《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十五章（更新版）
作者 庄司總一 著 楊東傑 指導 林俊育 台譯 2017.06.25
兩年中間，陳陣ê厝變成部落中siōng好額ê，原來tsit-ê部落無夠五十戶，每戶lóng真sàn-tshiah。
陳陣ê厝大改變。土角疊起來ê壁kah竹柱起ê簡單厝á，外觀無法度整修，照原，m̄-koh，內部已經吹入想bē到ê文明氣息。Kah-ná鳥siū ê稻草床變成樟材ê床台，綢ê棉被頂面掛薄綿紗布ê蚊罩，鏡台靠壁邊，化妝台頂面排列bē輸都市tsa-bó͘ gín-á ê化妝品。一kha厝裡本來to̍h有，舊ê張皮ê大衣箱，內底貯滿真tsē súi衫褲。
房間改變，tsa-bó͘ gín-á mā改變。她ê皮膚變白，變芳。這是瑞文眞用心teh買白粉、紅胭脂kah衣服hō͘ 她，kā她雕塑起來ê；tùi正面kā她看，kah-ná變一個人。M̄-koh，陳陣愛phah獵，贏過化妝kui十倍，所以離ē-tàng滿足瑞文ê高尚容貌姿態iáu真遠。
安子tùi二房ê長男景仁ê話鼻tio̍h秘密，知影瑞文是tī女兒桃á節ê前一日，來到tsit ê部落。瑞文因為有特別ê tāi-tsì ài參詳，卻無看tio̍h阿陣本人，伊就問in老母講：
「Kám koh去山頂à？真無她法。她明明知影我今á日會來，kám m̄是？你mā tio̍h khah致意tsiah tio̍h ā。」
「是lah，實在真pháiⁿ勢。我tiāⁿ-tiāⁿ講kah嘴酸，hit-ê siáu-tsa-bó͘ lóng m̄聽我ê話。四、五日前透早趁我iáu-teh睏，槍帶leh to̍h出去。Tsit ê tsing-seⁿ！ 到昨暗lóng無tńg來。Tsit pái我無beh放她suah，我beh kā槍搶來放火燒。大人ah，tsit pái請你tio̍h赦免，今á日過晝一定會tńg來。」
「Bē相信得。你去山頂kā她tshōe tńg來。」
「Ai-ah，你ná會對我tsit-ê老大人講hiah無理ê話？Mài hiah-ni̍h急lah，ing暗tòa tiàm tsia好lah。」
「我koh khah án怎mā無ài tòa tsia，我討厭tsit間厝kah tsit-ê部落。」
「這是án怎講leh？ Kám講你beh放sak tsit-ê tsa-bó͘ gín-á？」
「Tsit件tāi-tsì suah尾厝裡ê人lóng知ā lah。總是，tsìn前lóng無人發覺tsiah是不可思議。M̄-koh一旦暴露，káⁿ會變khah麻煩。所以，今á日beh來kah阿婆參詳一下」
瑞文tùi門口sòa接ê房內ê竹椅á探身出來；椅á頂tshū野貓ê皮。Tsit間kah隔壁hit間充滿粉味ê睏房完全無仝款，一kóa phah獵得tio̍h ê物tún kah kui厝間，非常雜亂。壁頂掛熊皮，吊鹿角，陰暗ê壁角有lâ-lí ê標本，kah-ná beh慢慢á行出來ê款式。自然ta ê軟皮kah製造標本產生ê臭hiàn味，hō͘ 瑞文感覺kiōng-beh吐。伊看tio̍h kui厝間lóng是野蠻無慈悲ê殺生，甚至想講beh照tú-tsiah阿陣ê老母ê話來棄sak阿陣。伊本來想beh kah阿陣ê老母參詳，m̄-koh，伊忽然又koh kā家己擋起來。
我ná會對tsit-ê無受教育ê tsa-bó͘ gín-á迷kah án-ne leh？伊常常teh想，iáu是m̄知原因；hō͘ 人笑戇大獃、siáu-.ê，mā無辦法，所以時常討厭家己。假使hit當時無tú-tio̍h毒蛇，tsit-má伊可能已經tī東京teh讀大學à。Hit時，安子mā有勸伊改變心情，thang展開新ê生活，伊mā真想beh án-ne。M̄-koh，病好出院ā，身軀卻iáu常常關節痛疼，情緒無好，到隔tńg年三月，可能iáu bē堪得去留學，所以to̍h無去東京，然後熱天就又koh到à。有一工，伊帶一支槍beh做伴手去庄腳。一支槍做救命ê謝禮實在是無夠額，m̄-koh，對接tio̍h禮物ê阿陣來講，kah-ná是天賜ê大禮物，歡喜kāh bē講得。
聽tio̍h tsit項tāi-tsì ê部落頭甲長張忠，為瑞文舉行一個歡迎會。因為tī tsit-ê村裡tú-tio̍h災難ê瑞文koh健康tńg來訪問，對村民來講是好兆頭。In就tī甲長厝前ê大埕跳舞，三十個左右穿kah súi-tang-tang ê姑娘，沿路唱歌，沿路手牽手跳舞。服裝是台灣衫，m̄-koh，唱ê歌詞kah伴舞ê音樂lóng是原住民慶祝豐收ê各種歌舞，顯然in是平埔族。平埔族也就是平地番，早前kah tùi支那來ê移民接觸做sing-lí，因為文化低，土地hō͘ 人奪去，生活範圍suah縮小，漸漸去hō͘ 人同化，hông叫做台灣人，失去in固有ê風俗習慣kah語言。所以tī日本ê統治下，雖然有一視同仁ê制度，m̄-koh，平埔族猶原生活tī弱勢者ê屈辱心態中。
因為tsit-ê緣故，瑞文問起張忠ê祖先ê時，伊mā講m̄知，無願意去kha̍p-tio̍h hiah-ê故事。M̄-koh，瑞文ê疑問m̄是in祖先是m̄是生番，伊是想beh知影in kám有外國人ê血統。Hiah-ê老人以外，少年tsa-bó͘ gín-á ê面貌to̍h hō͘ 人有hit種外國血統ê感覺。In hō͘ 強力ê日頭曝，皮膚雖然bē-tàng講是白色，m̄-koh，曝了是淡薄á小麥色。跳舞ê tsa-bó͘ gín-á中間to̍h有一個真顯然是紅頭毛。Koh再講，原住民一般lóng是疏(se)毛，m̄-koh，瑞文bat tī tsit-ê部落內看tio̍h一個鬍鬚koh腳腿全全毛ê青年，而且面形ê線條真清楚。M̄-koh，甲長張忠斷然否定，講in根本都無外國人ê血統。因為無啥物證據，瑞文只有tìm頭bē-tàng講啥。此後瑞文常常來tsit-ê部落，iáu是對tsit-ê問題抱tio̍h疑問，設法beh來tshōe出證據，伊就去附近幾個部落進行調查。瑞文只要付十錢ê銅錢á，就ē-tàng自由出入任何一間厝，隨便tshiau-péng in ê家財用具。十錢ê入場觀覽費in to̍h感覺真tsē，可見每一家ê日常用品lóng真欠缺koh粗俗，像講大支ê葫蘆瓠(hia)-á，粗胚ê水甕，老舊ê弓箭等等。有一工，瑞文tùi一個原住民ê厝發現一塊荷蘭瓷盤，盤底有kah-ná是外國文字，瑞文根本to̍h m̄知he是啥物字，啥物意思。因為伊驚hō͘ 人發覺伊來庄腳ê行踏，一直m̄敢kā tsit-ê瓷á交hō͘ 清文去調查，而且mā顯然無法度用tsit塊瓷á來證明in kah外國人ê血統有關聯。因為早前荷蘭人傳教師準講有來過tsia ê歷史事實，koh in確實bat來到tsit-ê偏僻ê所在努力宣教。總是，荷蘭人kah原住民通婚ê情形iáu是無清楚。M̄-koh無gōa久，瑞文to̍h有機會掠tio̍h證據。有一工，阿陣tùi附近部落ê厝the̍h來一個文件箱。He是一個外表張牛皮，真結實ê盒á，漆紅色ê漆，tùi la̍k漆ê所在露出文字。為tio̍h mài去傷tio̍h皮面，用小刀kā漆khau掉，發見有用毛筆記載下面ê字：
