh khuàⁿ-tio̍h Guá; 11 Tuì sím-phuàⁿ, in-uī tsit sè-kan ê thóng-tī-tsiá í-king siū sím-phuàⁿ." 12 Guá iáu ū tsin-tsē hāng tāi-tsì beh kā lín kóng, m̄-koh lín tsit-má iáu bē-tàng liáu-kái. 13 Tsin-lí ê Sìng-Sîn lâi ê sî, I ē tshuā lín liáu-kái it-tshè ê tsin-lí. I m̄-sī tsiàu ka-kī ê ì-sù lâi kóng, sī tsiong I só͘ thiaⁿ-tio̍h-.ê lâi kóng, mā ē tsiong bī-lâi ê tāi-tsì pò lín tsai. 14 I ē kā îng-kng kui hō͘ Guá, in-uī I ē tsiong tuì Guá só͘ niá-siū ê thuân-pò hō͘ lín. 15 Thiⁿ-Pē só͘ ū ê it-tshè lóng sī Guá ê, só͘-í Guá tsiah kóng, Sìng-Sîn ē tsiong tuì Guá só͘ niá-siū ê tsin-lí thuân-pò hō͘ lín."

Iu-būn Kah Huaⁿ-hí
16 Koh bô juā kú, lín tsiū bē-tàng khuàⁿ-tio̍h Guá, koh-tsài bô juā kú, lín tsiū ē koh khuàⁿ-tio̍h Guá." 17 Ū kuí-nā-ê bûn-tô͘ hō͘-siōng kóng, "I kā lán kóng, ' Koh bô juā kú, lín tsiū bē-tàng khuàⁿ-tio̍h Guá, koh-tsài bô juā kú, lín tsiū ē koh khuàⁿ-tio̍h Guá.' Koh kóng, ' In-uī Guá teh-beh tńg-khì Thiⁿ-Pē hia.' Tsiah-ê uē sī sím-mi̍h ì-sù?" 18 Só͘-í in it-ti̍t mn̄g, " I só͘ kóng ê ' Koh bô juā kú.' sī sím-mi̍h ì-sù? Lán m̄-tsai I teh kóng sím-mi̍h." 19 Iâ-so͘ tsai in ài beh mn̄g I, tsiū kā in kóng, "Lín in-uī Guá kóng, ' Koh bô juā kú, lín tsiū bē-tàng khuàⁿ-tio̍h Guá, koh-tsài bô juā kú, lín tsiū ē koh khuàⁿ-tio̍h Guá.' teh mn̄g-lâi mn̄g-khì sī-bô? 20 Guá si̍t-tsāi kā lín kóng, lín ē thî-khàu ai-siong, m̄-koh sè-kan-lâng ē huaⁿ-hí. Lín ē iu-būn, m̄-koh lín ê iu-būn beh piàn-tsò huaⁿ-hí. 21 Hū-jîn-lâng beh seⁿ-kiáⁿ tsiū iu-būn, in-uī i ê sán-kî kàu à, m̄-koh eⁿ-á tshut-sì liáu-āu, bô koh kì-tit seⁿ-kiáⁿ ê thòng-khó͘, in-uī i ē huaⁿ-hí ū eⁿ-á tshut-sì tī sè-kan. 22 Tshin-tshiūⁿ án-ne, lín tsit-má ū iu-būn, m̄-koh Guá ē koh kìⁿ-tio̍h lín, lín ê sim tsiū ē huaⁿ-hí. Bô-lâng ē-tàng kā lín ê huaⁿ-hí tshiúⁿ-khì." 23 " Kàu hit ji̍t, lín bē koh mn̄g Guá sím-mi̍h. Guá si̍t-tsāi kā lín kóng, lín hōng Guá ê miâ tuì Thiⁿ-Pē só͘ kiû ê, I lóng ē siúⁿ-sù hō͘ lín. 24 Lín kàu taⁿ iáu m̄-bat hōng Guá ê miâ kiû sím-mi̍h. Lín tio̍h kiû, tsiū ē tit-tio̍h, hō͘ lín ê huaⁿ-hí muá-muá."

Iâⁿ-kuè Sè-kan
25 " Tsiah-ê tāi-tsì Guá lóng īng phì-jū kā lín kóng kuè à. Sî teh-beh kàu, Guá bô koh-tsài īng phì-jū kā lín kóng. Guá beh bîng-khak tuì lín kóng-khí Thiⁿ-Pē ê tāi-tsì. 26 Hit-ê ji̍t nā kàu, lín tio̍h hōng Guá ê miâ kî-kiû. Guá bô kā lín kóng, Guá beh thè lín tuì Thiⁿ-Pē khún-kiû. 27 Thiⁿ-Pē pún-sin to̍h thiàⁿ lín, sī in-uī lín ū thiàⁿ Guá, koh ū sìn Guá sī tuì Thiⁿ-Pē hia lâi-.ê. 28 Guá tuì Thiⁿ-Pē hia tshut-lâi, lâi-kàu sè-kan. Taⁿ koh beh lī-khui sè-kan, tńg-khì Thiⁿ-Pē hia." 29 Bûn-tô͘ mn̄g kóng, "Taⁿ Lí bîng-khak tuì guán kóng, m̄-sī īng phì-jū. 30 Taⁿ guán tsai Lí bû-só͘ put-ti, m̄-bián lâng kā Lí mn̄g, in-uī án-ne, guán sìn Lí sī tuì Siōng-Tsú hia lâi-.ê." 31 Iâ-so͘ mn̄g kóng, "Taⁿ lín ū sìn bô? 32 Sî teh-beh kàu, kî-si̍t í-king kàu à. Lín ē sì-suàⁿ, ta̍k-lâng tńg-khì ka-kī ê só͘-tsāi, pàng Guá ka-kī tsi̍t-ê, m̄-koh Guá m̄-sī ka-kī tsi̍t-ê, in-uī ū Thiⁿ-Pē kah Guá tông-tsāi. 33 Guá í-king tsiong tsiah-ê tāi-tsì kā lín kóng, sī beh hō͘ lín tī Guá ê lāi-bīn ū pîng-an. Lín tī sè-kan ē ū khó͘-lān, m̄-koh lín thang hòng-sim, Guá í-king iâⁿ-kuè sè-kan."