《押韻啟應詩篇》

 | | | 轉寄

台語押韻啟應詩篇 6

作者 Tīⁿ Jî-gio̍k 2006.02.05

Tāi-pi̍t ê si, kau-hō͘ Ga̍k-kuaⁿ; īng si-hiân ê ga̍k-khì; tiāu, īng tē-pueh.

1a　Iâ-hô-hua ah, m̄-thang tī Lí ê siū-khì-tiong tsik-pī guá,
　　耶 和 華 啊，不 通 在 您 的 怒 氣 中 責 備 我，
1b　　　Ia̍h m̄-thang tī Lí tuā siū-khì-tiong khiàn-tsik guá.
　　　　亦 不 通 在 您 大 怒 氣 中 譴 責 我。

2a　Iâ-hô-hua ah, kiû Lí khó-lîn guá,
　　耶 和 華 啊，求 您 可 憐 我，
2b　　　In-uī guá sue-lám teh beh hua,
　　　　因 為 我 衰 弱 將 要 熄，

2c　Iâ-hô-hua ah, kiû Lí i- tī guá,
　　耶 和 華 啊， 求 您 醫治 我，
2d　　　In-uī guá ê kut-thâu ngia̍uh-ngia̍uh-tshuah.
　　　　因 為 我 的 骨 頭 蠕 蠕 惙 。

3a　Guá ê sim tuā-tuā kiaⁿ-hiâⁿ teh hán-huah;
　　我 的 心 大 大 驚 惶 在 喊 喝；
3b　　　Iâ-hô-hua ah, Lí beh kàu tī-sî tsiah kiù guá?
　　　　耶 和 華 啊， 您 要 到 底 時 才 救 我？

4a　Iâ-hô-hua ah, kiû Lí ua̍t-tò-tńg kiù guá ê sìⁿ-miā;
　　耶 和 華 啊，求 您 越 倒 轉 救 我 的 性 命；
4b　　　Uī-tio̍h Lí ê tsû-ài lâi kiù guá tô-miā.
　　　　為 著 您 的 慈 愛 來 救 我 逃 命。

5a　In-uī sí -bô ê tiong-kan, bô kì-liām Lí ;
　　因 為 死 亡 的 中 間， 無 紀 念 您；
5b　　　Im-hú ê tiong-kan, siáⁿ-lâng kám-siā Lí ?
　　　　陰 府 的 中 間， 甚 人 感 謝 您？

6a　Guá in-uī haiⁿ-haiⁿ-tshan lâi ià-siān, sing-khu sng-nńg,
　　我 因 為 哼 哼 孱 來 厭 倦 、 身 軀 酸 軟，
6b　　　Guá ta̍k-mî lâu ba̍k-sái, im guá ê bîn-tshn̂g,
　　　　我 逐 暝 流 目 屎，淹 我 的 眠 床，
　　　　sip-thàu guá ê jio̍k-á kàu thiⁿ-kng.
　　　　濕 透 我 的 褥 仔 到 天 光。

7a　Guá in-uī iu-būn, ba̍k-tsiu phah-pháiⁿ tsiām-tsiām sue,
　　我 因 為 憂 悶， 目 珠 打 歹 漸 漸 衰，
7b　　　Koh in-uī guá it-tshè ê tuì-ti̍k lâi ba̍k-tsiu hue.
　　　　又 因 為 我 一 切 的 對 敵 來 目 珠 花。

8a　Lín it-tshè tsuè pháiⁿ ê lâng, tio̍h lī-khui guá;
　　恁 一 切 做 歹 的 人， 著 離 開 我；
8b　　　In-uī Iâ-hô-hua thiaⁿ-kìⁿ guá thî-khàu ê siaⁿ bô suah.
　　　　因 為 耶 和 華 聽 見 我 啼 哭 的 聲 無 息。

9a　Iâ-hô-hua ū thiaⁿ guá ê khún-kiû kap kî-tó ,
　　耶 和 華 有 聽 我 的 懇 求 及 祈 禱，
9b　　　Iâ-hô-hua beh tsiap-la̍p guá ê kî -tó .
　　　　耶 和 華 要 接 納 我 的 祈 禱。

10a　Guá ê tuì-ti̍k lóng beh kiàn-siàu,
　　我 的 對 敵 攏 要 見 誚，
　　tuā-tuā kiaⁿ-hiâⁿ tsia̍h buē siau,
　　大 大 驚 惶 食 未 消，
10b　　　In beh thè tò -tńg, hut-jiân kiàn-siàu.
　　　　伊 要 退 倒 轉， 忽 然 見 誚。