順天命結婚 1668年復活節
Martin Beets 陳麻木 嬰莫
鄭成功帶領大軍攻入台南，取得Phu-lo-bin-jia城(譯註：普羅民遮城=Provintia，今台南赤崁樓)，攻陷Je-lan-ji-a城 (譯註：熱蘭遮城=Fort Zeelandia，今台南安平古堡)，kā荷蘭人tùi台灣趕出去；he是明朝永曆十五年 (1661年) ê tāi-tsì。Hit當時差不多全部ê荷蘭人，lóng退去Ba-ta-bi-ah(譯註：巴達維亞Batavia，印尼雅加達ê舊名)。M̄-koh有一kóa失去撤退ê機會，á是熱愛台灣tsit塊土地，無願意離開ê，就入去山內避難，suah定居落來；ē-tàng想像hit種不得已ê情形。Tsit-ê文件箱頂面記載ê年號ē-tàng證明tsit-ê歷史事實。陳麻木是“Martin Beets” ê漢字名，鄒族語ê數字「五」發音是 “e-i-moh”，án-ne kā它推測起來，「嬰莫」ē-sái講是女原住民ê名。
由此可見，tsiah-ê原住民有白人血統是明確ê，m̄-koh，m̄知hit當時逃來到tsia ê荷蘭人有gōa tsē。若用常識來判斷，人數可能m̄是真tsē，而且因為in kah台灣人已經有teh通婚，經過二世紀半ê今á日，in所接受tio̍h ê西歐人ê血，ē-sái講ná親像是大海中ê一滴水。其實in對家己ê族譜系統完全m̄知，m̄是in故意隱瞞，是因為in無文字，kan-taⁿ靠單純ê語言，致使in變成矇霧不知，七、八代以前祖先ê tāi-tsì，lóng bē記得了了à。
M̄-koh，對歷史小khóa有關心ê人來講，這確實是一個真有趣味ê發現，ē-tàng刺激in ê研究心，而且恐驚án-ne iáu未滿足，會koh想beh探求koh khah有力ê歷史資料，親像文書kah器物，koh進一步去調查風俗習慣kah口傳歷史，驅動探究事實ê慾望。M̄-koh，瑞文ê探究慾望kan-taⁿ到tsia為止；tùi荷蘭人kah原住民通婚ê事實來講，阿陣ê身上有白人ê血統，準講kan-taⁿ大海中ê一滴水mā好，瑞文只要知影tsit件tāi-tsì，án-ne就有夠額à。Tsit-ê秘密ê tāi-tsì增加瑞文ê情緒快樂感；金屋藏嬌ê秘密絕對bē-sái漏洩，同時tsit-ê第二秘密ê味mā無beh hō͘ 任何人鼻tio̍h。
當然tsit種浪漫ê感受是tī無gōa久以後，也是確定hiah-ê原住民有紅毛人ê血統以後ê tāi-tsì。這hó͘ 瑞文tùi kah原住民女子發生關係ê屈辱感得tio̍h解救；伊致意血統ê問題是tsit-ê目的。事實上，伊tú犯tsit-ê過失ê時非常bē爽快，想講無beh koh去hit-ê部落。因為第一，伊感覺kah hit-ê tsa-bó͘ gín-á發生關係只不過是逢場做戲，而且mā是因為有lim酒ê關係。接受部落甲長歡迎會hit工，瑞文酒量無好，suah醉kah hō͘ 人扛去睏，忽然醒起來ê時已經接近黃昏。伊自本並無beh tòa落來ê phah算，所以伊隨時準備beh tńg去。M̄-koh到火車站有四里gōa路，到台車ê起站也有二里半路，若隨出發，tī半路無gōa久就會天暗，而且koh驚路草無熟，會去tú-tio̍h危險ê tāi-tsì，hō͘ 蛇咬tio̍h ê記憶猶新。所以瑞文就拜託甲長派兩個勇壯ê少年村民kā伊護送，m̄-koh伊感覺hō͘ 兩個siuⁿ過粗勇ê tsa-po͘人來跟tòe，雖然ē-tàng壯膽。總是，顛倒感覺有khah bē安心。瑞文就拒絕叫人護送，kan-taⁿ叫阿陣牽水牛來行向歸途。
晚霞消失，日落西山，厚厚ê雲罩tiâu天空。雨期已經接近尾聲，hit兩三工連續好天，m̄-koh，天氣容易變化，含水氣ê hip熱夜間空氣，一屑á微風都無，kiōng-beh bē喘氣。水牛踏tio̍h空虛ê蹄聲，行kah phīⁿ-phēⁿ喘。
過一時á，in兩人騎起lih牛ê kha脊phiaⁿ，阿陣騎tiàm頭前，沿路phah水牛ê頭，沿路huah叫牛拚勢走。
「Teh beh落雨ā，若ē-tàng趕到火車頭to̍h好。」
「Bē按算得。」
「若落雨，你hit領súi衫to̍h會ak-tâm去。」
「我無要緊，像你hiah-ni̍h lám身ê人會感冒。都市ê好額人kám lóng kah你仝款lám身？」
「我並無lám身ā。」
「Lám身koh無膽。」
「若koh講pháiⁿ話，我就beh kā你ê槍收回。」
「Ai-ah，khah忍耐一下。你若kā我ê槍the̍h tńg去，我就beh開槍phah你。」
「Mài heⁿh驚人。Ueh，雷公teh tân à neh？」
「Teh tân ā。」
「你無teh驚oh？你是虎豹母。你神經ná會hiah-ni̍h大條？」
「你問我hit-ê問題，我mā m̄知。Ai-ah，大人，你ná會hiah-ni̍h軟tsiáⁿ無膽？M̄-koh，我m̄-bat看過像你tsit款hiah好ê tsa-pō͘人。」
「你ê心胸真好，kám m̄是？」
「烏白講，若án-ne亂講，心神無定，會tùi牛頂跋落去o͘h。」
「無講白賊lah，穿súi衫看起來to̍h無仝款。」
