《押韻啟應詩篇》

 | | | 轉寄

台語押韻啟應詩篇 58

作者 Tīⁿ Jî-gio̍k 2007.02.18

58　　Tāi-pi̍t kim ê si ; kau hō͘ Ga̍k-kuaⁿ ; tiāu , sī īng “Bo̍h-tit huí-huāi ”.

1a　Sè-kan lâng ah , lín tsīng-tsīng kiám tsin-tsiàⁿ kóng kong-gī mah?
　　世 間 人 啊，恁 靜 靜 豈 真 正 講 公 義 嗎？

1b　　　Lín kiám tsiàu sîng-si̍t kiâⁿ sím-phuàⁿ mah ?
　　　　恁 豈 照 誠 實 行 審 判 嗎 ？

2a　M̄ -sī , lín sī sim-lāi tsuè pháiⁿ ê lâng;
　　不 是，恁 是 心 內 做 歹 的 人；

2b　　　Lín tī tuē-tsiūⁿ,
　　　　恁 在 地 上，
　　　　īng lín ê tshiú só͘ tsuè ê kiông-pō tshìn hō͘ lâng.
　　　　用 恁 的 手 所 做 的 強 暴 秤 給 人。

3a　Pháiⁿ-lâng tsi̍t-ē tshut bú-thai,
　　歹 人 一 下 出 母 胎，

3b　　　Tsiū kap Siōng-tè tshiⁿ-so͘ ;
　　　　就 與 上 帝 生 疏；

3c　Tsi̍t-ē lī-khui lāu-bú ê pak-tó͘ , tsiū kiâⁿ tshe-lō͘ ,
　　一 下 離 開 老 母 的 腹 肚， 就 行 叉 路，

3d　　　Kóng pe̍h-tsha̍t-uē bû-sò͘ .
　　　　講 白 賊 話 無 數。

4a　In ê to̍k tshin-tshiūⁿ tsuâ ê to̍k bih tī khang,
　　伊 的 毒 親 像 蛇 的 毒 匿 在 孔，

4b　　　In tshin-tshiūⁿ tshàu-hī-lâng ê to̍k-tsuâ that-ba̍t hī-khang;
　　　　伊 親 像 臭 耳 人 的 毒 蛇 塞 密 耳 孔；

5a　M̄-thiaⁿ khu-tsuâ ê lâng ê siaⁿ,
　　不 聽 驅 蛇 的 人 的 聲，

5b　　　Sui-bóng gâu uī-hû liām-tsiù--ê , in ia̍h m̄-thiaⁿ.
　　　　雖 罔 能 畫 符 唸 咒 的，伊 亦 不 聽。

6a　Siōng-tè ah , kiû Lí phah-tsi̍h in tshuì-lāi ê khí;
　　上 帝 啊，求 你 拍 折 伊 嘴 內 的 齒；

6b　　　Iâ-hô-hua ah, kiû Lí phah-tsi̍h sai-á-thûn ê tuā-ki tshuì-khí.
　　　　耶 和 華 啊，求 你 打 折 獅 仔 屯 的 大 枝 嘴 齒。

7a　Guān in siau-bia̍t tshin-tshiūⁿ kín-kín lâu-tshut ê tsuí-tî ;
　　願 伊 消 滅 親 像 緊 緊 流 出 的 水 池；

7b　　　In ê tsìⁿ pí beh siā ê sî, guān in ê tsìⁿ tshin-tshiūⁿ phah-tsi̍h.
　　　　伊 的 箭 比 欲 射 的時, 願 伊 的箭 親 像 打 折。

8a　Guān in tshin-tshiūⁿ lô͘ -lê , siau-iûⁿ--khì;
　　願 伊 親 像 螺 狸，消 溶 去；

8b　　　Koh tshin-tshiūⁿ hū-jîn-lâng
　　 復 親 像 婦 仁 人
　　　　ka-la̍uh bô kìⁿ-tio̍h thiⁿ-ji̍t ê thai-jî .
　　　　掉 落 無 見 著 天 日 的 胎 兒。

9a　Lín īng tshì-á hiâⁿ hé , tiáⁿ iáu-bē jia̍t-khí,
　　恁 用 莿 仔 燃 火， 鼎 猶 未 熱 起，

9b　　　Tsú beh īng kńg-lê-hong hing-khí,
　　　　主 要 用 捲 龍 風 興 起；
　　　　Tsiong tshiⁿ--ê kap to̍h--ê , tsuè tsi̍t-ē sàu--khì.
　　　　將 青 的 與 to̍h的, 做 一 下 掃 去。

10a　Gī-lâng khuàⁿ-kìⁿ pò-ìng ê sū , tsiū huaⁿ-hí ;
　　　義 人 看 見 報 應 的 事，就 歡 喜；

10b　　　I beh tī pháiⁿ-lâng ê huih sué i ê kha tshing-khì.
　　　　　他 將 在 歹 人 的 血 洗 他 的 腳 清 氣。

11a　Lâng tsiū beh kóng, gī-lâng tsin-tsiàⁿ ū hó-pò tit sin-uan;
　　　人 就 欲 講， 義 人 真 正 有 好 報 得 申 冤；

11b　　　Tī tuē-bīn-tsiūⁿ kó-jiân ū Siōng-tè teh phuàⁿ-tuàn.
　　 　　　在 地 面 上 果 然 有 上 帝 在 判 斷。