《押韻啟應詩篇》

 | | | 轉寄

台語押韻啟應詩篇 33

作者 Tīⁿ Jî-gio̍k 2006.08.20

1a　Lín gī-lâng ah, tio̍h in-uī Iâ-hô-hua lâi huaⁿ-hí ;
　　恁　義 人　啊， 著　因 為 耶 和 華　來　歡　喜；
1b　　　Tsìng-ti̍t ê lâng ê o -ló sī ha̍p-gî .
　　　　正　直　的 人　的 讚美　是　合　宜。


2a　Lín tio̍h tuâⁿ-khîm kám-siā Iâ-hô-hua;
　　恁　著　彈　琴　感　謝　耶 和 華；
2b　　　Īng tsa̍p-tiâu-hiân ê sik o -ló I lâi tshiùⁿ-kua.
　　　　用　十　條　絃　的 瑟　讚 美 祂 來　唱　歌。


3a　Tio̍h tuì I tshiùⁿ sin ê kua lâi o -ló ,
　　著 對 祂 唱 新 的 歌 來 讚 美，
3ba　　　Tuâⁿ kàu tsin hó , siaⁿ-im hiáng-liāng kàu tsuè-ko.
　　　　彈 到 真 好，聲 音 響 亮 到 最 高。


4a　In -uī Iâ-hô-hua ê giân-gú tsìng-ti̍t ;
　　因 為 耶 和 華 的 言 語 正 直；
4b　　　Huān I só͘ tsuè--ê , it-tsīn sī sîng-si̍t .
　　　　凡 祂 所 做 的，一 盡 是 誠 實。


5a　I huaⁿ-hí gī-lí kap kong-pîng tī sè-tsiūⁿ.
　　祂 歡 喜 義 理 及 公 平 在 世 上。
5b　　　Iâ-hô-hua ê tsû-ài muá-muá tī tuē-tsiūⁿ.
　　　　耶 和 華 的 慈 愛 滿 滿 在 地 上。


6a　Tsiah-ê thiⁿ tuì Iâ-hô-hua ê uē lâi tsō-tsiâⁿ,
　　諸 些 天 從 耶 和 華 的 話 來 造 成，
6b　　　Thiⁿ ê bān-luī, tuì I ê tshuì ê khì lâi tsiâⁿ.
　　　　天 的 萬 類，從 祂 的 嘴 的 氣 來 成。


7a　I tsū-tsi̍p hái-tsuí tsiâⁿ-tsuè kui-tui,
　　祂 聚 集 海 水 成 做 歸 堆，
7b　　　Siu-khǹg tshim-ian tī tsuí-khò͘ lāi- uî .
　　　　收 放 深 淵 在 水 庫 內 圍。


8a　Tsuân-tuē tio̍h kìng-uì Iâ-hô-hua kiok-kiong khiam-pi ,
　　全 地 著 敬 畏 耶 和 華 鞠 躬 謙 卑，
8b　　　Huān-nā khiā-khí tī sè-tsiūⁿ--ê , lóng tio̍h kiaⁿ I .
　　　　凡 若 居 起 在 世 上 的，都 當 驚 祂。


9a　In-uī I kóng-tshut tsiū ū tsûn-tsāi,
　　因 為 祂 講 出 就 有 存 在，
9b　　　I bīng-līng tsiū khiā-tsāi.
　　　　祂 命 令 就 站 在。


10a　Iâ-hô-hua hō͘ lia̍t-pang ê kè-i̍k bô-tshái-kang,
　　耶 和 華 使 列 邦 的 計 劃 無 采 工，
10b　　　Hō͘ tsìng peh-sìⁿ só͘ siūⁿ--ê , kui tī khang-khang.
　　　　使 眾 百 姓 所 想 的，歸 於 空 空 。


11a　Iâ-hô-hua ê kè-i̍k íng-uán khiā-tsāi,
　　耶 和 華 的 計 劃 永 遠 站 在，
11b　　　I ê sim só͘ siūⁿ--ê kàu bān sè -tāi .
　　　　祂 的 心 所 想 的 到 萬 世 代。