Hit工，阿陣照老母ê交帶，穿hit領kan-taⁿ拜拜tsiah穿ê薄桃á色人造絲ê衫褲，平常時thǹg赤腳，今á日也穿布鞋。雖然非常han-bān ê手路，她也有化妝，頭毛koh梳kah真整齊，後壁也有結龜甲形ê髮髻，頂面插一蕊黃梔á花。這是她siōng súi ê打扮，m̄-koh，瑞文想tio̍h厝裡ê tsa-bó͘-kán-á若有tāi-tsì就會打扮kah比她tsit-má koh khah súi。總是，阿陣tsit-má看起來已經比平常時穿破舊衫褲khah影目tsē loh。瑞文想講她若穿都市teh時行ê盛裝，一定會相當súi。
「若到寒天，你ê皮膚會變khah白，kám m̄是？」
「Eh，會小khóa白。討厭，你tsit-ê人，ná會問人tsit種怪問題？」
「想beh hō͘ 你穿khah súi ê衫。」
「你若hiah-ni̍h親切有心，後tsōa來ê時，買槍籽hō͘ 我lah。無lah，m̄免lah，因為以後我ē-tàng去phah獵，我beh家己thàn錢來買。Hiah-ni̍h好ê槍來到我ê手中，kah-ná teh眠夢leh。M̄-koh，你ná會對我hiah親切leh？」
「我kā你講過幾nā pái à，無啥物不可思議ê tāi-tsì。這並m̄是答謝你對我ê救命之恩lah。」
「Kám án-ne？Á無，你koh去hō͘ 蛇咬一pái kám好？」阿陣無論án怎想，都想bē到講會值得hiah大ê報酬；該感謝ê是她tsiah tio̍h ā。她熱切ǹg望想beh ài ê槍，hiah-ni̍h簡單to̍h得tio̍h，這ē-sái講是超自然ê tāi-tsì。Tī街路邊teh hō͘ 人拜ê土地公叫做「有求必應」，大家lóng去kā伊感謝。對阿陣來講，tsit位都市來ê好額人比土地公koh khah像神明。
擔心落雨kah火車時間bē赴，所以若行到平坦ê路，阿陣就hō͘ 牛用走ê。水牛沉重ê腳步tī烏暗中趕路，m̄-bat騎過馬á是牛ê瑞文，tī慢慢á koh搖動無穩ê牛kha脊phiaⁿ頂面，驚去 siak落來，心內不安。因為無啥物thang hōaⁿ，伊只好用手lám-tiâu阿陣ê腰。「你若驚sia̍k落去suah bē曉khiú牛尾！」阿陣kā伊khau洗講，m̄-koh，瑞文lám她ê身軀，她並無掛意。阿陣ê手無khiú半項，m̄-koh，她ê身軀tòe牛ê搖動，非常調和，一屑á都無危險ê感覺。Ná親像去hō͘ 蛇咬tio̍h mā無tāi-tsì，瑞文感覺只要掠tiâu tsit-ê tsa-bó͘人，to̍h免煩惱跋落去。Hō͘ 龜殼花咬tio̍h ê時，tùi甘蔗園到部落，是tsit-ê tsa-bó͘人āiⁿ伊去ê。Hit時，她ê肩胛頭堅實有力koh可靠。「Bē死lah！」她肯定án-ne講，kah-ná宣言一般自信滿滿ê話；這tī tsit-má想起來mā ē-tàng hō͘ 伊有安心ê感覺。
趕到車頭已經teh beh九點，差幾分鐘無赴tio̍h車班。離尾班車tio̍h koh等一點半鐘，而且koh teh落大雨，連車軸都kiōng-beh流去ê大雨。 兩人tī車頭hit條街ê亭á腳bih雨，對水牛來講，這是siōng好無比ê淋浴。因為大雨潑到亭á腳ê內底面，瑞文kah阿陣就不得不退到店面ê門腳口。Hia tú好是料理店，店頭垂掛鴨肉kah豬腳，tú入口ê所在就是料理台，傳來油ê芳味kah炒麵tshi-tshi tsha̍h-tsha̍h ê聲。
腹肚iau koh需要等火車，兩人就入去店內，因為樓腳lah-sap koh tâm-lok-lok，所以in就peh起lih二樓。
食麵了後胃就khah燒lō，瑞文發現tsit間店m̄是kan-taⁿ飲食ê店；壁頂掛一幅框玻璃ê上海美人ê掛圖，內底房間傳來絃á伴奏ê歌聲kah淫穢ê笑聲。瑞文m̄-bat來過tsit款ê所在，一知影這是tsa-bó͘間，心內就bē爽快起來。M̄-koh，外面落大雨bē-tàng出去。過一時á，一個tsa-po͘人入來，講beh tshōa in入去內底ê房間。瑞文kā伊拒絕，講in是teh等火車，店內ê人看出瑞文是好額人，極力kā伊遊說。瑞文感覺真ak-tsak(ak-tsak)，m̄-koh，也無法度抵抗hit-ê kô-kô纏ê tsa-po͘人，心內雖然困惑，結局mā是kah阿陣tàu陣hō͘ 伊tshōa入去房間內。約十二尺四方ê狹房間內，光線暗淡，kan-taⁿ ē-tàng看tio̍h面模。過無一時á，粉抹kah ná壁hiah厚ê兩個tsa-bó͘人入來，一個phâng酒kah薰盤，另外一個攬絃á。然後in就開始唱歌；tú-tsiah hit-ê tsa-po͘人用拍板phah拍，一個tsa-bó͘大聲唱黃色ê歌，另外一個挨弦á。In bē曉調節音樂ê調，kan-taⁿ拚大聲唱kah奏，狹狹ê房間kah-ná teh做風颱hì-hè叫，hō͘ 人頭殼痛koh起烏暗眩。阿陣kah-ná預感危害teh beh降臨ê動物，感覺奇異koh恐怖，目tsiu peh-kah大大蕊，挽tiâu身軀來做防衛。一曲了後，瑞文擋bē-tiâu，付了賞金就kā in趕出去。
火車ê時間iáu ē赴，m̄-koh，也tio̍h趕緊離開tsia。總是，iáu有一項傷腦筋ê tāi-tsì；tsit-ê女子beh án怎tsiah好leh？不管她是án怎野生ê勇敢tsa-bó͘ gín-á，她ná會有法度tī tsit-ê大風雨中趕四里路tńg去leh？準講她無講無願意，瑞文mā bē堪得án-ne做。傷腦筋！傷腦筋！瑞文看tio̍h滴tī壁角眠床頭ê雨水，心內一遍koh一遍án-ne teh掛慮。M̄-koh，困惑ê m̄是kan-taⁿ tsiah-ê tāi-tsì；忽然誤入酒樓淫穢ê霉氣，漸漸tī伊ê心中擴散起來。精神ê枝葉jú hō͘ 風搖動，肉體ê根jú堅固不動ê情形下，瑞文幾nā pái想beh衝出去，m̄-koh，雨jú來jú大，風也jú來jú強。Kah-ná厝頂teh釘（tèng）釘ê雨聲，hō͘ 伊ê心koh khah ak-tsak起狂起來。尾班車進站ê聲跟tòe風雨聲微微á傳來，然後火車起行ê水螺聲響起。害ah，死loh！著急煩惱ê心情變成絕望ê看破。
「阿陣，咱無法度tńg去à，ing暗只好tòa-tiàm tsia。來ah，koh來lim酒！」
