《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十七章

作者 巴克禮普世版小組 2014.01.26

Iâ-so͘ Uī Bûn-tô͘ Kî-tó
Iâ-so͘ kóng tsiah-ê uē liáu-āu, gia̍h thâu ǹg thiⁿ, kóng, "Thiⁿ-Pē ah, sî í-king kàu à. Guān Lí îng-iāu Lí ê Kiáⁿ, thang hō͘ Kiáⁿ mā ē-tàng îng-iāu Lí. 2 Lí ū tsiong thóng-tī bān-bîn ê kuân-pìng siúⁿ-sù hō͘ Kiáⁿ, hō͘ I ē-tàng tsiong íng-uán ê ua̍h-miā siúⁿ-sù it-tshè Lí kau-tài I ê lâng. 3 Íng-uán ê ua̍h-miā tsiū-sī jīn-bat Lí sī to̍k-it tsin ê Siōng-Tsú, koh jīn-bat Lí só͘ tshe-phài lâi ê Iâ-so͘ Ki-tok. 4 Guá í-king tī tē-tsiūⁿ uân-sîng Lí kau-tài Guá ê kang lâi îng-iāu Lí à. 5 Thiⁿ-Pē ah, taⁿ kiû Lí hō͘ Guá tī Lí ê bīn-tsîng tit-tio̍h îng-iāu, tsiū-sī tshòng-tsō sè-kan í-tsîng Guá kah Lí tsò-hué ū ê îng-iāu." 6 " Lí tuì sè-kan kíng-suán tshut-lâi hō͘ Guá ê lâng, Guá í-king ū tsiong Lí ê miâ tuì in hián-bîng. In guân-pún sī Lí ê, Lí tsiong in siúⁿ-sù hō͘ Guá. In mā í-king ū tsun-siú Lí ê tō-lí. 7 Taⁿ in tsai Lí hō͘ Guá ê ta̍k-hāng lóng sī tuì Lí lâi-.ê. 8 In-uī Guá ū tsiong Lí hō͘ Guá ê sìn-sit thuân hō͘ in. In ū tsiap-siū hiah-ê sìn-sit, mā khak-si̍t tsai Guá sī tuì Lí hia lâi, koh ū sìn sī Lí tshe-phài Guá lâi."

9 " Guá uī-tio̍h in tuì Lí kî-kiû, m̄-sī uī-tio̍h sè-kan-lâng kiû, sī uī-tio̍h Lí hō͘ Guá ê lâng lâi kiû, in-uī in sī Lí-.ê. 10 Guá ê it-tshè lóng sī Lí ê, Lí ê it-tshè mā lóng sī Guá-.ê. Guá koh ū thong-kuè in tit-tio̍h îng-iāu. 11 Guá bô koh tiàm tī sè-kan, m̄-koh in iáu tī sè-kan. Sìng ê Thiⁿ-Pē ah, guān Lí īng Lí ê miâ, tsiū-sī Lí hō͘ Guá ê, lâi pó-siú in, thang hō͘ in tsiâⁿ-tsò tsi̍t-thé, tshin-tshiūⁿ lán sī tsi̍t-thé. 12 Guá kah in tsò-hué ê sî, bat hōng Lí ê miâ, tsiū-sī Lí hō͘ Guá ê, lâi pó-siú in. Tû-liáu hit-ê tsù-tīng tîm-lûn ê lâng í-guā, Guá mā ū tsiàu-kò͘ in, hō͘ in lóng bô tîm-lûn, án-ne sī beh hō͘ Sìng-king ê uē tit-tio̍h ìng-giām. 13 Taⁿ guá khì Lí hia. Guá iáu tiàm sè-kan ê sî kóng tsiah-ê uē, sī beh hō͘ in sim-lāi tshiong-muá Guá ê huaⁿ-hí. 14 Guá ū tsiong Lí ê tō-lí thuân hō͘ in, sè-kan-lâng uàn-hūn in, in-uī in bô koh sio̍k tsit sè-kan, tshin-tshiūⁿ Guá bô sio̍k tsit sè-kan. 15 Guá m̄-sī kiû Lí tshuā in lī-khui tsit sè-kan, sī teh kiû Lí pó-siú in thuat-lī hit-ê siâ-ok. 16 In bô koh sio̍k tsit sè-kan, tshin-tshiūⁿ Guá bô sio̍k tsit sè-kan. 17 Kiû Lí īng tsin-lí kā in sìng-huà, Lí ê uē tsiū-sī tsin-lí. 18 Tshin-tshiūⁿ Lí ū tshe-phài Guá ji̍p sè-kan, Guá mā ū tshe-phài in ji̍p sè-kan. 19 Taⁿ Guá uī-tio̍h in lâi sìng-huà Guá ka-kī hō͘ Lí īng, thang hō͘ in mā ē-tàng thong-kuè tsin-lí lâi sìng-huà in ka-kī hō͘ Lí īng."

20 " Guá m̄-nā uī-tio̍h tsiah-ê lâng kî-kiû, mā uī-tio̍h tuì tsiah-ê lâng só͘ thuân ê tō-lí lâi sìn Guá hiah-ê lâng kî-kiû. 21 Thang hō͘ in lóng tsiâⁿ-tsò tsi̍t-thé. Thiⁿ-Pē ah, tshin-tshiūⁿ Lí tiàm-tī Guá lāi-bīn, Guá tiàm-tī Lí lāi-bīn. Kiû Lí hō͘ in mā án-ne tiàm-tī lán lāi-bīn, thang hō͘ sè-kan-lâng siong-sìn, sī Lí tshe-phài Guá lâi. 22 Lí hō͘ Guá ê îng-iāu, Guá mā ū hō͘ in, thang hō͘ in tsiâⁿ-tsò tsi̍t-thé, tshin-tshiūⁿ lán sī tsi̍t-thé. 23 Guá tī in lāi-bīn, Lí tī Guá lāi-bīn, sī beh hō͘ in ē-tàng uân-tsuân tsiâⁿ-tsò tsi̍t-thé, thang hō͘ sè-kan-lâng tsai, sī Lí tshe-phài Guá, mā tsai Lí ū thiàⁿ in tshin-tshiūⁿ Lí ū thiàⁿ Guá."

24 " Thiⁿ-Pē ah, Lí kau-tài Guá hiah-ê lâng, Guá bô-lūn tī tó-uī lóng ài in kah Guá tsò-hué tī hia, thang hō͘ in khuàⁿ-tio̍h Lí siúⁿ-sù Guá ê îng-iāu, in-uī Lí tī tshòng-tsō sè-kan í-tsîng to̍h í-king thiàⁿ Guá. 25 Kong-gī ê Thiⁿ-Pē ah, sè-kan-lâng m̄-bat Lí, m̄-koh Guá bat Lí. Tsiah-ê lâng mā tsai Lí ū tshe-phài Guá. 26 Guá í-king ū hō͘ in bat Lí ê miâ, mā beh kè-sio̍k tsí-sī in. Thang hō͘ Lí tuì Guá ê thiàⁿ-thàng tī in lāi-bīn, Guá mā tī in lāi-bīn."