《押韻啟應詩篇》

 | | | 轉寄

台語押韻啟應詩篇 64

作者 Tīⁿ Jî-gio̍k 2007.04.01

64　　Tāi-pi̍t ê si, kau hō͘ Ga̍k-kuaⁿ.

1a　Siōng-tè ah , guá ai-siong ê sî , kiû Lí thiaⁿ guá ê siaⁿ;
　　上 帝 啊， 我 哀 傷 的 時，求 你 聽 我 的 聲；

1b　　　Kiû Lí pó-hō͘ guá ê ua̍h-miā,
　　　　求 你 保 護 我 的 活 命，
　　　　tuì-ti̍k nā lâi, hō͘ guá bián kiaⁿ.
　　　　對 敵 若 來，使 我 免 驚。

2a　Kiû Lí tsiong guá khǹg-ba̍t tsiàu-kò͘,
　　求 你 將 我 放 密 照 顧，

2b　　　Hō͘ guá thuat-lī tsuè-pháiⁿ ê lâng àm-tsīⁿ ê kè-bô͘,
　　　　使 我 脫 離 做 歹 的 人 暗 靜 的 計 謀，
　　　　kap kiâⁿ put-gī ê lâng ê jiáu-luān beh hāi bû-ko͘ .
　　　　與 行 不 義 的 人 的 擾 亂 欲 害 無 辜。

3a　In buâ in ê tsi̍h tshin-tshiūⁿ to hiah lāi,
　　伊 磨 伊 的 舌 親 像 刀 許 利，

3b　　　In pí-tsún in ê tsìⁿ, tsiū-sī ok-to̍k ê uē iā hiah lāi, 　　
　　伊 比 準 伊 的 箭， 就 是 惡 毒 的 話 也 許 利，

4a　Beh tī àm-tsīⁿ ê só͘-tsāi siā bû-ko͘ ê lâng;
　　欲 在 暗 靜 的 所 在 射 無 辜 的 人；

4b　　　In hut-jiân siā-tio̍h i , ia̍h m̄-kiaⁿ siáⁿ-lâng.
　　　　伊 忽 然 射 著 他，亦 不 驚 甚 人。

5a　In saⁿ bián-lē siat pháiⁿ kè-bô͘ beh hāi-lâng,
　　伊 相 勉 勵 設 歹 計 謀 欲 害 人，

5b　　　In tsham-siông àm-tsīⁿ tiuⁿ lô-bāng;
　　　　伊 參 詳 暗 靜 張 羅 網；
　　　　Kóng, tsī-tsuī uē khuàⁿ-kìⁿ in ê hām-khang.
　　　　講， 是 誰 會 看 見 伊 的 陷 坑 。

6a　In uī pháiⁿ-tāi tô͘ -bô͘,
　　伊 為 歹 事 圖 謀，

6b　　　Kóng, guán tsīn-la̍t tô͘ -bô͘,
　　　　講， 阮 盡 力 圖 謀，

6c　Í -king ū tú-hó ê kè-bô͘ ;
　　已 經 有 抵 好 的 計 謀；

6d　　　In ta̍k-lâng ê liām-thâu kap sim-su khùn-lân po̍k-lō͘ .
　　　　伊 逐 人 的 念 頭 及 心 思 困 難 暴 露。

7a　Tsóng-sī Siōng-tè beh īng tsìⁿ siā in ;
　　總 是 上 帝 要 用 箭 射 伊；

7b　　　In hut-jiân tio̍h-siong bia̍t sin.
　　　　伊 忽 然 著 傷 滅 身。

8a　In beh tio̍h-tak khut-kē ,
　　伊 必 著 觸 屈 低，

8b　　　In ê tsi̍h uē hāi in pún-sin;
　　　　伊 的 舌 會 害 伊 本 身；

8c　Huān-nā khuàⁿ-kìⁿ in--ê ,
　　 凡 若 看 見 伊 的，

8d　　　Lóng beh iô-thâu siám-sin.
　　　　攏 必 搖 頭 閃 身。

9a　Tsìng-lâng lóng beh kiaⁿ-hiâⁿ,
　　眾 人 攏 必 驚 惶，
　　beh pò-iông Siōng-tè só͘ tsuè ta̍k-kiāⁿ.
　　必 報 揚 上 帝 所 做 逐 件。

9b　　　Koh siông-sè siūⁿ I ê só͘-kiâⁿ.
　　　　復 詳 細 想 祂 的 所 行。

10a　Gī-lâng beh in-uī Iâ-hô-hua lâi huaⁿ-hí , ia̍h beh uá-khò I ;
　　　義 人 必 因 為 耶 和 華 來 歡 喜，亦 必 倚 靠 祂；

10b　　　Huān-nā sim tsìng-ti̍t ê lâng, lóng beh khua-kháu tik -ì .
　　　　　凡 若 心 正 直 的 人， 攏 必 誇 口 得 意。