瑞文hit暗ê經驗無真爽快，有kah-ná第一pái kah妓女接觸ê hit種無爽快、後悔kah幻滅ê感覺。女子真奇妙無感動，mā無表示反抗，也無進一步顯露熱情。真不可思議，tī原野無礙奔放ê形影，來到tsit間酒樓suah完全消失去；kah-ná一隻hō͘ 人at斷翼ê鳥á，kiu-kiu無氣力ê款。 期待落空，瑞文非常失望無奈，而且對方是無知koh下賤ê原住民女子，瑞文無法度美化家己ê愚戇行為，想講以後無ài koh去hit-ê庄腳。總是，跟tòe時間ê消失，伊ê心koh去hō͘ 一種奇異ê力量吸引。伊感覺hit暗所發生ê，只不過是偶然koh無意義ê tāi-tsì。Hit時，hit-ê女子一屑á 都無sêng hit-ê tsa-bó͘ gín-á，真正ê她是另外一個。瑞文常常看hit-ê十字形ê孔嘴，想起她tùi孔嘴kā血吸出來，心中就湧出不可思議ê深koh親密ê感情。伊kah春鶯ê婚姻生活無完滿，以及對安子失戀ê傷痕，一切伊tī人生上ê不如意，kah-ná lóng想beh tùi tsit-ê孔嘴來得tio̍h安慰。伊常常對in bó͘講：「若無hit pái ê受傷，tsit-má我就bē án-ne kah她tī hia做伙。」見若án-ne講ê時，春鶯就相信丈夫ê愛情不移，聽kah神神神。
就án-ne，瑞文ê腳koh去hō͘ 庄腳吸引去，此後伊kah阿陣ê中間變成真oh得切斷ê關係。車頭邊hit間暗淡ê厝已經無koh hō͘ 伊幻滅ê感覺，結局mā無koh有hit暗ê想法。瑞文ê熱情kah阿陣對伊ê反應自起頭便無一致；伊經常ǹg望阿陣tio̍h kā面容kah穿插裝飾hō͘ súi-súi，m̄-koh，阿陣lóng嫌麻煩，無teh致意。因為阿陣對phah獵裝備比胭脂水粉khah kah意，瑞文買hō͘ 她ê mo͘-je-ru槍(譯註：Mosel，德國製)，對她來講是比玉á珠寶kah金手指koh khah貴重。她m̄是無ài súi，只是因為裝飾打扮會減弱她對phah獵ê熱情；她tsit種對趣味ê熱狂，瑞文實在也無她ê法度。瑞文雖然有兩三pái陪她去山頂，m̄-koh，伊對phah獵lóng興趣bē起來。瑞文ê腳siuⁿ過軟弱，bē堪得行危險ê山野路，koh再講，被射tio̍h ê花鹿á是羌á身軀全血，哀求ê兩蕊目tsiu teh睨，四腳phi̍h-phi̍h-tshuah，瑞文看tio̍h真不忍心。
「你實在是一個siáu tsa-bó͘，phah獵，kám m̄是tsa-po͘人ê tāi-tsì？」
「我若生做tsa-po͘ ê to̍h好à。」
「我拚命beh hō͘ 你妝súi-súi，變成溫柔ê tsa-bó͘ gín-á，你ná會 bē了解我ê心意leh？你若是lóng無beh聽我ê話，我就無beh koh來你tsia。」
「你siōng好mài koh來。」
「你到底對我是有án怎ê想法leh？ Kah意á是棄嫌？」
「Kah意lah，kah意lah。」
「Án-ne，你tio̍h聽我ê話，mài koh殺生！」
「M̄是teh殺生lah，hit-ê可惡ê豹咬死阮老父，無論如何我tio̍h ài報仇lah。M̄-koh，可惜我生做tsa-bó͘ ê；我bat兩pái看tio̍h hit隻豹，兩pái lóng phah無tio̍h。」
阿陣無論是gōa野生，女人to̍h是女人，無男人一般ê體力。她無法度照家己所意愛ê án-ne，踏入去峻險ê山岳，槍ê瞄準mā iáu未正確。她tú-tio̍h hit隻豹兩pái；一pái是豹落來山谷lim溪水，另外一pái是她看tio̍h豹teh peh koân ê檜木樹。她兩pái lóng phah無tio̍h牠了後，to̍h m̄-bat koh看tio̍h hit隻豹。 若射tio̍h hit隻豹來達成她ê願望，to̍h ē-tàng停止使用槍à。瑞文ǹg望阿陣早一日來達成她ê宿望，m̄-koh，siōng重要ê是m̄知hit隻豹tang時會koh再出現？
因為tsit-ê女子性質ku怪，瑞文ê熱情suah teh空轉。起初瑞文掠準伊對tsit-ê庄腳女子，用金錢ê力量就ē-tàng照她ê意思，m̄-koh，無phah算伊一屑á 都bē屈服。她用對待村裡tsa-po͘人仝款粗魯ê言行來對待瑞文；有時真無掩蓋，隨時to̍h發洩感情；有時若想tio̍h，不管是m̄是放瑞文一人，就家己走去phah獵。Tsit種無受束縛，放任ê心也有她ê吸引力，m̄-koh 她kah-ná一隻oh飼ê動物，m̄知到tang時tsiah飼會飽？瑞文感覺真遺憾。所以tī外人看起來是一幅愛慾圖，實際上並m̄是án-ne，顛倒是欠缺肉體ê喜悅。瑞文想辦法beh kā阿陣占做伊家己ê，為tio̍h beh達成目的，tio̍h先除去她ê野蠻性癖，m̄-koh，若繼續hō͘ 她tòa-tiàm tsit-ê山野，一定是無可能ê。
所以，瑞文開始想講tio̍h ài來hō͘ 她吸收都市ê文明空氣。事實上，因為周圍種種tāi-tsì ê變化，瑞文知影已經無可能繼續tī庄腳kah她保持關係。
「阿婆，我今á日做最後ê決心，想來想去，我以後無辦法koh來tsit-ê庄腳。所以....。」
阿笑聽了，感覺m̄-tio̍h，趕緊kā瑞文插話；她想講tsit-ê金庫若去hō͘ 伊走去，tāi-tsì to̍h大條à。
「無lah，大人，請你mài受氣lah。Hit隻m̄知報恩ê山貓若tńg來，tsit pái我一定教hō͘ 她乖，你tsiah kā我看māi leh。真害！她ā m̄去做日工，kan-taⁿ照家己所愛，我有法度過tsit種安樂ê生活，lóng是大人ê致蔭，我tio̍h大大kā你感謝，koh感激kah流目屎。總是，該吃罪ê siáu-tsa-bó͘ 是….。無noh，我ê tsa-bó͘-kiáⁿ mā 是心內真知影。她有感謝á是歡喜，m̄-koh因為iáu細漢，驚見笑，lóng bē曉好好á表達出來。她bē曉ho͘ tsa-po͘人歡喜，iáu kah-ná幼tsíⁿ ê雞母，iáu真han-bān lah。M̄-koh，她對你是真熱情，想講已經是真正ê夫妻ā，聽tio̍h你講beh kā她放sak，她beh án怎哮閙，你kám知？」
「Ueh，ueh，請kā話聽清楚。我是想beh kā阿陣娶tńg來台南ê厝做tsa-bó͘-kán-á。阿婆，你bē反對tsiah tio̍h ho͘ⁿh？」