12a　Jīn Iâ-hô-hua tsuè i ê Siōng-tè--ê , hit kok ū hok-khì;
　　認 耶 和 華 做 它 的 上 帝 的，彼 國 有 福 氣；
12b　　　I kíng-suán tsuè I ê sán-gia̍p--ê , hit -ê peh-sìⁿ ū hok-khì.
　　　　祂揀 選 做 祂 的 產 業 的，彼 個 百 姓 有 福 氣。


13a　Iâ-hô-hua tuì thiⁿ teh khuàⁿ bān-pang,
　　耶 和 華 從 天 在 看 萬 邦，
13b　　　I kàm-tshat lóng-tsóng ê sè-kan-lâng.
　　　　祂 鑑 察 攏 總 的 世 間 人。


14a　I tuì I khiā-khí ê só͘-tsāi ǹg guā-bīn,
　　祂 從 祂 居 起 的 所 在 向 外 面，
14b　　　Khuàⁿ it-tshè ê peh-sìⁿ khiā-khí tī tuē-bīn.
　　　　看 一 切 的 百 姓 居 起 在 地 面。


15a　I sī tsō-tsiâⁿ in tsìng-lâng ê sim--ê ,
　　祂 是 做 成 伊 眾 人 的 心 的，
15b　　　Liû-sim tī in it-tshè ê só͘-tsuè--ê .
　　　　留 心 在 伊 一 切 的 所 做 的。


16a　Kun-ông buē-uē in-uī ping tsuē tit-tio̍h kiù;
　　君 王 不 會 因 為 兵 多 得 著 救；
16b　　　Bíng-lâng buē-uē in-uī khuì-la̍t tuā tit-tio̍h kiù.
　　　　猛 人 不 會 因 為 氣 力 大 得 著 救。


17a　Uá-khò bé tit-tio̍h kiù sī bô-tshái-kang;
　　倚 靠 馬 得 到 救 是 無 采 工；
17b　　　Buē-uē īng i ê tuā-la̍t lâi kiù lâng.
　　　　不 會 　用 它的 大 力 來 救 人。


18a　Iâ-hô-hua ê ba̍k-tsiu khuàⁿ kìng-uì I ê lâng,
　　耶 和 華 的 目 珠 看 敬 畏 祂 的 人，
18b　　　Khuàⁿ ǹg-bāng I ê tsû-ài ê lâng;
　　　　看 盼 望 祂 的 慈 愛 的 人；


19a　Beh kiù in ê lîng-hûn thuat-lī íng-uán sí ,
　　要 救 伊 的 靈 魂 脫 離 永 遠 死，
19b　　　Pó-tsûn in ê ua̍h-miā tī ki-hng ê sî .
　　　　保 存 伊 的 活 命 在 饑 荒 的 時。


20a　Guán ê sim-sîn pîng-sò͘ thìng-hāu Iâ-hô-hua;
　　　阮 的 心 神 平 素 等 候 耶 和 華；
20b　　　I sī tsuè guán ê pang-tsān bô suah,
　　　　祂是 做 阮 的 幫 助 無 息 ，
　　　　tsuè guán ê tîn-pâi thang i - uá.
　　　　做 阮 的 盾 牌 通 依 倚。


21a　Guán ê sim beh uá-khò I lâi huaⁿ-hí tshut-siaⁿ,
　　阮 的 心 要 倚 靠 祂 來 歡 喜 出 聲，
21b　　　In-uī guán pîng-sò͘ uá-khò I ê sìng-miâ.
　　　　因 為 阮 平 素 倚 靠 祂 的 聖 名。


22a　Iâ-hô-hua ah, guān Lí ê tsû-ài lîm-kàu guán,
　　耶 和 華 啊， 願　Ｌｉ２的 慈 愛 臨 到 阮，
22b　　　Tsiàu guán só͘ ǹg-bāng Lí-- ê , tap guán ê guān.
　　　　照 阮 所 盼 望　Ｌｉ２ 的，答 阮 的 願。