阿笑oh得回答，kah-ná teh想。她原本是一個貪慾koh奸巧ê tsa-bó͘人，m̄-koh，一旦運氣若tháu，to̍h kah田庄人常有ê情形仝款，會得意忘形，陷落tī貪慾ê無底深坑。
「真感謝，m̄-koh，我tio̍h小考慮一下。」
「為啥物？」
「她出世tī山裡，又koh是hit種怪癖，若去lín hiah大ê家庭，恐驚bē曉做khang-khòe。」
「M̄是kan-taⁿ做tsa-bó͘-kán-á，tsit種情形我免講，你應該會知tsiah tio̍h ā。」
「所以，我tsiah tio̍h koh khah ài考慮。你kám有kah長輩序大眾親人講好勢？」
「無講過，m̄-koh，tshiàⁿ tsa-bó͘-kán-á是我ê自由。」
「Bē-sái，bē-sái，án-ne bē用得，會出麻煩lah。」
「你既然無ài就無法度，我kah lín tsa-bó͘-kiáⁿ ê緣份就到tsia為止。Kám無其它ê方法？」
瑞文ê心情會án-ne，實在是因為阿陣洗身軀ê相片去hō͘ in bó͘ 春鶯看tio̍h，伊kah阿陣ê關係koh hō͘ 二兄景文tùi土地管理員黃丙ê嘴鼻tio̍h秘密。Tsit-ê不名譽ê批判tī厝裡當teh傳開，現tsēng問題to̍h beh爆發à。到tsia來，to̍h趁tsit-ê機會來清算醜聞關係，á是先kā阿陣用tsa-bó͘-kán-á ê名義安頓tiàm厝裡，以後tsiah koh來設法完善處理。瑞文已經面臨二選一ê決定時刻；而且tsit-ê必須迫切決定ê原因iáu有一個，就是部落居民ê反感。In起初對tsit-ê都市好額人抱一種難得見面koh敬畏ê心，m̄-koh，in漸漸回復到庄腳人本來ê排他傾向。瑞文kah阿陣ê豔事惹人注目了後，in就表示明顯ê排斥，充滿tioh beh kā她趕出去ê受氣驚人ê目神。
「總是，我bē-sái無考慮村人對我ê敵視眼光。最近我有聽tio̍h in teh講，beh放火燒hit間破厝，我真驚in對我ê hit種受氣。」
「有啥物thang好驚？In因為欣羨你，tsiah來引起hit種看bē順眼ê心。咱ā無做啥物pháiⁿ事，無做賊也無惹人麻煩，做你免煩惱，免tshap in。M̄-koh，你若一定beh tshōa hit-ê魔女去做tsa-bó͘-kán-á，我mā無你ê法度。」
「你若同意就好。Án-ne你緊講，我tio̍h hō͘ 你gōa tsē錢？」
「無no͘h，你mài án-ne講。到taⁿ為止，你hō͘ 阮hiah tsē好處，我無應該koh要求金錢，若koh貪心就會受罰落地獄neh。」 她án-ne假大方，瑞文就問她一百五十圓如何，她kah-ná無滿意，恬恬無回答。
「Kám講嫌siuⁿ少？」
「M̄是lah，是講阮sàn-tshiah人對tāi-tsì tio̍h詳細考慮。Hông tshiàⁿ做tsa-bó͘-kán-á，如果hō͘ 人趕出來就會有困難；染tio̍h都市奢華ê生活習慣，tńg來到庄腳就會變成無路用去。這可能是無必要ê掛慮，m̄-koh mā是需要考慮在先。」
阿笑想講tsa-bō͘-kiáⁿ m̄是kan-taⁿ做tsa-bó͘-kán-á，koh是細姨，橫直會成做人ê笑柄，如果hō͘ 人趕出來，就會失去tsit欉搖錢樹，所以iáu是保持現狀khah穩當。
「而且我hit-ê魔女ná親像山頂ê樹á自然成長，三歲ê時得tio̍h麻疹險險á死去，服用各種藥物：十歲ê時tùi檨á樹頂跋落來，腰骨斷去，長時間hō͘ 醫生治療。」
「Án-ne，我koh加添五十圓，m̄-koh無beh koh加ā，你tio̍h了解。」 瑞文suah尾就火giâ起來，受氣對她án-ne講。Beh賣tsa-bó͘-kiáⁿ，連藥費都算tsham落去，實在是一個貪心不足ê阿婆á。瑞文想講她若koh無理要求，就beh kā她嚇（háⁿ）beh降低價數，m̄-koh，家己ê弱點去hō͘ 她掠tiâu-.leh，只好應付她ê要求。
Tsit時，甲長張忠來訪。瑞文本來to̍h有想beh kah伊參詳有關kah阿陣之間ê tāi-tsì，伊來了真tú好。瑞文最近驚去tú-tio̍h張忠，因為伊有警告講：Lín hiah派頭ê做法，對純樸ê村民帶來pháiⁿ影響，應該小khóa檢討一下。伊面色烏mà-mà koh人大欉，容貌帶有一種警察ê威嚴，瑞文有淡薄á驚伊。台灣一向有保甲制度，十戶做一甲，十甲做一保，自備壯丁來保護各自ê地區，是維持安寧秩序為目的ê自治團體，ē-sái講是警防團，是歷史悠久koh組織複雜ê堅固制度。保正kah甲長有調解處分民間紛爭，以及訓戒不良子弟ê義務kah權利，所以，若敗壞純良ê風俗，當然tio̍h受警戒，甚至接受私刑mā無話講。M̄-koh，tsit-má瑞文已經免擔心ā。
「甲長，kā你加添真tsē麻煩，真失禮。M̄-koh，今á日我決心beh kā tāi-tsì處理hō͘ 它完全清楚。」
「Án-ne真好ah，橫直部落村民有種種不滿ê講法。M̄-koh，我今á日來訪，有另外一項tāi-tsì。」
「Kám是ta̍k-pái teh講ê土地ê tāi-tsì？」 又koh是tsit件tāi-tsì，瑞文目頭結結。這是比追求異性ê神魂顛倒koh khah現實ê問題，是hō͘ 伊相當懊惱ê事件。
大體上，農業m̄是伊所想像ê hiah單純，mā m̄是愉快ê tāi-tsì。看tio̍h農民勞動tsē報酬少ê悲慘情形，瑞文也會體會tio̍h伊家己tsit種小地主ê煩惱滋味，因為伊ê土地ê地質無好。雖然伊ê心hō͘ tsa-bó͘ 縛tiâu，總是，伊mā m̄是kā重要ê田園ê tāi-tsì完全放bē記得。顛倒因為tsa-bó͘ ê影響，hō͘ 伊軟弱ê精神堅強起來，hō͘ 伊對人ê行為koh再感覺活潑起來，有競爭ê鬥志。Tī炎熱kah-ná火燒ê日頭下，mā tio̍h去巡田園，mā tio̍h監督鼓勵工人，koh tio̍h研究甘蔗耕作ê改良kah增產。雖然是án-ne，結果收成iáu是lóng不如意；毒蟲kā甘蔗食kah冇(phàⁿ)心蛀孔，赤腐病害kā甘蔗心變紅色，ná親像用紅墨水染過。Tsiah-ê病虫害經過研究了後，也有漸漸得tio̍h防治，m̄-koh，siōng傷腦筋ê是風kah水ê災害；尤其土地ê位置是tī河川流域，見若熱天河水氾濫ê時，耕地lóng淹水，致使甘蔗莖爛去á是完全失去糖分。
Tī tsit種情形下，瑞文無經驗koh無有夠精密ê頭腦，所以估計出來ê計算lóng落空，達bē到預期收成ê一半。瑞文怨恨景文kā kan-taⁿ講面積闊，m̄-koh，地質bái ê土地分hō͘ 伊；m̄-nā án-ne，伊mā知影tsit塊來路有問題ê土地早慢會帶來麻煩。有一工，瑞文來到tsit塊土地，一個tsa-po͘人行óa來，一直問伊tsit塊土地tang時tùi啥人ê手買來。瑞文感覺kah-ná tī tó位見過tsit-ê人，詳細kā伊看真，原來to̍h是kah二兄第一pái來看土地ê路中，tī輕便車頂tú-tio̍h ê hit位農民，而且照伊hit工所講ê，伊主張tī tsia有in-tau ê土地。以後koh有出現幾個人講出仝款ê主張，瑞文詳細kā in問起來，tsiah知真相是án-ne：大約二十年前做大水，河川流域ê tsit所在ê耕地流失去。後來tsit所在變成拋荒ê免租地，過無gōa久koh浮起來ê土地就歸入國庫。不知情ê原本所有者重新開墾，m̄-koh，in ê所有權kah使用權lóng無被承認，然後tī亂雜ê中間，經過幾nā人ê手，tsit-má變成瑞文所有。
受害ê是瑞文；伊原本lóng m̄知，tsit-má suah絞入去是非ê中間，lóng無辦法。伊有去kā景文投過tsit件困擾ê tāi-tsì，m̄-koh，景文一直lóng無真誠kah伊討論，每pái lóng是án-ne講：「Hiah-ni̍h無膽bē-sái得lah，無論hiah-ê人án怎講，你ê物件to̍h是你ê ，kám m̄是？Tsit塊土地ê權利是絕對無問題ê，無需要煩惱lah，若有問題，法律會保障。」
是lah，家己無有啥物違背正義ê tāi-tsì，in無論án怎來干擾，用法律來kā in對抗，in無可能kā土地奪tńg去lah。雖然án-ne想起來有理，m̄-koh，心內總是bē有真正平安；準講是間接去奪別人ê物件，hit-ê霸占ê事實無法度消失去。
眾農民並m̄是要求tsit-má beh討回in ê土地，kan-taⁿ ǹg望ē-tàng租in耕作；若是bē-tàng án-ne做，就希望ē-tàng hō͘ in一kóa補償費。農民tsit種ê要求並m̄是無理，m̄-koh，tùi社會秩序來講是無合理koh無妥當ê訴求，所以瑞文一概無beh tshap in。M̄-koh，農民繼續來kô-kô纏，紛爭漸漸擴大，因此張忠出面來調解。
「照我頂pái kā你建議ê，你小讓一步如何？雖然對你來講有khah khik虧，m̄-koh，若án-ne堅持落去，總是無法度解決。」
「我mā頭尾lóng想過，m̄-koh，我無法度lah。」
「我tiàm中間調解mā無啥物法度，tio̍h看你tī情面上小讓步leh。In所要求ê，對你來講雖然無理，m̄-koh，mā有值得同情ê所在。我mā ǹg望lín小khóa kā我同情leh。我若是林本源，hiah-ê土地ē-sái hō͘ in，金錢上，mā ē-sái隨時hō͘ in一千、二千，我mā免得有hiah-ni̍h討厭ê心情。可惜我m̄是真富裕，kan-taⁿ ē-tàng勉強維持生活niā-niā。」
事實上，瑞文ê生活並無旁觀者所看ê hiah富裕。伊原本想講家己持有財產ē-tàng自由來使用，會khah khùiⁿ活，m̄-koh，實際kā它看起來，m̄-nā金錢ê支出增加，麻煩mā真tsē，並無感覺比以前khah富裕；連伊家己mā感覺真奇怪，何況ài別人來kā伊了解，當然to̍h相當困難。張忠mā無相信伊ê話，伊ngh一聲，用鼻孔teh kā伊恥笑。
「你koh kah平常時仝款teh講笑。你對hiah tsē ê都市美女厭倦ā，來kah tsit-ê庄腳tsa-bó͘ tàu陣解悶，為她開hiah tsē錢。Tsit種ê風流，kám講無錢ê人做會到？Tsit pái問題變kah hiah-ni̍h複雜，mā是因為看tio̍h你án-ne teh開錢kah-ná teh lim水ê款式，in感覺bē爽快；這是我ê看法。若有tàn落去水溝á ê錢，mā分kóa hō͘ 阮tsiah-ê sàn-tshiah人；in to̍h是tsit-ê理由lah。」
「這kah-ná teh勒索leh。」
「是ah，這m̄是teh講道理，是teh講感情ê問題。Tāi-tsì若惡化，m̄知in會變啥孔縫。你可能會想講我是teh烏白講，m̄-koh到tsia來，你mā是tio̍h加減hō͘ in一kóa好處，這是為你設想ê lah。」 張忠ê話kah-ná是teh暗示有性命ê危險tī-.leh。瑞文內心有感覺恐怖，m̄-koh感覺若án-ne to̍h認輸，未免siuⁿ過頭無志氣。伊想起景文無驚啥物ê精神，受挫折ê心情to̍h koh再奮發起來，伊斷然拒絕對方ê苦勸。
「無論如何，我無法度接受無理ê要求，tsit項tāi-tsì到tsia為止，以後mài koh提起。」
「Án-ne o͘h，我mā無辦法ā。」 張忠露出傷透腦筋ê沉痛面色，小khóa恬恬一下，看瑞文會回心轉意，顯出一屑á ǹg望bē，m̄-koh伊發見對方lóng無動靜，就看破，沿路ka̍uh-ka̍uh唸，行出厝外去。
「我m̄是為tio̍h家己ê利益，是考慮tio̍h雙方ê立場來盡力，尤其是希望你mài做m̄-tio̍h ê決定。M̄-koh，我也無beh koh插手，以後若有三長兩短，此事kah我無關。」 張忠出去了後無gōa久，瑞文聽tio̍h hì-hè叫ê聲傳過來，伊掠準是張忠tú-tsiah所講ê tāi-tsì發生ā，所以面色蒼白，tsông出去一看，真意外看tio̍h阿陣tńg來，koh有兩個原住民扛一隻豹，後面一陣人tòe teh看鬧熱。
阿陣kui面汗水kah塵埃，嘴phóe 有hō͘ 刺phè割tio̍h ê傷痕，頭毛ta燥koh亂，面頂衫破裂裂；tsiah-ê人teh替她講出她苦戰五工久ê故事。阿陣kah-ná凱旋ê軍隊，意氣揚揚；雖然疲勞kah-ná雲kā她ê身軀蓋tiâu-.leh， ná親像tùi一角ê空隙射出歡喜ê光，帶血絲ê目tsiu仁teh閃sih發光。
「我pôaⁿ過阿里山去到新高山(譯註：現今ê玉山)neh，我出門ê時就下決心tsit pái beh拚命射tio̍h hit隻豹為止。M̄-koh，無想講會去到hiah-ni̍h遠ê深山，我發見一隻豹，m̄-koh無射tio̍h，感覺真可惜，就繼續追去，tī不知不覺ê中間，suah入去到新高山。我tshōe了三四工，iáu無tú-tio̍h hit隻豹，想講看破beh tńg去ê時，就是今á日ê透早天phú光ê時，我發見一隻花鹿來tī溪谷ê淺灘teh lim水，牠ê腳步歪來歪去無力ê款，我想講一定是tio̍h傷ê鹿á。果然一隻豹mā落來溪谷，眞雄跳向hit隻鹿á。鹿á一下to̍h被制服teh滾liòng，我隨時開槍。你看，phah-tio̍h tsia lah。」
阿陣非常得意指豹ê槍籽痕hō͘ 瑞文看；腹肚邊kah胸坎á，總共有兩個孔嘴。
「我ê手小khóa phi̍h-phi̍h-tshuah，m̄-koh，我不管如何對牠開槍，花鹿mā中三槍死去。我suah尾就射死hit隻豹。看tio̍h美麗澄清ê溪水被染紅，我有講bē出ê心情。溪水漸漸koh清起來，我kan-taⁿ戇神teh看，tsit時我tsiah發見我teh流目屎。」
平常時一句一句直接表達ê阿陣，tsit時tòe-tio̍h感情ê流露，kā hit時ê情景描寫kah活跳跳，kah-ná詩情流露出來。
M̄-koh對瑞文來講，事實ê說明以外伊無趣味。伊看tio̍h阿陣淒惨ê款式，suah起雞母皮；ē-sái講伊討厭ê感覺是kah阿陣ê歡喜相像重量。Tsit-ê tsa-bó͘ gín-á已經無ǹg望ā，她對in老母所講ê hiah-ê話，瑞文心內想講iáu是取消khah妥當。
阿陣請瑞文賞hit兩位扛豹tńg來ê原住民各五十錢，伊the̍h一罐酒hō͘ in tńg去。瑞文bē了解她hiah-ni̍h倉倉pōng-pōng ê態度，就用khau洗ê口氣講：
「你án-ne tshìn-tshìn-tshái-tshái to̍h hō͘ in tńg去。這，kám m̄是你一生siōng歡喜ê tāi-tsì？應該tio̍h大大慶祝一下。Ing暗請村民來開慶祝會如何？」
「我mā有teh想，m̄-koh無法度lah。」
「為啥物？」
「無人會為我歡喜。你，kám m̄是想講我kah-ná phah-tio̍h一隻鼬鼠leh？」
「我真歡喜lah，你長年ê宿望已經完成，m̄-koh，我iáu有真tsē宿望未完成。」
「是án-ne o͘h！」
老母阿笑tùi邊á插話，kā tsa-bó͘-kiáⁿ大大責備。
「像你tsit款hiah戇ê tsa-bó͘ gín-á，全世界無tè tshōe lah。你想講án-ne to̍h是為老父報仇o͘h？你ná會知影咬lín老父嚨喉ê to̍h是你phah-tio̍h ê hit隻豹？」
「He無要緊lah，像阿母tsiah-ni̍h糊塗ê阿婆，ná會有法度了解我ê心情？」
「講啥物痟話！你tsit-ê siáu tsa-bó͘，án-ne好lah，以後不准你koh the̍h槍。你若koh m̄聽話，我就用槍kā你phah死，你tio̍h好好á kā我記得。趕緊去kā身軀洗清氣，大人tùi早起to̍h teh等你，等kah真煩ā lah。」
阿陣入去內面洗身軀。Tsit中間，阿笑tī圍爐起火，kā阿陣ê槍tàn入去內底。
阿陣身軀洗好倒tńg來，驚一tiô，kā槍tùi火中the̍h出來，m̄-koh，槍托已經燒盡，bē-tàng koh再使用ā。阿陣對老母大受氣，siàn老母ê嘴phóe，老母也m̄認輸，起pháiⁿ面摔碗盤。
「Mài冤家lah，母á-kiáⁿ án-ne bē看得lah！」瑞文插入來kā in兩人勸，阿笑非常懊惱，對阿陣講：
「Tsit款槍有啥物thang可惜ê？不管有槍á無，橫直不准你koh去phah獵to̍h是lah。實在真害，連tó一隻豹都分bē清楚，你tsit-ê tsa-bó͘ gín-á，ná ē-tàng去做大家族ê tsa-bó͘ kán-á leh？」
「你講啥物tāi-tsì？」 「你beh去做大人in-tau ê tsa-bó͘-kán-á ê tāi-tsì已經決定ā，知影無？」
「無啥物thang好感謝。」
「你tsit-ê阿陣ah，你若koh án-ne講，to̍h會受責罰，像tsit隻野獸腸á肚hông the̍h出來！」
「Mài koh tsho̍p-tsho̍p念ā lah。已經beh到食暗頓ê時間，mài koh冤家，緊去thâi一隻雞來食kám好？」 瑞文制止阿笑囉嗦，催她去煮暗頓，阿笑就行出去。瑞文m̄是腹肚iau，伊是想beh單獨kah阿陣講話。
「你過來tsia，坐tiàm椅á頂好無？」瑞文án-ne講，m̄-koh，阿陣坐tī土腳豹ê屍體邊á無beh tín動，瑞文mā因為氣味bái無beh行óa去。
「阿陣，to̍h是照lín老母所講ê，我已經決定beh hō͘ 你來阮tau。表面上是講來做tsa-bó͘-kán-á，實際上是第二夫人lah。你kám無beh去？Ē-tàng過好日子，tòa kah tsit間kah-ná lah-sap豬tiâu無仝ê大厝，穿súi衫，食好料，看戲，mā ē-tàng看電影」
瑞文為tio̍h beh探阿陣ê真實心情，thiau故意用膨風ê講法beh來引誘她。M̄-koh，無論瑞文án怎pûn笛á，伊lóng無法度搖動阿陣ê心；她kah-ná m̄知teh想啥物，恬恬á kā目tsiu移向hit隻豹看。
「是án怎？你bē ài做夫人oh？」阿陣iáu是恬恬無講話。「Kám án-ne？你無ài去ho͘ⁿh？」
「M̄是講無ài去，m̄-koh，我想beh維持tsit-má ê現狀lah。」
「是o͘h，若án-ne to̍h mài勉強，就照你ê ǹg望好lah。 」瑞文橫直已經決心beh放棄tsit-ê女人，阿陣ê無意願，hō͘ 伊有得救ê感覺，心情就án-ne輕鬆起來。總是，她講無意願ê時，並無固執beh kah伊ko-ko纏；hiah at-sa-lih顯出她無意願ê態度，hō͘ 瑞文感覺有一點á遺憾；伊iáu是對她迷戀，m̄甘放。
「M̄-koh，你bat講過，射死hit隻豹，願望達成就無beh koh殺生，我ǹg望tsit點你做會到。」
「Ngh，我mā有án-ne ê phah算，m̄-koh tsit-má有改變à。Tsit隻豹真可愛，射死牠tsìn前，牠咬死阮老父，實在真可惡。M̄-koh，tsit-má願望達成ā，suah感覺真奇怪ê失望；m̄-nā無koh怨恨，顛倒感覺牠真可憐、真可愛，這是真奇妙ê心情。」
阿陣摸hit隻勇壯美麗倒tī土腳ê豹ê腹肚邊，kah-ná teh摸天鵝絨一般。將近二米koân ê高砂豹，美麗茶色ê皮頂面有烏斑紋，有一個jia̍h tú好hō͘ tùi門口照入來ê夕陽光線照tio̍h，kah-ná金絲teh閃sih。瑞文ê心也忽然hō͘ tsit-ê難得ê光景打動，注目teh看。阿陣ê手指摸tio̍h豹身有歡喜ê感覺，kah-ná tsit隻野獸iáu活leh，有體溫，有脈動，傳來到手掌有深深ê親和感，甚至有情慾感，真是不可思議ê情景。 瑞文tsit時tsiah忽然清楚覺醒，家己kah tsit-ê tsa-bó͘ gín-á，無論經過gōa tsē歲月，無論是tī啥物情形下，結局兩人iáu是各別無仝ê人。
「原來如此，我mā ē-tàng了解你ê心情。阿陣，你生落來to̍h適合生活tī tsit-ê庄腳所在，若去到都市，我mā m̄知你kám ē-tàng適應無？雖然我kah lín老母有做決定，m̄-koh，咱來kā它取消。以後我可能bē koh常常來tsia，因為土地ê問題hō͘ 我感覺真厭煩。」
「M̄-koh，我kah你仝款，我tī tsit塊土地mā tòa bē落去。」
「是我m̄好，你為tio̍h我suah去hō͘ 村民大家怨恨。」
「無要緊lah，mài勉強來交往就bē有困擾，人lóng是án-ne無定tio̍h。Tsit隻野獸ê牙真恐怖，m̄-koh，人類，kám m̄是koh khah恐怖？人類對人類mā是會露出beh食人ê牙，kám m̄是？Án-ne講起來，你iáu無想beh tńg去。你ing暗siōng好mài tòa tsia。」
「你真現實，hiah-ni̍h急beh kah豹睏o͘h？」
「M̄是teh講sńg笑，tsiâⁿ實今á日tńg去有khah好。」
「有啥物理由？」
「M̄知啥物原因，我有tsit種感覺；我預感kah-ná會發生對你不利ê tāi-tsì。」
瑞文感覺她ê話真奇怪，kah日時拒絕農民要求ê時，張忠所警告ê話仝款。尤其是阿陣無講明確ê理由，kan-taⁿ是出tī她一種不吉ê預感。 瑞文已經感覺不安，想講beh趕緊tńg去，m̄-koh，koh想起kah tsit-ê女子ê關係to̍h beh結束à，所以koh引起寂寞愛惜ê想法。伊一再拖延時間，食了暗頓，日頭落山loh。 瑞文phah算ing暗beh tòa落來ê時，忽然聽tio̍h遠遠傳來吵雜ê聲。
「是啥物tāi-tsì？」 瑞文反射性 khiā起來。
「果然m̄是好tāi-tsì。」阿陣mā kah-ná動物察覺有危險，身軀隨時防衛性tēng起來，peh金目tsiu khiā起來。
「大概是村民開始相phah，lín兩人ná會hiah緊張，坐落來koh lim一杯！」
Kan-taⁿ阿笑無teh緊張，笑兩個少年人hiah倉pōng。M̄-koh，吵雜聲漸漸接近tsit間厝，過無gōa久就到門腳口來。阿陣kā門閂起來，koh kā燈火pûn hua。
「我tio̍h設法hō͘ tsit-ê人逃走，阿母，tsia to̍h拜託你。」阿陣án-ne趕緊講suah，就出力掠tiâu瑞文ê手，tùi後門逃走，tsông出去外面ê烏暗中。Tsit時，背後傳來前門hō͘ 棍棒粗魯kòng破ê聲，同時koh有 「有thâi死hit-ê少年好額人！」ê叫罵聲。另外一方面koh傳來「有話好好á講，mài暴亂lah！」ê極力勸解暴徒mài受氣ê聲。 阿陣kah瑞文兩人tùi後門逃走出來，穿過三、四戶人家ê後埕，走到大通路。然後tùi大通路向草欉下面ê斷崖溜落去。兩人逃命tī斷崖下面teh phīⁿ-phēⁿ喘ê時，聽tio̍h一隊暴民tùi in後面jiok來ê聲。 然後兩人koh繼續一直逃走，連地理真熟ê阿陣mā因為烏暗暝koh火急，應該án怎逃走，suah完全sa無方向。
伊kan-taⁿ知影確定tio̍h逃向kah追手倒péng ê方向。
過無gōa久，in真意外來到一個部落。阿陣認bat tsit-ê部落，就用tsia做基準，大概知影方向，也明白hia ê地形kah路草。
因為天tsiah tú-á暗，如果ē-tàng利用比人腳khah緊ê交通工具，可能hit暗to̍h ē-tàng到台南，所以阿陣就隨便借用縛tī一個人家厝ê黃牛。 過無一時á，載兩人ê牛行到高台地腳步放慢，阿陣忽然回頭過去看ê時， 「Ah！」一聲就tùi牛頂跳落來。然後，kah-ná身邊有一個tio̍h抵抗ê對手tī-.leh，她頓足搥胸，手舞腳tiô，尖聲huah-hiu。
「Tsing-seⁿ！In下手à。」瑞文mā隨時落來，ǹg hit-ê方向看過去；tú-tsiah拚命逃走過來ê烏暗起伏ê山崙á khah遠hit pêng，空中升起紅紅ê火光。
「害ah，老母m̄知án怎？」
瑞文忽然擔心阿陣ê老母 ê安全，m̄-koh，阿陣ê心內kah-ná有比老母ê安全koh khah致意ê tāi-tsì，對瑞文ê擔心無應半句，kan-taⁿ注目看hō͘ 火焰染成淺柑á色ê天空hit pêng。她粗暴ê動作隨時消失去，kah-ná看破oh得抵抗ê tāi-tsì，ná親像無風ê旗á靜靜khiā tī hia。過一時á，她又koh恬恬騎起lih牛頂，她已經連趕牛ê氣力都無去à。
「Lóng燒了了，變成火hu去à，鹿角、鹿皮、美麗ê雉雞，iáu有hit隻豹lóng」
阿陣用暗淡哀傷ê聲án-ne講。
然後隨時koh用bē-sái bē記得ê口氣加添講：
「而且真可惜，kám m̄是？你買hō͘ 我hiah-ê súi衫kah裝飾品」 Tsiah-ê加添ê話m̄是kan-taⁿ顧慮瑞文tsiah來講ê應酬話，因為她已經無厝thang tòa，mā失去thang tńg去ê故鄉；她有覺悟beh進入需要hiah-ê物件ê另外一種生活。銀河tī天頂teh流，牛發出單調ê腳蹄聲，ǹg獵戶三星ê方向，也就是陳家所在ê方向行去。
無論是成做tsa-bó͘-kán-á á是瑞文ê細姨，總講一句，to̍h是阿陣beh成做陳家ê人lah。阿陣本身kah瑞文早to̍h默認，這是一種命運ê安排。
